MENTORING

Kan professor senior pakhatin ‘Mentoring’ ṭha chungchanga a thusawi ka hriat reng chu, “Mentor ṭha chuan amah aia thiam leh ropui a chher chhuak thei tur a ni,” tih hi a ni a. Ṭum khat chu ka nu hian ka pi hnenah, fiamthu titak deuhin, “Ka nu, Mateii hian keimah mi tluk hunah chiah ka tluk ve ang che,” a ti a. Ka hnenah, “Nangmah aia fel leh lehkhathiam fa i chher chhuah hunah mi tluk chauh ang,” a ti bawk a. Hengte aṭanga ngaihtuahna lo piang hian mentoring awmzia min hriatthiam tirin, zir chian lehzual duhna ka rilruah a tuh a ni.

‘Mentoring’ chu hlawhtlinna nei thei tura mi pakhatin mi dang a kaihhruaina hi a ni. A kaihruaitu chu ‘Mentor’ a ni a, a kaihhruaia chu ‘Mentee’ a ni ve thung. Mentor chu a Mentee-te hlawhtlinna tura ṭul leh ngaite kawhhmuh thei tur mi thiam a ni ṭhin. A mawhphurhna hi kawng hnihin mi thiamten an sawifiah a, chungte chu –

1. Hlawhtling thei tura kaihhruai (guidance) leh

2. Entawn tlak (role model) ni chunga chhawmdawltu nih (support system) te a ni.

Mentoring hlutna hi Private Company lian tak takte hian hriain, a takin an hmang nasa em em tawh a. Mentoring system hlawhtling tak a awm hian, hnathawk tharte leh la naupang zawkten hma an sawn phah bakah, an kaisan hnuah hnathawh dan hmang an thiam phahin, an thawh hlawk phah hle ṭhin tih zir chianna tam takah hmuh tur a awm. Zirna in hrang hrangah pawh mentoring hian ngaih pawimawh a hlawh ṭan tawh hle a. Mizoram chhung ngeiah pawh, college hrang hranga zirtirtute hian mentoring hna thawkin, an hnuaia zirten an zirlai leh kawng danga harsatna an tawh sutkianpui tura hriatpuitu leh puitu an ni tel mek. Mentoring system hi hmalakna ṭha tak niin, tihchangtlun zel a nih chuan zirlaite pawhin hma an sawn phah ngei a rinawm.

Mizote hian a hnam anga mentoring system ṭha tak kan neih ṭhin chu ‘Zawlbuk system’ kha a ni. Khawtlang inrelbawlna leh ven himna mumal taka a awm theihna turin, Zawlbuk khan ‘Institution’ ṭha tak, duhthusama duan ang maiin, inzirtirna (training) hna a thawk ṭhin a nih kha.

Mizoram hian hmingṭhatnate nei ve bawk mah ila, Kristian ram nena inhmeh lo, hmingchhiatna, zahthlak tak tak kan nei a. Ruihtheih thil leh a kaihhnawih natna ṭha lo hluar lutuk te, chhungkaw kehdarh tam lutuk te, nupa inṭhenna sang chak lutuk te, eirukna leh buh leh bala intodelh lohna nasa lutuk te hian inkaihruaina ṭha, mentoring system kan mamawhzia chiang takin a lantir a ni.

Mizote hi a tam ber chu Kristian kan ni a. Kristianna hnuaiah hian mentoring system hi a hranpaa din ngai loin, chhuan awm mekte hi Kristian mentor chu kan ni nghal vek mai. Kan mawhphurhna chu chhuan thar, kan mentee-te hmasawntir leh hlawhtling tura kawng kawhhmuh/ sialsak leh kaihhruai hi a ni. Chu mai bakah, an tana entawn tlak (Role Model) nih leh, an rilru leh thlarau kaihhruai kawnga chhawmdawl hna thawh hi a pawimawh hle bawk.

Chhuan tharte hi thu ṭha tak tak hrilhin fuih ṭhin mah ila, entawn tlaka kan awm leh si loh chuan, kan thusawiten awmzia a nei thui thei dawn lo a. Thua kan sawi chhuah ai mahin a taka kan nunphung leh khawsak dan hian chhuan tharte tan awmzia a nei thuk zawk fo. Hlawhtlinna kawng an zawh theihna atana pawimawh, an mamawh (resource) chhawpsak kawngah chuan hma kan sawn chho hle a, a lawmawm tak zet a. Amaherawhchu, tun hunah chuan, tisa mamawh thiamna leh finna inpek chauh hi a tawk zo tawh lo a. Hlawhtlinna tluantling leh tlo, ram leh hnam tan pawha chhawrnaawm ni thei tura an rilru leh thlarau mentor pah reng pawh a lo ṭul ta a ni.

Chhuan awm mekte hian, mentoring hna kan thawh famkim loh avanga hmasawnna tluantling lo rah kan tel ang tih a hlauhawm tak zet a. Chuvangin, Mizo Kristian chhuan thar ṭha takte lo din chhuah theihna tura sulsutu, role model entawn tlak leh Pathian duh dana an rilru leh thlarau kaihruaitu mentor ṭha kan ni em tih kan inzawh fo a ngai.

