Nangmah vang vek!

A khuhhawnna: "Hey, 'Hmei­chhia tê tê' min ti elo! 'Hmeichhia' i tih, he ka chhungrilah hian eng'e awm i hria em? Thinlung ruak leh thlan ruak bak engmah hmuh tur i nei chai lo vang! Thin­lung ruak maw... ni e, thinlung ruak! Mahse he thinlung ruak hi a ruah nasat êm avangin a chak a, he engmahlovin a hnawh khah thinlung hi eng luan luh nan mah ka phal lo - zu chauh lo chu!"

Eng an ti nge?
Zu dawr chu a thim ruih a. Chung lam aṭangin êng fiah lo riai ruai hian zu dawr chhunga awmte chu a chhun paw ruih a, hlam bial vela mite bak chu inhmuh hleihtheih pawh a ni lo. Chu êng paw ruih hnuaiah chuan eng rawng mah hi a langsar lo - sual rawng mai lo chu!

Nula chuan a piaha tlangval ding chu meng salâ deuh tên chung hian a melh thip khai mai a. Tlangval chu dawhkan bawhin a bu deuh nghat nghat reng a, a piaha nula chu it melh paw'n a melh tawh lo. A tirah kha chuan zan khat thilthua han riahbuk thingnawifawm theih mai turah riak a ngai deuh a. Thawm a rik tak deuh luih luih hnuah nula chu melh 'tawkâ' mai duhtawk lovin, pawn thim lama han pawh chhuah mai hi a'n tum a; mahse chu nu chu hmeichhia a nih avang ngawta han tawngpâwng nêk ngawt chi a ni hlek lo: inphalrai ahnekin, chu nula chuan a lo liak pherh ta erh zawk mai a ni.

Hrawkbâwka chin chunglam hmangaihna changchawia zan khat nâ reng reng chu han tâl hiarpui vel a tum laiin, chu nula nen chuan an inlim ta zêk a. Tlangvalin tlawm a tum lo va, nula lahin ngawih chuh duh bik hek suh, kutzungchal sai ngat ngata inkâwk tawn chungin an inbauhdun ta chher chher mai a; zu in ve dangte boruak pawh an tikhâwbâw zo ta a ni.

Khawi lam lanu nge?
Chu nula chu thla tir aṭang khan he zu dawrah hian a kal ṭhangte chuan a neitu hmel tlukin an chian tawh a, a mikhual lo.

Uluk takin han inchei se la, khawlaiah tuemaw mit lak ngei tumin han inpenparh vel nâ se la zawng, he khawvel ram zauah hian hmeichhe chhe lo ber zingah pawh a tel mahna le. A sambu a dum hlap a, pian nalh tia sawi tur ni lo mah se, nula duhawm chum deuh bat mai hi a ni a. Nikum leh a kum hmasa maite kha chuan a kawng kal paw'n thlir zui a hlawh ṭhin. Tunah pawh hian an la thlir zui fo a, an thlir zui fo dan erawh a dang ta.

Tunhma zawng kha chuan nula thawm zawi tak mai; ṭawng tam lo, mi'n an fiam pawha nui sen sen chauh ṭhin kha a ni a. Duhawm famkimin he leilungah hian tlai ni a lêng ṭhin.

Mahse ke van vawr suau khawpin hmangaihna pialtlêp-ah a tawlhthlu a, a thlakhlelh hmangaihna chu a kumkhaw nun tichhetu a ni ta a; mite'na an hlimpui ṭhin hmangaihna chu, ani chuan a ṭahpui thung a. Mihringah hian inhnangfâkna tur nei ta lo va a inhriat hnuin zu hmun­ah a inhnangfâk ta ṭhin a nih hi.

Hei hi maw vawiin?
A tan chuan dam reina hi hah­thlawnna mai a ni. Ral riai riai a, thlanmuala hahdam taka mut hlan a nghakhlel ber a, mahni han intihhlum ngawt chu ni theiin a hre si lo. Mahse a thih theih dan tur a nih phawt chuan, a engti zawng pawha nun ve tawh loh hi a duh bera chu a ni mai.

Chu nula tan chuan nimin kha bumtu a ni a, vawiin pawh hi hreh­awmna; naktuk pawh beidawnna khua tisei thlawn mai mai tur a ni.

