Lukawlh pual!

A khuhhawnna: July ni 21 a lo thleng a, khawchhak lama chengte tan chuan Neil Armstrong-te ṭhian­dunina thla leilung an han rah chanchin tharthawh leh ni a ni. Mahse he khawchhak lamah hian mifing ve l>m lo, keia lo pian ve ngawt avang hian ṭhiante hnen aṭangin duhsakna thu a ri ve nawk nawk bawk a. Ka lukawlh thute pawh min hrilh tel nghal an awm nual a, rin ai daihin lukawlh hi thup a lo har dawn a nih awm hi maw!

Kum 2004-a gospel camping kan chhuah tuka ka meh kawlhtir aṭang khan heti hian kum 10 chhung chu ka lu hi a kawlh ang angin thlen chin apiangah ka la pu ve ta ngar ngar a, a rei ve thawkhat ta bawk a, thup rual a ni lo ve bawk a ni! Ka lu anga chiang hian kan camp laia kros thu kha pu chhuak ta zel ni phei ila, tun ai ngawt hi chuan fakna hla ṭhenkhatte hi chu ka sa huai ve deuh mahna.

Hetia kum 10 chhung teh meuh ka sam chungchanga ngaihdan ka la thlak chhin eih loh lai hian, min lungrualpui ve ṭhintu-a ka ngaih - Beckham te, Brazil Ronaldo te chuan min phatsan ngun ta malh malh khawp mai a. Anni pahnih ai hi chuan ka rilru a nghet deuh zawk a ni ngat ang! Bruce Willis te nen erawh chuan kan la lungrual viau zel e, Rinzual!

Naupan chhiat lai khan vai tawh phawt kha chu kan hlau a. Ngaihsan kawngah erawh chuan hmusit ru tak kan ni. Vaiho vang nek khan sipaite pawh hi kan hmu neu-in kan tham lo ta mah zawk niin ka hre hnuhnawh ta mai. Mahni ngam zawng takte'na lu an meh kawlh ve chuan, taksa pum nghing lawih khawpin kan han "Vai lu k^wng tuai met, tuai met" ta ṭhin a! "Lukawlh lukawlh thangah ^wk ^wk" tih ang duang te, "Lukawlh chu uiin an bauh duh" tih zirtirna te kha kan hriatthiam zawng tak mai a ni a, samin bek a hawlh zat nak nak tawh chinah pawh lu meh chu - "Ka pa, he no hian min pel lul rawh se" tih ang vel kha kan ṭanna a ni. Nia, mittui nen a ni, lu meh kha kan tuar ni!

Mahse keini thluk dan leh thlek dan ang ngawt kha a lo ni lo. Mihringte hian mi dang aia danglam sa tawh kan nihna hi pawm ṭha ve ta mai lovin, danglam chunga danglam lehzualna hi kan dap a, kan zawng a, chu danglamna chu sam enkawl danahte hian bet tlatin kan hria ni maw, lu buk hun leh k^wn hun te hi mi ṭhenkhat nunah chuan a lo inthlak zut mai hi a lo ni zawk a. Keini'na lukawlhte chu ui bauh hlawhna tawk vela kan ngaih laiin, hman deuh lawkah Britney Spears chuan 'news' siamna'n (?) a sam an han ziat kawlh miat mai a. Sawi zui pawh a hlawh nek pek a nih kha.

Mi bik nih duhna hian hringfate hi min aizial hneh ngawt mai. Kan lanchhuahpui dan leh inpholan dan a dang mai pawh a ni. He leilung kan luahza del del lai hian tuemaw chuan tuemaw aiin min hmuh leh ngaih dan danglam se, tia rilru pu fan fan ṭheuh kan nih n^k fam chuan, eng aiah nge awmkhawmna zinga lu buk bik nih te, lukawlh bik nih te an lo tum a nih chuan an duhdan kan ngaihkawihsak ngawt bik ang ni - an uchuak khawlo a nih ngawt loh chuan.

Kan lan dana hi kan inpuanchhuahna mai ni lo, kan chhinchhiahna hi a ni tel roh bawk a. Chhan dang nei thuk em em hran lova keini ang lukawlhte mai mai pawh hian pawimawhna thuk tak hi a nei ve tlat zel nia! Kan lu hi 'zawnawlna' a ni a, kan hming leh hmelah te, kan nihna leh eng hna hnaah emaw hian a bet tel ve tlat a, mite'na min mitthla thiam dan turah kan lu hian kori a tu thui ve tlat a. Kan 'signature' ropui a ni ve ngat asin.

Keimahni nena sawizawm inhmeh riau thilte hi kan hisaplawk hranpa ni lem lova kan neih a awm a, chuti ang neih tuma dap ta reng reng an awm bawk a, hlawkpui ṭawk tham ni lem lovah chuan chhawrbawl ve theih deuh a ni tlat. Slash-te ang hi chuan an lukhum t>-te hi chu keini leh lukawlh inkawpte ang ai ngawt chuan an hlawkpui deuh turah ka'n ngai ngawt a! Shakira paw'n a mawng s>p sawi kualte chu 'amah' a innihtir bawk a ni ang, tunlai inkhawm bang haw kawngah pawh Shakira hming a ri nawk nawk fo!

Chuvangin, Korean thlipuite chu lo tlehin, tleirawl lu buk chhah pui pui rawn inchhepchhuak zur zut mah se, kan lu a kawlh avang ngawt hian daihlim kil thim lam chuh tur kan ni bik lo ve! Mite'na min hriatrengna hi kan hmelṭhat leh chhiat thuhlaah te, kan dulkiar leh beng parh danah te pawh a innghat ve ch^wk a. Kan lu buk leh lukawlhah te pawh a innghah miau chuan 'a keimahni' ve tawk a ni lo'm ni? Upa-in "Engah maha than lohva ai chuan hnap tamah tal an than na ngai e" an tihte nen paw'n a inz<l ruai mai ka ti!

Tih taktak arpa tuihalah phei chuan, lukawlhte ngat phei hi chu Van paw'na thlavang a lo hauhsak tawh kan ni a, zawlnei Elisa pawh kha keimahni ang bawka lukawlh a ni asin!

Khatia zawlnei Eliza rawngbawl hna a chhunzawm hnu lawk a, Jeriko aṭanga Bethel-a a han chhoh khan mipa naupanghovin a nuihzat ngawt pek a. "Nang lukawlhpa, han cho tawh; nang lukawlhpa, han cho tawh," an lo ti vei rawk a, Elisa khan tuar dai mai duh bik hek lo, Pathian hmingin anchia a'n lawh piap mai a. Chumi hnu lawkah ramhnuai aṭangin savawm nu pahnih an lo chhuak a, naupang sawmli leh pahnih an rawn seh ta mai a nih kha!

Mahni tuipui ang z^wng z^wngin Bible hi her kual ngam ni ila chuan, "Lukawlh chu savawmin a chhan," ka ti ang!