Ka pu vanram

A khuhhawnna: Vanram ngaihtuahin min tihbuai chang apiangin ka pu kha ka hrechhuak ṭhin. Hmanah chuan khawpui hulumah zirtirtu hna a thawk ve lauh lauh ṭhin a; mahse sorkar lamah a aia thil tithei zawkte'n a 'post' an chuhpui tak avangin thingtlang khaw kilkhawr lamah a inbin liam a ngai a. Radio aṭang chauha sorkar hmalakna an hriat ve ṭhinna khaw chengker lamah a eizawnna chu a chhunzawm a ngai ta a ni. Mi chuhhelhte thla zâp vel chuan khaw mawngping lamah a hnawl kat rawk rawk a, mahse a phun chuang reng reng lo.

Kar hla thu
Ka pu chanchin chu khualpâng zin satliah thu tlângkam aṭangte leh khualzin remchang an awm zauh zauh chânga a lehkhathawn kan dawn aṭangte-a kan hriat bak chu, thehhmeh ang maiin a reh tlawk tlawk a. A chanchin tharlâm kan hriat theih chin lah chu thu lawmawm lam ni hlek lo - a sim tawh zu a in thar leh a, Zo-pân khawrah bawk a inhnangfâk leh, tihte a ni deuh tlawng! Chanchin inhre khât hrim hrim kan ni bawk a, a zu rui haw thei lovin zankhuaa hmeithai zu zuar vawk kuang a nawr thu kan hriatte chu kan lawmah a tla zawk mah!

Khawvel vanram
Kum tam thla tam a vei hnuah, a tlawngâwl chatuan dawn ta emaw kan tih hnuah, ka pu chuan nupui a nei tih kan han hre tlai khawhnu a. Ka pu kha chu pa zei elkhen, nupui neih tum hran lem lo ni khan ka hria. Mahse a sikul naupang hlui, Pawl 10 a zir beidawn hnua zirna chawlhsan leh ta, nula tuaitirtê nen an innei ta a ni awm e.

An han innei ta chu, an hlim chatuan dawn lo tih inhre lawk niawm fahran hian, mi dang zawng zawng aiin hmangaihna khurah pawh an tâl nasa a; ṭawngkam han inbah fuh loh zauh chang pawh nei lovin, naupang chhe hlim takin an hlim tihte pawh kan lo ralkhat hriat ve ṭhin.

Mahse chu an khawvel vanram thu ngaihnawm kan hriat hnu lawk chuan, anni, kan pute nupa paw'n an khawvel chu a her ngaiin a inher reng dawn emaw an tih mek laiin, an inneih aṭanga a kum thumna tur, kum thar vuakvet sar hulum a reh fel hnu lawkah ka pu hmangaih, a nuthai duat lai chu nat lawk pawh awm lovin a thi thut mai a; keini'n kan hre mai bawk si lo nen, ka pu'n mal taka chu thihna a han tuar tur chu ka khawngaih tawp thei lo.

Tupa leh a pu
Ka pu khawhar hnem tura an khua ka han lut chu, ka pu kher kher chu awm lo ni se la, chu khua chuan ngaihawmna a nei thei paw'n ka hre lo.

Ka pu in chu an sikul thlang lawk, hmun zawl rai angreng takah hian a ding fal nalh a. An sikul leh a in awmna chu tlang chhip a nih miau avangin an khaw in zawng zawng pawh a lang kirn thei vek a, awmkhawm ṭha deuh phei se la, lêna khuh tham lek âwma mâwi an ni.

Chutih lai chuan nipui a thaw ṭan tawh a. Ka pute khua, tui harsatna hmunah phei chuan nipui pawh a na zual bik hian a hriat a. Mahse chu nipui khaw lum huam huam leh ni sa vawl vawl chuan ka pu kawtzawl fai belhlen mai dungchhira di par leh eng par par emaw inṭo-pawlh sep sep duhawmna chu a tinêp chuang hlek lo. Tuiumhmun bula theihai kung ro lek lek tawha nauban inṭawnbet fir ferte pawh chuan par chhuang lêk lûk lo mah se, an mawina an hloh chuang lo va, pa tladah in bul vela chuti ang khuarel mawi han chawrno hlep hlep maite chu a nupui nunnem tak hisap tel loh chuan thil mak tih loh rual a ni 'nem.

