Khawvelin chawlh a la!

Genesis lama "Lei hi a chhia a, a ruak ngawt a ni" tih ang deuhin, hmanni lawka hmun hulum kha zan lama awmtual meichhemna hmun ang maiin vawiinah chuan a dai duak a, a rêm duk a. A tirah Wuhan aṭangin khawvelin bul kan ṭan a, China ram bung hrang hrangin an ṭawm chho va. Chutah chuan thlawhtheihna a tangkhang a; rel leh lirthei dang pawh khawvar lam arsi an sawi ang chauh an ni a. Khawvela mihring tamna berah meuh pawh mihring inlar hmuh tur an tam lo va, kawtthler a zau zual a, a ruak huai a. Manganna leh thawpikna-in boruak a zâp vei durh durh a. Kâr lovah khawthlang ram lamah Wuhan hri chhia chuan hlet a chhuah zui a. Chu 'hlet' chuan nasa takin vung a chhuah a. Tunah chuan coronavirus buaiin kan buai tlang ta a, ram za chuangin beih let dan teh chiam kan hre lo va, inven dan bak chu inhrilhchhawn tur kan hre tam lo. 

Mipui sang têl tlin khawmna ṭhin infiamna tualzawlte chu a ruak ta hiai huai a, football lama Europe leh South America te intawh khawm hun tur pawh kum khat lawihin sawn hlat a lo ṭul ta a, khawvelin a cho loh natna hrik chuan ro a rel mek.

Nawmsak bawlna hmun leh ennawn chhuahna hmunah mipui auh khawm theih a ni ta lo va, sumdawnna hmuna inpenparh ṭhinte leh tangka inchhek ri te pawh a thawm a zawi ta raih a. Lirthei leh thlawk thei khuahkhirh a ni a, mihringin a zawn tâka chu mawina aiah muanna; hlimna aiah himna; nawmsakna aiah nunna; khawlohna aiah khurbinna a ni ta ber.

Mahse khawvel chuan chawlh a mamawh alawm! Sydney aṭanga inṭanin, a rualpawl phak khawvel ram dangina an ṭawmpui zui tak zel - Earth Hour te chu tun thla tahrik ni 28-ah hman chauh tur mah ni se, Earth Hour aia thawk nâ-in khawvel chuan mihring thilsiam chawlh lâwkna ni chu a hmang ṭan ta zawk a. Tunah chuan darkar khat chhung kawlphetha tihmit zuai kha ni tawh lovin, kawlphetha aṭanga thahrui dang insiamna te, khawl leh bungraw dang hmanga thiamna rah ṭha lo chhuak zawih zawihte tan chawlh hun a lo ni a. Earth Hour rei lo te hman zuai pawhin leilung leh van boruak tana himna leh thawhvenna a thlen si chuan, tuna coronavirus vanga khawvelin a hmasawnna ruhrel leh hmanraw hrang hrang a khuahkhirh meka chuan kori a tu nasa zawk khawp ang. 

Buai reng rengin, hmanhlel hle rengin leilung hi kan luah a. Mahni mihringpui chu sawi loh, khuarelte phei chu kan nêk per dawr dawr a, kan khawih phak loh van sang lam lah chu meikhu kan chhuah khum hluah hluah a, van lama kan hmuh phak lohah khian thil rep kan ngah tawh khawp ang chu!

Mihring hi khawl ropui taka Siamtu'n a duan chhuah ni mah se, mihring siam anga livir neia khawl vir chur chur reng tura duan kan ni ve si lo. Chutah chuan covid-19 chuan dar a khawng ri a, hahchawlh hun a ni! Mihring hian amah pawh inngaihtuah thei lêk lova kawng hrang hranga a phêt lên lai chuan leilung leh a mihringpui tan ngaihtuahna ril leh thuk zawk a hmang nasa thei lo a ni ang e. Intihsiakin, intheihsiakin, intlansiak leh inneihsiak reng rengin kan thluak leh theihna hi a che vel ta em maw tih mai tur hi a ni tawh a. Mahse tunah chuan khawvel luahtu awmchhun kan ni ngawt lo va, leilung hi kan phingchil mai mai tur leh kan chenna boruakte hi awmze nei zawka hip tlâng tur kan nih thu te hi a ngaihtuahna hun kan nei thei dawn ta a ni awm e.

Inhmangaih tlang a, inrem tlang a, "Rualrem City" a cheng za del del tura siam hi kan ni reng a. Chu chu rei tak kan bosal tawh a, nung reng chungin kan boral hret hret chu a ni tawh ber. Tunah chuan lung te leh lung pui ang maia inngheng tawn tur kan lo ni a, pakhatin a tuar chuan pakhat dang tan ngaihthah theih ngawt a ni lo tih kan chiang tawh a, mihring leh a khawvel inzawm thukzia leh thuizia kan varpawh nasa leh zual tawh mahna!

