I ngaihdan a nih chu!

A khuhhawnna: Tu nge ka nih a, eng nge ka nih? Ka inphawrh fai leuh loh chuan min hriat chian tumin tute paw'n bei mah se, min hre dawn lo reng reng! Ka chanchin chu an hriatdan danin an lo hria pawh a ni thei e, kei chu amah Bob Dylan dungthulin "Blowin in the wind" a ni ang! Nia, thli chhem l>n chu a rim an lo hre thawi faih ṭhin pawh a ni ta ang, mahse a tak an chenchilh thei si lo - hre turin.

Eng kawng nge ka lo zawh tawh a, eng kawng nge zawh ka tum a, eng kawngah nge ka awm mek a, eng kawng hian nge min hmuak mek ka hre lo. Chuti ang "kawng" min hriatpuitu lah chu khawvelah tumah hi an awm lo va, an chhut nasat poh leh an buai ang.

"Tuemaw" nih tumin mihring hi kan buai vek a, "tumah" ni chuang ta lo pawh kan tam ngawt ang. Hmanah, ka suangtuahdan chuan, tuipui rala zin a, eng rosum leh thiltihtheihna danglam tak emaw, ngaihsan leh ngaihsan hlawh loh theih lohna eng dinhmun emawa din emaw kha ka chak ṭhin. A nih loha leh, thingtlang naupang enkawl emaw khawsak harsate tana eng zirna hmun emaw, an nunkhaw nawmna'na eng thil emaw ruahmansak a, khawsakho del del ka chak ṭhin a. Nungchate tana beih te; kan ramhmul hi kan ram rohlu a nih thu tlangaupui te; kan ramhmul hi kan rama "thim thuah tam" ral hma pawha kan hausakna, kan leilung tihlutu a nih thute zir chiang a, a hlutna zirtirtu nih te; infiammi niha chanchinbu kawma lan te; ka tum hlen thei tura chhel taka ka beihdan chanchin khawi media emaw-a sawi te ka ch^k a; daktawr thiam tak nih a, damdawi hmanga mi natna zawn aia mi natna mila damdawi chawhthiammi nih te pawh ka chak ṭhin. Ka duh ber chu mahni tan chauh ni lo va, mi dang tana hlawhtlin a ni.

Tunah eng'e ka nih? Tih tawh chu hlen ngei tum mi ka ni ṭhin a, ka ni pha ta lo! Ka hna pawh hi, tuk luih vang leh phuar vang pawh ni hran lem lova Thawhṭanni aṭanga Zirtawpni thlenga zing dar 8 aṭangin tlai dar 5 thleng thawk ṭhin thei tur ka ni a, ka thawk lo! Ka hna hian a zir lo nge keimah zawk hian ka zir lo tih thu hla hi ngaihtuah tham a ni em ka hre law; ka hna thawh chhung tirei lova titawi duhtu mai ka ni ta em, tih erawh chu inngaihtuah ka ngai ta fo a, chutah chuan ka hlawh hi ka phu nge phu lo tih pawh mahni ka inngaihtuah nawn fe a ngai tih ka hria. Mahse, mi tam zawk ang bawkin, thawh belh ai chuan thawh tlem ka lo duh ta fo a; nawmsak zawk duh mi ka lo ni ang tih hi hlauh nachang hre lo khawpin ka lo nunpui fe tawh hman zawk a, ka harh chhuah meuh chuan - khawtlang leh kohhranah ka lo "thu" hman fe tawh zuk nia!

Ka duhthusam hna ka thawk a, ka duhthusamin hna ka thawk ta lo! Mite'na min duhthusampui hna ka thawk a; mahse an duhthusamin ka thawk ta lo!

Kei hi, ṭawngṭaina dawng tam leh ṭawngṭai ve fo hi eng ang mihring nge maw ka lo nih chu le?

Kha'ng ka kum eng emaw zah (ve) chhung khan tu nge maw ka nih chu le? Kha'ng hun chhung zawng khan mite hian tu nge maw min tih le?

