Awm ve ta lo ila...

A khuhhawnna : A daih reite'n hriat reng an hlawh chuang lo va, a daih rei lote'n hriat loh an hlawh chuang hek lo. Simeikhu angin he leilungah hian hmuh theih turin kan lang ve zuai a, engtikah emaw chuan vawiina mite hi he khawvel aṭang hian kan la her liam vek dawn an ti. Huphurh vanga thihna hi kalkahlen theih a ni lo va, zuan thui lama lawmman ropui tak tak lo dawng tawhtute paw'n he thihna lui hi an zuankahlen thei dawn lo. Pa ṭawngkam thiam ber pawh a insawifihlim theih lohnaah hian tisa leh thlaraua malsawmna dawng chhah l<kte paw'n an dawn belh thihna chu an la liampui ve tho tho dawn! He lemchan dawhsan aṭang hian kan lan hun a la tawp ve ang a, puanzar khar a la ni ang a, chutih hunah chuan hlutna nei ve reng reng lo mah ila, leilung hi a va khawharthlak dawn em!

Min hre reng ang em?
Mi ropuite paw'n an chhuahsan ṭhin khawvel hi ropuina sawi tur nei ve reng reng lote paw'n kan chhuahsan ve dawn miau mai si a, chapo thei kan va awm lo em! Mi hausa hnukchat leh mi rethei hnuk chat nat dan a dang chuang lo va, a tu a te pawh hian thih chhan dang sawi tur nei lovin, lungphu chawlin mual kan la liam vek dawn a ni.
Inawmlemna khawvela mihringte kan boral hma; mi khawsa ho sapho pawh 'tak tak nuna' an la inphum lai, kum 30 liam tawhah khan he leilung hian a mikhual pakhat, Hank Williams Sr. hmangin hla nung an lo nei tawh a. Kha pa, nun suar khawkrawka hun tam tak lo hmang ṭhintu pa aw kha eng emaw chang hian ka hre chhuak leh
ṭhin. A aw mawi tak kha leilunga a dam chhan, a hmangaih em em mai khan hre reng se la, a ti lo. A ngaihtuahna fim leh ril ruih maite kha boruakah a la thâm ral dawn tih a hre reng a; zan thla >ng hnuai a, a ṭingṭang ngainat em em mai perh tlang tlang chungin -
"There was a time when I believed that you belonged to me
But now I know your heart is shackled to a memory
The more I learn to care for you, the more we drift apart
Why can't I free your doubtful mind and melt your cold cold heart,"
(Duh loh hriat rengnaa chang tur changin nun hi thihna hmaah kan lil^m a, kan inngainat poh leh natna kan insiam tam si...) a han ti a. Engtikah emaw a chhan leh vang duhawm lo ber, thihna hmangin a duh ber chu a la ṭhen kumkhua dawn tih a hre chhuak fo a. A dam lai ni chu a tlak hma ngeiin a hmangaih tan chuan a thinlung leh neih tinreng chu pek a, pek tam lehzual a duh a. Sisên leh thla >ng zung takngial paw'n a chhun na palh ang tih a hlauh em em, a hmangaihi nun nawmna tur engkim chu mahni inphat kim barh chungin a hlan a.
Mahse... engtikah emaw lei hnuaiah a la z^lsan dawn tih kha a chiang tlat a, chutih hunah chuan a hmangaihi chuan ṭap zawih zawih chungin, "Hank..." rawn ti ṭhin mah se, chh^ngtu tur a awm ve tawh dawn lo! Chumi suangtuahna ringawt pawh chu a va rapthlakin, hmangaihtu nunah chuan a va runthlak tak em! A ruang chunga pangpar leh mittui s<r tur te; a thlana hmeichhe pakhat, ṭap chunga indawm kun reng tur hmelte chu a han mitthla a.... Thlan piah rama a liam hnu-ah pawh a hmangaihi chuan a la duat fo tih rawn hria se a duh cheu a. Tichuan, a suangtuahna khawvel chhum zing phui mup aṭang chuan a hmabak khawvel chu lungchhe takin a han thlir a -
"Someday you'll call my name and I wouldn't answer
Someday you'll reach for me; I wouldnt be there
For you gone tired of all the love that I gave you
But someday, you'll wish that I still care,"
(Engtikah emaw ka hming hi i la rawn lam ang a, i mitthlaahte min la rawn hmu ang a... ka awm tawh dawn si lo....) a han ti a... A hmangaihna pek zozai chu a thih hnu-ah pawh a hmangaihi chuan a la hnemhnanpui theih cheu a ring a, a thlarau chuan thu tam a la sawi zuk han ring cheu a!
Nakinah tu emaw...
Nakinah chuan chanchinbu-ah a hming kha a lo la lang ang a, hawrawp hraw hreih hrawihin - 'Zaithiam Hank Williams a thi!' an la ti ang. Chutih hunah chuan a taksa chuan hlutna a nei tawh lo vang a, a aw mawi tak chu dah ṭhat a ni chauh tawh ang. A taksa chu engti zawng paw'n kuai let mah se, mahnia insaseng leh thei tur chi a ni tawh lo vang!
