Zofa duhtak

Thlalera mi au-rawl chuan..., "Ram ka la pek tur lam pana ka hruai lai che u khan nangni chuan van lam hi in rawn hawi ngai lo va, chung aṭangin bawkkhupin ka lo thlir reng ṭhin che u tih in hre ngai hek lo. Nun harsa takin, eitur leh silh leh fen mumal pawh nei lo va, ramsa < awrh ang chauha in tal ve naw naw laite khan in kiangah ka awm zel a; tlang leh ruam bawha thlang lam in pan zel laite khan vawitekhatmah ka chhînsan ngai lo che u. Luipui tui vawi tam in dai kai a, Rihdilah mitthite thlarau zinkawng in chhui tawp lai pawh khan in tisa leh thlarau chawlhna ram tur chu ka zuahsak vek tawh che u a ni.

In thiam dan leh hriat dan hawi zawnga ke in chheh lai khan, intiṭiavai mai lohna'n Khampat leh Seipui khur aṭangin ṭukkhawmtu ka pe che u a. Khatih lai leh a hnu lama in khawsak phung chu nangmahni thawhchhuah ve r>ng a ni lo, chi-a sawi tham loh aṭanga hnam ropui taka dinchhuah tumtu che u, kei hian in nun ka khai sansak che u a ni zawk.

Harsatna leh hun khirh hmangin vawi tam ka bia che u a, chu'ng hunlai chuan nangni'n min hre lo - min thlang lo. Mahse keima'n ka thlang zawk che u a ni!

Lungrualna hlutzia in pawh theihna'n in lakah hnam liante ka inlulintir fo a, thisen chhuakin in do a, in tlawm leh ṭhin. In ṭap a, in tlu a, in nupui fanaute chu salah hruai an ni a, mittui leh tuihawk kara in tluksawp laite khan in kiangah ka awm zel a, intelruh in mamawhzia zirtir che u ka tum avangin ka phal chin zelah in tlawm mai chauh a ni.

In rah chin apiang in ramah ka chhalsak che u a. Khawchhak kil aṭanga he ram luah tura ka hruai thlakna kawng kha chhut nawn leh u la, theihnghilh suh u la, in la chhui chho leh dawn a ni. Kha'ng in kalkawng zawng zawngah khan in sulhnute chu ka thup rih a, in mit a var hunah in dap chhuak leh ang a, in sulhnu awmna chin apiang chu in ram a la ni leh dawn a ni.

Ṭiau lui in k^n rual khan in kephaha ṭiauvut leh a lui tui te chu in thin thlak ka phal lo va, in kehniakte chu tuiin nuai ral tawh mah se, hun erawh chuan a chhinchhiah reng a, a la chiar nawn leh bawk ang.

Leilung ka din tirh aṭang khan Ṭiau chhak leh thlangah hian in chenna tur ram zau tak ka valhsak vek tawh che u a, chu ram chu ka mi thlan, ka mite hian in la luah dawn a ni. Khawvel ram dangte hian kunin chibai an la buk ang che u ang a, khawvel hnam ṭhenkhat hi in thuhnuaiah an la tlu lut ang.

Tuma la luah ngai loh ramah ka hruai lut che u a, Rihdil leh a piah chu 'thlarau ram' ah in ngai ṭhin. Mahse tunah chuan tisa ngeiin chu ram chu in luah ta. In hun hluiah khan nunho dan in thiam theihna'n tlang hrang hrangah chi peng hrang hrang ka dah che u a, nangmahni leh nangmahni in inbeih ṭhin lai pawh khan ka thlir reng ṭhin che u a, kha'ng zawng zawng kha hnam hmangaihna leh inpumkhatna in neih theihna'na ka ruahman a ni.

Thlang in tlak hnua in lal huaisen, Lalburha chanchin kha ṭhang leh thar zelah inhlanchhawn nachang in hriat theihna'n Sailo lal Lalburha chu huaisenna-in ka thuam a, ka thahrui a. Ani hnen aṭang khan inzir thar reng rawh u.

Kumpinu sawrkarin a palen changchawia a n>k lai che u khan pasalṭha ka pe che u asin. In lal leh pasalṭha rualte khan ralthuam an neih ṭhat em avanga Kumpinu rawn lian chho zel tura kha do an ni lo. Tam hneh an inrin avanga Kumpinu bei an ni lo. An ram, an hnam a ral dawna ai chuan, anni chuan an nun an hlan ang a, an neih zawng zawng leh anmahni chu ral mah se, an ram leh hnam a din chhuah dawn phawt chuan pawisak an nei lo.

Tu ram mahin chhuh luih ka phalsak lo che u a, ram ruakah ka dah ta r>ng bawk che u a. In chenna tura ram ka dinah hian hnam dangin an rawn zar buaiin, rawn luahlan che u an tum ṭhin. Mahse chuti maiin an chimih che u ka remti lo.

Nangmahni in inchhanhimna'na chem sen in len lai te, silai cheng in kau rik rap rap laite khan hmuhnawm ka ti che u! In ram leh hnam tan, in nupui fanaute tan, in tuchhuan lo awm zel turte in ngaihtuah avanga in hmelma-te nunna in laksak laite pawh khan ka ensan ngai lo che u.

In nun chu indona-in ka chher hriam a, tlawmngaihna-in ka tihausa a. In khawsak tisamkhaitu atan Bengkhuaia leh lal dangte hmanruaa hmangin, in hriat ngai loh rama ṭawngṭaimite chu ka koh chhuahsak ta che u a nih kha.

