Cassette ka chhar!

Kei hi hi nu-ho ang deuha thul mawnga thil roh ching tlat mai hi ka ni pek a! A ṭangkaina awm zui tawh tur pawh ni hlei lo te hi a ṭangkai laia ka chhawr rim em avanga ka dah ṭhat tlatte pawh a awm. A ṭhen chu eng emaw thulha lek chhuah atana ka dahṭâwl tak mai maite pawh a ni. Ka chutih fo avang chuan ka hausak phah hran lo va, bawlhhlawh erawh ka khawl tam ṭhin. Mahse ka phawsawlh vangah chuan ka puh phal lul lo mai! Chumi Inrinni tukah pawh chuan, tum ren run pawh hi hran lo hian ka hnawm tin phur bawm, ka suitcase chu ka'n hawng thla zen a, a khat tun mai. Lehkha them, engtik laia ka dah ṭhat a, eng atana hman tura ka tih nge pawh ka hriat tawh lohte chuan min lo hmuak nghal a. Ka dah ṭhat chhan ber ka hriat tawh loh ang bawkin, a tih leh zel dan tur pawh ka hre chuang hlei lo va! 

Lehkha ṭhenkhatah chuan ni leh thla chauhte a inziak a, ṭhenkhatah thu tawitê te. Ṭhenkhat thung erawh chu, ka thu ziah tum, ka pamṭul leh tak avanga 'nakina tihah’' tia ka vawm luh tak ngawtte an ni a, a thu lah chu laklawh deuh deuhin a tawp hlawm a. Engtikah tak ziah zawm leh hlawm ang i maw?

Hnawm tin phur bawmah chuan pen chhin nei lo, a tui pawh khal vek tawhte pawh ka hai chhuak. Sulrûl leh tuiêk nena inbawm chiat tawh, chahbi bawr a lo ri rak a; thlalak hlui râng ruai leh chanchinbu, history bu ni tawh zawk turte pawh a awm. YMA chanchinbu tepêng ka lo enkawl ve tawh copy ka duh deuhte pawh a let ram a; lehkhabu thehlêp, keu harsa khawpa inkhâwr chuar tup tawhte pawh ka hai chhuak zel a. A ruka ṭhiante hriat loha an pass lawmna tur sawmna lehkha ka siam ṭhenkhat chu a copy chuang tlêm azawng pawh ka lo la dahṭha khiau mai! Chu'ng thilte nuih tet tet chunga ka hai kual vel lai chuan, lehkhabu pakhat kar aṭang hian audio cassette pakhat hi a rawn tla ri chhak a, ka han lek vel that that a; ngaihtuahna a ding ta deuh thut a... Ngaiteh! thil hi a danglam ta thut mai!

Chu cassette chuan fun mawitu pawh a nei tawh lo, saruak mai a ni ta! A cassette siamtu hmel phei chu mitthlaah mai loh chuan a tak hmuh tum chi a ni tawh lo. A tirah chuan eng company ber emaw chuan uluk tâwpin an buaipui ang a, hralh theih loh hlau takin sarang nen an fun thlap ngei ang. Mahse tunah chuan chu cassette chuan hmel mawina reng reng a nei tawh lo va, a reel tuamtu plastic phei chu a khi ruak a, a pang sir a hêk huam bawk. A kilhna pahnih a la tâng ve vê vê a, a tawlh relh relh a, hmeh sual palh chuan a reel chu baw huk thei dinhmunah a ding reng tawh a ni.

Chuti ang vel chu a nih tawh avangin, chu cassette chu eng ang cassette nge a nih hriat tuma ngaih­thlak leh mi pawh a ni tawh lo. A reel chu tuam loha phai ram lam aṭanga rawn thleng hlim, vaivut bawh hnu ang mai hian a paw khuk a, a chahna laiah a rawn pir chhuak vâ a; cassette neitu leh a leitu hming ziahna remchang tura an siam niawm tak, lehkha them inbel ṭhin pawh kha - tih tham a awm tawh lo. Tu zâi awmna nge a nih ka hre ngam tawh lo va, khawi lam chhuak nge a nih lah ka hre hek lo. A neitu ka ni ngei em, tihah pawh ka chiang chuang lo. 