Khua a lo uitui a. Kawmchara mau leh rua-te chu tlai lam thli chuan a rawn chhem kur lei lei a. Ka pu chu tukverhah a dak tlat reng a, mitsir pawha min melh hlek lo hian, "Ka tupa, khu kan chuktuah huanah khuan i pi khan vaimim leh thlai chite tun ang hunah hian a thlâk ṭhin a. Keiin heta ṭang hian ka lo chhaih nui iar iar ṭhin asin...," a ti a. An nun, 'hmanlai' chang hlen tawh tur chanchin chu a sawi zel a, a aw chu a pangngai lo tawp! Thil a fel lo thuai dawnin ka hria a, mut pindan banga a ṭingṭang un zet mai, engtia rei nge a perh tawh loh tih pawh hriat loh, inkhai hil bul mai chu ka va la rawk rawk a. Engkhaw sawi set sawt lovin, "Kha, ka pu... zai ang," tih leh, a kuta ṭingṭang hmehbel chu ka rual a. Min chhang lo.

Mittui nen hla
Chuti ang hun, nipui khaw lum hnuaia a chawrno thei thei an chawrno sup sup lai chu lunglenna chhan tur hre lem lo tan paw'n lunglen hun a ni tih ka hria. Tlai ni tla tur chu tukverh biangah chuan a rawn inkâp lut reih a. Ka pu chu in chhung thim chin leh chin lovah chuan a ṭhu a; khawvela awm ta lo anga inngai ang hrim hian a taksa leh suangtuahna thlarau chu hla takah a lentir a.

Kan ngawidun vang vang a... thawm a lo ri a... Rimawi azawnga ka rimawi ngainat ber mai chu a lo ri chhuak a. Ṭingṭang hrui mal ri ni awm tak, mahse a hrui zawng zawng nena ri rual ṭhat ṭhat lawi si; ṭang et awt, fân ru angreng viau bawk si hian in chhung khawhar leh hnîm ruih mai chu a luah khat nghal a. Ka pu chu ka han en a, a ṭingṭang ngainat tak mai chu a hmet kual zai zai a... chumi ṭum tluk reng renga ka pu thu tak leh titak hmel chu ka la hmu ngai lo.

A lei sen huam mai chuan a heh da bui tawh chu a han hawl kual a. Meng hlek si lo, thil engkim hmuchiang em em vek si niawm hian a lang a. Chu tlai khaw lum huam huam leh khawharthlak ru angreng tak hnuaiah chuan hla lunglenthlak zet mai chu a han phawrh ta a ni. Ṭhal thlifim zinga tel ve niawm hrim hian amah leh a hla chu an lungkuai a -

"Would you know my name
If I saw you in Heaven?
Will you be the same
If I saw you in Heaven?
I must be strong and carry on
cause I know, I don't belong
Here in Heaven..."

Khawvel boruak chu a dai ruih mai. Ni lo, khawvel chu a ngawi duk zawk a ni. Ka bengah chuan ka pu aw thâm ri ṭuâk bak ri dang reng reng a awm lo. Ka pu chu ka en ngar mai a. Tlai thlifim chu a rawn thaw lut leh hak ṭhin a, tukverh bula calendar chu a phih ri leh hlawp ṭhin a. Kan boruak nen chuan engkim mai chu a inhne rem vel vek mai.

"Would you hold my hand
If I saw you in Heaven?
Would you help me stand
If I saw you in Heaven?
I'll find my way through
night and day
cause I know, I just can't stay
Here in Heaven”

a han ti a. A hmai zur tap tawh chu mittuiin a rawn bual ngiai ngiai a, a aw pawh a lawi zual hrat hrat bawk. Keia thinlung pawh chu eng emaw ti tak hian a vilh a, tukverhah chuan ka han dak ve ngawt a, ka hmuh hman loh kan pi chuktuah huan thlo fai melh melh lai hmel te chu hmuh tumin ka ring ka'n fan ngial a; mahse bei tidawng thlawn mai a ni. An chuktuah huan mawng lama zawngṭah filh ṭhuau mai hnuaia naupangho pipu suih uai then lauh lauhte mai loh chu hmuh tur an awm lo.

Hla chu a satu chhungril aṭangin a rawn baw chhuak hawk hawk reng a. Tlêma a sang lai deuh:

"Time can bring you down
Time can bend your knees
Time can break your heart
Have you beggin please...
beggin please?"

mittui nena a tih lawm lawm lai chuan a aw chu a fiah lo zual a, âwm chhungrila khâk awm ang mai hian a aw chu a ri chhuak hram hram chauh a ni. Mahse ka pu aw chu a mawi ka ti tlat! Chu khawvel ruak huai hnuaiah chuan ka pu khawhar zai chu thing leh mau han insawi ri seng sengte chuan an zâwm a, a ngaih la tawk chauh hian a khawk ri rem rem ni maite hian ka hria. A ri pawha lo zawm ve ngam lovin, hmui phunin ka lo zawm ve a, ka pu'n mittui leh aw lawi deuh ṭuau chung a:

"Beyond the door
There's a place - I'm sure
And I know, I'll be no more
Tears in Heaven"
a han tih thlen meuh chuan ka mittui pawh a hnai ve a ni. Ṭap thei ni ila, chumi ṭum tluk reng renga ṭah châk ni ka neih chu ka hre lo vang.