Pahmei, furchhia leh nawmloh satliahina a chelh theih loh ang maiin, thâwk lakna hun pawh nei mumal hman mang lovin, mahni seh lam lamah kan tlan a - chu chu khawvel nihphung tur rûngah kan ngai nghet deuh hmiah niin a lang ṭhin. Chutih karah chuan hmasang aṭang tawh khan eng inthin harhna hun emaw chuan khawvel hi a hrual zeuh zeuh a ni lo'm ni? Mahse mak tak leh hlauhawm taka siam - mihringte hi Eden aṭang tawh khan kan fuh hleithei chuang lo. 

Hmanah, kuthnathawktute thawhrimna chuan khawl a han hring chhuak a. Mi tumruhte chhelna-in awlsawmna hmanrua a tuk a, finna-in thiamna hrang hrang a hring zel a. An luh tirh aia ṭha zawka khawvel chhuahsan lehtute ṭhehnemngaihna leh inpekna chuan an tel ve tawh lohna khawvel tan nawmsak zawkna an hnutchhiah zut a. Hmasawnna chu chhuan lo awm leh zelte tan tlankawng lun ber a han nih tâk zelah chuan hawina lam apiang a vul a, a pik tel bawk a. A ruak a, a khat mup bawk a. Khawmual chu sawi loh, tuifinriat chhung leh van thengreng thlengin mihring chuan ram a la a. Lei chhungril thuahthip kara hausakna thlen thei de zeuh thleng hian mit kan len a nih hi. Leilung innghahna meuh pawh hi kan kar phawng thei hial ang a, tih theih rum rum tur khawpin khawvel thluak hi a inbuan vel a ni ber lo'm ni?

Theihna hrang hrang, thiamna ze chik nuk leh thamna leng vel noh noh karah hian leilung luahho ṭheuh ṭheuh, veng ṭhenawm naupang kal khawm ang maiin a eng thil emaw bera chungnun tum ran hi kan ni a. Chak zawk, thei zawk leh hausa zawk nih chu patling atchilh thil a ni. Chu chuan ṭawngkaa inbeihna a hring a, nuna indona mai bakah kut thawha inchaltauhna a hring fo va, a ram leh ram inkar thu-ah ngat phei chuan, hmun tinah ralthuam chher ri hriat tur a awm a. Awpbettu leh lehthaltu nih tumna thlarau chuan khawmual leh tuipui chung a awp khur a nih ber awm hi!

Inremna tia tlangau chungin mahni mihringpui chhiatna tur leh lei, vaivuta chantir dup duhna khawpa chapona chuan mihring hi a tuam a. Kan chher chawp tangka chuan a chhertu a thunun a, thinlung meuh pawh lei theitu chuan thluak chu ngam saah a ngai!

Tungchhova kalte chanchin chu thawnthu mak danglam a ni a. Inchibai chunga ke inrahsak tum ran mai te kan kat nawk a. Hmangaihna leh lungawina te hi kan zawng a, kan dap a. Mahse hmangaih hlen lohna leh lungawi kim theih lohna ram ni miau hek, mihringte nunchan chu duhawmna te, duhâmna te, nunrawnna leh nun rawpna nen kan khar leh ṭhin si! 

Chutichuan, hmasawnna chuan tawrhna a thlen a, changkanna chuan hleilenna. Finna chuan hnuaichhiahna a thlen a, hriatna chuan ngaihnepna. Chumi khawvel siam ṭhat tum chuan mi tam tak an lo pen chhuak tawh ṭhin tak na-in, amah Isua Krista meuh pawh khawvelin a hmelmak phah zelna leilung luahtute kha kan ni miau mai si a, keimahni relbawl bawlin kan inrelbawl a, chuti ang, mihring aṭanga chhuak ṭha ṭhang nia kan ngaihte chu "a lo ni mang hlek lo mai a!" kan tih theihna tur hunte pawh a lo thleng tel ve a nih awm hi maw!

Kan theihna te, kan thiamna te hi sâng viau tawh mah se; chu'ngte avang chuan mihring hi inkâr dan phah fo mah i la, leilung chhulchhuak, khuarel nena inhne rem taka khawsa mai tur; in chunga arpa sual huai ang maia khuang ul ul tur ni lovin in hnuaia bawk ve mai tur hi kan lo ni a. Kawmchara au lung lung tur ni lovin tap kuan vel mai tur hi kan lo ni a. Kawng khâr ṭhin hian tukverh hawn dar hi kan lo ngai reng a. A tawpah chuan mihring hian a dam chhung rei lo tê-ah hian nungcha ang maia in-ei tawn tur ni lovin, hmangaiha inkaihkuah tlang mai tur kan lo ni, tihte hi tunlaia khawvelin chawlh a han puan tâkah chuan, a eng zawng emaw tak chuan kan zir chhuah theih hlauhte hi ka ring ve hial nia!

Mihring aia chungnung zawk hian chung lam aṭang hian min be fo tihte mai hi...