A beng bulah tute emaw kha ring tak takin an la ṭap chiau vawng vawng ang a; a taksa chu khumah mu mah se, 'Hank Williams' kha a ni tawh dawn si lo! Mahse a thih hmain amaha 'amah' kha hmangaihna leh duhsakna hmangin a lan chhuahtir fo a, amah kha engti zawng mahin thihnain a hneh ve thei tawh dawn lo! A thihsan, a hmangaihi chu duhsakna nen thlan aṭanga thurâwn pek cheu a la duh dawn si!
Chu'ng zawng zawng chu a han ngaihtuah nawn leh ṭhin a, a dam lai nun thlakhlelhawmzia hre turin a duhtaki tan chuan nun leh engkim hi pek mawlh mawlh mai a duh a; a thih hnuah a hmangaihi chuan khawhar hrehawm tuar lo se; nun ṭihbaiawm hi rawn hmachhawn lo se; amah ang bawka duattu mihring dangin rawn enkawl se a ti ṭhin.
A duhtak vul lai ni leh vanglai ni chu engtikah emaw a la chuai ve ang. Hmeichhe sam bu nalh tak ṭhin kha sam ṭuakin a la khuh ang a, mitmeng nung ser ser ṭhin kha hun leh kum hian a nuai chul rep tawh ang. Mahse chutih hunah pawh chuan amah, Hank Williams lo chu tu nge hmeichhe khawhar mittui hruk hulsak tur awm chuang ang? Mahse thlan chhung
aṭang chuan mittui hruk hul ahnekin, a ko chhuak tamtu mai a ni dawn tih a inhria. A suangtuahnaah chuan a hmangaihi chu hmeichhia, khawharna hlira khat tur angin a han his^p a, a hmangaih chuan (a awm ve tawh loh hunah) tu emaw a la mamawh dawn tih a hria: duhsakna hlan chungin mual liam a duh a -
"There'll come a time in your life, Dear,
When you'll need someone who will care
Someday you'll call my name and I wouldn't answer
For someday, you'll find that I'm not there,"
(Ka awm ve loh hunah chuan hmeichhe tana tih rual loh thilte i tih a la ṭul ang a, kei ka awm tawh dawn si lo....) tiin, a awm loh hun tur a han hmu a! A va lungngaihthlakin, a va lunglenthlak chatuan vawng vawng tak em!
A awm ta lo!
A concert-na hmun tur pan a, khualzin kawnga a tlan laiin Hank Williams chu a awm ta lo tak tak! A ruang chungah chuan a hmangaihi chu ṭapin, chau hn>p khawpin a ruang dai reih maite chu rawn ch<l mah se, kuta khawih rêng a hre tawh lo. Ni e, a sam bel tlen mai leh a taksa vawt riai maite chu....
A aw leh rimawi tum ri chu bengah la ch^m fo mah se, rik nawntir leh tlut tlut theih mah se, Hank Williams a awm tawh chuang lo!
A thih hnuin sik leh sa hi vawi eng emaw zah a inher liam tawh a; hla ṭo-na mual hre fuh ber zinga miin, a ngainat em em, ni sa vawl vawl leh ruah sur ri seng sengte chu khawvelah hian a thlen ngaiin a la thleng reng mah se... lungpui chungah tui la inkhawh per seng sengin, van khi a nih ang ngait> bawkin a la dumpawl reih reng mah se, thing ṭhan kin tar tawh tak mai lerah mupui a la fu fo mah se... khawvel hi a danglam ta!
Tlang leh ruam a danglam lo va, vaukam panin tui a la f^wn reng a; ni chhuak leh tla a khaihlak ngai loh ang bawkin, arsi leh thla pawh zanah an la lang iar iar a. Mi pakhat thihna chuan khawvel nunphung leh nihphung hi a thlakthleng chuang lo - zinga sava hr^m a ngaihthlak ṭhin leh, tlai ni tla tur a thlir ṭhin kha an mawi ngaiin a la mawi ta cheu si!
Chu'ng lei mawina ngaina em emtu zinga pakhat chu leilungah hian a awm ve tawh lo - chu erawh, leilung hian hria ni se la, thim leh >n ṭhulhin a s<n tur! Mahse hmeichhe pakhat thinlungah erawh chuan engmahin a thlakthleng theih tawh loh tur thil pakhat a awm a: thih hnu-ah mihring hian a mihringpui a la kan fo a, mi nung dama awmte hi nung ve tawh lo-te'n thl^n chhung aṭangin an la rawn be fo tih hretu hmeichhe pakhat a awm.
Chu hmeichhia chuan, mihring hi saruak mai kan ni a, khawvelah hian neih nei tlatin inngai mah ila, neih reng reng kan lo nei lo va, khuarel ding chatuan tur zawkte hi keini aia kumhlun tur zawk an ni tih a hre fo tawh ang. Mihringin a dam chhunga a neih hlut ber chu a mihringpui chunga hmangaihna kumhlun tur hlan leh, duhsakna tinreng pek mai hi a ni tih a hre chhuak fo tawh ang.
Nunna kan neih ve miau si avangin, kan la thi dawn! A va pamhmai em! Thi leh mai tur mihring hian kan thih hma hian eng-a-ti-nge mite'na min rawn hriat rengna duhawm ber tur, hmangaihna hi kan lantir mai loh le? A va har si em!
Awm ve ta lo ila... aw! ka awm ve a pawimawhna hi engti kawngin nge mi dang thinlungah a lan chhuah ang aw...?
"Someday you'll call my name and I wouldn't answer..."