FATE THUTAKA AWM

Kum 2023 tawp lam khan naupang zinga rawngbawlna lama hmasawn zelna a nih beiseiin New Zealand-ah Kohhran tirhin training-in ka zu kal ve a. Covid hnua batch hmasa ber kan nih vangin hostel-ah awm lovin zirtirtute inah min thlentir hlawm a. Ka thlennate chu British nupa, an ṭhat lai zawng zawnga Pathian rawngbawl, naupang pastor leh missionary an ni a. Pension tawh mahse Pathian ram tan ṭhahnem an la ngai nupa khawp mai. Fa pathum, mipa pahnih leh hmeichhia pakhat neiin, nupui pasal an nei vek tawh a ni.

Thla nga dawn kan inchenchilh bawk a, kan inhre chiang hman ang reng viau a. Mak ka tih deuh chu, an fapate pahnih kha Pathian awm ring lo mi an ni ta daih mai kha a ni! Rinna kawnga inthlahdah deuh leh thatchhe deuh emaw, ngaihsak lo laklawh pawh ni lo, rawngbawltu chhungkuaa seilian ngei ten Pathian awm pawh an ring zo ta lo mai khan min barakhaih a ni ber mai.

Rinna kawnga an fapate an chan takah chuan, Pathian ngaihsak lo leh Pathian awm ring lo chhuan an lo awm zel loh nan an tupa aṭanga bul ṭan ṭhat leh an tum a. An faten an mamawh hun apianga nau awmsak turin an inpe a. An tute Pathian thutaka chawm seilen a, kaihhruai leh tumin kum 70 ralah theihtawp an chhuah leh mek a ni.

An chhungkaw chanchin aṭanga lang chiang deuh mai chu, nu leh pate hi, theihtawpa Pathian rawngbawl, thutakah awm ṭhin ni mah se, an fanauteah thutak an tuh si loh chuan an fate thutakah an awm lo thei tih hi a ni. An fate naupan lai, an thinlung hneh a awlsam laiin an ngaihthah a; Pathian ni lo khawvelin a lo hneh der mai a ni.

Pathian ngaihsak nu leh pate hian fanau kan enkawlnaah Pathian thutak kan hmaih chuan, naupang fel leh thuawih tak, pianthar awmzia hre chiang chiah si lo an lo pung zel dawn a ni. Pathian aia mahni finna leh thiamna ring, Pathian thu duha zawm duh si lo, mahni nuna sual huatna nei lo, mi nuna sual haw em em si te an lo ni ang tih a hlauhawm hle. Hengte hi chhungkua, khawtlang leh Kohhran tana mi hnawksak an lo ni thei a ni.

Kan Pathian thu hi chhandamna hmu khawpa mi tifing thei a nih bakah, nun kawng dik zawh theihna leh malsawmna tam tak dawn theihna a ni a. Pathian thutaka naupang kan enkawl seilen hian an mamawh dik tak kan pe tihna a ni. Pathian thu ngaina satliah lova Pathian duh dana nung ngam, Pathian thutaka seilian chhuan thar hi kan ramin a mamawh em em a ni.

Thutaka awm turin naupangten eng nge an mamawh?

1. Thiamna aiah Finna: Nu leh paten, “Lehkha i zir ṭhat loh chuan hlo i thlo vang,” an tih ṭhin tam tak kan awmin a rinawm. Education hi kawng engkima hlawhtlinna bul leh chhungkaw innghahna awm chhun nia ngai an awm fo. Hun a lo kal zel a, ‘zirna’ hi hlawhtlinna atana thil pawimawh tak ni mah se, a pawimawh ber erawh a ni lo tih kan hre chho mek zel a. Lehkha thiam leh hna sang tak thawkte pawh, “Ka fate thutakah an awm tih ka hriat aliama lawmna nasa zawk reng ka nei lo ve,” tih rilru pu an tam chho hle.

Zirna leh thiamna hi dahhniam theih a ni lo va, kan hma lam hun zel atan a pawimawh tak zet a. Khawvela hna zahawm leh ṭha ber berte hian khawsak nawmna chu a pe thei teh meuh mai; mahse, Pathian thutak erawh hi chuan zalenna leh thlamuanna a pe tel thung. Chuvangin, thiamna ngawr ngawr ni lovin, Lalpa aṭanga chhuak finna kan zawn tel thiam a ṭul hle. Lehkha thiam, hna sang thawk satliah ni lo, Davida anga virvawm phena Pathian chakna awm rin chhan thiam an nih a pawimawh em em a ni.

2. Pathian ṭihna: Kan ram hian thil ṭha tam tak titu aiin, dikna leh Pathian ṭihna avanga thil sual tiduh lotu a mamawh telh telh dawn. Hna ropui bera kan ngaih thawk a, thutaka awm lote ai chuan, hna hnuaihnung zawk thawk a, Pathian thutaka awm tlatte hi kan mamawh zawk niin a lang.

Kan fate nuna thutak tuh a, thutaka kaihhruai hun ṭha ber chu an naupan lai a ni. An thinlunga thutak tuh tur chuan Pathian thu kan hrilh bakah rinna hmanga an thinlung kan hneh a ngai a ni. Naupang enkawlnaah hian, sawisel leh siam ṭhat kan tum hmain inlaichinna ṭha kan siam hmasak a pawimawh. Pathian nena kan inkar kan chin fel a, chutah fate nen inzawmna ṭha kan neih hunah thutakah kan kaihruai thei dawn chauh a ni.