A in luah tê fel ren rawnah chuan a leng thlawt tawh lo. A thil hmuh apiang mai chuan a thaw a tipik a, a tlangval nena an lo tâldun hrep tawhna, a in chu tunhma zawng kha chuan vanram tlafual ang maia a ngaih ṭhin kha a ni a. Tunah chuan leilawt ang hlauh ni tawh maiin a hria a. Riah nan leh chaw ei nan bak a hmang tawh lo va, nuamsingkhaw an lo hman ṭhinna in chu hotel tenau tlachhe zui mek ang lek chauh a ni ta.

A harhfim chang chuan a mitthla­ah tlangval pakhat a lo lang ṭhin. Chu tlangval a lo hmangaih chu khawvela a inchhirna tawp hleithei lo siamsaktu a ni. Tlangval ṭhatna leh duhawmna zawng zawng chu nula tan chuan bumna thang a ni a, a tlangval intiamkamna zozaite chu, chu hmeichhe tan chuan Setana thlemna ai pawha rapthlak vek a ni.

Nun phurrit
Nova hunlai angin tuilêt pawh lo thleng leh se, damkhawchhuahpui atana a duh ber, a tlangval chu tunah chuan a thih chhan tur dik tak a lo ni ta zawk a. Mite'na an tleipui ṭhin hmangaihna chu, a tan chuan a nun phur tirittu mai a ni.

A nih duh loh ṭha ṭha chu a nihpui tawh a, a chunga thleng ve ngai lo tura a ngaih thilte chu a thleng ta fo a. Nula nunnem ṭhin chuan nu rothap nih a zak lo va; suangtuahnaah pawha mi chan chhe ber anga mihring hi a inngaih tawh chinah chuan tumah hi inzilh fin theih a ni tawh lo. Beiseina zawng zawng a thamral hnuah chuan, mihring nun hi a thar hlaka din thar leh a nih ngawt loh chuan tleuh fai theih a ni tawh ngai lo.

Kan nula-i pawh chuan a thlawn liau liau a, man lova hlimna a lo dawn tawh ṭhinte chu a beisei thar leh ngam tawh lo va, hlimna chu neih let leh tumin a sum neih ang ang a chên a, man lova a neih ṭhin hlimna themnêm tal pawh a lei zo tawh si lo.

Kham leh suar
A chhia a ṭha pawh thlu lovin, hmingchhiat leh mualpho pawh a dâwn thei tawh lo. A nun chhungril tuihâl chuan tui hna thar a mamawh a. A tuihna, kangchat ve ngai lo tura a lo ngaih ṭhin chuan tunah hian a nunah ṭhal khawkheng rapthlak ber mai chu a thlentir a, thlaler vaivut ang maiin a khawro ta tlawk tlawk mai a nih hi.

Ṭhian hnena a chhungril bun ruah mai a duhtawk thei lo va, a nun leh thlarau zawng zawngina a tawrhna chu in-uak thawla dam leh thei mai a ni tawh lo. A rilru, a suangtuahna leh a mihring mihrinna zawng zawng chu tihchhiatsak a nih tawh miau avangin, a taksa paw'n chu natna tawp thei lo chu tuar ve law law se; a tlin loh chinah a taksa chu vaivutah, a thlarau chu boruakah thamral tawh mai se, tiin a ngaihtuah a; chu a ngaihtuahna chu amah rau rau-ah a ngaihtuah chhuah ṭhat ber a ni hial ang!

Tlai tin zu a in a, a kham thei lo. Zu chu tui a ti a ni hran lo va, zu dawra kal reng chu nuam pawh a ti hek lo. Mahse a phurrit chhâwk nan zu a mamawh a, zu hmun a pan a ṭul a, a chahthlak lai chu a nun a nawm ve lai ber niin a hria.

Heti mai hi...
Zu dawr aṭanga phurh haw ngai khawpin, a chang phei chuan ding hleithei lovin a rui (sual) lui fo a, a pum chhunga zu a luh tam poh leh, a chan a ṭha ni maiah a ngai a.

Tunah chuan nula fai ser ṭhin kha nula tenawm takah a chang zo tawh a - a pawisa chuang lo. Mihring a nih leh, ran a nih lam pawh a ngaihtuah chang tawh lo va, a ruihna tur a nih phawt chuan a taksa pawh a hralh mai ang. Mahse tumah hi hmangaih leh a duh tawh lo va, tuma hmangaih nih pawh a duh chuang hek lo.

