Letter to heaven

A khuhhawnna: Hringnun hi mawi viau mah se, khawvel hi a nun a râwng leh tlat ṭhin! Thihna-in a sawisak chhungkua, lawmna reng reng nei thei lo tura a khawihte tan chuan Vanram leh Hremhmun hi ngaihtuah chiam chiam a har khawp mai. Chu'ng chen chena hla (?) chu chhiat tawk chhungkaw ngaihtuahna bing mup tan suangtuah phâk a ni lo - ngaihtuahna hi thlanmual leh in chhung dungah a tawp hmuk mai a ni! Leilungin a hrin chhuah thil chi tinreng hi vanduaina min hriatpuitu; lunglen chawk thotu; hlimna reng reng tawng ve tawh ngai lo tura min chêksawlhtu anga hriat tlat a awl khawp mai. Vanduai leh mal ta tlawk tlawk anga hringfate phuar ṭhintu thihna chuan hmeichhe naupang pakhat pawh lainatawm zet maiin a 'chhiat khum' a, chu nau chanchin chuan hnuk a fan ṭhin...

Thihna thla zar boruak pik churh mai chuan a uap bet tlat a, chu hmeichhe naupang chu a kum rualpuite anga khawvel hi nuam hlir nuam hlir ni tura thlir ve thei dinhmunah a ding lo. A ṭhiante chu an nute pawnfen tlâng vuanin bazar-ah te an kal hnek hnek a; an nute kut vuanin khawvel hi an ngam ṭhin! Ani erawh, a rilte a lo ṭâm a, "Ânu, ka ril a ṭâm," han ti ve-na tur pawh a nei ve tawh si lo!

An khawhar hnêm tura patling leh nutling rual lo pungkhawm zingah chuan hmeichhe naupang khawharna leh lunglenna hnêm thiam an awm lo va, hnem theih rual lah a ni hek lo. An in chhung chu a ruak huai mai a. Thlirna lam apiangah awm ve tawh lo, a nu chu mitthlain a hmu zel a, chutih rual chiah chuan thlân khurah a nu chu an zalh tawh, tih a hre chhuak tel ziah a - a va runthlak kher em! 

An khawhar hnem tuma an ina chuangkai ṭhinte hnem phak loh thinlung ngui chu engin nge thawi dam ta ang? Tangka, rangkachak leh thawmhnaw tharin a khawhar a hnem zo lo. Duhsakna leh tawrh­puina ṭawngkamin eng emaw châng chuan chhetê-in a thinlung hnîm chu a tuam dam ve deuh a; mahse a thinlunga hlimna zawng zawngte kha hliam hlirin a khat tawh tlat a. A khawvel hmui chêk ṭhinte kha khâkna hlirin a khat tawh tlat a. Tu ma'n a dinhmun chu an 'nihsak' thei si lo! A nu a hriat rengna chauh lo chu khawvel ṭhatna zawng zawng hi ninawm leh khamawm mai a ni. A hriat rengna lah chu, a vêl ngun bertu a ni lawi si! 

In leng an ṭin zo va, an in chhung chauh pawh ni lovin, khawvel chu a ruak ta ngawih ngawih mai! 

Nia, YMA ṭhutthleng leh gas thuk lian te; no leh khuangpui te pawh an dah bo zawh hnu chuan an khawharna leh an lusûnna ṭawmpui turin tu mah an hman reng ta lo. A nu chu an rawn hriat rengpui ve tawh lo. Tunah chuan a nu tel lovin ṭhâl ni sa te, fur ruahpui leh favang ni tla te chenin a mal tawrh tawh dawn ta! Thlasik thli a lo thâw leh ang a, vur a lo tlak leh hunah tu nge a nghen lum tak ang? 

Nipui tûk khat chu, chhun ni sen sat laiin hmeichhe naupang chu an kawtkai pangpar buk hnuaiah khawhar takin a tawlh hriau hriau a. A nu'n a leisak, a Barbie hmang chuan a inkhualtelem a. Mahse ṭawngtheilo Barbie mai lo chu ṭhian dang a nei si lo... A tui rei thei ta ngang lo va, an bathlar daihlima a pu bulah chuan a ṭhu ngui ve ta nghiai a. Pawn lam ni sa vawl vawl mai chu a thlir vang vang a, a hâm bai bai a; a mut a lo chhuah rual rualin a nu bawk chu a han hre chhuak leh ta a... 

A pu chuan khawhar hnêmah, tiin bathlara dawhkan an hûnah chuan lehkha a ziak mulh mulh a. Ni dang ang bawkin hmeichhe naupang chuan a pu thil ziah laklawh leh 'lawh loh lam chu a thlu ve lo, a pu mal chungah chuan a lawn a, a lehkha ziah lai chu a han bihpui ve nuap nuap a; a kutzungchal chuan kâwk ve zut zut mah se, eng thu nge inziak phei zawng a hre ve thiam lo.

