VATÂWK DANG ANG BAWK

Ka insum zo ta ngang lo: An hla ka chham ve dawn!

Ruihhlo addict an awm a, zu addict an awm a, vaihlo addict an awm a. Sa leh hmuihmer dang pawh hi kan addict thei hial awm e. Hmun awl hlek apianga in sak zel chak tlatna hian kan hotute hi a phuar bet a. Damdawi in te meuh pawh hi hmun thawl nuam taka sak aiin chep deuh deuhah kan nei a; a kiang hnaia hmun awl hlek chu building sak nan kan awt zel mai a ni. Kan hotute hian hmun awl awm hleka building sak belh zel chakna hi an addict tlat em ni? Kum 20 aia rei kal taah khan chu tih hun laia Chief Minister chuan Civil Hospital a rawn tlawh a; mi lian deuh deuh hian an rawn zui duah duah mai a; ‘he laiah hian chu tiang kahtiang chu building sa ila,” tiin an kawk kual a. Amah zuitu Officer lian deuh deuh chuan an lo ‘amen’ tak tluar tluar a. Kan hotu pakhat nen hian a PS emaw ni kha kan kaihrang deuh a; hmun awl apianga building sak ṭhat loh dan kan han sawi ve a; a sawt lo kher mai.

Kan nghahhlelh em em thin angin Assam Rifles an chhuak ta a. An chhuahsan hmun hman dan turah ngaihdan in ang reng reng lo a awm a. Chutiang lama ngaihtuahtute chu an han inhmu khawm a; vote lain duhdan an titlu a. AR chhuahsan hmunah hian in lian pui mihring 2000 zet len theihna an sa dawn ta a nih chu. Ruahmanna ṭha tak anga lang, belh chiana ṭah tichhuak a ni.

Khami ṭuma vote an la hrim hrim kha zawhna titam thei tak a ni. Committee a nih avangin vote lak hi compulsory-ah kan ngai em ni aw. Building sak duh lo lam thusawi kha hnial ngaihna hre si lovin, an lo tum sa anga kal duh si khan vote an hmang ta mai em ni? Sawrkar hian ngaihdan mumal a nei lo nge, hming ṭhat duh avangin vote a la mai mai? Kha meeting-ah khan sawrkar hnathawk an tam fe zawk niin a lang a. Sawrkar Officer lam khan AR ram chhunga Convention Centre sak chu duhin an phar thlu ta niawm tak a ni. Convention Centre sak tumna tihtluk tum hrim hrim emaw, sawrkar mek pawi sawi palh a transfer hlau hrim hrim emaw, khawpui plan lama engmah hriat belh tum lo emaw an ni ta mai em ni aw? Khatiang tho tho tur a nih chuan meeting kha a ṭulna a awm lo reng reng a. Sawrkar officer-ho kha lehkhain an duh dan zawt kual se, hun leh tha seng vak lovin an duh chu an ti thei mai dawn a ni. Officer duh dan leh an ban pharna lama thu titlu turin politician te hi kan beisei lo. Sawrkar Officer te pawh khalh ngil thei turin kan beisei zawk a; chu chu tun sawrkarah phei chuan inthlan hma atanga mi tam tak beisei dan a ni. Sawrkar Officer rual ban pharna lama thu tlukna kan siam dawn tho tho chuan politician hi eng nge kan mamawhna ni ang?

Kan officer lian leh kan politician-te hi an demawm hrim hrim. Khawpui dangah sawrkar sumin an zin fo a; a then phei chu foreign thlengin an kal a. An kalna ram khawpui ruahman dan te, hmun awl tha an neih dan te an hmu ve reng a; rualawh nachang an hre chuang miah lo a ni awm e. Sawrkar suma nuam ti deuha an va zin hi an duh tawk hle em ni?

Assam Rifle hmun hlui hi Aizawl hmun laili a ni a; traffic zawng zawng deuh thaw an fuan khawmna a ni sa a, a panna kawng hi a chep sa em em mai a ni. Mipui pun khawmna thil dang han dah belh se la, a kiangah motor park-na hmun eng anga zau pawh siam rawh se, kha hmun rawn pantute kha boruakah an rawn thlawk ang a, an rawn ṭum chat chat dawn lo reng reng a, kan kawngpui chep em emah hian an rawn inhnawh khawm vek dawn a nih chu. Ṭhang khat lian a ral ang a; kum sawmhnih sawmthum a lo kal leh ang a; kan tu leh fate an la rum ang. Khawpui kawng hi zauh ngaihna a awm tawh lo va, Office leh puipunna kan sem darh a nih loh chuan, a hnawh khawm zawnga kan chetna hian khawpui kawng a tithawl reng reng lo vang.

