HMA LAM PANA KAL ZEL

Thlarau lam intuai tharna hun hmang zo pafa hi anmahni in lam pan turin an haw dawn a. A pa zawk chuan a fapa rawlthar, lirthei ke pali nei khalh thiam tir hnenah chuan, “Tun ṭum chu in thleng min phur hawng a niang chu,” tiin a fapa hnenah chuan chahbi chu a han theh phei a. A fapa lirthei khalh thiam tir tan chuan chu aia thil thlakhlelhawm chu a awm thei awm lo ve. Phur takin a pa chahbi rawn theh phei chu a lo man vat a, lirthei khalhtu ṭhutna lamah chuan intithei ang reng tak hian a han ṭhu lut ta nghal a.

An tlanchhuah hmain a pa chuan ṭawngṭaina hun hman a rawt a, chu pawh chu a fapa chuan ngaihtuah lutuk lovin a lo zawm satliah ve chauh va. An ṭawngṭai zawh chuan phur em em mai hian an in lam pan tur chuan an inkhalh chhuak ta a. A pain an chhungkaw lirthei khalh tura a vawi khat sawmna anih avangin a pa lungawina zana khalh tumin hmun dang a hawi thei lo va, thil dang reng reng a ngaihtuah thei hek lo. Phur tak si zam chhe lek lekin, tihsual palh hlau em em in uluk takin a khalh ta a.

Chutia ngaihtuah dang pawh nei lova in lam pana an inkhalh lai chuan, beisei loh deuhvin, ruah thimpui a rawn thawk dawn tih hriat takin chhum dum a rawn inzial tup tup a, thli a rawn thaw ta vuk vuk mai a. Rei pawh an tlan hma chuan ruah leh thlipui chuan an kalna kawng chu a rawn nuai ta chiam a. Rawlthar motor khalh thiam tir tan chuan a zamawm viau ang tih a rin thiam theih mai awm e. A pa lam chu zam tih hriat tak hian a han hawi phei thuai a, ani chuan a fapa rilru buai ru tak chu hre lo ang maiin hma lam pana inkhalh zel turin a lo hrilh a.

Tiril a khur ru dar dar chungin a pa thu zawm chuan hma lam panin a inkhalh chhunzawm zel a. Khua lah chuan ziaawm lam pan a hnekin zual lam a pan tial tial emaw tih tur hian a thim chhah zual sauh leh nghal a. A pa lam bawk chu a han hawi phei leh ṭhin a, a pa chuan eng dang sawi lo chuan hma lam pan zel turin a lo hrilh leh mai zel bawk a. An bul hnaia lirthei khalh dangte chuan din zai an rel ta zel bawk si nen a fapa chuan din ve mai a han tum a, a pa erawh chuan kal tlang turin a fuih zel a. Motor dang zawng zawngte an din ṭhup hnuah pawh a pa thu awihin a inkhalh zui ta zel a ni.

Ruah leh thlipui nasa zawk a rawn thawk a, rawlthar tan chuan kal zel ngamna chi zia zang a ni tawh love tihah pawh a pa chuan, “Bawiha, ding lovin kal zel rawh. Thlipui leh ruah sur hi kan kal pel ṭep a nia,” tiin a fapa chu a lo fuih chhunzawm zel a. Mittui parawl ṭeuh chungin rawlthar chuan a pa thu awih harsa a tih ber lai pawhin, hma lam pan chuan a inkhalh chhunzawm ve zel a. Rei lo deuh hnuah chuan, a pain a sawi lawk ang ngeiin, thlipui leh ruah thimpui tlehna hmun chu an tlan pel ta nge nge a. Chu rawlthar lirthei khalh thiam tir tan chuan hnar a hlit phawi ang huai a ni ngei ang. A harsa zual lai an pelh tawh avanga rilru engthawl taka a awm laiin a pa chuan lirthei chu tidinga pawn lama chhuak thuai turin a hrilh ta thung a.

Mak ti leh hrethiam lo tak chungin a lirthei khalh lai chu a tiding a, pawnah chuan a chhuak ta a. Eng dang sawi lovin a pa chuan, “Thlipui leh ruahpui karah khan engati nge kal zel tura ka tih che i hria em?” tiin a fapa chu a zawt a. Ani chuan tifuh inti deuh hian, “Pathian hnena lawmthu sawina tur ka hriatfiah nan,” tiin a lo chhang zat a. A pa chuan, “Anih leh kan tlan pelh tak chhumpui zinna lamah sawn eng nge i hmuh han hawi let teh?” a han tih leh a. Rawlthar chuan en pawh en mang lo hian chhum zing chhah mup a hmuh thuin a lo chhang let thuai a.