Nakinah chuan harh chhuak ta thut ang hrim hian a pu chu a han chhoh thlêk hâ a, a kut te taktê chuan a pu ban chu a'n vuan a - "Âpu, thil min lo ziah? Ih maw, ânu, ka ngâi em mai! Ânu lehkhathawn tur min lo ziahsak... 'Ânu, min thihsan hnu khan ka ngâi thei lutuk che! I awmnaah ka lo kal ve ang a, kan inhmu thuai dawn a nia aw,' tih ziak rawh..."

A tunu ṭawngkam chuan a pu chu a fan na kher mai. A hnuk-ulh chuan a hrawkah a rawn hnawh nghal up up a. A tunu chu a hrilhhai lutuk a hlauh avangin, ṭah chhuah hlauvin a insûm ṭang ṭang a... 

"Mawh... âpu, ânu lehkhathawn tur chu min lo ziahsak teh...?" 

A pu mit khap ran tak em em chhan chu a hrethiam pha lo. A pu'n che lo chang lova pen hûm a, dawhkana a lehkhabu a melh ngawt ngawt lai chuan hmeichhe naupang chuan a pu ban chu a'n sâwi nak nak a... 

"Ânu, ka hmangaih lutuk che! Zana ka mut dawn apiang hian Pathian hnenah kan inhmuh leh thuai theihna turin ka dil ziah a, kan la inhmuh thuai ka ring. Pathianin ka ṭawngṭaina a chhâng dawn si a... tih ziak rawh." 

Hmeichhe naupang duh ang tak chuan a pu chuan khur dar dar chungin lehkhathawn chu a ziak ta a. Lehkhaip lian angreng takah hian lehkha chu a han thun a, 'Vana Pathian chuan he lehkha hi a lo hmuh ngei ka beisei' tiin a kâwmah chuan a ziak a, a char ta a. Nghakhlel taka a che vel lo thlir rengtu, a tunu hnenah chuan lehkhaip chu a'n pe a - "Bawihte, 'ti hian dâk bawmah va thlak rawh le. I lo haw leh thuai dawn 'nia." 

Hmeichhe naupang chu tha tho takin a ṭum ak ak a. A hma lawka hmeichhe naupang ngui tak khan thawklehkhatah hlim hmêl a rawn pu a, a mit mengte chu a nu thih hma ang mai khan a lo nung leh ta sar a. "Âpu, ka lo haw leh vat ang," tih pahin a tlan tarh tarh a. Hmanhmawh taka tlan pah chuan a pu chu lehhawiin a rawn bye bye leh a, a tlan liam ta.

Kawngpui lam panin hmeichhe naupang chu a tlan phei lauh lauh a... kawngpui a kân laite chuan khaw dang rêng a hawi lo. Lehlam kawng âna dâk bawm ringawt chu a en a. A rilru chuan, a nu'n a lehkha a lo chhiar huna a hlim turzia te; inhmuh thuai pawh a châk ve tawh ngawta a rinthu te a ngaihtuah pah a, nghet taka lehkhaip chelh pah chuan a tlan zel a... a tlu ta thlawrh mai! 

A nu hnen thleng tura lehkha­thawn thlakna bawm a thlen hma hret chuan chak mangkhenga truck lo tlan chuan a rawn su let tawp mai a. A tluk pah chuan hmeichhe naupang chu a ṭê ṭhat a; truck lah chu ding mai lovin a tlan tlang daih lehnghal! 

Hmeichhe naupang chuan dâk bawm a thleng hman ta lo! A ruang chu kawnglaiah a let bâm mai a. A lu leh taksa dang aṭang chuan thisen a lo baw chhuak ngiai ngiai a, a kut vei lam chuan a nu lehkha tur chu a la chelh ran a... 

Kawng sir dâk bawm bul mai aṭanga lo thlir rengtu dâkpu chuan a bawihsawm nghal a. Hmeichhe naupang lehkhaip chu a'n en a, a phu zawk mai - 'engtin nge chu lehkha chu Vanramah an thawn theih ang?'

Mahse a inngaihtuah harh thuai a, an pu ber hnenah lehkha chu thawn mai ṭhain a hria a. Lehkha thema thil awmzia hrilh fiahna a ziah mawlh mawlh lai chuan a phun sup sup a - "He lehkha hian a thlenna tur dik tak, Vanram chu a thleng fel der tawh a nih hi! Tunah chuan hmeichhe naupang chu a nu bulah hlim takin a awm ngei ang," a ti a.

Damdawiin motor-a hmeichhe naupang ruang an hlâng lai chu a lo thlir reng a, chu nau lainatawm tak chu a lawmpui ta zawk tlat! Duhsakna nen a mangṭha a - "Vanram chuan lo hmuak mawlh che rawh se!"