DUH THLAN THEIHNA

Ni tin kan thawh hlim aṭangin kan mut thlengin duh kan thlang ṭhin a. Zing thawh hun tur te, thawmhnaw hak tur te, ei leh in tur te, hnathawh tur te, ṭhian kawm tur leh a dangte, kan duhthlanna hmangin thutlukna kan siam ṭhin. Pathianin mihringte min siam khan duh thlan theihna zalen min pe a, “Huana thing tinreng rahte hi i duh duh i ei thei e, a chhia leh a ṭha hriatna thing rah erawh hi chu i ei tur a ni lo ...,” tiin (Gen.2:16b-17). Duh thlan theihna hlutzia leh pawimawhzia hi kan chhut ngai em?

Duhthlanna zalen neia siam kan nih hian, Pathian nihna - a ropuizia leh thilphalzia te, mihringte min hmangaihzia leh min siam chungnunzia a tilang a. Duh ni se, khawl angin, a duh tipuitling turin, ‘pre-programmed’ in min siam thei a. Mahse, chutiang ni lovin, zalen taka mahnia thutlukna siam theia min duang hian a hmangaihna makzia a tilang a ni. Hmangaihna dik tak chuan tu mah a tilui lo va, zalenna a pe ṭhin. Duhthlanna thiang tak hmanga thutlukna siam theia kan awm hi chanvo hlu tak a ni a. Kan duhthlanna hian, keimahni chauh ni lovin mi dangte pawh a nghawng ṭhin a; malsawmna emaw, harsatna leh chhiatna emaw, a thlen thei tih kan hriat a pawimawh hle.

Pathian rawngbawltu, Steve leh Anne Chapman te nupa hi zai thiam, America rama nupa inṭhen tam lutuk vei em emtu an ni a. Nupaa telna tura buatsaih inkhawmnaa an zai hmain, Anne chuan nupa inṭhen chungchangah ti hian a sawi a, “Chhungkuaa kan insiam tawh chuan kan kovah mawhphurhna nasa tak a innghat tawh a … duhthlanna hmanga kan nupa chungchanga thutlukna kan siam hian nghawng nasa tak a nei a. A nihna takah chuan, chhuan lo kal zel tur thlengin a nghawng a ni.” Duhthlanna kan neih hmanga thutlukna kan siam hian keimahni chauh ni lo, kan chhungkua, khawtlang, ram leh chhuan lo la awm turte thlengin, a ṭha zawng emaw, a chhe zawngin nghawng a neih avangin fimkhur a ngai hle a ni.

Titanic Lawng – Titanic lawng kha a hun laia lawng ropui leh mawi, tuia pil thei lo tluka ngaih a ni a. Mahse, vanduaithlak takin, April ni 15, 1912, zing dar 2:20 khan vur tlang suin a pil a; a chhunga chuang mi 1513 in nunna hlu tak an chan a ni. He lawng chet sual chhan bera nia an sawi chu, Captain Edward Smith-a khan an kalna turah vur tlang lian tak a awm tih, vawi ruk chuang zet an hrilh kha a ngai pawimawh lo a ni. Lawng captain khan a duhthlanna hmangin thutlukna him lo a siam a; a mawhphurhna pawimawh ber, a lawnga chuangte himna, hlen chhuak zo lovin tam takin nunna an chan phah ta a ni.

Evi leh Adama – Pathianin Evi leh Adama te mamawh tur engkim Eden huanah a dah vek a. Chuti chung chuan Pathian thu aiin Setana (rul) thusawi an awih a, an duhthlanna zalen an hmang dik lo va, sualah an tlu a. Eden huan aṭanga hnawh chhuah an ni a, Pathian nen an inlaichinna a lo chat a. An thlahte zawng zawng chu mi sual, chhandam ngai kan lo ni ta a ni. Mi pakhat duhthlanna hman sual nghawng hi a va na em!

Lal Isua nge Barabba? - Kum 2000 liam taah khan, Pilata chuan Juda-te hnenah duh thlan tur a pe a. “Tu nge chhuahsak che u ila in duh? Barabba nge Isua, Krista an tiha chu?” a ti a. Barabba an thlang zawk a, “A thisen chu keimahni chungah leh kan fate chungah awm rawh se,” an tih ang ngeiin an duhthlanna chuan chhuan tam tak a nghawng a ni.

Duh thlan tur pek kan ni - Kan hmaah hian duh thlan tur pawimawh tak kan nei ṭheuh a. Pathianin, Deuteronomy 30:19-ah chuan, “In hmaah nunna leh thihna, malsawmna leh anchhia ka dah … chutichuan nunna chu thlang rawh u, in nun theih nan, nangni leh in thlahte nen,” a ti a. Eng zawk nge kan thlan dawn?

Thutlukna dik siam - Billy Graham chu tleirawl kum 16 mi a nihin a piangthar a, a thih thlenga Pathian rawngbawltu rinawm leh ngaihsanawm em em a ni. Billy Graham Associates chuan thla tin, ‘Decision’ tih magazine an chhuah ṭhin a, kei pawhin ka tleirawl laiin ka chhiar ve ṭhin a. An magazine hming hi ka thinlungah a cham reng ṭhin a, an phuah chhan awmte ka ngaihtuah ṭhin a ni. Tun hnuah hian a pawimawhzia ka zir chhuak ve niin ka hria a. Ni tin thutlukna (decision) siamin nun leh hun kan hmang reng a, keimahni mai chuan thutlukna dik siam theih loh chang kan nei fo ṭhin. Thutlukna dik siam tura min puitu, ṭanpuitu, Thlarau Thianghlim kan mamawh a ni (Thuf.3:5-7; Joh 16:3).