Tunhma daih tawh khan Pu Zoramthangan lei verh a sawi tawh thin a; chu chu Pu Lalduhawma ngei hian nuizatthlâk deuh maiin a lo sawi hnawm tawh a. Kulikawn atanga Bawngkawn thleng lei verhin chu chu kal nan hmang ila, “Kan kal tumna kan pel vek ang” tiin. A video clip nei an la awm hial mai thei. Hei hian Lammual bula kawng siam belh leh parking siam ringawt hi a tawk zo lo va, hmunruak leh thing hmuna dah mai hi a tawk zawk tih a tilang lo a nih chuan a ngaihna kan hre ta lo.

Mizoram State University hi eng vanga Aizawlah bawk dah tum tlat nge an nih? Aizawla engkim dah kan tum a, hmun lailia mipui punkhawmna dah belh zel kan tum chhung chuan kan khawpui tawt hi a tawt tual tual ang a, kan buai tual tual ang. Kawng chhawng leh lei verh te hi a tha lutuk, mahse kan kal duhna hmun kan sem darh thiam si loh chuan awmzia a nei tak tak dawn lo. Aizawlah Mizoram Univwersity tha tak a awm diam tawh a. University dang a awm leh a nih chuan Lunglei lamah emaw, Thenzawl/Serchhip lamah emaw tal dah ve tawh awm tak a ni a. Heti anga kan kal zel chuan Aizawl hi a lian val tual tual ang a. Aziawl leh hmun dang kan inthlau tawlh tawlh ang a. Mihring nun inthlau lutuk chu kan ṭangrual tak tak rei thei hauh lo vang. Solomona hun laiin Jerusalem a ropuiin a lian a; lal chhungkua an hausa ngang mai. Mahse hmar lam hnam sawmte kha an ngaihthah deuh a ni ngei ang, rei an lungawi thei lo va, an ram a phel phawk mai a nih kha. Phel em zawng kan phel lo a ni mai thei a; mahse hnam anga kan himna tur thil, entirnan hnam dang nena insumdawn tawnna kawngah te, rei tak kan inthurual thei lo vang a, kan ṭangrual rei thei miah lo ang.

Aizawl khawpuia engkim dah kan tum hi a ṭha lo va, chu achhapa hmun laili-a thil dah khawm vak kan tum hi a ṭhat lohna belhchhahtu a ni. Kum 40 vel kal ta daih atang tawha mi thlir zauten an lo sawisel tawh thin kha tunah, kalphung thar sawrkar hnuaiah kan la chhunzawm zel dawn em ni? Hmanah mi thenkhatin Mara bial te, Chakma bial te UT neih chungchang an han sawi a; kan meng phâwk a, kan duh lo em em a; mahse hmasawnna sem rual turin ke kan pen leh duh miah si lo va; eng nge kan rilru hi? Keini hi lian bur bur ila, Lunglei chin chhim lam saw zuih tial tial rawh se kan ti em ni?

Hmun awl zau ṭha, thing hmun hrim hrim kan mamawh em em a. Delhi khawpuia Lodhi Garden ang te khu pakhat pawh kan nei lo reng reng a. State capital ve riang ruang hi a ro ngawih ngawih kum khua dawn ta a nih hi. ZPM sawrkar hi danglam turin kan beisei a, danglam tura kan beisei avangin neutral vote leh swing vote an hui a, an tling a, an sawrkar thei ta hial a. Mahse a vote tute beisei ang lo tak a, sawrkar hmasa dang ang bawk an nih mai mai dawn chuan mipui an beidawng hle ang a, anmahni pawhin an tuar ang.

A la tlai lo. Tunah hian ban pakhat pawh an la phun lo va; siam ṭhat theih a la ni. Convention Centre hi kan mamawh ngawih ngawih a nih chuan Tanhril lamah te, Mualpui lam te, Zemabawkl amah te, Durtlang Sihphir lamahte thawl takin dah mai se la, khawpui zauhna leh traffic pawh darhna tha tak a ni ang. Medical College & Hospital pawh Aizawl atanga KM 20 dawn laia hla Falkawnah a awm a; a mamawhtute chuan an pan mai a. Convention Centre, mi hrisel hlir kal khawmna tur phei chu a aia hlaah pawh awm se a pawi reng reng lo. Chutiang bawkin State University hi Aizawlah dah lul lo se la, Lunglei lamah hmun thawl ṭha takah va dah se la, Zoram chhim lam tan malsawmna a ni ang a, hmasawnna insem rual turin rahbi pakhat kan rap ta tihna a ni bawk ang.

A la tlai lo. ZPM sawrkar hi Vatawk dang ang bawk ni lo hram teh se.