Khawiah emaw

Hman deuh khan ṭhian pakhatin thu min rawn thawn a, "Heti ang zanah hian ralkhat ka han thlir a, hla takahte sawn mite pawh an lo awm ve a, an êng vê vê a" tih thu hi a ni a. Khaw thim hnua zinkawng han zawh chang hian kei paw'n ralkhata eng khua emaw lo êng de thliai thliai hi ka thlir ve fo mai a, pa êwmnêm ta chu, lunglen hi a kal nghal deuh ruih zel mai a! Boruak mel aṭanga teh pawha hla tham fê-ah chuan eng ang zan tak chu hmang ve ang maw, tihte hian ngaihtuahna a luh ta mai mai ṭhin a. Tute emaw chu an in-rim ve ang a, tute emaw chuan fianrialah Van lam biakpawh tumin ṭan an khawh mek emaw a ni ang a, tute emaw chu khawhar inah an lengkhawm mek emaw a ni ang a... Khawiah emaw hi chuan kan nun dan leh nih dan hawi lo zet hian tute emaw an khawsa mek a, kan thlen chin, tawh chin leh tem chin aṭang ringawt hi zawngin mihring leh a khawvel hi han teh puat chi rual a lo ni lo takzet. 

Hmanlai lal leh tunlai pa nuamsa te'na nipui in leh thlasik in neia khawsak an rel kual vel ang deuh hi kan ni a - han ti teh thêwr i la. A chang hi chuan kan dinhmun a ṭha veng vêwng viaua kan hriat tawh chinah hi chuan mi dang chan lam hi chu kan ngaihvenin kan bengkhawn thuk duh teh chiam pawh hian a lang lo. "Mahni puar chuan ṭhiante rilṭam chu a tawrh theih" tih ang deuh vel hi kan ni fur mai lo'm maw chu - kan chenhona tual zauah hian? 

Meipui alh vanglai ang hrima chunga turnipuiin sat dan theihtawp chhuah ni awm hrima "ṭhat" a chhuah dana-te hi, kan dinhmun azir hian a inla-hlei ve ngawt ṭhin mai. Ni a han sa ṭang ut a, khua a lum hup hup a, thlan a dir zeih zeih a, boruak a uap churh a, kan han inzêp a, “Ruah sur se aw... Thlasikte ni leh tawh zawk se...” te kan han ti a. Mahse keimahni chauh inngaihtuaha khuarel laka kan vuivai thu kan chhah chhuah laite hian tute emaw chuan an thlai dipdaltu leh dip ral thei hialtu hlo an thlawh a ngai a, hlo a thih theihna'n ni sa ṭang ṭha an mamawh a ni. Ruhseh vei leh natna dangin a tlakbuakte tan chuan ṭhalkhua hi hun duhawm a lo ni bawk a. Intuam lumna tur ṭha nei ve lo tan phei chuan thlasik bawh kêna nipui huna chen reng maite hi duhthusam têwpintai nei lo a ni hial ang chu! 

Chutih lai karah, ni sa leh khaw lum hre chang mang lo va, hmaizah leh boruak vawnna khawl hnuai a, dawhkan rinchhana hna ka thawh lai hian khawiah emaw chuan tuihal dangchêrin, khawkhêng boruak alh thei mai tur ang dêwn dêwn hnuaiah tui mal far khat pawh hmu mang lo an awm ngei awm si a... Thlan daihna'na tui ka hman buak puat puat lai hian khawiah emaw chuan taksa-in tui a mamawh ang pai tur a khawl tawh loh avanga thi mek an awm ngei awm si a... He hulhliap hnuaia tui bel vuan chung hian kei hian chu'ng mite tan chuan tih theih ka nei ang em? 

Nipui a liam a, kha khaw lum hnuaia "Sur se..." kan tih ṭhina ngei kha a lo sur a. Neih zawng zawng nena rawn tlak thlak tum ang hrimin ruahtui a rawn baw hawk hawk a, mihring ai pawha nghet leh tlo zawk - leilungte nen lam a’n nghaisa ta mai ṭhin a ni a leh! Lei a min a, lei a tawlh a; thli a lo tleh a, in a chhia a, in a chim a, in rauhsan ngaite a'n  awm a. Hmun ṭhenkhatah phei chuan tui a lian a, in leh bungrua a chhe sawp a. Chu’ng zawng zawngah chuan hlu ber, nunna eng emaw zah a luang ral a... 

Furkhua a han thiang a, kêr lovah khua a lo lum leh a, thlalera Israel fate ang mai khan hnu lam kan theihnghilh zui nghal mai a, ruahsur hlan kan nghakhlel leh hle zel tho va! Mahse mahni chauh kan inngaihtuah lai chuan khawiah emaw chhiatna chu engti ang takin nge a thlen phah leh ang a, mi eng zah nge ruahsur loh pawha thlabar ru sa tawh ang a, tih te chu kan ngaihtuah chang ta lo ṭhin. 

