"OK!"

Mahni nih lohna pui inchhal a, mi dang nih ang phêk ve ngei tuma ṭan la a, chhungrila kawrawng tlat si leh, mite hmuhpui loha hrehawm tuar tlawk tlawk ṭhin tam tak hian, inthup tumin, engkim mai hi awlsam taka tih 'OK' mai ching ve bawk ṭhin mah se, an lan dan piah lam zuk hriat chian meuh chuan he 'OK'  hi lemchanna mai a ni duh viau. Pawn lama ena ṭha duam; chhungril lama bakkhate hnah ang maia ti deuh hlur lawi si hi kan tam hle dawnin ka hre ve khanglang ṭhin a; mi tam tak 'OK' hi chu engemaw beisei neih let vang te, fel anga lan duh vang te, zawmthawt mai vang te, thil chik peih loh vang leh, eng eng emaw vang mai maia ti 'OK' ve mai mai hi an ni duh viau asin. 

Lemchang reng renga mi tam zawk an hmanhlelh a, inthup tum reng renga mite an inphawrh lansarhna ramah hian kan chungah eng pawh lo thleng se, 'OK' thei zel tur mihring hi kan awm ngai ang em? Pathianin a duh chu a dah sang a, a duh chu a hnukhniam a, tih thute hi sawi ve fo hlawm ṭhin mah ila, hnuai lam aṭanga chung lama chhoh chuan 'OK' pawh a la samkhai viau maithei. Mahse chung lam aṭanga hnuai lama chhuk turin Pathian hian min hnawn ta se, 'OK' kan la ti thei cheu ang em? 

He 'OK' chungchang ka ngaihtuah lai hian thil tam tak ka ngaihtuah a, ka ngaihtuahna tam tak zingah chuan mi pakhatin min rawn beng harh a, chu pa leh a chhehvel boruak chu inawih lunglen velna tur lam hawi reng reng lo; hawi thawvenna'na tlak loh tawp leh han phûr hluahna chhan tur awm reng reng lo hi a ni.

Amah hmu tur chuan khawvela hmun mawi lo, hmun chengker leh hnuchhawn ram hawi a ngai a. Mihringte'na ropui tia kan hrilhfêk kutchhuak thil reng reng hi hmuh inbeisei chi a ni lo. Chu pa kiangah chuan i chil a pût ngai lo vang a, i chil a rial ṭhelh ṭhelh ṭhin zawk ang. Mawng kham hnawk khawpa ṭhut ai chuan kêwng dawma din luih hram hram te pawh i thlang hial zawk ang a, thil tuihnai zawng zawng hmu si lovin, a tuitang lo lam hlir te pawh i hmu ta ve ang. 

Lirthei aiah i ke i chelek a ṭul ang a, kudam aiah buh hmun a thlirpui ang che. Thingpui dawr changkang leh dawr hming pawh awmze nei raih lam chu bengkhawn ngaihna pawh hre lovin, chhuat laiah ei tur a vawm lir tup tup ang a, bel uk khek khuk-ah tui a chhuang khu hlut hlut ang a, man chawi leh chawi lo pawha ei chakawm thil i hmu tlem pharh pharh viau ang. Kawtlai vaivut khu leh chabet ringawt pawh i tan chuan buaina laih tham a nih laiin, ani chuan thleng silna tuichhia pawh a infartir fup fup duh mai ang a; tarmit dum vuah chunga nalh i lo khelh ve rauh rauh laiin, ani chuan kawmchara vawkpui vun bawl ṭuak maite chu kutlawngin a hiat khu sut sut ang a, a rilru-ah a lan miau chuan, kut pawh silfai tawh hran hlei lovin fanghma emaw a vel leh chawt chawt mai bawk ang!

Chenna ngai loh ram hi i fang duh rau rau a nih chuan, mihring nuna thil awm hi hriatchian chaka i tuihal a, nun ropui haiṭeh tak tak i duh a nih bawk si chuan, chu pa chu tlawh la, khawvel ram zau tak hmu lo mah se, nun ram zau tak i hmu ang a; leilung luah chinah hian i mihring mihrinna paw'n hlawkna namen lo a pek ngei che ka tiam ngam tlat thung. Chu thlanawm loh khuaa mihring danglam leh a chhehvel nun chu a thianghlim a ni. Kawng­dungah thuziak tarmawi, thufing tak tak intar ve lo mah se, an nun chu thufing a ni a, an thiltih chu tarmawi a ni.

Khumah mutbu mang mang lova mu i hmu ang a, a mutna khum bul bang chu a awng suar ang a, in chung far an dawhna bur pawh chhuatah a inhung fer fur ang. Khumah chuan chhungpuinu na tuar chu a rum leh nghat nghat ṭhin ang a, "Ka tlin dawn ta lo a ni ang e," tia beidawng taka a han thaw leh halh ri pawh i hre fuh mial maithei. Chu nu sirah chuan naupang, kum thum mi vel bawr, tangseh na hnu khat lûk mai, a hmuhnawm zawnga han thlir ngial tum pawha mi rêp lo thei lo tur khawpa nasa i hmu tel ang a, a muhil thei lo a inleng bat bat ang a, khawlum huam huam hnuaiah a ṭap chhuak leh hlut ṭhin ang a, chu in chhunga boruak chu a ipik thlak i ti khawp ang.

