Vawiin

A khuhhawnna: Mihring hian mi dang aiin amah a inbe ngun ber ang. Mi kamtam ber leh ṭawngduh ber pawh hian a puanzar aiin a puanzar loh nun thuruk a ngah zawk ang. Chhungrilah hian a chang chuan r>m ri a fawn kual a, nui ri a kh^wk rum rum a, hnualna leh beiseina thar te, chapona leh insitna tawp chin nei lo te pawh an f^n uak uak thei a. Mihring hian amaha 'mihring' hi a siam a, chumi hun remchang atan chuan 'vawiin' hi pek kan ni! He vawiin hian a ni, miin kawng hrang hranga ramte chu an l^k ni! Vawiin hian a ni, miin kawng hrang hranga ramte chu an tlukpui ni! 

Aw, mihring! Leilung luahtu zinga ropui ber,

I nunah tute emaw an lo luh chang a awm ang. An kalsan leh chang che pawh a awm ang. Chuti ang hunah chuan nun awmzia i hriat theihna'n eng thil emaw tak an zirtir hman ngei che ang a, tu nge i nih chiah inhre turin emaw, eng mi nge nih i tum, tih i inhriatchian theihna'n engemawti zawng tal chuan an pui ngei ang che.

Chuti ang mite chu mi hrang hrang, ze inang lo pui pui an ni thei. I lehkha zirpui ṭhin te, ṭhenawm te, zirtirtu te, ṭhian te, ngaihzawng te... mikhual, i la hriat ngai loh te thleng pawhin an ni thei. Eng mi pawh chu ni se, i nuna lo lut tawhte chuan i nunkhua an khawih lo thei lo va, i hmakhua leh sulhnu an khawih lo thei lo.

A chang chuan i nuna thleng lo tura i duh thil rapthlak te, natna te, puhchhiatna te pawh a lo thleng ṭhin ang. Chu'ng tawrhna leh harsatna te chu hneh let thei tura i beih loh chuan i theihna, i chakna, i tumna leh i rilru ropuizia te i hrechhuak thei ngai lo vang.

Damlohna, tawrhna, hmangaihna, roh ber ber ch^nna leh thil duhawm lo dang te'n i thlarau nun an fiah fo vang. A engti zawng emaw bera fiahna lo thleng ṭhin chuan nun hi tluang purha hman tur a nih lohzia an hmuhfiahtir ang che.

I ṭhian kawm ṭhinte emaw hlawh­tlinna leh hlawhchhamna i tawn apiangin tu nge i nih chiah, tih hi i inhrechiang sauh zel ang a, i tum ram pawh i fiah lehzual ang. Tawnhriat duhawm lote pawh hian zirlai min pe ve tho va, a chang phei chuan zirlai pawimawh ber ber min pe ṭhin zuk ni a!

Miin an hmangaih che a nih chuan i theih ang tawkin hmangaihna-in chhang let ve ṭhin ang che. An hmangaih vang che ni ngawt lovin, hmangaihna an hriatchiantir che avang leh chuti lama i thinlung mit an tihkeu avang chauh pawhin hmangaih let ang che.

Miin an hliam che-in emaw an phatsan emaw che-in, ngaidam ṭhin rawh - tu lakah nge fimkhur tur a, tu nge rin tur tih i hriatchhuah theih phah avangin.

Eng thil pawh ni se, ni tina i nuna thil lo thlengte chu hlut hle phawt mai teh. Chu'ng thilte chu i tawng nawn leh ngai tawh dawn hauh lo a ni a! I mi biak ngai lohte kha biak tum la, an thusawite chu ngaihthlak ve han tum tawh teh le.

Hmangaihna ch>n la, zalen takin, rilru zangkhai takin awm tum rawh. Han hawi s^ng deuh vah pawh ni la, chu chu tuma'n an khapsak thei lo che. I rilru-in "Mi ropui i ni: ka ringtawk che" tiin nangmah leh nangmah inbe ṭhin rawh! Nangmah leh nangmah pawh i inrintawk loh chuan mi dang tan phei chuan rin i har khawp ang le.

I duhthusam thilte chu i thlentir thei. I duhthusam anga awm turin bei la, i duhthusam ang a nih phawt chuan inchhir buangbar hnuhnawh hauh suh ang che.

Mi i hmangaih a nih chuan, hrilh nghal rawh - naktukah eng'e lo thleng dawn, i hre si lo.

Ni tin zirlai thar zir tum la, vawiin hi nimin lama i lungkham ‘naktuk’ kha a ni e.

"Vawiin" chu a lo thleng e!