A pa chuan a chhanna chu a la duh tawk zo lo tih hriat takin, “Ngun zawkin han thlir leh la, eng nge i hmuh min han hrilh ṭha leh teh?” a ti leh a. Chu rawlthar chuan ngun taka a han thlir nawn leh hnu pawh chuan thil dang hmuh belh tur a awm loh thuin a chhang leh a. Chutah chiah chuan a pa chuan, “A dik e, mahse sawng chhum chhah mup i hmuh hnuaiah sawn tute nge awm i hria em? Khang lirthei ding ta zozaite kha thlipui leh ruahpui hnuaiah engmah ti thei lovin an la awm ṭhup reng a. Hma lam panin kal zel ta se la, keimahni ang tho hian hmun him zawkah an lo thleng ve tur a ni a. Mahse, khang harsatna chhumpui leh ruah thimpui hnuaia awm kha an thlang zawk tlat a, chhiatna nasa zawk hma chhawn theiin an awm mek a ni,” tiin a hrilhfiah zui ta a ni.

He thawnthu tawite hian hma lam pana kal zel a pawimawhzia a ti lang chiang viau awm e. Mi tin mai hian chhumpui hrang hrang – zirna, eizawnna, nupui pasal leh fate nena inlaichinna, hna zawnna, inngaihzawnna, rawngbawlna leh kawng dang tam takah kan tawk fo va. Chung hlawhchhamna chhumpui zing karah chuan kan ding ṭhuap mai ṭhin. Hma lam pana kal zel ai chuan chu chhumpuiah chuan cham hlen kan thlang a. Harsatna lian zawkah kan tlu lut nge nge ṭhin. Hlau leh khur chung pawha hma lam pana kal zel hi kan himna bul a lo ni reng mai.

Kan tana entawn tur ṭha ber chu Lal Isuan Kraws kawng a zawh dan hi a ni awm e. Chhandamna kawng hawng leh tur khan vuak thitlinin a awm a, Kraws pawh mahniin a pu zo ngang lo a nih kha. Mahse, hma lam pana kal zel a thlan tlat avangin Kraws lera thihna paltlangin hnehna nen ni thum niah a tho leh tih kan hria. Kawng lakah khan dingin chawlh zai rel ta se kan chan hian maian chan pawh a tluk awm lo ve. Hma lam pana kal zel hi, harsatna kawng peng ṭhuam pela, hnehna hla do chham theihna awm chhun a lo ni.

Michael Jordan khan, “Basketball ka khelh chhung khan vawi 9,000 ka theh lut lo va, vawi 300 chuang chak lo zawkah kan ṭang a, vawi sawmhnih paruk chakna tur ball vawm lut tura mawhphurhna pek ka tihlawhchham a. Hlawhchhamna hi ka nuna ka tawn nawn awn awn avang chauhvin ka hlawhtling thei a ni,” a ti. Mi ropui kan tih tam tak hian hlawhchhamna an tawn hunin tawp zui an duh ngai lo va, hma lam pana kal zel an thlan tlat avangin hlawhtlinna leh chawimawinain a hmuak nge nge ṭhin.

America President ropui berte zinga chhiar, Abraham Lincoln-a nuna hlawhchhamna zozaite kha mi naran tan chuan bo pil hlen vang vang tham a ni ngei ang. A hna a chan a, rilru lama rimtawngna avangin kulchona hial a tawk a, inthlannaah chak lo zawkah a ṭang ve fo mai ni lovin inthlanna a tel thei tura thlan chhuah (nominee) zingah pawh a tel pha lo fo a ni. Mahse, khang hlawhchhamna a tawh zozai te kha rahbi siam rem nana hmangin, President ropui ber pawla chhiar a lo ni ta anih hi.

Kan ṭhianpa pakhatin hmangaih lehkhathawn ziah dawn chuan lehkha phek hlawm sawmthum vel tal bawlhhlawh bawmah a awm loh chuan a thlum tak tak thei lo a tih ang deuh a nia. Hmangaih lehkhathawn thlum tak ziak chhuak tur pawhin vawi sawmthum hlawh chham hnuah hma lam pana kal zel a ngai tihna a nih chu. Philippi 3:16 ah chuan, “Eng pawh ni sela, kan thlen chin aṭang khan hma i sawn zel ang u,” tih ziak kan hmu a, thlen china chawlh lak mai hi kan tih loh tur tihna a ni awm e. Hma kan sawn dawn anih chuan HMA LAM PANA KAL ZEL hi kan innghahna, thu bul a nih a ngai ngei ang.

- Lalnunsiama Khalthang