Nang awm lo la chuan...

A khuhhawnna: Kha'ng hmunah te, he'ng hmunah te hian mahni chauha mala v^k turin min hnutchhiah ta la chuan mitin a hmuh theih bak suangtuahna a bo ang a, bengin a hriat theih bak beiseina a thamral ang a, thahrui hian chakna sawr chhuah tur a hmu lo vang a, pen tina tlu-in thlan khurah ka v^k liam mai mai dawn a lo ni!

A chang hi chuan mahni chauh pawha tlei leh tlai a, tla f^l thei anga inngaihna hian min luah fo a, bumna mai a ni tih ka han hriatchhuah hnuah meuh hi chuan khawharna-te hi chu nept>... kulh ropui chim ta rup chan ka lo chang fo a. Mihring ni chatuan mai tur hi khawl ang lekah ka inchhuah fo a, nun hi hlim reng tura ngaihna leh a chena chen d^k ṭhak tur anga ngaihtuahna ṭha lo leh sukthlek mawlmang ka hman chang ni hi a tam teh e!

Mihring hi amah maia hlim thei ni se la, ka piang ve ang em? Mihring hi hlim chatuan tura duan ni se la, natna leh thihna hi ṭiauvut zat angin leiah hian an inzar pharh ang em? Chu'ngte chu nangmah vang hian ka ngaihtuah nawn ta fo mai. Nia, mahni chauh inhriatna leh mahni chauha nung tura duan ka ni lo tih inhrechhuak tura min beng harh fo tur i lo awm hi ka tan nunna a lo nih hi le!

A chang chuan hlimna hi mahni ta bil, tuma tel lo pawha neih theih leh chharchhuah theih ni turah riak ka lo ngai ṭhin a nih awm hi maw! Ka phaktawk leh beisei phak baka ka chan leh neih hmang hian hlimnate chuan min um zui zawk chawn chawn tur angte hian ka lo ngai ṭhin a nih awm hi maw! Lungngaihnate chu hrethiam lovin, thlarau sual hnathawh anga ngaih chang ka lo nei fo awm asin! Mahni chauha hlim theia inngai mihring hi mi khawngaihthlak chu a ni!

Kan ngaihhlut ber tangka hian hmai hnih a neih chhung chuan mihring nun pawh hian 'nun hnih' a nei ve zel dawn a.

Chhun leh zan a inlumleh chhawk kualna khawvel ram zauvah hian nun thim leh eng hian min inluhchhawk zak zak ang a, mihring dang nena chengho tura Siamtu'n leia a dah kan nih miau avangin nuih ni leh ṭah ni tawng lova tawp hun nghak thiang kan ni lo va, thihna-ina a kawih ṭhen tura duan kan nih miau si avangin kan dam chhungin mi dang kan mamawh a, hlimna awmzia hrefiah turin khawharna leh lungngaihna te hi kan tawrh a ṭul ṭhin a nih hi.

Khawvela hla hralh tla ber chu lungngaihna kaihhnawih a ni duh chawk a, chuti ang hla chuan lung lah a len! Lehkhabu zingah hlimna leh ruahmanna kal mam purh purh ṭhinho chuanna ai chuan hrehawmna leh lungngaihna bilh telna lehkhabu chu a ngaihnawma hlel hlel an ni a. Hlimna min

ṭawmpuitu kan mamawh ang bawkin kan lungngaih-na min ṭawmpuitu tur tuemaw kan mamawh ṭhin - min tukzaltu leh min tichaktu turte bawk chu.

Na thei mihring hi, a chang chuan hlim viau ṭhin mah ila, ‘Sawm thah ni-ah lungngaih vawi khat a awm chawk’ tih a ngaihna khawvela kan chen miau avangin mihring hian rit a phur ṭhin a; harsatnain min hmuak a, nun ram chau ngawih ngawiha ni vui liam chang a awm fo a. Kan phak ve nia kan hriat kha kan chen lo sat sat a. Ngui leh vuiin kan kaikun a, chuti ang hunah chuan a ni, mihring hi mahni maia awm tura siam kan nih lohzia min hailansak a, hmangaihtu leh ṭanpuitu kut phar hmuh chaka mit min lzntir ṭhin tak ni!

