FINNA DIK

Kristiante hi kan vanneihna deuh pakhat chu, Pathian hian finna hi kan neih ve a phal mai ni lovin min pek ngei hi a lo duh em em a. Bible-ah pawh, kan ban phak maiah hian ‘Finna Bu’ kan tih hrang hrangte min lo chhawp chhuahsak a. Chungte chu Thufingte bu te, Thuhriltu kan tih te leh Joba bu te hi an ni a. Heng ‘Finna Bu’ kan tihte hi Sap ṭawng chuan ‘Wisdom Literature’ ti tein an sawi ṭhin a ni.

Finna bu chhunga thute hi uluk taka kan chhiar chuan a ṭawngkam bungrua hausakzia kan hmu thei awm e. Tehkhin thu (metaphor) hmangtein, mi mawl ber pawhin a hriatthiam theih turin a thu kalhmangte hi thiam takin a rawn inrem chho hlawm a ni. Heng Finna bu kan tihte zingah hian, Thuhriltu leh Joba bik hi chu mihringte chunga harsatna leh thil dik lo a lo thlen huna hmachhawn dan tur chungchang a ni tlangpui tiin mi thiamte chuan an sawi a. Thufingte bu ve thung hi chu, finna rawn zir ṭan turte tana bul ṭanna tur, a Sap ṭawng chuan ‘beginner’s guide’ an tih ang kha a ni, tiin mi thiamte chuan an lo sawi bawk a ni.

FINNA DIK CHU ENG NGE?

Finna hi hetia han sawi mai hi chuan thil ṭha tak niin a lang a. Amaherawhchu, Jakoba 3:14-17-ah chuan hetiang hian kan hmu a, “In thinlungah itsikna thuk tak leh mahni hmasialna in neih ruk si chuan, thu dik kalha in finna uanpuiin dawt sawi suh u. Chutiang finna chu chung lam aṭanga chhuak a ni lo va, ramhuai laka chhuak a ni zawk, a khawvel a, a thlarau lova ni ... Chung lam aṭanga finna lo chhuak chu a hmasa berah a thianghlim a, a dawtah a nelawm a, a nunnem a, a tihnuam bawk a; khawngaihnain a khat a, rah ṭha a chhuah ṭhin; hleih a nei lo va, a vervek hek lo.”

He Bible chang aṭang hian finna chu chi hnih – Khawvel aṭanga chhuak finna leh Pathian aṭanga chhuak finna a awm thei niin a lang.

1. Khawvel aṭanga chhuak finna: He finna hi kawng hrang hrangin a tarlan theih ang a. Miin lehkha a zir aṭanga finna a neih te, a thil tawn (experience) aṭanga finna a neih te, pianpui finna riau nei sa te pawh a awm theih awm e. Heng finna hi a ṭha lo kan tihna a ni lo va, ṭhenkhat chu Pathian rawn chung zel a, taima taka thawh rahte pawh a ni ṭhin. Heng finna hi chu Pathian pawhin a hmang ṭangkai let duh em em a ni.

Amaherawhchu, he khawvela finna hrang hrangte hi chu Pathian tel lo chuan a tluantling lo ṭhin a. Nget emaw kawrawng hi a awm tlat ṭhin a ni. Mi fing deuh pawh hian Pathian a ṭih loh chuan mi fing phakar leh rilru chhia; a finna rahin mi dangte a hliam emaw, harsatna a thlen zawk hialte pawh thil awm thei a ni. Chutiang mi chu an bula awm a hrehawm a, chapona te, mi dangte hriatthiam lohna te a keng tel ṭhin a ni.

Tunlai khawvelah pawh hian, Pathian thu nena inmil ang deuh a lang, chhung rila inmil chiah si lo ngaihdan emaw, thlir dan (philosophy) chi hrang hrang kan ban phakah a awm nuk a. Ṭhenkhat chuan hengte hi changkanna emaw tiin an um zui a, Pathian thu hmuhsit phah nante an hmang ṭhin a, a pawi tak zet a ni.

2. Pathian aṭanga chhuak finna: Jakoba 3:17-a kan hmuh finna hi chu khawvel sum leh pai leh hausakna te, thiamnaah te a innghat ve lo va. Tin, he khawvela kan awm chhung atan chauh ni lovin, vanram min thlen thei khawp hiala finna tluantling a ni.

FINNA DIK KAWNG – LALPA ṬIH

“Anih leh chu finna dik, Pathian aṭanga chhuak chu engtin nge kan neih theih ang?” tiin han inzawt ta ila. A chhanna chiang tak chu Thufingte 1:7, “Lalpa ṭih hi finna bul a ni,” tih hi a lo ni reng mai a. Tin, Joba 28:28-ah chuan “Ngai rawh, Lalpa ṭih hi, hei ngei hi finna a ni,” tiin kan lo hmu bawk. Heng thu aṭangte hian Pathian kan lo ṭih mai hian finna kan nei dawn a lo ni tih kan hmu thei awm e.

