Chawhmeh zuar Sangi

A khuhhawnna: Tunlai chu vai dawr lian a lar a, a dodal­tute leh thlawp­tute'n an theih­na zawn zawnah he Aizawl dawr lian thar hi "free fakna" an tihsak hi a ni hawt a, a dawrtu turte an intlar deuh titih anga an sawi ka lo hriat phei chuan, nuih tur nge thinur tur tih pawh ka thlei hrang thiam lo hial.

Sumdawnna khawvel vir mup mup karah hian keini hmelhriat bel ve chu chawhmeh zuar Sangi tih ang duangte an ni a. An chanchinte lah hian tu bengkhawn mah hi a hlawh lo va, kan ram rorelna in sang phei chu an chanchin hian a luah pha lo lulai lutuk a, beidawn ngaihna pawh a awm lo hial zawk!

Tuna vai dawr lian an rawn hawn thar hian kan Zoram economy a nghawng chhe hle dawnin an sawi a, mi berh ve t> t>-te'na dawr ak leh a remchan dan ang anga an sumdawn ve-na te pawh a sawp chhe zo dawn niin an sawi a. Sumdawng leh sumdawng inbeihna ni mai-te pawha sawi a awm. Chu'ng karah chuan chawhmeh zuar Sangi-te dinhmun chu engti ang takin nghawng ve ang maw, tihte ka lo ngaihtuah zui ve chiam chiam a. Anniho hi hman

aṭang tawha vailian tuar tawh an ni a, han au chhuak ve-in, tute emaw dodalna thute han fan kualpui ve dawn se - an do tura-te tak chu "sawrkar chak tak" hlir an nih dawn avangin khanghu sam kual sam kual chung te, zikhlum kheh mawlh mawlh chung te-a phun ve bal bal kha an theih tawk a ni tlawng mai a, an sumdawnna khawvel chu khawlhkham tak a ni.

Vun, thawmhnaw, lirthei, bungrua leh thil chi tin chi kima rualpawl bakah mi chung hreta lawn tuma kan thinlung zawng zawng, kan thlarau zawng zawng leh kan chakna zawng zawnga kan buaipui lai hian hnahthel hnuaia fanghmir ang vela kan hmuh k^n - chawhmeh zuar Sangi-te angho kan mamawhna hi a kiam thei chuang reng reng lo va. Anni tel lo chuan tu choka mah hi choka a tling zo lo va, tu dawhkan leh tu pumpui mah hi chawhmeh zuar Sangi-te tel lo chuan a kim thei lo.

Vairengte thlang lam aṭanga zikhlum, hmarcha, tomato, alu, dal leh eng ilo dang hi a chang chuan Sangi-te tan malsawmna a ni a, a kumtluan athu-a han ngaihtuah erawh chuan anchhia a ni thei ang. Chutah chuan an hma tlang sang takah sawrkar inpui a ding luah a, an hnungah loneitute an ṭhu tlim hmur bawk a, chung chhehvel kara leng - chawhmeh zuar Sangi-teho dinhmun chu i la ngaihtuah ngai mang mang lo maithei a ni.

A bikin Zirtawpni zan hi Sangi-te tan chuan tlaivar zan a ni. Chumi hma, Ningani zan aṭangin zanlai pel rawkin an meng ṭan tawh! Kar tir aṭang tawh khan an zawlpuite nen chawhmeh chungchangah indawrin an phi kual tawh bawk! Khawpuia Inrinni tuk hi chawhmeh zuar Sangi-te tan chuan Masi bazar a ni a, kar bul leh kar laihawl velte ai ngawt chuan thingpui hmeh pawh a tui thei deuh!

An sumdawnna innghahna bulpui chu khuarel a ni a, khuarel hi an tan malsawmna leh anchhia innih chhawk zat zat reng hi a ni ve a. Chuta karah chuan a zuartu ai maha a dawrtu an duh^m zawk chang hi a lo awm ve nawk bawk a; eng "bonus" mah tiam ve lo mah se, "tel khat cheng 20" piah lamah hian eng thil dang emaw inpek telte a ngai a, a chang chuan tel khat cheng 20 ni chunga "tel hnih cheng 30" nihtir a ṭul changte pawh a awm.

Kawngpui dung hi thlai zawrhna'n thil tih chi zawng a ni lo. Hriselna lam aṭanga chhut te, mihring khawsak phung aṭanga chhut te pawhin chawhmeh zawrhna awm hi a ni hlawl lo. Amah­erawhchu eng sawrkar chak tak mah hian chawhmeh zuar Sangi-te ang dinhmun hi an chawikang zo miau lo va, Bible-in "sual bul" a tih um hian kan thiam dan danin kan phe hlawm a ni miau mai si - tu nge indem thei chuang!?

Hmanah, engtik kum Independence Day nge ni, Millennium Centre an hawn kha? Sumdawnna khawvela kan hmasawn ve-na pholangtu in lian cheng vaibelchhe 34.37 emawni-a an sak an hawn kha... Khami hnu lawka kawngkama chawhmeh zuar Sangi-teho tiangkengtute'n an vai darh lai kha ka rilru-ah a lo lang leh

ṭhin. A engtik lai mah hian Sangi-te tan han thawven ve deuh emaw mumala sumdawnna han beih ve tak tak theihna hun ṭha emaw hi a la inhawng ta chuang reng reng lo va. Project lian pui pui hian a thlawh khum duai duai reng a, sumdawnna lian tak tak karah rem leh rem lovin an bet ve ṭai ṭai a, hlep chhe t> um-a ruahsur leh ni sa vawl vawl hnuaia an ph>t ve a ngai chatuan thei mai dawn ni-te hian a lang.

Chawhmeh zuar Sangi-te duhthusam ber chu thlai thar tam a ni. An thu loh em emna khuarelah chu chu a innghat. Vai sumdawnna remchang hawn hman lek lo va, ṭhal-ah pawha thlai thar tam thei tura ṭanlak an duh em em reng a; chu chu in ropui aṭanga be ṭhintute-a innghat a ni ve thung. Van chunga roreltu khi chuan a ṭhat a la chhuah ta reng a, van hnuaia roreltute erawh chuan an ṭhat an la chhuah ta lo reng thung a tih theih a. Vailian hi chawhmeh zuar Sangi-te chuan danchah an duh ngar ngar a, a danchah lam ngaihtuah lo ngar ngarte an khan lo lulai em mai a, 'Vishal vuai thei' chi thlengin kan ram chu ngaihtuahawm a ni zui ta zel bawk a nih hi!