Leilung chu hmun ruak zau tak, luahlumtu nei lo ang hrima ka thlir lai khan bengin a hrechhuak leh ṭhin che a, mitin a zawng ṭhin che a; hringnun kil thim aṭangin ri lovin chhungril hian a ko che a, ritphurh min ṭawmpui ta lo a nih pawhin, inuak-thawlna tur tuemaw tal chu mihring hian a mamawh miau si a ni!

Beidawnna ruamah mihring hi a tlukhlum a, mahni kut tuara a boral maite pawh a hlauhthawnawm rum rum ṭhin lai hian hmel lang hmasa ber chu nang hi i ni leh ṭhin a. Nun ram reh tlawk tlawkah hian min ṭangkham tura tu thahrui emaw kan mamawh lai te, mite hmuh ve loh nun min khawrh chhuahpui tura tuemaw kan mamawh lai te, khawvel hmachhawn thei tura tu hnen aṭang emawa chakna kan mamawh lai te hian koh phak leh ban phakah i awm zar zar a.

Chona leh chakna chu i zara ka chan a ni a, a changa ka khawvel reh tlawk tlawkah hian rimawi phurawm tak min tumsak ṭhin a, he thisen zungzam hi a tho thar leh ṭhin a nih hi.

Nun hi a kim loh nasat poh leh mihring kan nihzia hi a famkim ṭhin a lo ni! Changpat-in pum puarna a zawn kawngah cheh chhum a tawk a, a darh nuaih ṭhin ang lek hi mihring chu kan nih mai awm hi! Kan vak darh a, nun hi a ruak huai a; saruak mai kan nih avangin kawchhungah leh thinlungah kan ril a ṭam ṭhin. Thinlung rilṭam chuan luah khattu a zawng a, chatuan hawlhtlang thei hial tur khawpa hlimna min pe turin tuemaw ṭanpuina kut kha hmer vawng vawng chakin thinlung hi a rum chuah chuah a, hmuh tur hnaivaia awm reng chu kei ve khanglang hian ka hmuh k^n lui tak fo che a!

Ka duhzawng apiang neiin, ka lawmzawng apiang ko chhuak thei dinhmunah ding ila, nang nen hian kan inhlat tial tial ang a, ka tan i awm tih hrechhuak leh zo lovin leilawtah ka tlahlum mai dawn a lo ni!

Ka duh emaw duh lo emaw, ka nunah beh reng i duh lai khan thinthlak che ka tum a. I tel ve lohna khawvel thar siam tuma ke ka chheh luih ngat ngat laite pawh khan ka mamawh hun tur che thlirin min hnaih ru hriau hriau reng a. I tel ve lohna nun kawl tlat anga inhriate vanduaina tem tur hian min phal lo va, ka vanneihzia hrechhuak fo turin duhsak takin harsatna leh lungngaihna lungin min vawm ṭhin a nih hi.

Thla eng mawizia hre tur hian zan thim hnuaiah ka tawm a ṭul fo a; ka nuna khawvar hun nghakin nang hian khawfing la chah fel hmain min kuai ṭhu fo a; tlang chuan turin a bulṭhutah min hruai hmasa zawk ṭhin a lo hi!

Mihring hi mahni ke-a ding thei tura ropui taka siam ni mah ila, hringnun hi chu nang nena ke kan pendunna ṭhin tura duan a ni a. Tlang chhipa min paw thleng tur te, thlipui a tleh laia kan vawn tur leh inhumhimna tur min pek tel bakah, chakna hmachhuana naktuk min thlirlawkpui tur te, rit min phurhpui tur te-in nang hi i rawn thawkchhuak a. Ka nih phak loh tur tur leh ka mitthla paw'na a suangtuah phak bak pawh pel rawk rawk thei tur khawpin min koki chhuan a. Mi chen mang hlei lo hi ka tiapuite aia sangah min nghat ve fo a; mi pawl pha mang hlei lo hi mi pangngai chhuahin mi chhuah ve fo a; thimin a zin hnan bang chhah bula ṭhu nileng mai mai tur hi ni chhuahna lam panin min hruai fo a nih hi maw le!

Mi derthawng tak ka nihzia inhre chang lo lek khawpa min tuamhlawm nasatzia hi!