I nalh, i mawi!

Thuam mawi ngai, belh chhah ngai, thup ṭhen ngai, hai lan leh pho lan duh tel bawk kan nih hlawm roh avang hian a chang chuan kan saruak hi kan zahpui a. Saruak thupna'n theipui hnah chauh lo deuh kan melh a, kan dap a, kan zawng a. Kan chutihna lamah chuan a ṭhen chu kan tlu silawng a, a ṭhen chu kan beisei aia sangah kan lawn phah a, kan dinhmun a inkawlkalh nuaih a; a tu a mah chu han lungawi ta hliah hliah kan awm chuang hlei lo va!

Siam kan nih dan ang ang pawm loh hi mihring zepui zinga mi a ni ve khat ang. Tui luang ang maia rilru che reng, ngaihdan leh suangtuahna pawh thlak kual fo kha kan ni miau a, he kan dam chhung rei lo te, mumang anga ral leh riai riai ṭhinah hian lungawia mual liam ta hi kan v^ng pharh pharh viau maithei a ni.

A sum leh pai te, nihna leh din­hmun chungchangah te hi chuan "Ka ngaihtuah zawng a ni lo ve" han ti luam bawk vei ṭhin mah i la, kan chhungril hi chuan dap ruk ruk chang chu a nei fo lo thei lo. Chuti ang bawk chuan kan hmelhmang lan dan leh i chungchangah hian induhkhawp lohna thlarau hi a thawk rip thei rup rup hian ka'n ring khawpah! Kan tih theih ni hlek si lohah hian nalh leh mawi zualnate hi kan hisap luahtu lian hi a ni hlawm fo lo'm maw chu?

Lungkham leh helhkam ngah ṭun chunga tlai nilen chiam chiam hi a ṭul ber teh chiam hian kei, ka hre ta lo. Kan nih dana kan lungawi mai hian nge, kan lungawi mai theih loh avang hian kan ṭhan a ṭhat zawk ang a, hma kan sawn phah zawkna tur, tih lamte erawh chu mahni ngaihtuahna zawn aṭang chauha teh chi a ni thung ang. Kan tehfung lek dan a hrang nuaih ang a, mi dang tehna nena khai pawlh luih hram hram chi ni pawh a nih lem hmel loh.

A enga pawh chu ni se, mahni inpawmna aṭang lo chuan lungawina a chhuak dawn lo va, chhungril lam kan chinfel hma loh chuan nalh leh mawi te pawh hi a piang hlen thei dawn lo niin lang a. A reltu leh a thu ber kan nih vek theih lohna ram zauah hian thinlung bawk hi buatsaih thiam a lo ṭul leh ṭhin.

Mi ṭhenkhat, an hmelhmai leh pianhmang lan dana insit a, hnual a, "chuti deuh zawk se" ti fo ka hmuh hian khawngaihthlak ka ti ve khanglang ṭhin a. Ka khawngaih chhana chu kei aia an hmelchhiat deuh vang leh pian nalh loh deuh zawk vang a ni lo ve! An tih theih teh chiam awm chuang lova lungawi an zir duh ta mai ṭhin lova chu "khawngaihthlak" ka ti ve fo a ni. Nuih chhan tur te, beisei chhan tur te kan la neih ve ṭek ṭek chhung hi chuan kan nun hi a thlawn lo va, kan hlutna hi bo thei tura duan pawh a ni hek lo. Kan lan dan leh nih dan aṭang ngawtin engkim hi teh a ni lo tih hre ran chunga keimahni zawk hian mahni leh mahni hi "I nalh takzet!" kan intih ve fo-te pawh hi a ngai alawm maw le!

Engah maw khawvelah hian kan hmaikawr te, kan vun te hi mi dang ang tur hrim hrima kan han hlih kher chuan ang le! Kan hmel, vun leh pian te chu a hmutute mitah ni lovin, an thinlungah a chuang a; kan hmingte pawh hi an thinlungah a inziak ṭhin zawk a ni lo'm ni!? Kan thlir dan leh pawm dan a danglam phawt chuan Siamtu mitah chauh pawh ni lovin, keimahni mitah pawh hian kan mawi em em vek thei a, mi lungawi chu tute ma'n an hnualsuat thei lo va, tu mit mah a tikham thei bawk si lo!

