MI HANG KHAWHAR RIANGVAI

Kohna aw mawi lo

Kum 1932-ah kum 32 mi a nihin Nettie nen an innei a. Chutia rual zawng zawng zinga a Sangzuali nena an inthlakhlelh em em lai chuan St. Louis Revival Meeting lamah zai tura kohna a han dawng a. Laiking bel rawh a inmun churh churh lai hun, August thla khaw lum hrehawm zual lai chu sawi loh, a fa hmasa her hrinsak tuma a nupui Nettie a raipuar ṭeuh lai a ni a. Mosia'n kohna a hnial ang key-a han hnial ve mai pawh a chak ve rum rum hial ta ve ang. Mahse amah ngaisâng tak taktute bei tidawng tura thutlukna han siam kâwlkalh ngawt mai chu a rilrem zawng a ni hlek si lo va; tichuan, Abrahama angin chu kohna phurawm fahran lo chu a chhâng ta a ni.

Zin tur chuan a inpuahchah ta poh a. Châk lo zetin a zaina hmun lam a pan a. Mahse a haihawt a chhuak ve teh tlat pek a, an Chicago khaw daifem an tlan pelh hnu chuan a music case a theihnghilh tih a han hre chhuak leh hnuhnawh chauh a. An ina a va kir leh chuan a nupui chu thinthi diai hian a lo mu a. Chumi ṭum chuan an nu kalsan chu hreh sa loh hian a han hreh ru ta riau mai pek a. Mahse inhmu leh mai tur nia a inhriat avangin, thawm din em emin an nu chu a kalsan leh ta nge nge a. 

In chu a chhuahsan leh mai. Mahse a chhungril chuan an in chu a chhuahsan thei tlat lo va, Chicago daifem lama an tlan thawt leh viai viai laite chuan, in a chhuahsan dawn lai a, hriat loh ram ata, mawlhtu lian takin a rawn mawlh tlat ang chuan a la awm cheu. Chu 'mawlhtu' chu eng'e a nih a la hre lo. Hriat tum paw'n a ngaihtuah thiam hek lo. Mahse chutih laia mawlhtuin a mawlh lai leh a karna awka chu han hrethiam teh reng se la, an nu, chatuan atana a ṭhen hlen tawh tur nen chuan inmangṭhana hun pawh an nei sei deuh tur! An suangtuahna mitthla pawhina a la ngaihtuah chhin ngai hlek loh, ni lo tur chu ni-ah a lo chang ta si a le...

Hlim zan - lungngaih zan

Khawlum em em hnuaiah Thomas chuan Pathian ram lak tumin hla chi hrang hrang a han thlawh kual vel a. Revival Meeting-ah chutia a hla sak ênga mite'n Chatuan Pa fakna hla an zikpui hut hut lai chuan naupang pakhat hian Western Union thirhrui a rawn pe zauh a. Ngaihṭhat lohna hmawrfêm pawh nei lo hian chu lehkha chu a'n hawng a. Mahse chu lehkha chuan a rawn chhiatkhum hi a ni hawt mai... karei! a tan khawvelin awmzia a nei ve ta lo! Dam thlakhlelhna a nei lo chawpchilh nghal a, a tan he piallei hi a zau a, a zim a, a ruak huai bawk! Chu lehkhaah chuan eng thu nge inziaka i rin? Patling khûp tikhur a, pa tling mittui ko chhuak thei tur khawpa nâ hian pen tui dumin lehkha engah chuan - 'I nupui a thi' tih ngawt mai chu a lo inziak kalh a! Chu zawng, pen tui fiah loh taka inziak pawh ni se, chhiar fiah a awl khawp ang! 

Mipui tlim hmur maiin kut benga zai an rem tlut tlut lai chuan inhup chawn chawn chungin a chhuak a. Telephone booth hnaivai ber aṭangin in lam chu a va phone a. Mahse thil thar engmah hriat belh tur a nei lo. Ni e, engmah a tan thu thar leh tur chuang a awm lo; a ral khat thu hriat, Nettie a thi tih chu a va chian leh a ni hawt mai. Mite'n nun an neih theihna'n a zai a, mahse ani tan chuan khawvel a tawp zo vek tawh. Nun neih châkna a nei lo.

Engkim thlanah a liam

Mihring tan vawi khat thih ruat a ni, tih hi inhnemna thu ṭhahnem tling lo ber a ni tih chu hrilh hriat leh chuan a ngai tawh lo. A chhan leh vang duhawm lo ber - thihna chuan in lamah a nawr haw a. Chu thihna chimawm chuan an chhungkuaah hlei a len a; nunna fawng vuantu dawrawm a nihzia chu mit leh beng ngeiin a la finfiah leh ta dah. A enchim loh Nettie chuan fapa a hrinsak ngei mai; mahse chu fa tir pawh chu Pharoa Lungliana hun lai ang maiin thihna koham tak chuan a lem pilsak lehnghal!

Chhungkua a lo suangtuah ve 

ṭhinna zawng zawng chu vawileh­khatah nuai pherhin a awm a, mitthla leh mittui bak khawvelah hian chan a nei tawh lo. Kuang khata a nupui leh a fasên an chhilh hnan rual rual chuan a khawvel chu phum bovin a awm ve nghal a. Hun hi a lak ata a tawlh bo zo ta a, amaha engkim mai chu thlanah phum bovin a awm ve ta. Atan chuan John Donne-a ṭawngkam hawh a, "Thihna, uang uang teh suh khai...," ti tur khawp tal pawha pachan a har tawh. Patling a no tlat! 