Mentor dinhmun a pawimawh ang bawk hian Mentee-te pawh hi an pawimawh tel hle. Chhuan thar la inzir mekte hian mawhphurhna an neih ve chu - mentor theih tura taksa, rilru leh thlarau lo inpuahchah ve hi a ni. Kaihruaitu leh kawhhmuhtu zawn hi thil zahthlak a ni lo a, tlawma lak chi pawh a ni hek lo. Entawn tur dik thliar thiam pawh mentee-te mawhphurhna a ni tel bawk. Zirtir theih tura rilru inhawng neih hi a Pathian thu hle a, Mizo Kristian mentee awm dan tur dik tak a ni.

Mentor leh Mentee te inkar inlaichinna hi kawng hrang hrangin a sawi theih awm e. Chungte chu –

Mentor dinhmun sang zawk (Superior Mentor) - Entirnan, zirtirtu leh zirlai inkar, nu/ pa leh fate inkar, ram hruaitu leh mipuite inkar, Pathian rawngbawltu leh Kohhran mipuite inkar, etc.

Mentor leh mentee dinhmun inang (Peer Mentee) - Entirnan, hna thawkho nihna inang tlangte inkar, zirlai leh zirlai inkar, unau leh unau inkar, ṭhian leh ṭhian inkar, etc.

Mentee aia mentor dinhmun sang lo zawk (Subordinate Mentor) - Entirnan, hna thawk tura chhawr leh a chhawrtu inkar, zirlai leh a zirtirtu inkar, fate leh an nu leh pate inkar, etc.

Heng inlaichhinna hrang hrangte hian a tarlan chu, tu pawh mai hi mentor a nih theih a; dinhmun sang taka din kher hi mentor nih theih dan awm chhun a ni chuang lo tih hi a ni. Zirtirtuin dinhmun sang zawk aṭangin a zirlaite mentoring hna a thawk thei a; a zirtirtupuite tan entawn tlaka nun a hman chuan an tan mentor ṭha tak a ni thei bawk. Tin, a zirlaite aṭang pawhin finna thar a chhar thei a, zirlaite chu a tan mentor an ni let ve thei tihna a ni. Ka Professor ngaihsan deuh pakhat chuan, “Hetia ka zirtir che u hian in zirtirtu ka nih bakah in zirlai ka ni tel bawk a, a nuam ka ti ṭhin,” a ti. Mentoring system hriselah chuan mentor pawh mentee a nih chang a awm a, mentee pawh mentor a nih ve chang a awm bawk ang.

Mentor leh mentee inlaichinna hriselah chuan mentor-in a mentee-te ropuina a lawmpui ṭhin a. Amah aia dinhmun chungnung zawk a thleng a nih pawhin, ama hlawhtlinnaah a ngai ṭhin a ni. Inlaichinna hrisel loah erawh chuan, mentor-in a hnuaia zir reng tura ngaihna a awm thei a, mahni aia ropui mentee neih harsat tlatte pawh thil awm thei a ni bawk.

Kan ram siam ṭha tur hian tun aia dinhmun ṭha leh ropuia inhlankai hi kan tum ber tur chu a ni a. Chhuan thar ṭha leh thiam zawk kan chher chhuah a ṭul tak zet a ni. Lal Saula thlak tura Davida hriak thih a nih khan, Saula khan a lalṭhutthleng ken harsa a ti em em a; a dinhmun luah tur khan a kian ngam lo a ni ber. Lal Isua erawh chuan a zirtir sawm leh pahnihte ṭha takin a mentor a. He khawvela a hnathawh chhunzawm tur leh, khawvel pum huap a, zau zawka Chanchin Ṭha puang darh turin a ring tawk a; a hlawhtling reng bawk. A zirtirte thawh ṭhat avangin Lal Isua ropuina a nep phah lo a, a ropui zual zel zawk a ni.

Matthaia 7:17-20-ah chuan, “Thing ṭha chu a rah ṭha ṭhin a, thing chhia chu a rah chhe ṭhin. Thing ṭha a rah chhe thei lo va, thing chhia lah a rah ṭha thei hek lo. Thing tin rah ṭhaa rah lo apiang chu an kit a, meiah an tuah ṭhin. Tichuan, anni chu an rahah in hre mai ang,” tih ziak kan hmu a. Mizote hi Kristian, Pathianin a hriat nia inhria kan ni a. He kan inhriatna leh Kristianna avanga malsawmna kan dawnte hian rah a chhuah zui lo a nih chuan, kan ram hi kihin a awm ang a, meia tuah tur tawk chauha hlutna nei kan ni ang tih a hlauhawm. Mizo kan ni satliah mai lo a, Mizo Krista zuitu kan nih angin kan rahah miin min hre tur a ni dawn lawm ni?

NexGen Organization-te hian, “Kan ram leh hnam siam ṭha tura Pathian ṭih chhuan thar din,” tih hi hmathlir bera neiin, thuziak, rawngbawla fehchhuah leh seminar kan buatsaih te hmangin Pathian rawngbawlna kan kalpui ṭhin a. He hmathlir hian a tum ber chu chhuan thar (next generation) leh chhuan lo la awm turte Pathian ṭih tura mentoring hna thawh hi a ni. Pathian ṭih chhuan thar din hna hi, mentoring hna pawimawh tak, kan ram leh hnam siam ṭhatna tur a nih avangin Mizo mipuite thawhpuiah kan sawm duh che u a. He hna hi mahni zawn ṭheuhah, mi mal, chhungkua, khawtlang leh kohhranah, ṭhahnemngai taka thawk turin kan ngen tak meuh meuh che u a ni.

- Dr. Grace Lalkhawngaihi