Ka ṭhian, he nula "senior" pakhat hi han hmelhriat teh le...

Chu nula chu a "tlawngawl" rei ve deuh tawh a. Ṭum khat chu darthlalangah a han inen a. Nia, darthlalang hmaah chuan a han inpenparh kual vel a, a beih lah a bei rei na ngiang mai. A hnung lam darthlalanga a lan dan erawh a inhre lo va, a inhmu thei mai hek lo. Mahse, a'n inher kual a, a hnung lama darthlalang chu a'n hmachhawn ve leh thung a, a phu zuk mai! A nu'n a lo en reng em maw-te a inti hial — ama thla ngei a ni si!

Hmanahte kha chuan a khuavang chhinchhiahte kha nalh a intihpui ve ṭhin asin maw le! A biangsumte pawh a hmelṭhat tizualtu ber kha a ni ṭhin a ni lo'm ni? Mihring aikaih leh aizial theitu ni thei hial khawpa a vul lai par chhuantirtute chuan engah tehlul nge pangpar ang maia chuai ve mai an tum chu le? Hmaite pawh hi a lo z<r khawlo zo thei ngai a ni maw? 

Inchhung sekrek khawih reng rengin ni tin hun a hmang zo va, hun her zel hian mawina leh duhawmna te pawh a her liampui ve zel, tih lam ngaihtuah hman paw'n a khawsa ṭhin lo hial a nih kha. Hun hi a ding reng thei si lo va; chuti a nih chuan, a nalh reng theih loh chu a ni si!

A han inen leh ṭhin a, hmanah kha chuan darthlalang hmaa din kha a chaw-tui ber a ni hial! Tunah zawng, a han inen thuak a, a duhtawk ta khawp mai! Kum 20 kal taahte kha chuan darthlalang reng reng hi a "darthlalang hmanthiam" kha a ni ve vek ṭhin a, darthlalang paw'n a hmaa hmeichhe nalh chungchuang chu an en kham bikin a rinawm loh hial ṭhin a nih kha! Mahse mitmeng nung sar maite pawh a lo dul reih tawh chinah chuan... khawvel hi a lo upa ta!

Kum tam a liam ve tawh miau va, mawina leh nalhna thurukte chu tisaah hian a awm lo tih hre rual a ni tawh a ni lo'm ni? Tunah chuan "phanchang" a lo kai pha ve tawh a, kha'ng vanglai nun vul nite kha chu 'hmanlai' a ni ve tawh tur alawm! 

Tichuan, a kiai ta sak a.

Hun kal tawh kha a ko kir thei tawh lo va, a thu-in khawvel hi a inher lo tih a hre chiang ta hle. A duhawmna hloh ta duai ni-a a inhriat hnu lawka chu ngaihtuahna thar lo lut chuan a chantawka khuarel pawmthiam turin a zilh-fing nghal a, a thinlung chu lawmna-in a khat ta zawk a.

Darthlalangah chuan a hriat ngai loh mikhual hmu tawh mah se, a mit chu a han en vang vang a, tunah chuan a mitmeng chu leplerhna themn>m tel lo, finna leh ngilneihnaa khat a lo ni ta. A tisate pawh chu tunhma ang khan mipa han l>m velna'na duhawm tawpthang lo ni ṭhin mah se, a inthehdere-na hmanrua mai a ni — tunah chuan rinchhantlak tisa a lo pu reng tawh zawk alawm! 

Kum kal tate kha chuan chuti angin a inhmu ngai lo: tunah chuan mihring a nihna a inmanchhuak thiam ve ta. Nalh leh mawi chauh a khelh ṭhin khan pawn lam leh chhung lamah a ti-awngrawp mai mai a lo ni! Tunah chuan mawina dik tak, nalhna dik tak chu amahah a hmuthiam tawh a, nun hi a va mawiin, hun hi a va lo hlu em!

"I nalh, i mawi... i ṭha takzet!" tiin darthlalang hmaah chuan a phun sap a, lungawi takin a kal sawn ta a.