Guest writer
Lalzarmawia
I hming a chuang tawh em?
A khuhhawnna : "LRMA, kAn la Ngai dAwn mAng e, khuArei Ah!!!" tih ang duangte kha khawi lai bangrelah emaw a inziak ki-kawi ngiai ṭhin. Naupang chengvawng tak ni ve awm hrimin, hming ker ni leh thla, a kum nen lam a inziak ve thlip thlep fo a; a ziaktupa hmel han enin, kan lung a tihl>n a, kan thlarau tana chaw ṭha a pekna tur reng reng hi a awm kan ring lo. Mahse kha naupang hnap tawlh per pur, a biang dinglama hnap hrukna hnu, khir ki v^n ṭhin kha, khawi ilo vah chhuah nikhuaa a ruaiṭheh haw lam hmuh tur a van pharh hnu hi chuan a ngaihawm ve ṭan ta phian a. Khelmual goal bana a hming kher lai hmel turte chu engtin tin emaw, mihring hmel pangngai ang pu ve nial chung hian kan remkhawm ve ta nuap nuap fo mai!
Eng vang nge ni ngai, ka hre lo. Hmakhawsang ata tawh, mihring hian eng vang teh reng em maw ni, hming kher leh ker lamah hian kan ṭuan hi kan ti ṭha tlat zel mai a. Hamurabi-a hun lai aṭang tawh khan, Babylonian unaute nen, he bangrela sakhmingthan chungchangah hian a tu-a te mah hi kan danglam chuang lo ve! Classroom-a 'LZMA' tih lian ang kelh kulha a inkherna hnuai lawka roll number leh class zat inziakte kha kan ni tin nun tinuamtu kha a ni tlat pek a. Blackboard-a hming lamtawi ziak hmasa ber ni tura sikul thleng hmasa ber nih tumna thinlungte kha tu siam nge ni ta ngai ang?
'Don't make a noise' tih piaha 'A khi, sazu...' tih lo inziak leh ringawt ṭhin te; 'Tu nge chemfawngah hnap t^t?' tih thumal phena fiamthu inpawlh chiat ṭhin te kha, tunah chuan sawi nawn leh a rem tawh ṭut si lo! Thlen chin china hming kher tur emaw ti ta tlat ṭhinte khan eng ropuina mah kan beisei lo - khawvelah hian kan awm ve ngei, tih lantir kan duh hlawm vangte pawh a ni ta ve ang? Khatih lai khan khawvelah hian hming kher tur a nih hre lovin, a hming putu khan kuthlei thil tak meuh meuhin hming kha kan kher satliah mai mai kha a ni a, tun hnua ka ngaihtuah nawn leh ch^ng hian, bangrela hming kherte kha thil atthlak tawpkhawk ni theiin ka hre lo leh ta tlat pek.
Mahni thil neih hlut deuh apianga hming kan ziah thlip thlep ṭhin lai te, bang remchang leh, motor darthlalanga hming kher nuam kan tih tlat lai te khan, kan pian hma daiha khawvel lo chheih per vel tawhtute paw'n hming an lo kher ve ṭhin asin. Lungpui chungahte khan salu leh pasalṭha thl^ an ker a, hming ker tel nachang an hriat loh lai kha 'mawl' an intihna lai tak pawh a ni maithei. Keini chuan chem, perek, chheni, meihawl, chalk leh pen tui hmangin remchang kan tihna lai apiangah kan hming kha kan burpui chawt chawt a, kan han thlek vang vang a, lungawina kim khan min bual hlup hlup a, khawvelah hian kan awm ve a, khawvel hi kan ta a ni, tih kha ngaihtuah chhuah nachang hre ṭhin lo mah i la, he khualzin kawngah hian mikhual ang maiah kan inngai thei lo.
Ka awm a, ṭhiante kha he khawvelah hian an awm ve bawk a. "Khawvelah UFO nge Israel-in thil tithei zawk?" tih mai maite kha kan inhnialna ni ṭhin mah se, keini aia thil tithei zawk awmchhun chu kan pa-te kha an ni. Pa-te kan ngaihsan lai, Superman tak taka kan ngaih laite kha chuan, pa ber in sak chhung leh bangrel pawn lam kawngpui ep-a hming han kher kulh maite kha thlamuanna thuchah, a taka lantirtu a ni. Nun hian eng'e a mamawh kan hre lo va, beidawnna leh vanduaina hi bangrel chung lamah daih awm turah kan ngai a, min rawn tlak hnan dawn a nih paw'n - 'pa kan nei!'
