VANTLANG CHANPUAL

Vantlang hi a hring a hrana a hrana hmuh tur awm a ni lo naa, a awmzia kan hre vek a. Mita hmuh mai chi a ni lo naa vantlang hian chanpual kan nei ve ngei ngei tur a ni. Vantlang chanpual a ṭhat a; a inrem fuh hian mipui kan nuamsa mai thin.

Vantlang chanpual chu tu ta mah ni bik lo, a remchang apiangin kan hman theih leh kan inhman ṭawm theih hi a ni mai a. Kawngpui te hi tu ta mah a ni lo va, lirthei tlanna atan te, kea kal nan te zalen takin, neitu bik awm lovin kan hmang tlang mai a ni. Vantlang tuikhur te pawh man chawi lovin kan vaiin kan tlan thei.

Kan inhman ṭawm theih a nih avangin mahni ta anga chei bawl a thiang lo va; a hman lohna tura hman a ṭha hek lo. Vantlang chanpual ni si mahni puala hauh an awm hian vantlang chanpual a nihna a buai a; a hman lohna tura hmang an awm hian vantlang an tibuai bawk a ni.

Vantlang pual hi Aizawlah hian a vang hle mai. Hmun ruak phei chu a awm lo tih theih a ni. Tin, tunhmaa vantlang thil ni thin, mi mal eizawnnaa chang ta daih a awm bawk. Lirthei dahna Car/Bike Parking kan tih mai te hi vantlang chanpual a ni a. Tu ta bik mah a ni thei lo.

Vantlang chanpual pawimawh em em, hriselna leh faina lama kan dinhmun hriltu ni bawk chu vantlang inthiarna hi a ni.

A bul ṭanna atan Millennium Centre hi han hmang ila. He hmun hi Jail awmna a ni ṭhin a. Jail an sawn chhuak a. Chu hmun ruak chu Jail hmun hlui a nih tlat avangin sawrkar ta ni ngeiin kan ngai a; chu chu mipui ta tihna a ni. Chu hmunah chuan Shopping Centre an sa ta a; sawkar hmun, mipui taah chuan dawr a khat ta hmuk mai a. State danga shopping centre ang lo takin lirthei dahna hi mipui tan a awm mang lo. An customer te an ngaihtuah tel hauh lo va. Basement-a lirthei dahna pawh a chheh vela miten an mimal lirthei dahna atan an hauh ṭeuh a ni awm e. Chhak lam aṭanga ke hnih nei lirthei luhnaah phei chuan customer tan a luh ve theih loh. Card nei chauh an lut theiin an lirthei an hung thei thin. Chu mai chu a la ni ta lo. Inthiarna hmun pakhat mah hi vantlang tan hawn a ni lo. Man chawia hman ngai vek a ni. Hetiang hian hmun danga kan shopping centre neih ve te pawh an customer te tana inthiarna man chawi ngai deuh vek a ni a; an customer leh vantlang tan hawn a ni lo. Airport kan neih chhun Lengpui Airport chhehvelah pawh vantlang inthiarna tih tlak a awm meuh lo. Main Gate han luh chiah khuan pahnih a awm a. Pakhat chu sawrkar siam pawh a ni lo nghe nghe. Kohhran pakhatin anmahni sum senga an siam niin a lang. Heng zun in pahnihte hi kawngkhar awm lo, chung nei lo an ni a. Ruah sur laia hman remchang lo zet a ni a. Chu bakah hmeichhe tan hman ve mai a remchang lo hle. Zunna chauh an ni a; inthiarna a awm lo. June thla khan ka zu kal a. Zunin pakhatah hian zun ram thiar turin ka va kal a, EK a awm. A cute lo hle mai. Eng vangin nge kan airport neih chhuna zun inah ek a lo awm mai?

Vai ramah shopping centre lian pui puiah inthiarna a thlawn vek a ni. A fai em em bawk a. Mizorama man chawia kan inthiarna aiin a fai zawk a, a rimtui zawk a; a changkang zawk fe bawk. Khawpui lianah chuan a khat tawkin a thlawna inthiarna a awm thluah zel bawk a. Keini man chawia inthiarna te erawh chu a hing hum hum a; a bal ru fu bawk a. Hnam dang lakah zahpuiawm tak an ni. Hmun ṭhenkhatah phei chuan mipui awm chhung leh mipui nawlpui men chhung pawh an inhawng peih lo. Zun kawng lama harsatna nei tan Aizawl khawlai hi a ṭihawm fu a ni. Kan he tih chhung chuan ko pang behchhana zung leh khawi emawa mihring ek lo awm ringawt hi engtikah mah a bo lo vang.