Chu chu pindan chhung thil a ni. Pindan pawn lam ringawt pawh en la, i hah ang. An leikapui chu a bu lûk lûk ang a, a ri ruap ruap ang a, a kar laklawh a êwng huang ang a, ṭhenkhat lai pawh a mawih tawh tih hriat takin a chul hnêwng ruih ang. Bang tlabal chu hmuh kên tum ta hram hram pawh ni la, in chhung tlabal lutuk erawh chu, a chhunga i luh ve miau si chuan hmuh hmaih theih chi a ni dawn lo. Bungbel leh mistiri kutchhuak thil reng reng hian chu in chu a la luhchhuah ngai lo tih i hmu thiam sa nghal vek ang a, rawk an tawk ta emaw tih tur khawpin an tlabal ang.

Mahse in neitupa chu belbul la, kawm la, a thinlunga thu awm chu han zawt teh - "Heti hi ni chauh mah ila, kan la khawsa ve naw naw thei a: engkim mai hi lawmna tur hlir a ni zawk e." Tunhmaa an intunnunna ve ber, an vawkpui leh an bawng rualte chuan tunhma an pha ta ngai lo. Vawk in a rawih a, a chhungah vawk pahnih la awm ve bawk mah se, kawṭhalovin an tludun a, an chil phuan a tla berh luai a, an zun leh ek chuan an taksa a tiberh nuaih a; an kuang nawr chu sawi loh, an ha chang ṭhial rik ruap ruap bak chu thawm pawh an nei peih lo. 

Bawng huangah bawng lê pakhat, a ṭhi awrh nena ri leh rek rek ṭhin bak chu an ṭhenawm khawvengte paw'n an hmuh lohna a rei ta. Bawng chaw an sahna hmunte lah, ni sa rum rût hnuaiah chuan alh pup thei tur khawp hian a ro zo va, laiking bel rawh mai lo chu, ral-ah lung han tileng thei tur thil dang reng reng a awm lo. Bathlara khawibu chhep takngial pawh an rau zo tawh a; an sazupui khawi a tlan bo a, kawmthlanga thlai te reng reng chu an ro ri re a, ṭhal khawkheng chuan dim lo baksak hian a nuai a, lei char zet mai hnuaiah tuihna han zawn tum eng ang ṭhin mah se, beidawnna mai lo chu eng tuihna hma mah zawn chhuah tur a awm lo.

Chu lai hmun chu ram hruaitute paw'n an paltlang ve fo a, an tlan pel a. Sakhaw puithiamte paw'n an tlawh fo a, an chawl ngai lo va; khawtlang mi zahawm tak takte paw'n an hre reng a, ṭhat an chhuah chuang lo va, an chan ang chu mi dang chan ni ta se, sêr thi an awm ang em, tih mai maite i ngaihtuah chhuak hial ta ve ang. Mahse in neitupa chu belbul la, kawm la, a thinlunga thu awm chu han zawt teh - "Heti hi ni chauh mah ila, kan la khawsa ve naw naw thei a: engkim mai hi lawmna tur hlir a ni zawk e."

Engtiang taka pa hausa nge a nih tak? Sum a nei lo va, 'neih loh' tih mai loh chu engmah neih a nei lo. Khawvelah hian eng hi nge dam chhantlak ni a, a eng ber hi nge beisei tlak ni ta chu? Nawmsipbawlna hi mihring hnungkhirhtu a ni a, chu pa hnung chu eng thil mahin a khirh ve ngai lo vang. Hahdam tura mihring induhsakna hi tawrhna hmahruai a ni a, chu pa chu a hrehawm ve thei lo vang. Mamawh inpek ngawt hian lungawina kim aiin, kumkhaw duhkhawp lohna thinlung a kai chhuak ṭhin a, chu pa lakah chuan lungawi lo an awm ngai hek lo vang. Induatna hian inhuatna leh rilru piangsual bak thlen tur tam a nei lo va, chu pa lakah chuan hel leh nuar an awm ngai dawn lo. Sum leh paiah a innghat ve lo va, a duh anga khawvel hi her turah a ruat lo va, a chunga thleng ang zelin khawvel chu a hmachhawn a, chakna chuan a tawpah a ta neih leh bik tlat ṭhin. 

Thlasik khawvawt vin tak hi phunpui mai lovin, nipui lo her chhuak leh tur chu a thlir ṭhin a; ṭhal khaw ro hnuaiah fur khaw hnawm a thlir lui tlat ṭhin a; natna khumah damna a chhar ṭhin avangin, atan chuan nun hi nawmna a ni tawh sa a, chhan nei lovin engmah hi a thleng ngai lo, tih hre tlattu thinlungah chuan chiang takin "OK" tih hi a inziak ṭhin.