Guest writer
Lalzarmawia
Nun, Hun leh Nangmah
A khuhhawnna: Hmanni chu Facebook phek hlui ka keu vel mai mai a. Kum 2015 January thla, thlasik vawh vin chhoh lai vela ka thu tawi lo ziah ve kha ka keu chhuak nawlh a. Keimah chauh hi chuan ṭha ka'n ti leh vîng veng pek khawpah! "Naktukte zawng, lungkham teh suh: a liam ve leh mai ang. Tun ang thlasika intuam lumna tur i nei hi 'A va tihzia!' han ti hluai phawt mai teh. Nunte hi chu lirthei ang a ni a, a tlan zut zut a, kan khaw hmuh dan a dang zut zut a, min duhtu leh duh lotute pawh kan tlan pel zut zut zel mai nia!" tih tê mai kha a ni. Keimah bawkin ka ngaihtuah zui ta zel a...
Nun hi a tlan reng a, hetia kan nun ve chhung hian lungawi chang leh duhkhawp loh chang te, hlim ni leh lungngaih ni te, hlawhchham lai leh hlawhtlin ṭum te a thleng reng reng a, chu chu kan tawn tur ve renga Siamtu duan a ni.
A eng a mah hi kan nunah hian bet hlen a awm lo. Kan inngaih dan ang angin kan chhungrilah thil hi a lo tla ta mai niin a lang. Kan ngaihtuahna hian keimahni a pho lang a. Kan insawi ang hi kan ni mai lo va, kan thil tih hi keimahni chu kan ni. Keimahni taktaka hi phurrit leh thil phurawmah te, lungngaihna leh hlimnaah te, hlawhchhamna leh hlawhtlinna kan tawn changte hian a lo lang ṭhin a ni.
Kan nuna thil lo thleng tam zawk hi kan cho chhuah a ni a. A êng zawnga kan ngaihtuah chuan thil ṭha kan cho chhuak fo a, a thim zawnga kan ngaihtuah tlat chuan min delh rittu thil a lo thleng mai ṭhin.
Ngaihtuahna, rilruin a pawm danah leh kan thil tihte hi an inkhaidiat chhuak vek a. Indona, inhuatna, thikna, itsikna leh elrelna thinlung pu tlat mi thinlungah remna leh muanna a thleng ngai lo. Engto reng reng leh hlauthawng reng renga awm a, lungngaihna leh sawiselna, huatna leh demna nen ringawta kan khah chhung chuan hlimna hian min rawn pan chai lo vang!
Hetia nun kan hmang bek bek chhung hian kan chhehvela thil lo thlengte hi kan nunah kan seng lut zel a, chu chuan kan ngaihtuahna pawh a thunun thuai a, kan ngaihdan pawh a thlakthleng ṭhin a. Kan chhehvel thilte chu mihringina kan siam ṭheuh hi a ni a, mi dang hi kan nunah an bet tlat a, mi pangngai chin chuan mi mitmei pawh kan veng a nih rêng hi. Amaherawhchu, chuti chung chung pawh chuan keimahni siamtu erawh chu keimahni bawk kan ni tih intheihnghilh lo tlang i la ka ti ve mai mai ṭhin.
Mihring leh mihring kara thil pawimawh chu inzahderna hi a ni. Keimahnia awm ang ang kan rik chhuahpui phawng phawng hian engti ang takin nge mi dang nun a khawih dawn tih kan ngaihtuah tlan a ngai a, he leiah hian vanram leh hremhmun chu kan siam ve thei asin! Chumi siam tur chuan tumah hi ruat bik an awm chuang lo va, keimahni ṭheuh hi a mawhphurtu leh mawhpuh tura chu kan ni. Mi dang nun hlim leh hlim lovah hian mawh kan phur fo a, kan thinurna hup bet tur hian keimahni'n mawh kan phur tel bawk.
Engkim hi rilru aṭanga lo pût chhuak a ni a. Mi ngainatawm tak ṭheuh kan ni. Mahni leh mahni hi inchawkphur fo i la, kan thlarau nunte pawh tuai tharin, ngaihngam takin mahni leh mahni hi inpawm thliam mai i la, tu nge kan nih a, eng'e kan duh, tihah hian chiang tlang ta mai i la... Kan duh chu vuan i la, kan vawn chu duh i la, dawhtheihna nen hringnun hi i chên ang u.
Kan nunah eng thil pawh a lo thleng ang, chu'ng hunah chuan leiverh kaw tawpah êng a awm tih hre reng i la, kan tawn apiang hi min siam ṭhatu tur a ni tih hriatna hi a va hlu kher em!
Thil kal tawh chu a tihdanglam theih loh. Lo la thleng tur erawh keimahniah a innghat a, kan nun inlumlet kual vel hi keimahni ngaihdan dana innghat a ni e.