THINLUNG LUAHTU (PASSION)

“Eng nge i tui zawng emaw, vei zawng?” tih zawhna hi in zawt ta ṭheuh ila, engtin nge kan chhan ang le? Mi ṭhenkhat chuan sawi tur kan ngah mai thei a, a tam zawk erawh chuan tui zawng leh vei zawng sawi mai tur kan nei lo mai thei. Kan thil tuipui leh nuam kan tih em em, kan sawi pawha kan hmela lang khawpa min tihlim thei, hlawh awm mang lo pawh nise kan thawh duh tur hi kan 'Passion' a ni kan ti thei awm e. Kan 'Passion' chu kan 'thinlai luahtu', kan duh ngawih ngawih leh ngaihzawn, kan chak leh vei tlatte a ni thei bawk ang.

Mi tam ber chuan naupangte hi, “I len hunah eng nge nih i tum?” tih kan zawt ṭhin a, zawhna pawimawh tak pawh a ni awm e. A chhannaah chuan an len huna an hnathawh duhthusam an sawi fo ṭhin. Mahse, naupangte leh ṭhalaite hi, “Eng nge i thinlung luahtu?”, “Eng nge i vei zawng leh tih chak?” tih kan zawt ngai em le? Hetiang zawhna dawng lo naupang leh ṭhalai engzat nge awm ang a, an thinlunga Pathian dah hai chhuahsaktu nei lo eng zat tak awm ang maw?

Pathianin mi tin mai, mak leh danglam taka min siam dan hi, kan chawr chhuahna boruak leh tawnhriat (environment leh experience) ten rawn hai lang tho mahse, naupan lai aṭanga kan pianpui zia (innate qualities) -ah hian hmuh tur tam tak a awm ṭhin. Naupang kan enkawlnaah hian, nu leh pa leh zirtirtuten, anmahni chauh pawha hlutna nei, Pathianin ropui taka a siam enkawltu kan ni tih inhriain, an thinlung ro bawm haisak nachang hria ila. An sawi apiang thlawp vek tur tihna ni lo mahse, a dik leh ṭha chawm lian a, a ṭha lo kan siam ṭhat theih zawk nan hei hi a pawimawh em em a ni.

Zawhna zawh mai piah lamah, an nungchang leh che zia thlir chungin, an thinlung awn lam zir hmaih lo ila. Mihring thinlung hi hmelah a inpho lan fo avangin, eng an sawiin nge an hmelah phurna a lo lan a, engin nge an mitmeng tiharh sarh ṭhin tihte hi an tuipui zawng hriat theihna ṭangkai tak a ni.

Puitling tan pawh tawnhriat loh thilah ngaihdan neih a harsat avangin an la tawn ngai loh thilah duh, chak leh ngaihdan nei tura beisei ngawt hi a fuh ber lo va. Tawnhriat ṭha leh hriatna zau zawk an neih theihna tura kawng kan dappui pawh an ngai hle bawk. Chutiang a nih loh chuan, anmahni hre hauh lovin, internet hmangin, khawvelin duh tur, chak tur, ngaihsan tur a hrilh reng a ni tih hriat a pawimawh hle awm e.

Passion hi dam chhan (purpose) nen thil inhnaih tak, inchawm tawn a ni a. Kan dam chhan kan hriat loh chuan kan thinlunga phurna leh veina satliahin kawng bo takin min awmtir thei a. Kan dam chhan kan hriat erawh chuan, kan thinlunga nung vet vet awm, kan passion chuan, a tihhlawhtlinna kawng zawh turin min nawr kal thung a ni. Mihring dam chhan chu, “Pathian tana nun leh a rawngbawl,” a ni a. A bika siam kan nih anga kan mi mal tih tur hre tur erawh chuan, kan thinlunga thil ‘nung’ awm ṭhin hi, kan hai chhuah a, kan chettir a pawimawh hle.

Kum 2020-a Haggai International Leadership Seminar ka tel ve ṭum khan, min zirtirtu pakhat chuan, “In vei/tui zawng tiṭhang lian turin hma la rawh u," (Develop your passion) tiin min hrilh hlawm a. Kei chuan ka thinlunga zawhna awm fo ṭhin a nih avangin, “Kan passion chu engtin nge kan hriat ang a, engtin nge kan ṭhan lentir ang?” tiin ka zawt a. “Kan passion chu kan tui zawng leh chak zawng mai bakah, a hlimawm zawnga kan thinlung chawk tho fotu a nih loh vek leh, min tina ngawih ngawih a, zan mu thei lova min siamtu, kan ṭahpui leh sawi chhuah fo ṭhinte a ni thei bawk," a ti a.

Kan ṭhan lentir dan tur a sawi chu, “Kan thinlung luahtute kha, suangtuahna leh thua tham raltir mai lo vin, kan veina zawn tak kha kan luh chilh a, kan dai chhin a ngai a. A tak ram tem chhin pahin kan thinlung leh rilru awm dan te pawh kan finfiah zel ang a; tichuan, chawm lenin a lo awm dawn a ni,” a ti a. Pathian aṭanga chhuak passion chu a thi thei ngai lo a, hun rei tak hnuah pawh a lo lang leh ṭhin ang. Harsatna karah pawh chakna min petu, kan chhungril aṭanga min nawr kaltu a ni fo ang, titein an sawi bawk.