Nia, he cassette hi... lehkha karah khawvel laka tlan bo tumin a tawm bo a, khawvel paw'n a theihnghilh ta a nih hi le! Hmanah, Zoram pawn hla tak aṭangin Zofate kawtchhuah a rawn pan a, a duangtu company leh an hlawhfa chhawrte'n hah takin an buaipui hrep a; tu kutah nge a la tluk luh dawn, tih lam reng reng hre pha lovin an thawn chhuak ve mawp a, 'copy khatah chuti zat chu ka hlêp ang' tiin tu'n emaw a lo hralh chhawng ve leh a, tu ber emaw-in chumi rilru pu vêk chuan hralh nawn leh tumin a lo khar ve leh ngei tih chu a chiang a ni.

Khawi hmun emawah zaithiam leh a puitute'n zai record na'n an khurbinpui zui a, an duh ang an puitlin hnuah bazar-a an dah bak chu mi inah an luh kualpui leh zar zar ang a, bungraw zawrhin an zuar ngei ang. Mahse chutih laiin, a leitute tan chuan bungrua mai mai a ni ve lo thung. Cassette-ah chuan hla an khung pawh a ni thei, lemchan thawnthu pawh a ni thei; eng party president thusawi emaw pawh a ni mahna! A eng thil pawh chu ni se, duha leitu tan chuan eng thu leh hla pawh ni se, a leina man aṭangin a hlutna a chhût let leh tawh ngai lo vang tih ka ring a, mi'n an hawhsak chang paw'n a lam ruai ṭhin ang. 

A tira siamtu'n hralh sum atan a duang a, a lei chhawngtu'n sum tuakna'n a hmang nawn leh a; a chhunga aw thun a nih hnu erawh chuan cassette, hralha phurh kual mai mai leh zawrh kual mai mai theih kha a ni tawh lo thung. Thawnthu hlu, nun leh engkimah a chang zo va, hunbite hi mihring tan a siamsak tawh hial asin! 

Hlutna hi khawi aṭanga teh tur nge? Mawina pawh hi khawi aṭangin nge i teh? Tan in chhunga mihring leh saingho khum chunga mihring tan hlutna chu han chawk cham dawn teh le? A nih loha leh, ka zawt a che - Mawina chu thawmhnaw leh pangparah chauh hian em ni i teh? Mawina chu ramsa koham tak leh ngho hriam tak phenah pawh hian hmuh theih loh turin a inphum ve châwk asin! 

Mit leh a pual â tu thil aṭang chauh hian mawina chu a lo chhuak lo va, chhe nghal rup thei leh kumhlunah pawh hian mawina leh hlutna chu teh chhuah mai theih pawh a ni hek lo. Hnawmhne ang leka kan ngaih tam tak hi tu tan emaw chuan lunghlu ai paw'n a hlu thei zawk tlat a, kawtkaia lungtât maite pawh hian a thlirtu leh changtu azirin mihring hi a thunun thei asin! Chu chu a ni, tu tan emaw chuan he cassette pawh hi thawnthu tam tak sawitu a ni ngei ang. Ni lo, thawnthu mai a ni lo: nun thuchah kengtu a ni, ka ti zawk teh ang.

Mihring tan vawi khat thih ruat a nihna bak hi, thisen zawmpui leh chhul khat kualzate pawh hian inṭawmtlan thil dang hi kan neih pawh ka hre mang bar lo. Duh a thuhmun chang paw'n duh loh thil chu a thuhmun leh thei chuang tlat lo. He cassette-a aw inup ta pawh hi ṭhenkhat tan chuan engmahlo mai a ni ngei ang a, an tan chuan bengchheng leh bengbung ri satliah mai pawh a ni thei ang. Mahse mihringin a lei theih loh; nih a tum a, a ban a, a luhkhung a, a khar hnan ngial pawha a chan theih reng reng loh; chhungril aṭanga thawktu leh ṭhâmtu chauhina a pek theih, mawina leh hlutna hmu fuhtu tan chuan he cassette hi cassette naran a ni lo tawp ang. A leitu hian khaw lo dur khup khup changa a thinlung zîng pik vai kianna'n a lo hmang tawhin ka ring a. Ruahsur changa a thinlung tawmhulna'n te; nipui khaw ram reh tlawk tlawk hnuaiah, ṭhiante hmel hmu phak lova lei khawhar a nghah chang ni te chuan he cassette hmang hian khawvel ramri pelin, van boruak sâng takah te a suangtuahna nen khawvel hi an lo chhuk thlir tawh ngei ang a; lungngaih ni-ah mittui nen hunte pawh an lo hmangdun tawh ngeiin ka ring a ni.

