KUM THAR 2026 ATAN ENG NGE I GOAL?

Kum thar 2026 kan chuang kai leh ta reng mai a, a lawmawmin rilrute pawh a thar hle mai. He kum thar hi keimahni tan ṭheuhva kum ṭha tak a nih theih nan tam tak chu nasa takin kan inbuatsaih a rinawm. Tum ṭumah hian kum thar hi hlawk zawka kan hman theih nan leh, kum thara kan goal-te a hlawhtlin theih dan tur ṭhenkhat sawi in tum teh ang.

Goal neih pawimawhna

Tum bik (goal) nei mite chuan a nei ve lote aiin nasa takin hma an sawn zawk tih hi tlang hriat a ni a. Goal nei tlatte chu, harsatna karah pawh, an kawng zawh turah an chiang a, beiseina nen taima takin ke an pen thei ṭhin a. A tawpah mi ropui leh entawntlak, mi hlawhtling an ni nghe nghe ṭhin a ni.

Goal nei lo nun

Tum bik nei rana nun hi mi zawng zawngin an peih lem lova, ṭhenkhat chuan an chunga lo thleng apiang an lo hmachhawn mawp mawp ringawt a. Tum bik nei lo na na na chuan thil tihhlawhtlin pawh an nei tlem a; kum tam a ral hnu phei chuan tum nei leh nei lote chu an inthlau em em ṭhin a ni.

Tum bik nei lova nung chu tuifinriat a lawngleng, kartu nei lova lang mai mai ang hi a ni, an ti. Tui fawnin a lenna lam apiangah a leng mai ṭhin a ni. Tum kan neih loh chuan mi dang tum kan tihhlawhtlinpui a ngai tho tho dawn a, khawvel ṭhang leh danglam zelin min len zel mai dawn a ni.

Goal hi tu tan nge?

Goal hi mimal, chhungkua leh pawl angin a nei theih a. Chu mai bakah, kohhran, sawrkar leh department ang pawhin a neih theih a ni. Ram changkang zawkah chuan hun bi tiam neia goal neih hi an uar em em a. Hei hi an ram pawhin a changkan phah em em a ni tih kan hmu thei a ni.

Engahte nge goal kan neih theih?

Mimal tan chuan mahni taksa, rilru leh thlarau hriselna atan te, zirna leh hnathawhna kawnga hmasawnna atan te, rawngbawlna leh thilpek kawnga hmasawnna atan te, ngaih pawimawh zawng tihhlawhtlin duh bik atan te leh kawng tinrengah goal a neih theih a ni.

Tin, chhungkua leh pawl ang pawhin goal hi a neih theih a. Hmasawnna atana kan mamawh, tihhlawhtlin harsa site hi Pathian rinchhanin, rinna nen goal-ah a neih theih a ni. Hetiang hian mi tam takin theih loh tura an ngaih an lo tihlawhtling tawh ṭhin a ni.

Kan goal atan chuan lehkha zirnaa ṭha taka pass te, ṭhalai tan competitive exam-a tlin te, Bible chhiar chhuah leh zir te, lehkhabu ziah te, video ṭangkai siam te, hrisel zawk nan exercise lak te pawh a ni thei ang. Tin, pawl leh sawrkar angin project lian tak tak neih te, chung project te chu a hun taka zawh te pawh a ni thei bawk ang.

Ram hmasawnna atan goal neia kal

Kan ramah hian Sawrkar leh a hnuaia department-te hian hmathlir thui tak neiin, goal sang tak tak nei vek thei se hma kan sawn chak lehzual ngeiin a rinawm. Hetiang hian Central Sawrkar leh ram changkang zawkte pawhin an lo ti ṭhin a ni. Kan rama project hrang hrangte, hun tiam chhunga a hlawhtling thei lo ṭhin hian hmasawnna a timuang em em a. Zawh hun tura ruahmanah hian zawh ngei ni thei ṭhin sela chuan kan ram hmasawnna pawh a chak zawk ngei ang. A hun taka zawh hi Central Sawrkar phei chuan a ngaih pawimawh em avangin, hun tiam hmaa zote tan lawmman pek a tiam hial ṭhin a ni.

Kum khat atan goal neih a ṭha tawk em?