Chhungkaw tana duhthlanna - Josua chuan an chhungkaw tan chiang takin duh a thlang a, “Kei leh ka chhungte erawh hi zawngin LALPA rawng a ni kan bawl dawn ni,” tiin. Josua angin, chhungkaw pa berte hian, chhungkaw tan duhthlanna dik leh ṭha siam thei ṭheuh se a va duhawm dawn em!

Duh thlan theihna hman sual - Tunlai khawvela thil pawi em em chu, duhthlanna zalen hman dan kan thiam lo leh kan fate kan zirtir lo hi a ni. Pathian hmangaihna leh thil phalna hi, “Ka nun a nia, ka dikna chanvo a lawm,” (It’s my life, it’s my right) tiin, thil sual tih phalna (license) ang a, dik lo taka hmang an tam hle a; a pawi tak zet a ni. Pathianin a ‘hmangaihna ramri’ chhunga hman tur duhthlanna zalen min pek hi, ramri pelin kan hmang ṭhin a. Chu chuan sualah min hruai a, keimahni chhiatna leh mi dang tan pawh harsatna a thlen ṭhin a ni. Pathian leh nu leh pa te, zirtirtu te leh ram danin a phal loh thil, ‘ti suh’ an tihte, kan faten an duhthlanna hmanga an tihluih hian, a tuartu tur chu anmahni a ni tih hi an naupan lai aṭanga kan zirtir a ngai a ni. Ṭhian kawm leh nungchangah te, ei leh inah te, taimak leh rinawm thuah te, Pathian thu an pawisak danah te, an duhthlanna rah an la seng dawn tih chiang taka kan hrilh a pawimawh hle (1 Peter 2:16; Gal.5:13).

Duhthlanna hi chanvo hlu tak mawhphurhna keng tel a ni - Kan fate kan hmangaih a, an tana ṭha tur hriselna te, lehkha thiamna te, ei leh in te, in leh lo te, nupui/pasal ṭha te kan duhsak a, thil awm tak pawh a ni. Amaherawhchu, heng thilte aia pawimawh chu, Pathianin duh thlan theihna zalen a pek hi an hman thiam a, thutlukna dik an siam theih hi a ni. An duhthlanna zalen hi thil sual tih nan leh thlan nan an hman chuan, an tan chhiatna leh chatuan boralna a thlen dawn a ni.

Duhthlanna hi ‘chanvo’ a nih rualin mawhphurhna (responsibility & accountability) a keng tel tih, an naupan lai aṭanga kan fate zirtir a pawimawh hle. A chanvo lai chauh duh a, a mawhphurhna ken tel hre lo leh hlen chhuak lo kan tam avangin chhungkua leh ramin a tuar mek a ni. Pathianin mihringte min hmangaih em avanga duh thlan theihna zalen min pek hi, min pek chhan ang ngeia hmang ṭangkai a, a ken tel mawhphurhna hlen chhuak tura inzirtir hi a pawimawh hle. Hei hi nu leh paten kan zawm a, kan fate pawh kan zirtir/hlan chhawn a ngai a ni.

Pathian fa, sual ngaihdamna chhangtu, mi piangthar, vanram kal inbeisei te hian, kan nihna leh chanvoin a ken tel thupek, ‘Pathian ṭih leh a thupekte zawm’ mawhphurhna hi kan hlen chhuah tel a ṭul. Nu leh pate zarah, in leh lo ṭha takah thlamuang takin kan fate an awm a, ei leh in tui leh thawmhnaw ṭha an nei a; fa an nih avangin hengte hi an chanvo (right) a ni ngei mai. Amaherawhchu, fa an nih avangin nu leh pate thuawih leh chawimawi te, in chhung khura ṭangkai te hi an chanvoin a phut tel, an mawhphurhna, Pathian thupek a ni tih an hriat tel a ṭul. Puitlingte pawh hian, nu leh pa la nei kan nih chuan, kan fate tana entawn tur kan hnutchhiah theih nan, kan nu leh pate laka kan mawhphurhna hi kan hlen chhuah a ngai a ni.

Duhthlanna pawimawh ber - Kan nuna duhthlanna pawimawh ber leh thutlukna ropui ber chu Lal Isua, Lal leh Chhandamtua kan thlan a, a hnung kan zui hi a ni. Chu chuan he khawvela kan awm chhung bakah kan chatuan nun thleng a nghawng a ni. Kan fate hian, an naupan lai, thu an awih a, zirtir leh kaihhruai an awlsam ber lai, kum 4 – 14 inkar an nih lai ngeia duhthlanna leh thutlukna pawimawh ber hi an siam theih nan theihtawp kan chhuah a ngai a ni. Kan duhthlanna leh thutlukna siam dan a zirin, Pathian malsawmna emaw, anchhia emaw, kan chungah a thleng dawn a ni tih kan hriat a, kan zirtir a pawimawh. Duhthlanna zalen hmanga Pathian hmangaihna kan chhan let hi mihringin Pathian tana kan tih theih ropui ber a ni.

Lalpan Mizoram malsawm rawh se!

- Dr Lalmalsawmi Hmar