Ni e, he khawvelin a laka nunrawn a chhuah chang chuan he cassette hi inthlamuanna'n a bêl ṭhinin ka ring. Ngui leh nguaia ni a vui liam changin he cassette-ah hian a thlarau chu a chawlhtir ang a. Nun hi ho ta riau leh, leilunga thamral chatuan mai mai tura a inngaih chang paw'n he cassette hmang tho hian a thinlung chu a uak thawl ṭhinin ka ring tlat. 

Hlim ni leh ṭah ni te; ṭhian ṭha leh ngaihzawng a ṭhen ni te; thihna leh harsatna chi hrang hrangte'n an sawp retheih lai te; lunglenna leh khawharnate'n a chhungril an nghawr chim hem hem lai te paw'n he cassette nen hian hun tam an lo hmang ve tawh ngei ang a. Hna ṭul a neih chang leh, tih tur thlawt a hriat loh changte paw'n an lo in-awi tleidun tawh ṭhin ang. Chu cassette chu a taksa pêng pakhat ang maiin a ngai ang a, mi dang hnena a sawi duh ngai loh thilte chu ngawi rengin an lo sawidun tawh ṭhin ngei ang a; lunglen tuardunin, hlimna thlarau pawh an lo changdun tawh hial ta ve ang... 

Tunah erawh, chu'ng zawng zawng hmawrbawkna chu ka kutah a lo awm ta! Tu emaw tan chuan he cassette hi hlut tak tê-in a hlu dawn, tihte ka ngaihtuah ta chiam chiam a. Cassette leh a chhunga thil awm zawng zawngte hi phum bovin, halralin, boruak lawng hmang paw'n lei piah lam ramah thawn bo daih pawh ni ila, 'engtik lai' emaw kha chu khawvela pa thiltithei ber paw'na a nuai bo leh nawhreh theih a ni tawh si lo. 

Hun hlutna chu mihring siam a ni a, hun hlui leh thar pawh hi mihring ta a ni. Sana hmâ leh tlai pawh hi a hmangtu mihring azir mai a ni a; miin 'tun' a tih chu nimin pawh a ni thei, naktuk pawh a ni thei - hun titu-ina hun a tih hi hun chu a ni mai. He cassette pawh hi a neitu chuan han hmu leh ngat se la chuan, an hun lo hmandun ṭhin dan zozaite kha a ngaihtuah chhuak leh ang a, a tana 'hun awmchhun' te chu a ngaihtuah thar leh ṭhinin ka ring a,  chu hunah chuan 'tun' hmangin a cheng veng veng ang. Chu hunah chuan a thlarau leh a engkim a lo pumpek tawh avangin mite'n cassette holam leh lolam mai maiah ngaihsak mah se, ani tan chauh chuan namen lovin a hlu ngei dawn si a...

Cassette neitu chu a la dam ang em? A rukin 'eng cassette emaw' a lo zawng ṭhin ang em? Nunna pakhat hian nunna tam tak hring chhuak thei pawh ni se, mi pakhatin a hun tawn leh a boruak lo chhaih tawh chu mi dang hnenah a hlan chhawng thei ngawt dawn em ni?

Cassette neitu'n a cassette ngainat a ngaithlak lai chuan khawvel thil dang hi a hrechang lo fo ang a, amah mai paw'n lei nun hi a kim ta biai biai nite'n a hre ṭhin ang. A chutih hun lai chuan suangtuahna tam tak nen khawvel hi an hrût kual vel tawh ang a, tunah te hian a suangtuah ram chu thleng tawh tak maw? 

Thamral tawh hnu thil tam tak chuan ring takin a ko ṭhinin ka ring. A neitu dik tak chuan he a cassette ngei hi han hmu leh se la, khatih laia a khawvel kha fiah takin a rawn inlar thar leh uaih uaihin ka ring a. Chumi avang chuan, naupan laia meizial bung kan chhar laia kan hlimna vawrtawp ang thialin he cassette kawltu lo nih ve ngawr ngawr pawh chu inchhuan veng vengna tham ni ta tlatte hian ka hriat phah ta hial a. Inchhuanna tham ni-a ka hriat tluk ang vel zeta thukin a neitu dik tak zawn hmuh ka châkna chu a nasa a; hre chhuak thei ngat ila chuan, hlawk zawka inngai chungin ka pe mai dawn si a...