Chuti ang hun ripah chuan tu'nge Pathian malsawmna thute ngaihtuah ang a, thinlung taka lam phar vak vak 

ṭhin ngai ang ni? Siamtu Pathian meuh pawh zah zo tawh lo va, "Nangmah vang phiangsen vek hi a ni...," ti sak sak duh tur hlir thlan khawm mihring kan nih awm hlawm hi maw!? Chu dinhmun chu Thomas-a chan chu a ni. Chatuan nunna a ngaihtuah lo. Pathian a dem a; a tan kutzungtê vawi khat chauh pawh han phût leh zeuh pawh a tum tawh hek lo. Rei tak chhung chu a in khawhar takah chuan a inkharkhip tlat reng a. A beidawnna ruam aṭang chuan an hlim lai ni kal ta-te kha a chhui kir neuh neuh a. A lusunna pawndum phen aṭang chuan a hmanlai nun kha a thlir kir leh a. A hming a lo chher ve tawhna thin - 'K' chuang Biaksailovi rûn sâng vela a lo pingpei ṭhinna khawvelah chuan zuan luh leh a tum nghet ta a ni.

Chuti tur em ni?

Thihna chuan Thomas chu a cheksawlh chiang alawm. Mahse thihna chuan a khumlaizawl thlenga luhchhuahin, thlemna chuan a thling thlengin hual chep tawh mah se, beidawnna khuarkhurum mawng nei lovah tla thla duai duaia a inhriat lai chuan 'in do zawh loh tur thlemna reng reng in chungah a thleng ngai lo vang' tih lo sawi tawhtu thu nung chu a la mit hlek lo. Muhil ṭhangharh thut ang mai hian St. Louis a pan dawn laia Nettie kalsan lo tura a thinlunga thu sawitu aw kha a han hre chhuak thut a. Kha aw kha Pathian aw a ni thei ang em? Eng vang tehlulin nge kha aw kha a lo ngaihchan loh? Nettie hnukchat tur thlaphang hnem tur khan remchang a insiam ta si lo... A pawi! Siam ṭhat leh a, hun liam tawh hnu pawh kir leh rual a ni tawh si lo...

"Aw Pathian, i aw hre chiang turin ka ngaithla tawh ang."

Chu chu pa khawhar riangvai Thomas-a intiamna a ni. Mahse, a khawharna chu laksak a ni lo va, hnem tuma thlem mi lah a ni chuang hek lo. 

Hriat loh ram ata...

Fur khaw chhe êng iau uau leh di ngaih hian bân zai a rel lo a nih ngai chuan, lusun khawharna pawh hian ban zai rel a tum chuang dawn lo a ni awm mang e. Thomas pawh hian lu a sun rei khawp mai a, a tawrhin a tuar tlawk tlawk a, mi pangngai a ni tawh hlek lo. Ṭum khat chu, a ṭhian hnaivai, Prof. Frye-a'n music school-a len khawthawnpuiah a sawm teh hlauh a. Chuta pindan pakhat an va luh a, piano bula ṭhuthmun an rem fel hnu chuan, ani, Prof. Frye chuan a kalsan leh ta thuai a. 

Thomas Dorsey, rei lo te atan a hmangaih ber mangṭhatu ni satliah mai lo, chatuan chatuan atana a duatlaii leh a fapa mangṭhatu chuan chu piano chu a khap kual zai zai a. Khawvel chu a reh tlawk tlawk a. Tlai ni tla tur ni zung chuan tukverh puanzarte chu a rawn chhun êng sur sur a; thlifim han thawt rual chuan tukverh puanzarte chu an phe leh hlap hlap ṭhin. 

Chutah, mihring ṭawngte leh vantirhkoh ṭawngte paw'n a sawi fiah thiam hleih theih loh tur thlamuanna zângkhai ru riau mai chuan a rawn tuam vel hlup hlup hian a inhria a; a kut, Pathian lam hawia phar leh ngai tawh lo tura a lo dah hran tawh chuan mangang takin Pathian, engkima engkima chu duh em em mai hian a ban mek ni hian a inhre bawk. Chu bak chu eng dang mah chiangkuangin a hre fumfe tawh lo. 

Engtia rei nge chuti ang chuan a awm? Khawvel boruak inlumlet a han hriat leh a, biak tlaka a han chhuah leh hnuah chuan eng rimawi em maw ni, ani paw'n a la hmelhriat ngai hlek loh chu urhsun mangkheng hian a lo tum fân raih raih a. Chu rimawi lem tinuam tur chiah chuan hla a lo kal nghal zui bawk a... chu hla chuan a khawvel phurrit leh helhkamte chu a chhâwk zângkhaiin, a hringnun tan-in ata a zalen ta! Khawvel ni a kin a, a lei taksa a chhuahsan thlenga a chatuan ro hlu ber tur chu... a pian tirh a ta, a hun tawn rapthlak lai ber pawha hmua hre rengtu, Pathian a ni. Pathian chuan thihna hmangin khawvela hla chuai tawh ngai lo pek a duh a, khawvel mihring tam tak zingah hian chuti ang tuar khawchhuak thei leh tawrhtir manhla tur chu Thomas ngei hi a ni tih a lang chhuak a. Hriat loh ram aṭanga pawl ṭhintu chuan thlakthlengtu duhawm, hla azawnga hla puanzeh mawi ber pawl a pe a, chu hla chu ka ngaihthlak apiangin hrehawmna tuarte Pathian ka hrechhuak ṭhin. 

Precious Lord, take my hand,

Lead me on, let me stand,

I am tired, I am weak, I am worn;

Through the storm, 

through the night,

Lead me on to the light:

Take my hand, precious Lord,

Lead me home.

When my way grows drear,

Precious Lord, linger near,

When my life is almost gone,

Hear my cry, hear my call,

Hold my hand lest I fall:

When the darkness appears

And the night draws near,

And the day is past and gone,

At the river I stand,

Guide my feet, hold my hand: