Tuk khat chu

A khuhhawnna: Kum 20 kal taa chawlhna rama ch^m hlen tura kan thlah liam tak, duhtak chawl ta, ka U Mawia-hova zing ni chhuah rual a -

"Liandova te kawmcharah,

Ni chhuak ka hmu hmasa ber;

Sava te e ten ten,

Tumbuanga aw e tun tun,"

kan tih ṭhin laite khan zing ni chhuakte hi kan chhuah khalh fo a, kha'ng hun laite kha tih tur thlawt ka hriat loh chang nite hian ka ngaihtuah chhuak leh mai mai ṭhin.

Hmanah khan, tui-thak leh chithak a hlut zual em em laite kha chuan thawh hma chhan tur ṭha tawk tak kha awm tlata hriatna kan nei fo a, tih tur hriat loh vang tal paw'n kan tho hma ṭhin! Tunah erawh zawng, thawh hma chhan tur nei kuh ṭel ṭul chungin, thawh hnua thawh ṭan chauh turah thil zawng zawng hi kan han dah ta deuh tlat a; chhungte'n chawthleng nen meuha min nawr thawh chang paw'n Thufingte 24-a "I duh chuan mu hlek la, chawl hlek rawh; kutkuangkuahin chawl hlek teh..." tih lait> kha kan han ṭanchhan a, a thu zuitu - "I mut hlanin i rethei hman ang a, tl^kchhamnain sipai angin a nang thut ang che," tihte chu kan muthilhsan hmak a, duh leh chhungte'n Chhung Inkhawm-ah infuihna'n lo hmang se, keini'n an thawhrah sengpui leh th>n ila, tihte hi kan ngaihdan a ni ta fo mai!

Nia, keini ang, mut nachang hre lo, thawh nachang hre hek lo tan hi chuan khawvel kan thlir dan hi a thle h> h^w a, mi mut huna men a, mi men huna mut tak tlat maite hi mi ang lo zia a nih thu lam reng reng kan ngaihtuah chhuak pha lo - chuti tak chuan a nia, kan mawl t^k ni!

Mut hun leh thawh hun kan hriat tawh loh chinah hi chuan mihring hi mi pangngaiah kan lo inchh^l pha reng reng lo, tih tun hnute hian ka hre chiang ta tulh tulh mai. Keini tan chuan 't<k khat' tih thumal ringawtte hi inthlahrung ru deuh tak chunga sawi a ngai ta!

A tuk lama tih turin min helhkam ve miau avangin, zing khat chu thinthiin ka mu hleithei bik lo. Tuk khat chu thawh ka hai ve pek a, khaw >n hma-in ka'n tho a, mahni leh mahni a inhuat theih deuh rum rum nia!

Chutih hun lai chu Vau thla chawhnu lam, khawchin zirmite paw'na an khuahkhirh hleihtheih loh leh an thlirlawk fuh hleihtheih loh tura khua-in chimawm a chhuah vei sek lai a ni. Zan lamah nau suakb^k
ṭap laklawh ang hrimin, do han zawh rual lohin ruah a sur tlawk tlawk a, "Khaw chhia leh ka di ngaihin ban zai reng a r>l lo," tih hla fiamte chu ngeiawm lamah a kal deuh lek lek. Mahse a tuk lamah erawh chuan, khawfing chat tur hmu lo rei tawh kei hi, khua chuan min hmaizah ve deuh ni maw, thian takt> hian van chu a thiang k<k mai a; khawfing seh chah tum ang hrima chutia kei ka'n tho ve phat chu, reh riin min lo hmachhawn a; vanpui ngawi duk maia khawvar lam arsi mawiziate hi ka hrilhf^k a tling reng tawh ang.

V^nvar-ah leilung chu chiang lo riaiin a'n lang reih a, k^wla zing ni chhuak tur chuan thawm a rawn nei d>t d>t a... Chhe heu! hei hi a lo ni maw, zing khua chu! Chhun >ng thawmhnaw inbel tura leilung hnena zing ni chhuakin a rawn thlen tur thu hrilh a, chhak kawlkila a zung a rawn kah >n siar siar laite chuan, naupang aṭanga tar thlenga kan ṭawngṭai hla chhama tel deuh ziah ṭhin, zing ni chhuak tur chuan - 'Vawiin chu ka mawi dawn a nia, hlim takin tho teh," mi rawn ti ni tlat hian ka hria a, a ph<rawm dan a dang sur mai.

Khawvel thim mup mai chu zawi zawiin a rawn k>u hret hret a, nakin lawkah sap naute hmai khuhna puan hawn ang maiin, khawvel chu fiah leh faiin zing ni chhuak chuan a rawn k>u hawng dawn a ni.