Mihring mihrinnaah mi fing tak kan ni sa lo a ni thei a, lehkha pawh kan zir sang lo a ni thei. Amaherawhchu, Pathian thuin chiang taka min lo hrilh chu, Lalpa ṭih hi finna bul a ni, tih hi a ni. Mihring kan nih chhung chuan duhte kan nei a, hmachhawp hrang hrang te, hna emaw, kawppui ṭha te, chhungkaw ṭha leh in leh lo ṭha neih te pawh kan duh ṭhin. Chung chu dik taka nei thei tur chuan Pathian aṭanga chhuak finna kan mamawh a, chu finna kan neih theih dan chu Lalpa ṭihna hi a ni. Miin Lalpa a ṭih tlat chuan a nun a lo ngil a, khawvel thilah mi sang tak a lo ni kher lo a nih pawhin, mi zahawm takah an chhuak ṭhin a ni.

Anih leh, “Engtin nge Pathian chu kan ṭih ang? Lalpa ṭih chu eng nge a awmzia?,” ‘Lalpa, ka ṭih lutuk che,’ kan ti chiam dawn em ni?” tiin zawhna han inzawt leh ta ila. Mi tu pawh hi an thu kan awih dawn chuan tu nge an nih kan hriat hmasak a ngai a. Rintlak an ni nge ni lo, an thu a dik nge dik lo hriat a pawimawh a. An duh zawng leh duh loh zawng te ngaihven a, kan belh chian hmasak an ngai ṭhin a ni.

Chutiang chiah chuan, Pathian kan ṭih dawn chuan Amah leh a duh zawng kan hriat hmasak a ngai a. Amah kan biak tam a, a awte kan ngaihthlak tam a ngai a ni. Chutianga kan awm theih nana kailawn pawimawh tak chu ni tin amah nen inpawlna hun (devotion) neih hi a ni a. Bible chhiar leh ṭawngṭaiin dam chhung ni kan chhiar ang a, finna dik kawng zawh turin bul kan ṭan thei a ni.

FINNA DIK KAWNG ZAWHA DAM CHHUNG NI CHHIAR

Sam 90:12-ah chuan, “Kan dam chhung nite chhiar dan tur min zirtir ang che, Finna thinlung kan neih phah hialna turin,” tih kan hmu a. SL&PB-in a buatsaih ‘Mizo Study Bible’ tih lehkhabu-in a hrilhfiah danah chuan, “Kan dam chhung ni tlemzia min hriat fiahtir ang che,” tiin a ziak a. Pathian duh zawng hriat fiah theihna, finna thinlung a dilna a ni, tiin a inziak a.

Kan dam chhung ni tawi te hman dan ṭha ber chu ni tin Pathian nena hman hi a ni a. Kan hun kal tate han ngaihtuah let ta ila, “Khatia ka lo awm kha ka van inchhir,” kan tih hi chu Pathian kan hnaih loh lai a lo ni duh tlangpui a. “Ka hun hman danah ka lungawi khawp mai, ka hlim veng veng,” kan tih hi chu Pathian duh dana kan awm lai a lo ni duh tlangpui ṭhin.

Finna nena dam chhung ni chhiar dan pawimawh tak chu, ni tin Bible chhiar leh ṭawngṭai a, Pathian pawlna hun (devotion/quiet time) neih leh Pathian biak inkhawmna a tel te hi a ni a. Devotion/quiet time neih dan ringawt pawh hi kawng hrang hrang a awm thei awm e. Ṭhenkhat chuan, Bible chhiar leh ṭawngṭai piah lamah, Pathianin a pawlna thu leh an ṭawngṭai thupui ziahna tur notebook-te siamin, an vawng ṭhin a. Chung Pathian pawlna leh ṭawngṭaina an ziahte chu hun eng emaw chen hnuah an han keu let leh chuan, Pathian hnathawh te, an ṭawngṭaina a lo chhan ṭhinzia te an hriatchian phah fo a ni.

A tawp berah chuan, Pathianin Amah aṭanga chhuak finna dik hi kan tan min pek ve a phal avangin lawmthu sawi ila. Jakoba 1:5-ah chuan, “In zingah tu pawhin finna a tlakchham chuan, mi zawng zawng hnena hau lo leh ui lova pe ṭhintu Pathian chu dil rawh se; chutichuan, a hnenah pek a ni ang,” tih kan hmu a. Chu finna dik leh tluantling, chung lam aṭanga chhuak chu kan lo neih ngei theihna tura Pathian ṭih tlat chung a, kan dam chhung nite chhiar dan kan thiam deuh deuh theih nan, Lalpan chhiartu zawng zawngte malsawm rawh se.

- Dr. Lalruatsangi