JUST DO IT

Hmasawnna thuruk chu tuna tih nghal hi a ni - Mark Twain.

Bul ṭan turin mi ropui i nih kher a ngai lo, mi ropui ni turin bul i ṭan a ngai zawk - Zig Ziglar.

Sap ṭawnga ‘Just Do it’ tih hi Mizo ṭawng chuan ‘Ti nghal mai rawh’ tihna a ni a. He thumal lar tak lo chhuahna han zir chian hian, tih tur khek lova tih nghal hi hlawhtlinna kawng a ni tih puan chhuahna a ni.

Nike slogan leh logo lo chhuahna ṭobul – a tak a tih nghal

Phil Knight-an a hming chawiin Nike Company hi January ni 25, 1964 khan a din a. Kum 1988 khan fakna lam siamtu agency-te nen ‘Just Do It’ tih Nike slogan lar tak hi an phuah chhuak a ni. He slogan phuah chhuaktu Dan Wieden hian Gary Gilmore thusawi hnuhnung ber aṭanga a phuah chhuah a ni a. Gary Gilore chuan a chung thu court in thu an rel a. A thil tihsual leh a chunga hremna lo thleng tur chu a pawm vek a. “Hremna tur chu min pe tawh mai ru, Just do it,” a tih atanga lo chhuak a ni.

Nike slogan, ‘Just Do It’ hi an logo lar tak, Swoosh (tick mark kual deuh) kiangah hian an dah lang ṭhin a. An logo hi, Nike dintu Knight-a’n zirtirtu hna a thawh lai a, Portland State University-a a zirlai, Carolyn Davidson siam a ni. A logo design hian thil che leh rang (motion and speed) a entir a, a taka chet chhuahna lam lantir a tum ber a ni. Nike slogan ‘Just Do It’ tih leh an company logo ‘Swoosh’ te hi, khek lova a taka tih nghal duhna aṭanga lo chhuak a ni.

Nike ṭhan duanna leh an Brand Ambassador-te

Hetianga a tak a ti nghal duh company an nih avang hian an ṭhang duang em em a. Kum tinin Nike hian sum Rs 3.85 lakh crore (tluklehdingawn 3,85,000) vel an la lut a. Khawvela infiam mi lar tak tak Tiger Woods, Senera Williams, Wayne Rooney, Michael Jordan, Kobe Bryant, Roger Federer leh Rafel Nadal te chu an Brand Ambassador-te an ni a. Nike siam pheikhawk Air Jordan phei chu Nike brand ṭhanna atan mel lung pawimawh tak a ni.

Cristiano Ronaldo pawh hi, company dangte aia hmain, kum 17 mi lek a nih laiin thawhhona an lo siampui tawh a. Nike design-sak a ball boot ‘CR7’ hi khawvel hriat a ni. Tun ṭum World Cup-a ball boot senno lar em em nachhan pawh kha, Nike siam chhuah ball boot ‘Nike Breakout Pink Pack’ vang niin an sawi.

Nike aṭanga kan zir tur

Nike ṭhan duan chhan hi, a slogan (Just Do It) leh logo (Swoosh) aṭang rengin, a taka chet chhuah nghal, a taka tih nghal au chhuahpuitu a nih vang a ni. Mizote kan mu tan lian ber chu, kan thil hriatte a taka che chhuak a, ti nghal ṭhin kan tam lo hi a ni.

Khawvela hnam zingah hian Mizote aia thu ṭha inhrilh leh hre hnem hi an awm bik kher awm lo ve. Kan pi leh pute hun lai aṭang tawhin, Zawlbukah zirtirna an inpe a, nu leh paten in lamah an chhunzawm a. Chanchin Ṭha kan dawn hnuin, Pathian thu inzirtirna, Biak in leh Sunday School uar hnam kan ni. Mimal, chhungkua, ram leh hnam anga din chhuahna tham hi chu kan hre tawh a. Nike slogan ‘Just Do it’ leh logo ‘Swoosh’ lo chhuahna ang hian, zawm chiah ila chuan, Delhi ‘Drip’ khai leh milem betute tlawn reng ngai kan ni tawh hauh lovang le!

Hriat tam nge pawimawh a tak a tih – Knowledge Vs Action?

Hriat tam chu a ṭha teh meuh mai a; mahse, hriat tam ai chuan a taka tih tam hi a pawimawh zawk a ni. Hriatna hi thil pawimawh tak ni mahse, kan nunah hma kan sawn theih nan leh rah kan chhuah theih nan hriatna bakah a taka kan tih a ngai a ni. Chutiang bawkin, thiltih ringawt, hriatna tel lo hian kan nun kawngah harsatna a thlen thei.

Hriatna leh thiltih hi pawisa thir hmai pahnih ang hian an kal kawp a, an pawimawh ve ve laiin, Mizoten kan nunpui ngai chu a thil tih lam hi niin a lang. Hriselna leh hlawhtlinna lamah te, Pathian thu leh zirna lamah te, lehkhabu ṭha tam tak a awm lai leh, internet aṭanga hmuh tur tam tak a awm lai hian, mi tlem te chauhin danglamna an chan chhan chu an thil ṭha hriatte an tih nghal a, an nunpui nghal vang a ni.