Zu dawra a tluksawp nuaih ṭum paw'n a tih dan pangngaiin in lama a in tur a lei haw ziah tho a. Chutianga a tih loh chuan a zan ṭhangharhin rilru fim a pu ang a, thil awmdan dik tak hriatchhuah lehna chuan a thinlung chu hling chhun ang maia nâ-in a chhun leh ngawr ngawr ang a, a rilru chu a nat ngaiin a na leh ṭhin dawn tih a inhre reng.

A haw leh haw loh pawh hre lova a khuma a lo mut leh ngawt ṭhin châng a tam ber a. A tih fuh loh châng chuan zanah a han ṭhangharh leh hlawl mai ṭhin a, chutiang hunah chuan a ni, a thinlunga ser chu hlim lan a nih leh ṭhin ni!

Nunhlui ram a fang hman ziah ṭhin a, a mitthlaa mi pakhat lo lang leh teivet ṭhina chu a hua a, a mitthla nuai reh turin zu chu a han tlak nghal pawp zel a! A ngaihtuahnaa a luh fuh ṭum erawh chuan zu hnathawh meuh paw'n a thinlung chu a luan hneh lo ṭhin a, mittui tlak zan a tam ṭhin mang e!

Ni e, kum nga chuang hlimna aiin zan khat lungngaih a rei zawk a, hlimpui tur kan chhekkhawl tam poha kan inhriat leh ṭahpui tur a tam ting a ni mai si!

A la thi lo!
Chu nula chuan a thinlunga thi hlen tura a duh chu a thi thei lo va, nunna thar a rawn nei leh ṭhin a. Thinlung hliam chu eng damdawi mahin a thawi dam zo lo va, pawn lam lang thei leh kawchhung lam fel lo anga enkawl theih lah a ni chai si lo! Chutiang phurrit karah chuan a thlarau a ngaihtuah chuang lo va, a taksa phei chu hnawmhnê ang lekah a ngai zo ta si...

A duhthusam ber pawh a taksa, thi thei taksa ngei mai chu a lainâ-te'n thlan kotlangah 'Amen' thum hnan dap tawh mai se a ti ṭhin a, a duh angin a thi thei mai bawk si lo!

Hlimna a lo tawn ve tawhte chuan thahrui ahnekin, a hrehawmna an belhchhah nasa ting mai a. Hmeichhe zu ngawlvei han nih meuh chu thil nuam a ni hlek lo. Mahse a nun chu ṭhawngaleivir ang maiin a inlumlet but but a, zahthlak leh pawmtlak loh nun tam tak a insiamchawp chu hrehawm tiru veng veng ṭhin mah se, chu lo chu kawng dang zawh tur a hre chuang si lo a ni.

Zu dawra rimawi a han rik dup dup laite chuan a dung chin bak a ngaihtuah thei ngai lo va, ngaihtuah thui pawh a duh hek lo. A no-ah zu a han chhung khat pap a; chik taka amah lo en ṭhintu an awm a nih ngai chuan, a zu no-ah chuan mittui pawh a far lut leh zauh ṭhin tih an hmu ang.

Chu nula chuan a tlangvalin a kalsan ni aṭang khan a khawvel zawng zawng a hloh fai nghal vek a, a chhia leh ṭha hriatna te nen lama rukbosak a ni tawh a. Atthlak takin, rapthlak takin a nun leh hun hman chu a duh tawh mai a, 'Nula zu ngawlvei ka nih hi' han tih chher chherte chu zahthlakah pawh a ngai duh tawh lo - chu a nihna chu mite'n hre vel vek mahse pawi a ti hek lo.

Khawvelah hian hmangaih a nei a, khawvelah hian huat a nei a. Van hnuaiah hian dem em em leh anchhe tinrenga a um zui tâk a awm a; chu chu mihring pakhat a ni.

Mahse... a dinhmun siamtu dik tak chu tu dang ni lovin 'amah' chu a ni tih erawh a inhrechhuak zo si lo! Chu lam a ngaihtuah pha lo. Nun dan bawlhhlawha khawsak duhna hial petu, a tlangval chu mitthi kawtchhuah lo thlen khalh a, mitthi khuaah pawh lo thah nawn leh sak a duh a, amah taka erawh chu a inmanchhuak thei chuang reng reng si lo.