A tlangpuiin, goal hi kum tirah kum khat atan kan siam ṭhin a; kum tawpah kan tihhlawhtlin leh hlawhtlin loh kan chhut ṭhin. Kum khat atana goal neih hi a ṭhat tawk loh chhan chu, thla 2/3 thlenga kan tihhlawhtlin loh pawhin hun tam tak neiin kan inhria a. Hun a liam a, kan tumah kan chiang lo tawlh tawlh a, kan lo inthlahdah ṭhin an ti a. Hei hi a dik thui viau awm e. Bible chhiar chhuah pawh hi, a tirah mi tam takin tum mahse, kum tir aṭanga bul an ṭan nghal mai loh avangin hlawhtling an tlem ṭhin a ni.

Thla thum chauh atan goal

Brian P. Morgan-a ziah lehkhabu, ‘The12 week Year’ tihah chuan goal set dan thar a sawi a. Chu chu, goal kan neih chu kar 12 (thla 3) a tihhlawhtlin zel tura ruahman tur a ni, a ti a. A sawi dan chuan, thla thum hi kum khat angin lo ngai ta ila, chuti a nih chuan kar khat hi thla khat ang zel a lo ni dawn a ni. Kan goal neihte chu thla thum chhung zelin tihhlawhtlin kan tum dawn a ni.

Kar 12 (thla 3) atan goal set ṭhatna a sawi tlangpuite chu:

1. A hun a tawi a, inthlahdahna hun a awm lo.

2. Hun tawp dawna ṭan vakna hun (last minute/days) kum khatah vawi 4 kan nei thei dawn.

3. Hun a tlem avangin kan ṭang mar dawn.

4. Kan goal-ah kan hlawhtlin chuan kum khatah vawi li lai hlawhtlinna kan lawm thei dawn.

5. Kar tin tihhlawhtlin tur a awm avangin hlawhtling turin ṭan mar a awl.

Hetiang hi a nih avangin, kum khat emaw, a aia tam emaw atan goal kan nei a nih pawhin sem sawm ta ila. Kan sem sawmte chu thla thum chhung zela kan tihpuitlin turin ziakin dah ila, a tihlawhtling turin hma kan la mai dawn a ni. Goal reng reng hi rilrua vawn mai a tawk lo va; ziak ngeia dah a, bangah emaw kan tar chuan kan hre nawn leh ṭhin a, ṭan min lak thartir leh ṭhin a ni. Tin, kan goal-te a hlawhtlin theihna atana ṭawngṭai ṭhin hi a pawimawh em em a ni.

Kan talent kan peipun a ngai

John Haggai-a chuan, “Pathian tan thil ropui tak, Pathian tel lova hlawhtling thei lo tur tih tum ang che,” a ti a. Pathian tan hian thil ropui tak, Pathian ṭanpuina tel lova keimahnia kan tihhlawhtlin theih hauh loh tur tih i tum ṭheuh ang u.

Dr Myles Munroe-a chuan khawvela hmun hausa ber chu ‘thlanmual’ a ni, a ti mauh mai a. A awmzia chu, thiamna leh theihna, talent, Pathianin mihringtea a dah hi hai chhuak lovin mi tam takin thlanmualah an liampui a, phum bovin a awm a ni.

Hetianga kan liam ve mai loh nan hian, Pathianin thiamna leh theihna min pekte hi kan dam chhung ngei hian hai chhuah tum ila. Pathianin ti tura min duh tihlawhtling turin Goal hi neih i tum ang u.

Bible chuan, “Mihring rilruin a kawng a ruahman a, A ke pen erawh chu Lalpan a hruai ṭhin,” (Thuf 16:9) a ti a. Kan kawng tur kan ruahmanna chu goal - tumbik kan nei hi a ni a. Chutiang hun bi tiam chhunga tum bik kan neih chuan Pathianin kan thil tumte min tihhlawhltlinsak dawn a ni.

He kum tharah hian Pathian, nangmah, i chhungkua leh i ram tan, i rawngbawlna, hna, sumdawnna leh kawng engkimah hmasawnna neih tum tlat la. Chung i thil tumte chu ziak chhuakin GOAL nei la, Pathian leh mihring tan malsawmna i lo ni thei dawn a ni.

- Dr Vanlalsiama Chhangte