GAP (awl) awm lo a tih nghal

Miin thil tam tak a lo hriat tawh te, a lo zir tawh te eng vangin nge a hman ṭangkai loh? Hei hi a chhan ber chu a hriat leh a tih karah hian awl (gap) a awm ṭhin vang a ni. Hemi kar awl hi a ni mi tam tak duhthusam thlentir lo ṭhintu, tih duhna leh tih ngeina inkara tham raltir ṭhintu chu ni! He lai awl hi i hma lam huna mi hlawhtling i nih leh nih loh hriltu pawimawh tak a ni. Hlawhtlinna kan chan loh chhan hi thil ṭha nia kan hriatte tih dan kan thiam loh vang ni lovin, tih tur kan hriat kan tih nghal mai loh vang a ni. Hriat tam hi a pawi lo; mahse, hriatna hi thlai chi ang chauh a ni a, a rah a la ni lo. A rah chhuak hmu tur chuan kan chet chhuah a ngai.

Hlawhtlinna hi hriat tam lam a ni lo a, a hun nghah a ni hek lo. Hlawhtlinna chu hriatna leh a taka tih inkar awl dah khah a ni. Chumi kar awl i dah khat dan chuan tu nge i nih mek leh, i la nih tur a hril thui hle. I dah khah loh a i tih loh erawh chuan i nih tum kha a hla telh telh thung ang. In buatsaih vak a ngai lo, nghah a ngai lo, tih mai a tawk. Thiam lo, dik lo chung chung pawha i tih chuan i ti ṭha chho telh telh mai ang. Hriatna chu i ban phakah, i lehkhabu chhuarah leh i phone-ah a awm. I lo hriat tawhsate pawh kha a tam tawk reng a ni.

Tih nghal mai hi harsatna sut kianna leh tihṭhat theihna a ni

A tira harsa anga lang hi kan tih nghal chuan a lo awlsam zawk ṭhin. Kan tih ngei tur thil ti lova thil dang kan tih hian, tih a ngai ta lo a ni lo va, a hun kan sawn hla a, kan tih a la ngai dawn tho a ni. Hetianga hun sawn hlat hian kan tih ṭhat loh phah ṭhin a ni.

Zirlai kan nih laiin kan ‘assignment-te’ ‘last minute’ a tih tura kan dah avangin tlaivarten tih a ngai a, kan tih ṭhat loh phah ṭhin. Kan assignment kha a tir teah khan lo ti nghal mai ila; zan tin, rei lo te teten lo ti beuh beuh ila, assignment ṭha takah a chhuak mai dawn a. Kan thil lo tih tawh ennawn leh siam ṭhatna hun a tam a, ṭha takin kan tih theih phah dawn a ni.

Mi fing Solomona chuan, “mi thatchhia chuan anmahni kawngah harsatna an insiam chawp ṭhin” a lo ti a. Mi taima erawh chuan harsatna awm lovin an ti mai ṭhin a, an kawng pawh a nawm zawk thu a lo sawi daih tawh a ni. A awlsam zawk nia i hriat avanga thil i ti emaw, i tih tur i khek a nih chuan, a harsa zawng leh a ṭha lo lam zawngin tih tur i khek tihna a ni zawk a ni. I khek rei poh leh a har tawlh tawlh dawn a, i tih ṭhat loh phah emaw, i tih lo phah hial thei a ni.

Esther’in a tih nghal mai avangin nunna tam tak a chhan chhuak

Estheri khan a pami hnen aṭangin, Juda mite thah chi mih vekna tur lal thupek kha a lo hriatin, thupek chu tihhlawhtlin a nih lohna turin a che chhuak nghal a. Ṭawngṭaia bul ṭanin ruahmanna a siam nghal a, Juda mite nunna tam tak zuahin a lo awm phah ta a ni. Estheri khan a tih tur kha ni danga la ngaihtuah ṭhat atan a ti lo va, ni danga tih atan a khek hek lo. Ṭawngṭaina nasa tak nen a chet chhuah nghal avangin, Juda hnamte chhan chhuahin an awm ta a ni.

Nakinah, naktukah, kar lehah tih hian kan nun hi a tichhe nasa hle. Vawiina tih theih naktuka tihah khek suh tih a nih kha. Tuna tih theih reng nakina tih tura dah hian kan hmasawnna tur muangchangin a dal a. Kan thluakah a inphan a, a inzawm khawm a, a lo nghet a, ti thei lo angin min inngaihtir a, kan ti thei ta ṭhin lo a ni. Nike company-in ‘Just Do It’ ti a, tih nghal mai hi au hlaa an hman ang hian, kan hmaa tih tur awm chu i ti mai zel ang u.

- JC Lalnunsanga