CAB/CAA thlâwptu MNF party hi VC/LC-ah kan hnâwl a ṭul - PC Lalthanliana

Congress party-in nimina Congress Bhavan-a political session an neihah minister hlui PC Lalthanliana'n thu a sawi a, "Mizoram mipuite'n local council leh village council inthlan lo awm turah sorkar lai MNF hi Citizenship Amendment Act avang leh V/C rorelna an suasam avangin mipuiin kan hnâwl a 

ṭul," a ti.

PC Lalthanliana chuan, CAB/CAA chu ram leh hnam leh ṭhangthar la awm turte tan a him lo tiin kohhran leh tlawmngai pawlte'n an dodal tih sawiin, "Chuti chung chuan MNF chuan Parliament-ah a thláwp zawngin an MP an vote tir thu an hotupain a puang a ni. CAA hi kan duh lo tak tak a nih chuan, VC leh LC inthlan lo awm turah hian CAA thláwp tlattu leh kan do ang ti chunga Parliament-a vote-tu MNF hi kan hnâwl a ṭul a ni," a ti a; MNF-in CAB thláwp zawnga an MP an vote tir chu mak a tih thu a sawi.

VC kalphung leh a thlan dan felfai zawk chu Congress sorkar laia ruahmanna leh dan siam a nih thu sawiin PC Lalthanliana chuan, "Inthlan dan felfai lo thei lai zawng zawng siamremin, dan thar ṭha zawk kan siam a, vawiin thlenga VC leh LC inthlanna felfai kan nei thei hi Pu Lal Thanhawla kaihhruai sorkarin dan fel zawk a siam vang a ni," a ti.

PC Lalthanliana chuan, Mizoram khaw hrang hrangah MNF-te'n khawtual inrêlbàwlna a suasam nasa hle nia sawiin, "Krismas hma lawk khan Lunglei district-ah MGNREGS hnuaia material component aṭangin khaw tinin an chan tur zat aṭanga 25% chu Block office aṭangin MNF unit hotute'n la chhuakin party induhsak nan an hmang a ni," a ti a; MGNREGS material component sum chu VEC emaw BEC emaw chauhin an khawih tur a nih thu a sawi.

"Material component aṭanga sum an lak chhuahte chu MNF chhungkaw hnenah Krismas hma deuh khan an sem a, khaw ṭhenkhatah chuan in khatah Rs. 300 ten an sem. MNF VCP pakhat phei chuan dan dik lo a ni, tiin a dawng duh lo a ni," tiin PC Lalthanliana chuan a sawi bawk.