Keiina lenkhawthawn chêk satliah vang mai maia ruah ka lo nin ve sasawi lai hian khawiah emaw chuan kei pawhina ka la lam leh chung tur - buh leh thlai chingtute chuan malsawm ruah chu an lo nuihpui ver ver ang a. Him piala ruahpui hnuaia ka tawm hul phiang lai hian khawiah emaw chuan rêp-in far tluk tluk hnuaiah te, pan tur in leh lo nei chuang lova mi bathlar chuh ta chawn chawn te, tuilian leh leimin vanga nun chên mek leh sahimna dapa vak ruai ruai te pawh an awm ngei awm si a... He hulhliap hnuaia intuam lum chung hian kei hian chu'ng mite tan chuan tih theih ka nei ang em?

Fur a han liam ve leh a, favang hun zalen leh thawlêng a lo her chhuak a. Beiseina leh lunglengin khawvel her zel chu kan thlir a, kum tawp hun tawp chuan rilru a kam ru ṭan a. Ni tla tur thlête chu lak lohva liam mai mai atan kan ui vawng vawng a, sawi chhuah thiam si loh hian kan chhungrilah min kamtu leh kaptu awm hian kan hre fo a. A leilung chatuan nih phung lamah chuan mihringte kan rual tlên hun lai tak pawh a ni ta ve ang. Mahse sik leh sa inlumlet kual velnaa hun duh rei lo ber mai favang lo thleng ta chu, a duhawm leh lungkuai zawngin a inphan kual vel dawn chauh emaw tih laiin, mahni khaw lam pan leh tur ang hrimin a han liam zui leh nghal deuh mai a. "Ozone pawp thu" te pawh sawi inthlahrunawm zawk hial khawpin thlasik a lo thleng vawt var a. Nipui khaw lum leh fur khaw chhia te chu nikum ang maiin a hla duai a. Khua-in lum tih tak tak a neih tak loh avangin nipui hunah kir leh kan chêk ṭan a, tuihna a lo kangchah mek avangin furkhuate chu kan ngai thar leh a! He thlasik khaw vawt hnuaiah hian mutbu mumal nei lovin khawiah emaw chuan nu-te'n an fate an kuah ang a, intuam lumna ṭha nei mang bar lovin khawiah emaw chuan tute emaw chuan ‘hun ruhseh’ chu an hmang ang a... Khuarel leh Masi lunglen nena kan indawm fên kual lai vel hian khawiah emaw chuan thlasikin mi a hmer hlum mek ta ve ang. 

Nia, khua-in a nunrawn theihtawp chhuah tum ta ni awm hrima thlasik a han vawh vin tâk laite hian, thlan tla lo chauha kan inthuam a, kan in-ur lum up up lai hian khawiah emaw chuan bang êwng siar suar kara thli rawn thaw vawt leh hek hek ṭhin pawh a tawrha tawrh tham fê a ni ang a; ṭhuta lum chuang lo, muta lum chuang lo dinhmun chauraua meng khur beuh beuh an awm ngei awm si a... He hulhliap hnuaia infam ṭup chung hian kei hian chu'ng mite tan chuan tih theih ka nei ang em?

Thihna leh natna te, rorelna dik lo leh thlarau lam chungchangte chu  thu hran lo ni ta se, hetia ṭhuthmuna kan phun nawipui eng eng emaw hi chu kan dinhmun vêwngzia hre ṭha duh mang lova kan ên chhuahpui hi a ni ve fo mai a.  He'lai hmun ngawt ai chuan khawi lai hmun emaw chu nuam zawka ringin ring kan fan a; tuna kan nih dan ang ai ngawta nuamsa zawk leh zalen zawk beiseiin mit kan khap a; kan chunga thleng mek leh kan chunga tla mek pawm thiam lohna hi mihring zepui a lo ni a nih pawhin, chumi zepui fuh hlel zet mai chu a banpui chawpa ṭhiah a, phih thluk ve fo zawng a ngai a nih hi maw! 

Misual tê mah ni i la, phun nawi reng renga kan nunkhaw tawi tê han tlingtlak ngawt chu a pamhmai dawn riau hian ka hre ṭhin. Kan phun nawi hma hian mitthlaah mi dang lo lang hmasa ṭhin ta se, mahni chauhin khawvelah kan awm lo, tihte ngaihtuah hmasa ṭhin ta i la, kan duhdan leh ngaihdan te chu a danglam mahna? Lungloha kan lêk eng eng emaw hi chu kan ngaihtuahna leh thlir dan dik lo aṭanga lo chhuak a nih hmel chiang mai. Lungawina hi kan duhthusam thilah a innghat ngawt kher dawn em ni? Mi dang dinhmun thlir chungin mahni in-en i la, tehna khai kher lo thung i la, kan tisa leh thlarau hian a va ngeih dawn rua em! 

Tuna puar peng pawnga he thu ka chhut boh boh lai hian khawiah emaw chuan tute emaw chuan chaw an khawn maithei asin! He hulhliap hnuaia ṭhu chung hian kei hian chu'ng mite tan chuan tih theih ka nei ang em?