DUAN LAWK AVANGA HRINGNUN CHANVO

Kan chunga thil thleng, a awmzia kan hriatthiam lohte hi, “Chan tawka khua rel,” tiin, pawm thiam mai kan tum ṭhin a. Ṭhenkhat erawh chuan, kan sawi leh thlan phak loh thil tam tak kan chunga thlengte ngaihtuahin, vanduai bik niin kan inhria a; ‘Khuanu’ hian a rorel danah hleih a nei niin kan hre ṭhin. Kan nunah hian thil lo thleng tur, kan hringnun chanvo (destiny) hi awmin, a reltu pawh a awm a; amaherawhchu, a rel emaw, a duan (design) lawk dan erawh kan hriatthiam phak lovah kan ngai niin a lang.

Sam 139-ah chuan Lal Davida’n ‘hlauhawm tak leh mak (ṭha danglam bik) taka siam’ a nih avanga Pathian hnena lawmthu a sawina kan hmu a. “Kutke ka neih hma pawhin mi hmu vek a, Ka dam chhung ni turte a inṭan hma daihin, I lehkhabu-ah chuan ziak vek a ni,” tiin, Pathianin a dam chhung ni a hman dan turte chu ruahmanna neiin, a lo duang lawk vek tawh tih a puang chhuak a ni.

Jeremia hnenah khan Pathianin, “Pum chhunga ka siam hma chein ka hria che a, Chhul ata i chhuah hma pawhin ka serh hrang che a, Hnamte hnena zawlneiah ka ruat tawh a che,” (Jeremia 1:5) tiin a chanvo tura a duan lawk a hriattir a. Zawlnei Jeremia leh Lal Davida te chauh ni lovin, mi zawng zawng, leilung pian hmaa Kristaa a lo thlan tawh, ama fa ni tura a ruat lawkte (Ephesi 1) hi, hringnuna kan chanvo tur Pathianin a lo duang lawk vek a ni.

Hemi behchhan hian ṭhenkhat chuan, “Kan thih leh dam chu Pathian thu thu,” tiin, sawi leh tih ve theih engmah nei lo angin an inngai a. An duh duh danin an nung a; an chunga thleng engkim, a chhia a ṭhaah Pathian an mawhpuh zo vek ṭhin. Amaherawhchu, Pathianin mihringte hi duh thlan theihna min pe a; a duan lawk ang emaw, keimahni duh dan angin kan nung thei a ni. Duhthlanna kan hman dik loh hlauh chuan, kan chanvo luah zo lovin nun kan hmang liam thei a. Mi tam takin, duan lawk hringnun chanvo an nei tih inhre lovin, mual an liam tawh a; chuvangin, thlanmual hi hmun hausa ber, thiamna leh theihna hman chhuah loh tam tak phum bova a awmna hmun an lo ti hial ṭhin a ni.

Vawi khat dam manah kan nun hian awmzia nei se kan ti ṭheuh a, eng nge kan dam chhan kan inzawt fo ṭhin. Lei leh van leh a chhunga thil awm zawng zawngte hi Pathianin chhan nei ṭheuhvin a siam a (Thuf 16:4). Mihringte pawh hi chhan neiin min siam a, kan nunah thil tum a nei ṭheuh a. Chumi hriat leh hlen chhuah chu kan dam chhan ber a ni. Mahnia insiam thei lo, siamtu nei kan nih avangin kan dam chhan hi min Siamtu hnen aṭang lo chuan kan hre thei ngai dawn lo va. Chuvangin, Pathian kan rawn a, duan lawk kan nih dan kan inchhut hi a pawimawh em em dawn a ni.

Mi tam tak chuan, duan lawk an nih dan hriat hi dam chhunga an eizawnna tur kawng hriatna hmanrua emaw an ti ṭhin a. Amaherawhchu, chutiang a ni lo va, Pathian min kohna leh dahna hmun hriat theihna tur zawk a ni. Miin a eizawnna tur duh a thlang thei a, thiamna leh theihna ngai angte a neih hnuin a thawk ṭan a, tawpsan a ṭul hunte pawh a lo awm ṭhin. Pathian kohna erawh chu thlan theih a ni lo va, thiamna leh theihna vang ni lovin a dawna dawn a ni a. Pian hmain a inṭan a; a thilthlawnpekah leh a kohnaah chuan Pathianin a rilru a lamlet ngai loh (Rom 11:29) avangin tawp ni a nei ve lo a ni.

Pathian min kohna, kan hringnun chanvo hriat chhuah hi thil awl ai lo tak, mi bikte chauhin an hriat theih emaw a tih theih rum rum a. Jeremia ang khan chiang takin Pathianin min rawn hriattir ve mai se tih chang kan nei ṭheuh awm e. A nihna takah chuan, keinin hriat kan duh aia nasain Pathianin kan hriat a duh zawk a. Keimahni lama ṭan lak vak avanga hriat theih chi a ni lo va, a ‘chabi’ pawimawh tak chu duan lawk (DESIGN) kan nih dan hriat hi a ni.

Suangtuahna duhthusam (Dreams) – Kan Pathian hian suangtuahna duhthusam ropui tak a nei a; chu chu mi zawng zawngin thutak an hriat leh chhandama an awm hi a ni. Ama anpuia siam keini pawh hian suangtuahna duhthusam tam tak kan nei ṭhin. Naupan lai emaw, puitlin hnuah pawh, thil duh leh chak, nih leh tih tum kan neihte zingah eng nge kan thinlunga cham reng a, min tiphur a, a tak ram chang thei se kan tih ngawih ngawih? Eng ber nge Pathian suangtuahna duhthusam nen inmil? Pathian rawn chunga heng zawhnate inzawh hian Pathian min siam chhan hriatna kawngah min pui thei a ni.

