Charlie Chaplin ka thlawp!

A khuhhawnna: Lal mu khawi ang maia hawi chapo lurh mai te; mi hmai leh khaw >ng zahpah hlek lova khawsak hreh reng reng lo te; kawngka lu chung leh lirthei hmaa eng nihna emaw thiah thlahlel em em ringawt mai te; mihring inlai­chinna leh mipui tana ṭhahnemngaih lam aia mahni invoh vung mai te hi khawvela mi bawlhhlawh ber berte ni mai hian ka hre ve a. Chuti ang lam hawi sual firfiak leh kherek zet zet maite chu fiamthuthiam Charlie Chaplin khan a lo helh nasa khawp mai hi a lo ni a. 'The Great Dictator' lehkhabuah heti ang deuh hian a lo ziak a...

Mi tih loh dan takin, kei zawng, ram zau taka lalber (emperor) nih hi ka thlahlel ve tlat lo mai a, chuti ang lam chu ka tuipui zawng lah a ni hek lo.

Mipui leh ram awptu nihte ai ngawt chuan, ka theih ve-na a nih phawt chuan mi dang ṭanpuitu nih ka thlang zawk a. Mihring kan ni a, tute emaw puih hi mihring kan nihna zawn aṭanga kan tihmakmawha chu a ni. Tute pawh hi hlim i la, kaikun bik awm lo se; huatna aiah remna-in rorel se ka ti ṭhin. He khawvel hi mi tin tana siam a ni a, leilung hi a hausa em mai a, mi zawng zawng a huap a ni. Amaherawhchu, nun hi a mawi a, a zalen tur a nih laiin, chuti ang nun duhawm chu kan hnawl bo tlat bawk si!

Itsikna hi thlarau tan t<r hlauhawm a ni. Chu t<r hlauhawm chuan khawvel hi a fan a, huatna chi a tuh a, thisen a luang ṭhin a nih hi. Thiamna a ṭhang a, khawvel hi a tlan pur pur a, keimahni kan inhloh si! Thiamna sang zel chuan mamawh min siam belh ṭun a ni lo'm ni?

Hriatna chuan mahni hmasialnaah min hruai lut a, finna chuan mi dang nghaisaa mahni inhaivurna ruamah min thlen a. Thil tam tak kan ngaihtuah a, kan rilru khawihtu erawh thil tlem t> chauh a ni lawi a.

He'ng khawvel thiamna sang zelte ai hi chuan nun ze mawi kan mamawh zawk daih! Finna ai chuan ngilneihna leh zaidawhna kan mamawh zawk. Chu'ng nun ze ropui tel lo chuan khawvel hi nunrawnna tualzawl mai a ni a, mihring hi chu tualah chuan kan tluhlum ṭhin.

Thlawhtheihna leh radio te chuan khawvel hmun hrang hranga awmte hi min thlun zawmin, ralah pawh min kuah khawm thei ta hial mai. Nia, mihringin kan mamawh nia hriatna avanga siamchhuah pawh a ni reng a ni. Tunlai khawvelah chuan kan ṭawng rual rualin khawvel letliama mite nen lam, mi maktaduai t>lin an lo hre thei nghal vek tawh a. Mi lungngai te, hmeichhia leh naupang te, rorelna fel lo vanga retheihna tuar mek te leh pawisawilo te chuan min lo ngaithla thei tih ka hria; chuvangin, ka sawi duh chu - "Beidawng ngai suh" tih hi a ni.

Itsitna vang te, mi dang 'len' ve hlauh vanga mi dipdal tum tlatna vang te hian khawvel nun a kaikun a, lungngaihna-in a tuam ṭhin. Mahse mipui rorelna hmetmita rorelna lektute kut aṭangin mipuiin rorelna an la chang ve ang a, zalenna mei a mit tawh ngai lo vang!

Chanchinṭha Luka bung 17-naah pawh kan hmuh kha - "Pathian ram chu in zingah a awm a ni," tih a nih kha. Chu... mi pakhatah a ni lo, pawlhovah a ni hek lo: ‘in zingah,’ mipui zingah a ni, a awm ni!

Mipui hian thiltihtheihna in nei a ni. Hnehna chang turin in chak tawk a, zalen boruak tawng turin theihna chu nangmahni-ah a awm a, nun hi duhawm riaia hmang thei turin in thawhrah in seng thei. Chutichuan, mipui rorelna hmangin kan thiltihtheihna chu i pho lang teh ang u.

Khawvel thar siam turin lungrualna nen ke pen i la, chu khawvel tharah chuan phur takin hna kan thawk thei tawh ang a, kan hmalam hunte duhawm zawkin a lo inpharh diai tawh ang a, lungmuangin lei rem kan rap ve tawh ang.

Lei phurrit lum bo turin i bei ang u.

Indaidanna ramrite ṭhiat i la, itsikna thinlung thian faiin, huatna leh nunrawnna te chu i phum bo teh ang u. Khawvel hi nunna tlakin chhuah tum i la, thiamna leh finna hmanga kan thawhrah dik takte chuan hlimna min thlen tawh ang. Chumi atan chuan insuihkhawm leh zai i rel teh ang u hmiang?

En teh, chhumte chu an kiang a, ni >ng a lo lang e. Thim ata >ngah kan chuangchhuak a, kan thla tliak tawhte chu a lo pharh leh thei ta - thla-in kan thlawk ang! Chhimbal piah ramah-te chuan kan l>ng ang a, nunna >ng zungzamte chu temin, hmabak duhawm leh ropuina ram chu kan hnaih zel ang a, kan zavai hian chu nun chu kan la tawng dawn a ni. Chu duhaisam ram, suangtuahna khawvel thar chu han thlir la, i rilru-in han cheng vel teh - a tak ram kan la dai dawn asin!