Ka pu Vanram chu
Ka pu-in urhsun fahrana a hlim lai hun liam tawh leh a thlenna tur Vanram mitthla chunga vawi thum ngawt 'Tears in Heaven' a sak tleng tleng hnua ka bula a khawhar hla, ṭawngkama a chhilh nawn lehna thu mawlh kha ka theihngilh thei tawh lo. Ral hla tak thlir chungin, a duhlai boral ta mitthla reng chung khan, "Ka tupa, in sawi vul chûk Vanram hi ka thlahlel ve viau pawh a ni dang lo. He leiah, kan hringnun a chauh changa nuam zawng zawng kimna hmun, Vanram kan beiseina erawh hi chu a hlu thlawt. Vanah khian lawilut ve ta ila, beisei kan nei tawh lo tur mawlh chu ania, ka lo helhkam lawk ṭhin ni! Hunin ro a rel tawh lohna hmun chu ka thlir ve thiam lo - kei chu hunte hian ka lung an tileng ṭhin.

Tunah hian Vanah i pi nen pawh khan han intawng leh ta pawh ni ila, kan hlim lai ni angte kha a pha dawn paw'n ka hre lo tlat ṭhin. Mi tin kan inhmangaih uchuak hlawm ṭheuhna hmunah chuan hmangaihna hi a awm ve tih kan hre zawk dawn em ni? He bawlhhlawh khawvel, hmangaihna a derthawn ṭhinna ramah, inhmangaih chhung rei lotêa hmangaih leh hmangaihte'n kut kan han invawnsak a, kan han inhmer lumsak veng veng ṭhin te; danglam bik taka kan han inko ṭhin te leh, nunkhua a zuai changa kan inhnem malh malh ṭhin te hi kei zawng, a thlakhlelhawm ka ti bik chuang a. Mi zawng zawng hi inhmangaih ta ila, kan hringnun kalh hi a kim ngût emaw chu?

Vanah chuan eng'e kan hma­chhawp... faisa rin der der maw? Ka peih zawng a ni hlek lo. Inhmangaihna tawp chin nei lo maw? Hmangaihna dawngtu nih a va thlakhlelhawm dawn lo rua em! Kei zawng, he lei derthawng takah hian tladah tak, chhel tak siin leng ila, kan thlarau nun pawh hi a tihausa sawtin ka ring ṭhin... Mahse duhthlang thei kan ni si lova le, he khawvel a nih loh rau rau chuan Hremhmun ai ngawt zawngin Vanram chu ka thlahlel zawk e...

Chu Vanah chuan ka la thleng ve ang a, i pi khan kan inkoh dan bik riau khan min lo ko leh ang a, ka ko-nghâwng, lusunna ritphurtu hi lo chhâwkin, ka duh em em, a hmel têreuh khan min lo chhawn ang em? Ka hre lo, ka hre ngam lo. Chutih hunah chuan 'amah' kha a la ni reng ang em, tih hi ka chiang ngam tlat lo va, vawi khat chauh tal pawh han inhmu leh pawh ni ila, dai phul kianga sekawtrawlh kan inzuankahlensiak laia kan hlimnate chauh pawh kha Vanah chuan kan tawng leh thei dawn em ni?" a ti thâm ṭiak ṭiak a, ka chhan thiam loh zawhna leh thuril a ni.

Muttui piah ramah
Tunah chuan ka pu chu a awm ve ta lo. Kawngkhar Mawi piah lamah a lut ve ta. Chutah chuan a beisei ang ngeiin a mittui pawh a hul tawh ang a, Vanram hrilhfiahna pawh a hrefiah vek tawh ang. A kim lova a hriat ṭhin kha a kimin a hre tawh ngei ang a, khawi hmunah nge hmangaihna chu a vul a, duhawmnate pawh hi khawi lai takah hian nge a inthlun, tihte pawh a hre fai vek tawhin ka ring.

Mahse kei zawng, ka la fiah ve lo va, nun leh engkim a hulharna hmun chu ka la mitthla thiam ta chuang lo. Mittui a tlak tawh ngai lohna ramah chuan eng’e hlua hlu lo tur ka teh thiam ve miau si loh avangin -

"Ka pu, Vanah chuan chawl ang che. Ka rawn pan ve hunah che chuan nang kha ka ngainat mize danglam tak pu, 'nangmah' ila ni reng ang em?"