Tawnhriat (Experience) – Kan khualzinna kawngah hian Pathianin tlangah leh ruamah te min hruai a; thil ṭha leh ṭha lo, kan thlan leh thlan loh tam tak kan tawng ṭhin. Kan thil tawn ṭhenkhat chuan kan nun a chawi kang a, a ṭhenin a pawt hniam a; mahse, a zavaiin tun dinhmun thleng tur hian min pui a. Heng kan chunga thil thleng leh kan tawn zawng zawngte hi Pathianin kan ṭhatna turin min thawhsak ṭhin avangin kan nuna a thil tum hi hengte piah lam daih hi anih a rinawm loh a ni. Kan tawnhriatte hian Pathian min hriat chiantir a, chu chu mi dangte hnenah kan hrilh chhawng ve leh ṭhin a ni.

Pianpui zia (Soul print) – Mi tin mai hi hlauhawm leh mak taka, ṭha danglam bik taka siam vek kan ni a. Kan kut zia leh mitmu zia a inang lo ṭheuh ang bawkin kan pianpui zia pawh hi a hranpa ṭheuha duan a ni a. Keimahni zia kan inhriat chian poh leh kan chakna leh panna lai kan hre chiang thei dawn a ni. Tin, Pathian thil tum tihlawhtling tura mi dangte nen kan thawhhonaah an pianpui zia kan hriat a, kan ngaihhlut thiam a pawimawh em em a ni.

Mi zinga awm nge nuam ka tih mahnia awm? Thutlukna ka siamin ka thinlung nge ka rilruin min hruai ṭhin? Thil tih dawnin ruahmanna siam lawk nge ka duh a ṭul ang zela awm? Mahni pianpui zia inhriat hian Pathian min kohna hriatna kawngah min pui thei a ni.

Nihna (Identity) – “Tu nge ka nih?” tih hi, engtik lai emaw chuan kan inzawt ṭheuh tawhin a rinawm. Kan eizawnna, chhungkaw inlaichinna, sakhua, khawtlanga dinhmun, pian hmang, thil neih leh thil tihtheih te hi kan nihna sawifiah nan kan hmang ṭhin a. Amaherawhchu, keimahni kan inhriat dan leh mi dangten min hriat dan tam tak a awm thei a, a inthlak fo ṭhin a ni.

Ringtu kan lo nih hian, Isua Krista avangin thilsiam thar niin, nihna thar tam tak kan nei a. Keimahni hringnun chanvo ṭheuh luah tur chuan, a tak takah, “Tu nge ka nih?” tih hi kan inhriat a pawimawh em em a ni. Isua nihna chu ‘Krista (Hriakthih), Pathian nung Fapa’ a ni a, Simona nihna chu ‘Petera (Lung)’ a ni. Kan nihna tak tak hre tur chuan, Lal Isua hnenah, “A nih leh, nangin tu nge i ni min tih?” tia kan zawh a ngai a ni.

Thilpekte (Gifts) – Thilpekte kan tih hian Thlarau Thianghlim hnathawh lantirna, thlarau thilpekte leh talent, pianpui leh zir chawp thiamna leh theihnate a huam vek a. Thilpekte hi chi hrang hrang a awm a, mi dang fuih theihna te, thilmak tihtheihna te, mi dangte thuam chak theihna te, mi dangte khawngaih theihna te, rorel thiamna te, thilpek pek theihna te leh a dang te. Thilpek kan dawnte hi keimahni tan chauh a ni lo va, mi dangte nena kan intihchak tawnna, inmamawh tawn kan nihzia tichiangtu a ni. Eng ang thilpek nge kan dawn tih kan hriat a, Pathian hnena kan hlan chuan, kan ngaihtuah phak bakin Pathianin a thil tum tihhlawhtlin nan a hmang thei a ni.

Inkungkaihna (Network) – Kan Pathian hi Pathian pakhata mi nung pathum, inkungkaih tlata awm a nih avangin a anpuia siam mihringte pawh hi inkungkaihna nei turin min siam a. Kan dam chhan leh Pathian min duan dan pawh hi mi dangte nena kan inlaichhinna aṭang chauha hriat chian theih a ni.

Tute nen nge inlaichinna kan neih a, kan nun kawngah, a thil tum kan hlen chhuah theih nan, Pathianin tute nge a rawn tirh tih kan ngaihven ṭhin a pawimawh. Tin, inkungkaihna kan neihte hian Pathianin min kohna hmun (chhungkua, kohhran, sawrkar, sumdawnna, damlo enkawlna, zirna, inbiak pawhna, themthiamna leh intihhlimna etc.) hre turin min pui thei a ni.

Ringtute hi Pathian ropuina puang chhuak a, Chanchin Ṭha hril tur kan ni a. Thilsiam dangte ang bawkin, duan lawk kan nih ang taka kan awm hian Pathian a ropui a; duan lawk an nih dan mi dangte kan hriattir hian Krista aiawha palai rinawm kan lo ni mai dawn a ni. Keimahni avanga mi dangte felnaa an hawi kir a, Pathian nen inlaichinna an lo neih hian, Pathian suangtuahna duhthusam, a lalramah punna a lo thleng ṭhin a ni.

- Juliet C. K. Lian