Ka lam rawn hawi nachang in hriat hnua in nun ze mawi kha hnam tin nun zia ni se ka duh ṭhin. Engtik lai paw'n mahni inphatin mi dang tan in nung ṭhin a nih kha. Hnam lian lot> in nih avangin hmangaihna-in in inkhuahkhawm ṭhin a, Zo nun leh Kristian nun tluka inhmeh hi van thengreng ram hla zawkah pawh hmuh tur a awm lo.

In thla khirhtu Kumpinu rorelna ka phehthluksak che u a, zalenna famkim nena thuam che u ka tum laiin, in zinga mite leh a rîm mektu hnam dangte ṭanrualna chuan Kanan ram in panna kawng chu a tikualin, a tisukuk leh zo ta a, thlalerah kum tam in ch^m a lo ngai ta a ni.

In ram chu nangmahni ta bil liau liau tura ka din a ni a, in hnam pawh ka hung hran rei e! In pianpui zalenna chu awpbeh a ni ṭhin a, in ṭhanharh hnu a, in pi leh pute thurolum hre renga ralthuam in chelek laite pawh khan thilmak ka tihsak ṭhin che u kha!

Mahni nunna pawh kalsana ram tana nun in hlan kha, in ti dik asin! Hnam tana hliam in tuar kha, in tih tur dik tak a ni asin! In ser kaite chu inchhuanna tham a ni a, in thinlung chu van d^pa phochhuah tham khawpa mawi a ni. Tuma'n hmusit che u suh se. Tu nge chil chhak che u a, tu nge deusawh che u? Chu'ng mite hrem dan tur chu ka ruahman fel vek tawh e. Tuma'n nuamsa-in khawvel an chhuahsan lo ang!

Ka mite in nih chuan in hnamah pawh in chian ka duh a, a fiahna'n che u harsatna leh buaina ka pe fo che u a, ka thli fim zel che u a ni.

Chatuan khawvar in nghahna turin, in lu phumna hmun chu ram thianghlima siam turin hetah hian ka nghat che u a ni. In nunah zan a lo thlen chang chuan vanpui chim ta ang maiin ṭekmei rapthlak takin a deng zawt zawt ṭhin che u a. Thim chhah tak takin a hual mup mup fo che u a, thil ti dik lo-tu zawk ni ang hrima beih in tawh lai pawh ka hai lo. Ka hmu vek. Mahse thisen leh thlantui, mittui leh mangchhia aṭang hian inthingharh ula, insangmar ula, in ke chhep remin, tho u la, ding ang che u. In hliamte chu a dam ta! In serte chu a ṭha zawnga hre rengin, khawvel mithmuhah hian, "Kan lo tho leh ta e!" ti turin ka duh che u a ni!

Kumpinu dawhkan hnuaia chaw-mal tla in chhar lai te, tuna in dinhmun te hi ka hai lo. Hnam hmangaihtu miretheite ṭawngṭaina chu ka khawlkhawm a, mi inngaitlawmte thawm chuan van a nghawr asin! Lu chhum ban chhum huamin in thlahtute khan he ram hi an lo sat zau a. Hmanni-a mite khan chutiang bawk chuan he ram zalenna hi an sual a, thisen tam tak a luang a, in thlakhlelh zalenna chu a bo tur a ni lo!

Ram ruh filh ṭhuau chungah ka dah lo che u a, hausakna-in ka thuam che u a ni. Chu malsawmna chu kei leh in hnam in hmangaih nasat zual deuh deuh hunah ruahpui angin a la sur ang.

Ram chu in hmuh theih chin chauh hi a ni lo, a piah zel pawh a la awm. Chu chu in ta lo turah dah ngawt suh u. Hnam chu, inchhui ngun rawh u. In chanvo chuhin in ṭhenawm lawkah, in inchhung ril ngei thlengin sese-a phiarruk reng in ni!

In nawmsakna tur thlir lovin, in hnam dinchhuahna tur chauh ngaihtuah u la, min lungrualpui ang. Tu nge hnam chu phatsan a, tu nge hnam tana ding ngam? Tu nge ram chu hmangaih a, tu nge a hralhtu chu? Vawiinah hian harh ula, pawn lam aṭanga beitu chauh ni lovin, chhung lama pawn lam mite thurualpuite pawh dap chhuak rawh u. Chu'ng mite chu in thinlung phekah chhinchhiah tlat ula, in hnam chunga thil thlengte chu vawng tlat ula, in ram leh hnam tana mi hnawksak chu ngaihtuahna ni-ah ngaihtuah a ni ang.

Zoram khawvar hun in nghak a, in zavai chuan in nghak chhuak lo ang. Khua a var hma hian mi ṭhenkhat chu thim zingah dah hlen an ni phawt ang a, rilru-a van lam entu leh thinlunga hnam phurtu tak takte'n khawvar hnuaiah he ram hi an luah hlen tawh ang.

Khua a var hma hian, in hmanlai pasalṭhatna thinlungte chu in muthlumpui zo tawh nge, in la tuai thar zel tih hriat ka duh a ni. In chakna thahruite chu a khang zo ta nge, in la ṭang mar reng tih hriat ka duh a ni. Fiahna in la kaltlang leh rih ang. A fiahtu che u chu hnam dang mi leh nangmahni chhunga mite ngei pawh an la ni ang.

Khawvar chu a hnai ta. In puanven sawi chhing u la, in beng chhiin, in mit len u la, in kalkawng chu thian fai turin tho chhuak rawh u le," tiin puan var sin chu a au a. A bengkhawntu tak tak chu mi tlemt> chauh an la ni a.