Naupang dangte neih ang kha nei ve lo fo mah i la, kan neih loh lam aiin, kan neih lam hlir kha kan tuipui a; kan neih ve loh thil chu kan sawihn^wmsak a, a nei lotu thinlung kha a dam zawk daih! Ni chhuah leh ni tlak inkarah hian zawhna tam tak kan chh^k chhuak a, a chh^nna chu kan bengkhawn hran tawh chuang lo - keimahni kha hming kher thei tura he leilunga lo awm hi kan ni a, khawvel leh zawhna tam tak chhanna chu keimahni kha kan ni asin!
Khati taka mahni hming kher kan ngaihpawimawh a, kan duat hleuh hleuh lai khan nun hi a ṭhang a, hun hi a liam a, ralkhat aṭangin kan leh thlir ve fo ṭhin ang, tih lam reng reng kha kan chh<t pha ngai lo. Lui tui luang ang maiin kan hun hi a liam pur pur a, kan nih dan leh pawm zawng leh duh zawng pawh a danglam ta. Nun ph>k hlui kan keu a, hun hlui bung leh ch^ng kan thlir ch^ng ni a lo thleng a, bangrela hming kher lai ni te kha fiah ber berah a ṭang ta fo mai.
'Bang rawh se!' kan tih ṭhenkhatte lal tura kan duh leh fo hnuah hian, kha'ng kan hming kher leh ṭhiante hming kher te kha chu an nih ang ngai rengin an la inkher a, lungpui chunga ṭhiante hming kerte khan thawnthu tam tak min lo hrilh thar leh ṭhin. Ṭhenkhat, in chhunga hmun lailum luahtu thingzaite kha tunah chuan chawmpang karah chul rupin, mawih chhe zetin an tlu b>ih a. Ar in sakna ch^k atan takngial paw'n - hluihlawn an ni zo tawh. Chartin ṭhenkhatah erawh chuan fiah lo ruaiin, 'LTKA' tih ang duangte a la inrin ve riak riak a, mitthlaah mipa naupang mawza tumtel pet ṭak ṭak lai hmel a lo lang nghal a. Ṭhenkhat hming lo lang erawh, a putu taksa-te'n thlan khur chhung an luahlum zo tawh a; lungpui hal darh tawh hnu kara 'VL...' tih lo la inker kalh maite chu - a hming putu mihring khan hlate khuaa khawi lai kawngka lu chungah emaw chhungkhatpa hming a ziahsan ta!
'Min theihnghilh suh' titu tam takte kan hriatrengna lairila kan hriat reng tawh loh fo hnuah chuan, taksa a ṭhankin hnuah pawh rilru hi chu a la ṭhang zel a, boruaka thu l>ng tam takin min la rawn den dawt dawt ch^ng awm ve ṭhin mah se, hriat reng atana kan duh tam tak chuan mual an liam ta fo mai. Kha nunhlui khawvelah khan ka pu paw'n hming a lo kher ve tawh ṭhin a ni awm e. Kei paw'n ka pu sulhnu zuiin ka hming kha langsar lai leh kawmk^rah pawh ka kher ve fo a. Kha hming kher an hmuh ch^ng apiang khan a hmutute'n kei hi min mitthla zui ve nghal ka beisei ṭhin vang pawh a ni ang e.
Tunah zawng, hming kher rual kan ni ta lo! Mahse hming kher hun chu a va ni lawi si em! Ni e, tun hi hun ṭha chu a ni a, tun hi hming kher hun chu a ni! Naupan laia ka hming ka kherna ṭhin bangrel leh hmun remchang dangte chu hun hian a hnawl zo tawh a. Tui>k leh pat>k, hun leh nun, sik leh sa leh thil dang te'n an nawh reh tak hnuah chuan, hming kher ṭha leh turin min duh a. Tl^ng hriat loha hming kher satliah ngawt tawh lovin, khawvel hriat thama ringin, leilung innghahna lungpui chungah hian tuboh leh chheni lek k^ngin, ka hming ker thawm hi ri chhawr chhawr se la; mite'n he leiah hian ka lo piang ve ngei a ni tih an hriat reng tawhna turin, fiah leh fai, lian leh hrawl taka hming ker tura koh ka lo ni!