Khawchhak kila van boruak zau tak mai chuan rawng a rawn nei ṭan a, ni zungz^m chuan a thlen tur chin zel chu a rawn thawi kual den den a; zan thim hnuaia tlang bawk thim runte pawh an ruhrel zawng zawng nen chhak lawkah an rawn zi mar ṭual ṭual a, ni chhuak chuan rawng mawi a rawn b^n nghal chat bawk a. Sava zing mu thei tawh lote pawh van boruakah chuan zalen taka chiap lap lap chungin an thlawk kual ziai ziai a, tum lawk pawh ni hran lem lo hian thingzar ro lutuk tawhahte chuan ṭhuthmun an han rem vel a, ka lo thlir reng a, ka ning lo. Ngawi rengin zing ni chhuak lawma an hr^m noh nohte chu ka ngaithla a, ka kham lo.

Chutih lai chuan khawvel chu a reh tlawk tlawk a - sava thawm mai lo chu! Kawmthlang leh vanzawla sava chiar bakah, kan dithlifarfemahte chuan thil ṭhat> a awm tehreng em maw ni, chawngzawng ṭhenkhat hi bang kil lai lum chuh ni awm hrimin an inchai ri nak nak a, ṭingṭang tum thiamte kuthnu ai paw'n chu'ng chawngzawng rual khatin kan bang kila thawm an chhuah chu a ngaihnawm zawk ni hian ka hria a; Siamtu rimawi duhzawng pianpuitute chetla thawm chu a n>p thei lul lo ve!

Mihring ke pen ri hriat tur a la awm hma chhung chauh chuan, siam zawh hlim ang maiin khawvel chu a mawi zo a! Mahse nakin lawkah zing ṭawng-
ṭai inkhawm dar a rawn ri val val ang a, khuarel mawi takte chuan anmahni enkawl tura Siamtu'n he leilunga a dah, mihringte an la hmachhawn dawn a, chutih hunah chuan savate chu an zalen tawh lo vang! Mizoram a ni tih hre ranin, anmahni vehtu an awm leh awm loh ngaichangin an hawi zek zek ang a, ṭul hlek lovah an ṭhuthmun an sawn chhen a ngai ang a, inveng ru ran chungin an thlawk kual zuai zuai tawh ang.

Kan piah ral maiah chuan Khawvel Indopui I-na hma lam daih tawh aṭanga tun hnu thlenga nausen leh putar chena kan riah hmun nghet tur, thlanmual chu a inpho iar a. Phul s^ng f> f> leh thingbuk ṭawi bim bemte chu zing ni chhuak chuan a chhun s>t s>t a, hnah n>ma daifim tling khawm, zing ni chhuak s^r-a han tle sep sep mawina chu sawi thu a ch>ng lo, tuikeplung ṭha mi ang mai a ni.

Zo thlifim a rawn thawk ṭan a, zing ṭawngṭai inkhawm dar pawh a rawn ri ta vel vel mai. Ral lawka lui luang ri hem hem mawina chu ui bauh riin a rawn luahlan a; van thiang k<k mai chu meikhu-in a rawn hliah ṭan a, lirthei kawchhung leh hnathawh khawl r<m ri thum chur chur chuan muhilte a rawn kaitho zel a... Khai! naupangho pawh an rawn tualchai ṭan ta!

Zalen taka zing boruak hiptu, va-te rualho chuan he leilung hi an thlen in a ni ve tho tih hre reng mah se, mihringte lakah thlen in an hnawng leh ṭhin tih an inhre chiang hle a ni ang, van boruak s^ng lamah an invawrh chho a; ṭhenkhatin thlamuanpui tham tura an rin thingbuk an b>l a, an awr^wl mawi takte chu chhuah ngam alawi an awm ta lo!

Zing ni chhuak mawi tak pawh chuan awmze neia mawi a tum tawh lo va, khua a tlang s^ng tulh tulh a, ni pawh a sa tawlh tawlh a, khawvel chuan a nunrawn a chhuah leh ṭan ta! Dan pangngaia an neih tawh, mut dawn a, "Khawvar thlengin min veng ang che," tia ṭawngṭai liam satliah mihringte chuan an mut hlana vengtu venhimna lakah lawmthu sawi chu an bat a nih lam reng reng an ngaihtuah leh tawh lo.

Chu zing ni chhuak chu anmahni tuipui z^wng z^wng nen an lo hmuak leh nghal chat a, ṭhenkhat chuan zingkar hla lo fahran mai, 'Lake of Fire' tih ang duangte chu kawr ruam kang faitir leuh tur khawpa ring hian an han ngaithla a! Rimawi leh mawi lo, khawl r^wl leh sa r^wl nen, engkim mai chu 'ka tlawm bik dawn lo' ti niawm fahran hian, awmze nei hlek lovin an inchhawn tluk tluk a; chuti ang hunah chuan tihluihna nen meuh paw'n lung a leng thei tak tak tawh lo.

Khuarel thilte'n sahimna zawngin kan Zoram hi min la pem bosan vek duh tak tak mai dawna hriatnate ka nei thar leh a, chutih rual chuan keimah leh keimah pawh ka indem - engatinge khawvel thianghlim lai chu hmuh tum lova ka lo muthilhsan fo chu le!?

Siamtu hian min phalsak zel se, zingah thawh haiin, khawfing chah hmain tho ziah thei ṭhin i la ka ti mang e!