Damdawi-in tukverh

A khuhhawnna: Keimahni ṭheuhah hian tukverh a awm a, kan tukverh hawn dan azir zelin kan khaw hmuh hi a thimin a >ng mai a, a thawpikthlak dan leh a thawventhlak dana pawh kan hawi duh dan azirte a lo ni 

ṭhin. Mi dang tante pawh hian thil ṭha leh thu ṭha te hi ti thei lo ta teh reng pawh ni i la, thu lawmawm leh dawnsawn nuam tur chi talte hi ngaihtuahsak thei ta hram hram zel i la, tute khawvel da rep tawh emaw hi chu rawng thar kan hnawih thei fo dawn a lo ni. Chuti ang lam chuan tunlai chu ka rilru a luah ve reuh a, he "Damdawi-in tukverh" hian i nunah thlifim a koh luh ve-te pawh ka ring ve hial mai ka ti!  

Damlo na zet mai pahnih hian damdawi-in pindan pakhat an luahdun a. A pakhat zawk chu a chuapa tuihn^ng chet velna-in kawngro a sut phah dawn avangin tlai tin darkar khat vel a khuma a ṭhut chhuah an phalsak a. A mutna khum bul maiah chuan tukverh a awm a. Damlo pakhat zawk erawh chu ṭhut chhuah ve an phalsak loh avangin nileng zankhuain a mut tlawn reng a ngai thung a. Damdawi-in pindan khat luahdun ta chu, rei tak tak titi khawchang sawiin an inkawm ṭhin a: an nupui leh chhungkaw chanchin te, an in leh lo te, an hna chungchang te chu an titi chaw tui ber a ni. Chu damlo pahnih chu tunhmaa sipaia lo ṭang tawh ve ve an ni a, tunah erawh sipai hna han thawk chi rual an ni tawh lo.

Tlai tin mai hian tukverh bula mu zawk, ṭhut chhuah an phalsak zawka chuan tukverh aṭanga pawn lam khawvela a thil hmuhte chu a hrilhchhawng ve leh ṭhin a. Pawn lam khawvela thil thleng mek chanchin a hriat chuan, a ṭhu chhuak ve thei lova nun chu fur hnim ang maiin a lo chawrno thar hlep hlep ṭhin a. A nun, thimin ro a relna chu pawn lam khawvel rawng mawi ze hrang hrang chuan a rawn chei mawi tharsak leh ṭhin a, a nun pik leh zim chun mai chu pawn lam boruak zau tak chanchin chuan a kaih pharhsak leh ṭhin a ni.

Tukverh aṭanga lang thei, pawn lam khawvelah chuan dil mawi zet mai a awm a. Chu dilah chuan varak leh vatawk te an intlat pawlh sup sup a. Naupangte chu lawnglengin dilah chuan an inkar vel a, an nui iar iar a. Tleirawl inngaizawngte chu an duhberte nen kut inchelhin van dumpawl riai hnuaiah chuan pangpar vul chhing chheng zingah l>n lai an chen a, khawvel chu siam zawh hlim ang mai hian a thar sur a!

Tukverh bula ṭhu-in chu'ng khuarel leh mihring vul lai ni a sawi laite chuan a ṭhu chhuak ve thei lo zawka chuan chhing diar diarin pawn lam khawvel chu a lo suangtuah ve a, hmu ve ang hrimin a nun chu pawn lam khawvelah a cheng a.

Tlai khat chu, khua a uap churh a. Tukverh bula ṭhu chuan an thlang lawkah sipai kalrem an rawn beih phei mek thu a sawi a. Ṭhu chhuak ve thei lo-a chuan sipai rimawi tum pawlina khuang leh tawtawrawt an ham rika chu hre ve pha hlek lo mah se, a thinlungah a lo chiang ve em em tho va. Chuti anga tlai tina tukverh bula ṭhu-in a thil hmuhte a sawichhawn ṭan ni aṭang chuan hun leh ni eng zah tak kal liam tawh ang maw? Ni leh chawlhkarte chu an liam duak duak chu a ni a...

Tuk khat erawh chu thil a danglam ta. Anmahni bualfai tura zinga nurse lo lut chuan tukverh bula mu zawk chu a lo thi fel reng tawh tih a rawn hmu a, muang siai hian a lo chatthla fel reng tawh mai! Lungchhe tak chungin nurse chuan tukverh bula mu pa ruang chu la chhuak turin damdawi-in hnathawk ve dangte chu a tir ta a. Tukverh bula mu zawk a boral tak si-ah chuan, ṭhut chhuah an phalsak ve loh zawka chuan pawn lam khawvel thlir ve a duh avangin tukverh bula muttir a, ṭhut chhuah phalsak ve turin a ngen ta ngawt a. Nurse chuan a remtihsak ve mai a, tukverh bula a sawn hnu chuan a kalsan ta a.

Zawimuangin, na ti chung chungin a kiu khing lehlam rinchhan chuan tukverh aṭanga pawn lam khawvel hmuh tumin damlo chu a'n inkam k^ng a. A taksate her remin, harsa ti tak chungin tukverh lamah chuan a'n thle a, pawn lam khawvel hmuh hlan chu a nghakhlel tawh a ni. Mahse harsa ti chung chunga tukverha a'n dak chhuak chu, eng thil nge a hmuh - engmah! Tukverh aṭang chuan eng thil mah hmuh tur a awm lo - a lo chh^wntu bang chhah tak mai lo chu!

A ngaihna hre lova a awm lai chuan nurse chu a lo lut leh a. Chu damlo chuan tukverha a thil hmuh chu sawiin, a pindan luahpui, a ṭhian boral ta khan engtia tukverh pawn lama khawvel muang dup mai leh duhawm riai mai thlir thei nge a nih, tih nurse hnenah chuan a zawt nghal chawt a. Nurse chuan eng danga chhang lovin, "Kha pa kha mitdel a nia lawm! Helai bang hi a hmu thei reng reng hleinem," a ti ta mai a! Nurse v>k chuan, "Ka rin dan chuan, i ṭhiana khan i thinlung ngui chawh harh a tum ṭhin a ni," tiin a chhunzawm leh a.