Vaupung dawihzep

A khuhhawnna : Ui bauh ring nazawng an hlauhawm lohna hmunah hian ui bauh ve satliah an kat nawk a, bur chu a ruah poh leh a ri a ring ṭhin ngei a lo nih dawn hi. Khawvel history pawh ni se, ram bung khat chanchin pawh ni se, mimal leh khawtlang nun pawh ni se, vaupung tina mite vangin he leiah hian buaina vawi engemawzah a lo thleng tawh a, a thleng mek a, a thleng zel bawk ang. Mahse he vaupung hi dawihzep tuamna hmaikawr mai a ni fo.

Theipui hnah ralthuam
A chhan leh a vang chu eng pawh ni rawh se, mihring hian Eden Huan aṭang tawh khan inphen nan theipui hnah bawk a la ring ta reng a, he theipui hnah phenah hian a saruakzia a lang fo a, he theipui hnah hian a hmelma kutthlakna lakah engti zawng mahin a chhan zo ngai dawn chuang si lo. Hmas^ng ata tawh, mihring thinur hian a dawihzepzia a pholang fo a, a thinur inhrikthlakna sulhnu chu sawp nelh nulh pawh a ni thei; mahse a hlauhna thinlung chuan a ṭhawng tho reng si!

Khawvel hi i thlir em? Engvangin nge khawvel hi buaina hlira a khah a, indona thawnthu leh indona chanchin tharin engvangin nge englai mai pawha min tuam reng ṭhin ni? Indona hi engvanga lo irhchhuak nge a nih a, pawikhawihna hi engvanga lo thleng leh ṭhin nge a nih? Mahni hmasialna vangin indona meipui a alh ṭhin a, vaupung vangin buaina za tam tak a lo thleng a; mahse mahni hmasialna leh vaupung hian tumah a vau dai hlen tak tak lo va, nawrch>pa an awmin, mi dangina an tihbuai belh pawh an ngai lo - anmahniin an buai tawk viau zel.

Mahni hmasialtu chuan mi dang chhiatna leh mi dang nun khawih pawi duhna hi hringnun kalh a nih a ngaihtuah ngai lo va, lalna chan a duh. Chu nihna leh ngaihtuahna tenawm chuan ralthuam atan vaupung fawng a vuan a, a vaupung tin^ thei tur chuan sahimna zuk zawng tlat ṭhin si a!

Mihring hian engvangin nge sipai a din a, ralthuam a kh^wm fo? A sahimna a ngaihtuah a, a vaupung ti-na tura ngaihtuahna a s>n nasat ṭhinzia hi i ngaihtuah ngai em? Silai a hmuchhuak a, thlawhtheihna a siam a, bomb hmanga mi ralsaina tur a ngaihtuah a, amah taka erawh chu bang ph>nah a bihruk ṭhin si hi! Ni e, hmun ralmuang china a ngaih aṭanga hmelma bei ṭhin mihring hian vaupung dawihzep hi a hrechiang khawp ang.

A vaupung leh mahni inthup chunga mi dang a beihna hi tuma hailansak lehchuan a ngai lo va, a hmaik^wr phen aṭangin a inpuang a, a theipui hnah ralthuam phenah saruak a nihzia a lantir mai a ni.

Mei-khup tlan
Mihring khawlo leh l> lovin a huat ber chu a anpui mihring a ni a; a hlauh ber pawh mihring a nih a inhriat ang bawk a, mihring a nih inhre ve-te chu a ni. Hetiang mihringte hi alawm, vuakchhiat tur bungrua remkhawm a, mi dang khawvel hi nawmchen nana hmansak tum a, chhuanlam leh dawt hmanga bibo leh ṭhinte chu!

Buaina fa chuan khawvel indona hi tihfuh ch^ngin a hneh mial pawh a ni thei; a ralthuam chhekkhawl leh inphenna chu a chakpui pawh a ni thei; mahse a chak lohna chu eng hian nge thuam mawi leh tawh chuang ang ni? Mawi a tum poh leh hnawmhne ang a ni a, incheimawi a, a nihna bihruksan a tum nasat poh leh a inhailang nasa ṭhin.