Hman deuh lawk khan, “Destiny by Design” (YWAM hnuaia inzirtirna pakhat) seminar leh training-ah ka tel ve a. Chu seminar-in a tum chu, mi mal anga Pathianin mak tak leh danglam taka min duan (design) dan hai chhuah a, a thiltum tihhlawhtlin nan engtia hmang chhuak tur nge kan nih tih hre tura zirhona a ni a. Pathianin min pek kan pianpui ziate hi, kan naupan laia kan thil lawm zawng leh khalh ṭhinah te a lo lang chhuak ṭhin a; chu chu hmuh hmaih leh hmuh kan a ni fo ṭhin niin an sawi a ni.

He kan thil zir aṭang hian, keimah bikah chuan, ka thil lawm leh tuipui te chu, ka infiampuite leh ka kawmte a zirin a inthlak a, ka tuipui chawp thei zel ṭhin tih ka hre chhuak a. Min tihlimtu ber chu, ‘eng thil emaw’, ni lovin ‘tute emaw’ a ni zawk tih hriatna ka chhar thar a. Chu chuan, tunlai khawvel buaina leh harsatna tam takah hian, ṭangkaina a nei ve nia hriatnate chuan phurna min siam thar hle a ni.

Mi dangte khalh kal, an duh dan anga nung mai ṭhin nia inhriatna, ka chak lohnaa ka ngaih ṭhin chu, ka chakna thuruk a lo ni ve thei reng mai a ni tih ngaihtuahna ka nei ta zawk a. Ka pianpui zia ka hriat chhuah chu ngaihhlut ka zir a, Pathian ram zauna leh mi dangte tana malsawmna ni turin hman ṭangkai dan ka zir ve mek zel a ni. Hetiang training ṭha tak tak, Pathian miten an buatsaihah hian kal nachang hriat hi a pawimawh takzet a, kan suangtuah phak bakin Pathianin a hmang ṭhin a ni.

Kan eizawnna leh kan hnathawh te hi, kan passion (tui zawng) tak a ni thei a; ṭulna avangin kan tui loh zawng tak hna kan thawk thei bawk. Mahni tui zawng tak eizawnna atana hmangte chuan, phur tak leh nuam ti taka an thawh ṭhin avangin, an hnaah danglamna, a ṭha zawngin an siam fo va. Kan tuina zawnah chuan hlawh nei lo/hlawh tlem zawk pawhin, hlim takin kan thawk thei ṭhin a ni.

Chumi rual chuan, a tira kan tui vak lohnate pawh hi, Pathian min dahna a nih chuan a tui chawp theih a, kan hriat leh thiam chian hnuah phei chuan kan tui zui em em thei bawk. Tui chilh tur khawpa hriatna leh thiamna nei turin, taimakna leh inpekna hi thil pawimawh tak a ni. Chuvangin, hma bak eng tak nei naupangte hian, an lo ṭhan len a, khawvel an hmachhawnnaah, mahni thinlung inchhut thiamna leh inhriatchianna an neih theih nan, tun aṭangin zawhna awmze nei kan zawh fo a pawimawh a. Anmahnia ṭhatna awm kan hmuh leh hriat te, an beng hriata kan sawi chhuah fo hian an nunah thuk takin chi a tuh thei a ni.

A tawp berah chuan, Lal Isua thinlung ang pu mi ni turin Amah hnaih ila. Chutiang bawkin, kan kuta awm kan tu leh fa, kan zirlai naupangte hi, an eizawnna leh hlawhtlinna tura buatsaih bakah, an thinlung enkawl tura mawhphurhna pek kan nih hre reng ila. Lal Isua thinlung, amah nawr kaltu, a chaw tui ber chu, “Pa Pathian duh zawng tih a ni,” tih Bible-ah kan hmu a (Johana 4:34). Thi khawp hiala thu zawma awmtirtu, Lal Isua nawrkaltu, a ‘Passion’ chu, Pa Pathian a hmangaihna leh mihringte min hmangaihna a ni. Lal Isua pawhin chu thinlung chu nei ve turin min duh a, kan zawm ngei tura thupek pawimawh ber leh a dawttu min pek chu, “Pathian hmangaih leh mihringpuite hmangaih,” a ni tih a sawi a ni (Matthaia 22:37-39).

Pathian leh mi dangte hmangaihna thinlung thianghlim tak kan neih chuan, kan thil vei, duh zawng leh chak zawng te chuan a dan a kalh ngai dawn lo va. Kan thinlung luahtu chu thil awm zen zen lo, mi tam tak ngaihdan leh ngaihhlut pawh a ni kher lo thei. Eng pawh ti ila, a lama rilru leh thinlung dik kan put phawt chuan, Ama awmpuina leh tihchakna changin, hlawhtlinna pawh a awm zel ang (1Chro 16:9). Kan thinlung luahtu berte in ngaihnepsak a, in up behsak lova Pathian ke bula inthlenpui zawk zel hi a finthlak a ni. Pathian duh dan a ni em tih finfiah chungin, meiling chu meialhah chantir thei tura mi dang tana kawng hawnsaktu nih hi thil hlu tak a ni. “Engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se,” tih ziak a nih ang khan. “Lalpa chungah chuan lawm bawk rawh. Tichuan, i thinlung duh zawngte chu a pe ang che” (Sam 37:4) tih a ni sia.

- Dr. Mary Lalengkimi