3. Hmuh leh hriat tur dik: Tleirawl pakhat hian a hmeichhiatpui aiin mipa kawm nuam a ti tlat mai a; a hmel duh zawng pawh a hmeichhiatpui anni deuh zel a. Hmeichhe incheina aiin a pa thei ang bera inchei a duh tlat zel avangin a nu mangang chuan kawm turin min ti a. Rin dan sa ka neih avangin a phone rawn keng tel turin ka chah a. Chu tleirawl nen chuan kan han ṭhu dun a, a reels en ṭhin chu ka han hmuh chuan hmeichhia, mipa lema chang, “Nia i inhriat dan kha i ni thei” tih inzirtirna a en uar hle tih ka hmu a ni.

Kan faten reels an en tam tak hi Pathian ngaihsak lohna leh sual lam kawnga hruaitu, Pathian thutak aia nun nuam leh awlsama nun zirtirna a tam hle. Tunlaia an games khelh lar tak ‘Roblox’ pawh hi ṭawngkam mawi lo tak tak zirtir nan an hman bakah, LGBTQ lam hawi an zeh tel tak fo vangin ram ṭhenkhat chuan an khuahkhirk mek a. Australia phei chuan naupang kum 16 hnuai lam tan social media hman a khap tawh hial a ni. An thil hmuh tam leh hriat tam hi an nun kaihruaitu a nih vangin, kan kutah a innghat thui hle.

Ṭum khat chu Mission Field-ah rawngbawlin ka kal a. Pathian ringlo ram tih takah thawktute pawhin ṭhahnem an ngai hle a. Hmun pakhata kan hun hman a hlawhtling hle mai a, naupang 15 chuangin ringtu baptisma an chang thar a, kan lawm hle mai a. Hmun dangah rawngbawlna chhunzawm turin ka han insawn leh nghal a. Chuta min lo dawngsawngtute chuan min chibai pahin, “In thawm kan lo hria a, kan beiseina a sang ve teh mai a nia,” an lo ti a. Chu ṭawngkam chuan min den dan a dang zar mai a, ṭhahnem ngaih a na ta hle mai a.

Hun kan han hmang chho va, Baptisma chantir ngei ngei tumna chuan min hneh hle a. Ka thusawi leh inbuatsaihna pawh Baptisma chantir ngei ngei tumna vang a ni chho ta vek mai a, ka hahpui hle a ni. Tuk khat chu pindana ka ṭawngṭai laiin Pathian aw ni ngeia ka hriat hian, “An nun thlak danglam theitu i ni lo,” min rawn ti hian ka hria a. Chuta ṭang chuan thusawi tur ka lo inbuatsaih lawkte chu ka thlak vek a, Pathian lawm zawnga rawng bawl turin ka inbuatsaih ta zawk a. Keima aw ni lovin Pathian aw zawk chu an nuna thu sawi turin ka ring thiam chho ta a. Kan rawngbawlna Pathianin mal a sawm a, kan beisei aia nasain ringlo mi naupangte nunah danglamna kan hmu a ni.

Kan fate nun thlak danglam tur hian, a titheitu Pathian chakna rin chhan thei turin, Pathian thutaka kan awm hmasak a ngai a ni. Fate lam kan hawi hmain, Pathian lam hawia ban kan phar hmasak a ngai. Sual a tam a, a hnai a, a awlsam em em bawk a; thu ṭhain a chhan seng tawh lo va, Pathian thutak lo chuan an nun a chhan zo tawh lo. Taksa, rilru leh thlarau lama an tana ṭha ber kan duhsak lai hian kan fate hi thutakah an awm em le?

Pathian hnathawh dan hi mihringten engtikah mah kan hrethiam ngai dawn lo va; amaherawhchu, chhan nei vekin hna a thawk ṭhin tih erawh kan hria a. Samsona chakzia pho lang turin sakeibaknei a pawh sawmtir a, Daniela rinna chakzia lantir tur erawh chuan Daniela tichak lovin sakeibaknei pukah him takin a awmtir thung a ni.

Genesis 21:18 thuah, Pathian vantirhkohvin Hagari hnenah, “Tho la, naupang (Ismaela) kha kai tho la, i kutin chelh rawh, amah chu chi ropui takah ka siam dawn asin,” a rawn ti tih kan hmu a. Pathian vantirhkohvin thi mai tur Ismaela ko lo va, an dinhmun avanga beidawng tawh a nu Hagari a koh kher hian awmzia a va nei thuk tak em! Pathian hian nu leh pa, pi leh pu, naupang enkawltute kaltlang hian naupangte hi a thutaka chawm seilen a duh a, Chhandamna lawngah hruai a duh a ni.

Tunlai hunah mi tinin fate aia ngaihsak tur tam tak kan nei a; mi ṭhenkhat fate avangin an beidawng em em bawk a. Chutiang a nih lai leh thiamna sang zel avanga fate kan umphak tawh loh lai hian, keimahni kaltlang ngei hian Pathianin kan fate hi chhan chhuah a duh a ni. Kan kuta kan fate chelh a, chhandamna lawnga hruai lut turin Pathianin min thlang tlat a ni tih hi anmahni enkawltute hian kan hriat a pawimawh em em a ni.

- H. Muansangpuia