Khawvel hi a cho pawh a ni ang e, mahse khawvel chu a hneh ngai lo vang. Khawvel hi inkhualtelemna ang leka ngai a, a vaupung leh bikrukna aṭanga leilung leh mihring hi a chaih a nih chuan, phih chhuah a la ni tho tho dawn! A dawihzepna thup tumin zuitu rinawmah a inlan der pawh a ni thei a, ṭhian rinawm angah a insiam pawh a ni thei a, a duh phawt chuan hmangaihtu ber ang paw'n a inchhal thei ang chu! Mahse Juda Iskariot-a khan engkim hi fiahfai takin a lo pholang tawh a; seh a tum hmaah chuan tlanchhe chungin vauna thu a chhak chhuak a, thinlung kh<r chungin a nihna a zawt ṭhin.

Arpa chan lai chu a awm alawm. Hnehna hlado chham a, in chunga khuan al al ch^ng chu a awm alawm. Mahse he mihringa vaupung hian eng hnehna tluantling mah a hawn ngai lo va, eng hlawhtlinna tak tak mah a sual chhuak ngai lo. A ken ang ralthuam vuan vetu hmaah chuan tawpkhawkah a tlawm fo a, a mit chu a mihringpui en ngam lovin a kimki ṭhin a, amah do letna lak aṭanga insawifihlimna leh tlanchhiatna tur mawlh a ngaihven a, khawvel leh a mihringpui hneh tumtu chu mualpho takin a zuih ral ṭhin.

Dawihzep kulhbing sang
Engati nge mihring hian amah mihring chauh a en ṭhin a, mi dang tawrhna chu a deusawh ṭhin? Thinurna leh vaupung hian eng thil hi nge a nghawng chhuah a, heti taka mihringin a tuipui tlat? Nau piang tawh leh lo la piang tur thlenga taksa leh rilru ramtuileilova siam duhtu hian leilung a zah lo a ni mai lo va, amah leh amah pawh a inzah lo a ni!

Mi dang tawrhna ngaihven hleithei lo khawpa mahni hmasial leh, mite retheihna hawisan tlat ṭhin mihring hian lal leh thuneih a duh ṭhin. A vaupung vangin khawvel hi a nghing ta dur dur pawh a ni ang; mahse a va dawihzep lawi si em! Mihring hian a sual phak loh a sual a, a cho phak loh chu 'ngam' a ti a; amah vanga thisen luang leh tawrhna taksa te; thlantui leh mittui zawng zawng te hi a chunga leih buak leh mai tur a nih a inhriat chhuah chiah hian mihring chuan a dawihzepzia a inhrechhuak a, a vaupung chuan amah bawk a bei let leh ṭhin tihte hi tawpkhawpa a hriatchhuah leh ṭhina chu a ni.

Dawihzep kulhbing s^ngah mi nikhua lo chu a tawm bo a ni thei e; mahse pawn lam aṭanga nuihzat a ni tho ang. Sum leh paiah a inchhek ngah a, rilṭamin a thi dawn lo tih a inhria pawh a ni ang; mahse a neih sum leh ropuina zawng zawng chuan amah ngaihdam theihna thinlung a lei zo reng reng lo. He vaupung hi natna a ni a, he natna hian mihring chu a ei chhe ṭhin. Kan dam ve tawh miau avangin kan la thi vek dawn a, mihring eng anga thiltithei pawh hnukchat tuar lovin kan la thi dawn.

Engati nge thlanlungte hi kan phun a, engvangin nge kan mihringpuite tana hriatrengtlak nih hi kan thlan fo ni? He vaupung nuna khat mihring tan chuan chutiang nihlawhna chu suangtuah hah ve a ṭul lo. A pawikhawihna leh a sualna chuan thlanah a la hnuk liam dawn a. A thl^nah chuan ui-na thu sawi tur ni lovin, a thi ngei a ni tih chian turin mite an pungkhawm ang - chutiang mihring thlan kotlangah chuan mite'n hnehna hlado chu an la chham dawn a ni.