Children's Film Festival khâr a ni

Aizawla Children's Film Festival 2020 buatsaih chu Vanapa Hall-ah ni hnih neih a nih hnuah nimin khan Graceland School, Khatlaah chhunzawm a ni a, khâr nghal a ni.

Naupang pual film kûtpui hi January 29, Nilaini khan Vanapa Hall-ah ṭan a ni a, Art & Culture minister R Lalzirliana'n a hawng. Vanapa Hall-ah hian January 30, Ningani khan chhunzawm a ni a, nilengin film ṭha, naupangte kawng dika kaihruai thei tur chhuah niin, Aizawla sikul 

ṭhenkhata zirlaite an tel.

Film Festival hi nimin khan Graceland School-ah chhunzawm niin, film chhuah leh a ni a, zirlai naupang ṭhahnem takin an en. Film chhuah zawhah a khârna inkhawm neih a ni a, Art & Culture deputy director Lalchuailova'n a hmanpui. Festival hi Children's Film Society of India (CFSI) leh Art & Culture department-te buatsaih a ni.

CFSI hian India ram hmun hrang hrangah Children's Film Festival an buatsaih ṭhin a, Mizoramah pawh tun hmain IPR department nen ṭang dunin an lo buatsaih tawh ṭhin. Kumina Film Festival neih chhungin sikul pariat aṭangin zirlai naupang 1,000 chuangin an chhim hman a ni.