Kan hmaah Iskariot-a

A khuhhawnna: Petera chanchin pawh chhui zau chuang lem lo keini ang hi chuan Juda Iskariot-a chanchinte phei hi chu kan hre tlem khawp a. "Chanchinṭha Juda Iskariot-a ziak" tih ang velte kha chu a chhuibingmite'n an sawi thawm ka lo ralkhat hriat ve teih teih tawh a. Aigupta rama El Minya-ah puk pakhata Iskariot-a chanchinṭha ziahna lehkha (papyrus) an hai chhuah thu National Geographic Society-in an tlangzarh dan velte a ri nawk tawh a nih kha.

Abela felzia sawi ch^ng apianga Kaina sualzia sawi tel ve zel a ngai ta ang deuh hian, Isua Krista ropuia a lan rual chiahin Iskariot-a tenawmzia sawi tel a ni ta zel a, pa piang vanduai ve tak zawng a ni ngat mai.

Keini ve teh lamina Iskariot-a kan hmelhriat dan hi chu, Bible-a a lan dan ang ngau ngau hi a ni mai a. Zirtir sawmpahnih zinga an sum pai vawngtu, an treasurer, an finance minister ve chhang kha a ni a. A sum leh thil hlu lampang ngawr ngawr lamah kha chuan a rilru a pe tawk ve viau zawng a ni ang, an ṭhianpa Johana khan a ziak dim teh chiam lo. Isua hun hnuhnung lama Bethani khuaa Lazara-te ina an chawlh ṭuma Mari'n hriak man to spiknard sawh keh a, Isua ke-a a chulh ṭum pawh khan Iskariot-a chuan a sum mit-chawngkawr khan a lo melh leh hman pek a: “He hriak rimtui hi engati nge duli zathuma hralhin mi retheite hnena an pek zawk loh?” a ti vei kh^ kh^ a nih kha. Amah Johana khan thu belhin, "Mi retheite a ngaihsak vanga chu thu chu sawi a ni lo; rukru a ni a, tangka ip a kawl a, a chhunga dah chu a lak ṭhin vang zawk a ni," a ti tel deuh kher!

Kan Pathian Lehkhabu-a hming lang zingah hian Iskariot-a hi a "misualpa" deuh ber mai ni hian a lang a. Misual symbol mai a ni lo va, bumhmang icon a ni a, a taka Isua fawp pha zingah chuan a hmingchhe l^wtlak a, Isua phei chuan "...chu mihring chu piang suh se la, a tan a ṭha zawk ang,” tia a chungchang thu a puansak kha a ni hial. Mahse Iskariot-a hi malin a awm lo ve, a hnungah mi tam takin kan zui si a!

Tuk tin zan tin, a sur a sa hnuaiah, lamhla leh hnaiah pawha Isua belbul ve chawt tho kha a ni a. Isua rualin thlifim a dawng a, Isua rualin vaivut a pal khu a, Isua rualin tuifawnte pawh a tawng ve a, thilmak tam tak kha a mit ngeiin a hmu ve zut a, mi sawmpahnih thlanchhuah zingah khan a thusa ber pawl pawh a ni maithei. A tawpah phei chuan zirtirte zinga a lar ber pawl a ni ta hial!

Kha Juda Iskariot-a kha a "side B" lam, a chhe lam leh ni lo lam zawnga hriat hlawh a nih rual hian, Adama ang bawka mihring hlimthla leh darthlalang a nihna lam hi kan sawi vak lo em aw? A lang a pau-ah chuan Isua ruala kal ve ṭhin kha a ni a, a lang lo ruamah, a thinlung lamah erawh kha chuan Isua kha a lang lem bik lo a nih hmel. A khawthlir kha a hnu lama piangte ang bawkin - sum khan a chiah hneh ve hle ni hian a lang tlat a, kan tunlai khawvelah hian cheng ve ni se la chuan Bible zakzeh chunga eiru ṭun ṭun, kan tih zinga mi ngei hi a ni ve ang.

