Ka ngaisang chuang si lo!

A khuhhawnna : Zu a rui a, a ṭawng bual bual a; chuti chung chuan thu ṭha tak tak a chhak chhuak zut zut a. Pathian thu, Bible bung leh chang nalh tak tak a phuh chhuak a. Eden Huan aṭangin a luhchhuah a, hringnunah a tawp a; Lei leh Van a suihzawm a... uak ṭhawt ṭhawt chungin Pathian thu leh sawrkar chungchangte pawh a sawi kur duah a, a meng pui pui a, ka ngaihsan phah chuang si lo!

Kohhrana a kul a taia ṭang a ni a, pa chengv^wng tak angin a lang a, sawrkar hna a thawk bawk. A fanu leh fapa chanchin sawi tlak a neih ka hre lo va, sawi tlak loh chanchin nei fa a neih leh neih loh pawh ka hre lo. Chu chuan amah ka hmuhdan leh ngaihdan a tidanglam pha chuang lo. He rama hri chi khat lar tak a vei ve a. Chuti ang hri vei chu tuma'n an lainat lem lo. Sawrkar sum bawm aṭangin thla tin hlawh a la a, a hlawh lakna pisa aṭangin chhunahte hian khawi lai lai emawahte a tei kual zur zut thung a. Khaw hla takah gospel camping leh crusade tih ang vela thangbo vang vang chang a ngah. Mahse thla khat emaw a aia tam emaw sawrkar hna a tlanbosan ch^ng a, khawi lai lai emawa thlarau a buaipui chiam chiam chung pawh chuan, amah bera chuan harhna a chan awm pawh ka hre lo va, a thawh loh hlawh chu vawi engemawzah sawrkar aṭangin a la tawh a; a thawh chu cheng khat hu ni ta se, a hlawh chu cheng hnih a nih hmel! Mahse thiam loh a inchantir chuang lo. A ni tin eizawnna tlansanin, pawihawi leh chhuanlam tinreng nen pisa a chhuahsan fo a, khawi hmunah emaw thil ṭha ti thanin a va thang fo mah se, ka ngaisang chuang si lo!

Zu pawh in lo, sakhuana pawh la run hran lem lo a ni a. Mite'na kan hmuh dan chu mi ṭha pangngai leh nun tluangtlam - lamhlaa thing tuai tlawn ṭha ang a ni. A chang chuan ram kalphung fuh lohzia a thupui a, a chang leh tute nun emaw a kham thu a sawi a. Tu pawi mah a sawi lo tih chu amah leh amah paw'n a inhrechiang viau a. Ruihtheih thila a fihlim avangin mi dang ngaihtheih lohna lian ang reng tak hi a nei a; a lang a pauin chu a ngaihdan chu tilang lem lo mah se, a ngaihtheih zawng leh zawng loh chu a hriat tho. Ram nun leh hringnun kal sual hi a vei a, her rem a duh a, chuti chung chuan a ngawi mai a. Chet chhuah a tum lo va, mite chu khelmual chhunga inkhel lai ang mai hian a sir aṭangin a thlir ni mai hian a hriat. Chuti chung chuan mi nih dan leh awm dan dik lo chu siam ṭhat duh angin a insawi fo a, a chutih fo avang chuan ka ngaisang chuang si lo!

A ṭawng tinuam tur leh a nun tizalen tur tawkin sum leh paiah ngelnghetin a inhria a. Khawtlangah engemaw nikhua-in a-ti-veltu zinga mi a ni fo a, tha a thawh loh chang paw'n pawisa tal a thawh thei deuh zel a. Sual do chu zu leh vai huat hi niin a ngai nghet hmiah em maw tih tur a ni. A vei thur thur a, zahpah a nei hran lo va, a ngaihdan leh chetdan apiang chu

ṭha ber turah a ruat a, amah kalhtu chu a hlat a, duat hlawh fa tlum ber ang hrima nun a tum tlat ni hian a lang ṭhin. A pal chak a, a p<t chak a, mi dang chunga l>n tumna rilru a pu ran reng a, mi chunga l>ng tur chuan mi dang a mamawhna a nasa tih a inhre chuang lo. Mahnia tlei thei tawk leh puar thei tawk niin a inngai a, chu chuan a khaw hmuh, ṭawngkam leh sukthlek eng eng emaw a kaihhruai tlat avangin mi dang nena inkungkaihna kawngah zung a kaih thuktir thei ngai reng reng lo tih inhre lovin, tute pawh hi a kawhna lama kal mai zel turah a ruat a. "Hmalakna" kan tih ang kawngahte hian sakawr tha chak ang mai ni mah se, a tun zah bawk a pal tluk ṭhin avangin ka ngaisang chuang si lo!

Amaha thli beng dan z^wng z^wngin, a ṭul ang angin a thle tawn mai a. Ṭul a tih hunah a inkhawm a, ṭul a tih hunah ruihhlo a kawm leh mai a. "Style" tih hian a thunun a, a tunlai thei ang bera a hriatin nunchan hi a hmang a, thil tak tak hriat tum chuang si lo hian ama phak tawkah ngaihdan hranpa lianpui hi a nei a, mimawl hi a hmu tam! Tunlai thiamna leh finna tlem azawng temtu a ni a, a thil tem chuan awmze nei zawka lut thuk zawk turin a tivir chuang hlek lo va; ama'n nawmchenna leh a nun hlimna tawk nia a hriat phuahchawp leh tlachawp bungraw nun leh thlarauah a inhnangfak a, amah aia hnuai zawk hreta a hriatte chu tu-khawkhaah a ruat lo va, a hamṭhatna tur mihring nia a hriat thung erawh chu a zui peih nek a. "Mi" nih tling ve tak mai, "tuemaw" ni ve riau hian a inhria a, engemaw ti ve thei riau hian a inhre tlat a. Mahse tu'nge a nih ka hriat chian miau avangin ka ngaisang chuang si lo!

Mipui hmuhah a inpho itawm thiam a, mipui lawm zawng chu ani paw'na a lawm zawng ni awm tak hian a inpuang thiam a. Mihring hi kan rual lo tlang a, kan dinhmun a inchen lo tih thu dik kumhlun hi hre bel hneh ber ang hian a lang a. Ngaihdan ṭha tak tak leh ruahmanna rintlak hmel pui pui chhawp chhuah tur a nei thei reng a, mi huap zo hle ang hian a lang a. Mipuia tlak natna tur leh a tlakna tur target thlang fuh ṭhin chat chat viau mah se, fakna ri te, sum inchhek ri te hian politician sihal ṭhenkhatte ang tho-in a n^k n>m an zen tlat avangin ka ngaihsan phah chuang der si lo!