Kan duhthlan kawng ngei kan zawh a, chu kawng chuan kan nun pawh a khalh ṭhinin ka ring a. Nun hi zinkawng ang a ni a, thil chi hrang hrang kan hmuin kan tawng a, kan chetsual deuha leh, kan tlu a; mahse kan tho va, kan kal leh mai ṭhin zawng a ni a. Mahse, kan tlu a, kan tho leh thei tih tih hre lo hi kan tam zawk ang em? Tlu apiang hian kan tho leh thei tih hre khawpin kan harh vek ang em? Tlu tawhte hi an tho leh thei tih hre chunga kutphar hi kan tam ng<t ang em? Tlu tawh leh tlute kaithotute hian tlute chu a lehpeka chetdan tur hrethiam thei turah kan dah ang nge, kaihruai zui turin kan che peih lo vang?

Mihring hian kan nuna thil lo thlengte hi kan duh dan a ni vek bik kher lo... ti raw? A teuh lo. Mahse a lo thleng miau si - chhan engemaw avangin a lo thleng ṭhin. A chang chuan vanduaina tuipuiah pil ta ruai ruai hian ka inhre ṭhin a; mahse vanneihna tawngbaw thei turin ka hma hun lo duan ve ang angte chu tihhlawhtling turin sak tak chung paw'n ke ka pen ve leh ṭauh ṭauh ṭhin a, kan ka pen dan a dang ṭhin mai pawh a ni.

Mi chak ka ni em? Ka ni chuang hauh lo. Mite pawh hi an chak tawk vek lo vang. Mi zawng zawng hian harsatna kan tawk vek a. A thimzawnga thlir ṭhintu nih phei chu vanduaithlak tak a ni. Mahse nun hian eng hlimna nge min la pek dawn tih thlir chunga hma lama ke pen hi kan tih mai zel tura chu a ni lawi si.

A thimzawnga thlir ṭhin tlat hi mi tin tarmit a ni ang em? Chhuanlam siam a, tun hun ni lova thil kal tawh lam en tlat a, hnu lam aṭanga hma lam teh tlat mi hi a tam zawk kan ni mai ang em?

Mihring hian harsatna tawk ṭhin lo i la, engtin nge kawng dik kan hriat theih ang ni? Harsatna chu vai kian tum lova kan ṭhutpui reng chuan keimahni chu harsatna kan ni zawk mai ang em? Kan chhungrilah chona thar kan nei ang a, ke pen turin kan tho tur a ni si!

Mi nun tluang mi ka ni em? A teuh lo. Chuti ang nun chu ka duh hlek lo! Mahse mahni leh mahni nihna hloh khawpa kan chet tawh chinah erawh chuan mi pangngai nih leh a har tawh khawp mai. Chuti ang hunah chuan kan tawn ang apiang ze nei, mihring kan ni tawh mai ṭhin.

Hlimna chu eng'e a nih chiah? A hnu lehah eng thil nge lo thleng dawn tih hi tute mah hian kan hre hlek lo. Kan nun dan tur hi kan hrelawk lo va, sawi theih a ni ngawt lo. Nun chu ni tina zir thar zel a ngai a, kan thil tawn ang zia zelin nunkhawchhuah kan zir mai tur a ni.

Mi ṭhenkhatina an harsatnate min rawn lehburh ve fo a, chu chuan an harsatna sut kian kawngah a pui r>ng em ka hre lo. An chh<t lo mai pawh a, anmahni'na an sut kian theih thil chu tlanchhiatsanin, harsatna sawiin an nileng satliah lek fo ni hian ka hre ve ṭhin.

Ka ngaihdan chu a chang fal fal deuh em aw? A lo ni maithei e... Mahse mi ṭanpui theitu nih hi ka duh a, mite harsatna lo ngaihthlaksak a, puih an ngaihnaa lo puih hi ka thupui chu a ni. Mahse, kan hmaah hian mite'n "thim" an hmu ṭhin a, kei ngei pawh ka tan hian "thim" hi ka hmuh thuah tam ṭhin. Amaherawhchu, ka khawthlirna tukverh hi ka thlak thei thei lo a nih pawhin, ka hawina tukverh hi hawisanin, tukverh dang ka pan dawn lo'm ni?