Mi fel angin a inlan a, a tawpah mi sual khawlo a nihna a lang ta tho si a, keiniho nen hian suar khata tla za kan ni - mi hrang kan ni lo ve!

Sumin Isua a hralh a (chu...!), tangka sawm­thum chu a hlu hle a ni maithei, mahse kha tangka sawmthum khan an hotupa ni lovin, amah leh amah a inhralh tih lam reng reng kha a thlu hman lo va, a nunna chhattu chu hrui a ni lo - a sum ngainatna zawk kha a ni!

Zirtir zingah Petera ang kha chu tunlai hian kan v^ng pharh pharh viau ang a, Iskariot-a ang kha chu thler tinah kan lawr fur hian ka ring mang e! Han dem thei chi ziazang em kan nih?

Kha kan hmaa mi huai tenawm kal ta, Iskariot-a kha lo dem tluan parh ngawt teh suh. Khatia Isua hralh a, a duh ber tangka a han neih hnu khan harhna a chang ve tho a ni a! Thinlung ṭawphnawk ber mai a put azara a han "mawm" tak lawk hnu khan ani chuan a thil tih dik loh kha a pawm a, a pawm satliah mai pawh ni lovin mahni inthiam lohna kha a nei khat liam a. Amaha ze ropui tak - mihring nihna kha a lo lang chhuak a, a tlan lohna lam turah a tlan zui ta mai pawh a, a dik lohna a pawm ngam erawh kha chu ropui deuh a ni a.

Mihring hi ti dik lo thei, sual thei, khawlo thuk zet thei kan ni a. Mi pangngai chuan thil a tih dik lohin inchhir nachang a hria a, mahni inthiam lohna rilru a pu ṭhin a. Mihring anga lang ve si

ṭhenkhat hi chuan thil an tih dik loh chian em em chung pawh hian an dik lohna an pawm duh der lo va, inthiam chawp chungin mi dang an puh kual zut a, insawifihlim leh a eng kawng hawi zawng emaw tala thiam chan dan ngawt hi an dap zut zut a, chu'ng mite chu Iskariot-a ai mahin an tenawm zawk mai lo'ng maw?

Sakawrdai sikul pakhat thuvawn chu "To be a man" tih a ni. Mi ṭhenkhat chuan fiamthu thawhna'n an lo hmang leh hman pek! Khawvela thuvawn zingah hian thuvawn ril pawl tak niin ka hria. Mihring hian mihring nih hi a zir a ngai fo a, mihringin mihring a nihna a hloh tawh chinah chuan khawvelah hian a khawi hmun mah hi hahchawlhna awm lo, engkim a inṭhelṭhu-na hmun a ni zel.

Mihringin a tih dik loh te, a thil ṭha lo leh sual tih te a pawm duh miau si loh chuan engtikah nge thlakthlengna nun (change) chu a thlen chuan ang? Mihringin mihring a nihna hloha sawrkar vawnfung a chelhnaah te, sawrkar hna a thawhnaah te, eng eizawnna emaw eng hna emaw, sakhaw rawngbawlna a ni emaw a eng kawngah pawha a mihrinna ze ropui tak a tlansan a, a thlawh bosan miau chuan engtin chuan nge khua a var ngawt ang le?

Siamtu kut lum la kai ther ther naupangte hi chuan thil an tih dik loh an hriat leh hian hrehawm an ti a, an kimki a ni ngai a; amaherawhchu mihringin a dai tur tam tak lo dai tawhte hian thil kan tih dik loh hi kan hre duh tlat lo ṭhin a ni lo'm ni? Kan thil tih dik loh kan pawm duh hlawl loh dan leh kan huatthlalak em emzia chu!

He'ng thilah hian sum thianghlim lo vawngtu Iskariot-a kha chuan a dik lohna a pawm ngam a, a ropui ve-na lai a ni. Inthiam thei hlawl lovin a tangka dawn kha hmun thianghlimah a vawrh lut a, a sim chiang hmak hmak khawp hian ka ring. Mahse sim hlen tura mahni a indahṭhat dan erawh kha chu a rapthlak lu deuh ta mai pawh a ni.