Sawrkar lamin lirthei nei zawng zawngte chu garage nei vek turin min ti a; mahse chumi hnuah pawh vantlang kawnga motor dah mai ni lo; anmahni puala hauh tlat an awm rei hle a. Kawng pangah inthlahrung miah lovin “Reserve for MZ 01....” tih an tar ngam tlat a ni. Dawr ṭhenkhat chuan an dawr kawt vantlang kawng kha anmahni pualin an hauh tlat bawk a. Vantlang tana zuah, lirthei hunna tur ngei pawh “A man pe lawkin” intiin anmahni pualin an hauh ngam tlat a ni.

Kawngpui zau lai, vantlang chanpual tur niawm tak chu taxi chauh din theihna turin taxi stand atan ruat a ni zel bawk a. Chungahte chuan taxi apiang an ding thei meuh lo lehzel bawk a; kha lai hmuna ding thei bik, “member” an la awm ta zel a ni.

Kan sawi takte khi vantlang chanpual la hek vek an ni.

Engati nge vantlang chanpual hi a tlem em em?

Kan dawizep: Mi mal intih vui kan hlau lutuk a, kan hotuten tute emaw tihlawm an lo tum bawk thin si a; vantlang kan nihna anga kan chanvo a kiam a, a thawrawng tawlh tawlh ta mai a ni. Vantlang hmun awm mang lo khawpin in hmun kan inpe a; kawr area meuh pawh a bo thei a; vantlang tuikhur meuh pawh a bo thei ta hial a ni. Thingtlangah pawh vantlang kawng ni thin, bo ta daih a awm nual.

Pawisa kan duh lutuk: Sum lak theihna apiang kan bawh a ni ber mai. Chhe te te leh awm ang lo taka lang pawh kan iai phal tawh lo. Shopping centre pakhata dawr zunin nghaktu chu a nghah theihna turin tunhma khan Cabinet rank meuh a inrawlh an ti. Hei hian a chunga kan sawi tak intih lawm tumna leh tuna kan sawi mek sum duhna hi a tarlang chiang hle mai. Kan duh a te tham a; kan awh a te tham a; chu chuan Cabinet rank sawrkar mi lian meuh pawh a inrawlhtir ta a ni awm e.

Sawrkar a pachhia: Ram dang chu an sawrkar a hausa a; vantlang mamawh an siamin an ti thei zel mai. Keini ram chu kan sawrkar hi a rethei tih phat rual a ni lo. Leiba nen, puk chawpin a kal hram hram a ni ber a. Hei hi tun hnai thil thleng vanga lo awm a ni lo va, tunhma atanga kan kal dan inchher chhuan zelin a hrin chhuah a ni. Sawrkar hruaitu politician leh sawrkar hnathawk lian chin hi inpuh tur bik an awm kher awm lo ve.

State danga an neih ang kan nei ve thei lo a nih pawhin vantlang inthiarna hi sawrkar sum ring lutuk lova vantlang chanpuala dah theih dan a awm ngei ang. Inthiarna hrulah dawr te tak te sa tel se la. Hmawmsawm eng ilo zuar pahin inthiarna an enkawl nghal ang a. An enkawl manah a thlawnin dawr an luah thung ang. An inhawn hun chhung tur te pawh bithliah fel tak, vantlang mamawh phurhruk zo ngei turin ruahman mai se la, vantlang pual inthiarna a awm thei ngeiin a rinawm. Shopping centre hrang hranga inthiarna te pawh hi vantlang tana ruahman theih a ni. Dawr luah man atanga cut-in hnathawktu ruai mai se a fel mai tur a ni.

Kan mamawh chu sawrkar chak leh hausa a ni a; kan mamawh hi tuna kan dinhmun atanga thlir chuan vana rah ang mai niin a lang a, a beidawnthlak rum rum thin.

Sawrkar hausa kan neih theihna tur kawng hnih a awm a. Sawrkar sum renchem thiam leh sawrkar sum hmuhna siam a ni. Delhi tlanga project eng emaw zu theh luh a; hna lian eng emaw siam ringawt hi a tawk zo tawh lo. Keimahni ngei hian eng emaw kan tih ve a, sawrkar chak leh vantlang chanpual min siamsak thei kan neih ngei a ngai tawh a ni.

Mi state neih ang hi engtin nge kan neih ve theih ang tih hi kan hruaitu fel tak tak te, kan mithiam te, kan Officer hna thiam inti tak takte hian beng sikin han ngaihtuah tawh teh se.