Made in Keimah!

A khuhhawnna: Khawvel kawlkil tawpah, vanthengreng zau tak leh hnuaia thuah riat chhungah pawh tawm dawn i la, kei hi mi dang ni lovin, keimah tho kha ka la ni reng dawn. 

Inthlak mah i la...

Ka hair­style hi thlakin, a changin nuai thur i la; a chang leh sam van kûwk pu i la, a changin sipai rawngrût lu mehin met i la, a chang chuan ṭhenawm nula sam chen zet pawh zuahin, mawngah sam hmawr invaw siau siau pawh ni se, kei hi keimah tho kha ka la ni dawn. 

Ni khat chhung ringawtin ka thawmhnaw hi vawi eng emaw zah thlak i la, ka zing tuk chhuak chuan kawr pawl ha-in, tukṭhuan ei khamah a dum; chhun ni sen sat vang laiin a var; tlai ni nemah kawr hring; zan thimah a sen pawh ha chhuak mah i la, kei hi keimah tho kha ka la  ni dawn.

Khawpui hulum laiah in nei i la, chu in-ah chuan ka duh hunah mu i la; ka duh hunah in-ei puar i la, tih tur thlawt ka hriat loh changin leng i la... Khawpui daifemah leng khawthawngin, chu hmunah chuan ṭingṭang nena inawmtleiin, thing hlimahte chawl der der pawh ni i la; a ni, ka duhthusam thilte chu suangtuahin, mumang ramah leng ta delh delh pawh ni i la... chutah pawh chuan kei hi keimah tho kha ka la ni reng dawn. 

Ṭhiante nen kawi tin thler tin suar tluanin, khawvelin nuam a tih ang zawng zawngte hi chên i la; sorkar leh vantlang ngêng chhun lo tawk emaw, chhun tawk chauh emaw paw'n khawsa kual vel ni i la, chutih hunah pawh chuan kei hi keimah tho kha ka la ni ang.

A nih loha leh, ka eizawnna hi thlakin, ka ṭhuthmun chu pisa dawhkan a ni emaw chanchinthar hmunpui a ni emaw, thirchhe phurh­khawmna in a ni emaw bazar kawngpui chêp lai leh lehkhabu dawr lian pawh ni se, kei hi keimah ka ni reng dawn tho.

Ka inphal lo

Keimahah hian mihring tam tak a awm a. Keimaha mihring tam tak thununtu chu keimah ka ni. Keimahah hian mi chak lo pakhat a awm a, chumi hneh tur chuan keimahah tho hian mi chak pakhat a awm. Keimahah hian mi chapo pakhat a awm a, chumi khap dai tur chuan mi inngaitlawm pakhat a awm. Keimahah hian mi thinchhia pakhat a awm a, chumi vau dai tur chuan mi ngilnei pakhat a awm. 

Ka kawchhungah hian mi nunrawng leh mi zaidam an inbuan reng a; mi zelthel leh mi taima an incho tawn reng a; mi pamham leh dikna ngainatu inhnial ri phei chu khawvel hian hre pha se, ngaih­nawm a va ti dawn rua em!

Thlaler laiking an sawi, Chaeme­leon ka ni lo va, Thlan­rawkpa Khuang­chawi laia laiking 'Bengali' pawh kha ka ni hek lo. Zebra rawng ṭial buai mai, kutze inang lo ang maia rawng thuhmun reng reng nei ta lo nungcha pawh ka ni lo va, kei hi pian tirh aṭanga mi dang la ni ta reng reng lo - keimah kha ka ni. 

Mahse eng ka ti nge kei hian keimah ka ni tih hi ka lantir loh fo a, keimaha thil awm, ze ṭha leh Pathianin a thawk khum ze mawi zozai hi eng vanga pholang ta mai lo nge ka nih ṭhin le? Keimah leh ka ngaihtuahna, ka suangtuahna leh tu emawin min mitthla-na ṭhin ang zawng zawng hi dahkhamin, tu emaw-ah inlet dawn ta ila; tu nen emaw kan nihphung leh keimahnia 'keimahni' zawng zawng ve ve inthleng vek dawn ni ta ila, ka thih hnu thleng pawhin ka phal ngai lo vang. Kei hi mi hausa emaw, mi rethei emaw; mi hlawhtling emaw, mi hlawhchham emaw... a eng ang mihring pawh chu ni ila, mi dang nena 'a zawng zawnga' inthleng chu ka inphal ngai dawn lo chhiava!

Keimaha pathian

Ka thawh ût chûng leh zing thawh ka hai chûng paw'n kei hi tihpalh thil thu tak meuh meuh paw'n mi dang ka la ni ngai lo va, nikhawhrelo ṭhelh ṭhelha natna-in ka taksa a hrûwm lai leh, ka lu meuh pawh a hai muai muai lai paw'n keimah tho kha ka la ni cheu a. Ka nu chhul chhungah ka lut leh tawh ngai dawn lo va, ka nu pum chhunga mihring ka nih aṭang daih tawh khan mi nung, mi dang ni tawh ngai reng reng lo tura duan ka ni. Chumi vang chuan chapo ṭha miin ka chapo fo a, Pathianin ama anpui ngeia a din leh duan, a chher leh chhar ka nih miau avangin keimahah hian Pathian ata pathian a awm a ni!

Ka va chapo ta em! Pathian-ah ka inchhûl ta hial elo? Ni lo, chu lam a ni lo. John Lennon-te anga ropuina phuahchawp, mite'na an lo ngaihhlut avanga ropui ta ber anga inngai tur khawpin ka thlarau a rethei lo ve! A zaithiam avang chauhin khawvelin a hria a, thiam dang a neih kan hriat loh tehlul nen, Isua tluka ropuiah a han inngai mauh mai pek a - a ropui lo teh e! 

Mihring hi Genesis-a 'Ama anpui ngeiin a siam a...' tih thu nung hmang veka nung kan ni a, keimahniah hian mi dang ni lo, keimahni a awm. Chuta 'keimahni' hmuthiam apiang chu khawvelah hian an nihlawh awk awk dawn a ni mai. Mi an tuma beih hah a ṭul lo va, mi ang nih tuma hun sen thlawn a ṭul hek lo va, mi ang lo veka duan leh siam kan ni. Keimahniah hian kan duhtawk leh kan mamawh tawk ang zia zelin chakna, huaisenna, chhelna leh kan hlawhtlinna tur ang zawng zawng hi phumin a awm a, mi dang ang nih tuma mi dang melh hman a ni lo. 

Mimal nih hi a hlu em a, mite hian keimah, mimal hi an hria a: Pathian paw'n keimah, mimal hi min en a. Keimahniah hian engkim a awm tih hre khawpin vawiin hian harhna han chang hlawm ila ka va ti em!