Kan Khua

A khuhhawnna: Kawlkilah Ni a han tla a, ngawpui chhung chu a thim chho rawi rawi a; zan khawthim hnuaiah ngaw aṭangin nungcha hrâm thei nazawng an hrâm chuah chuah a, khauchher ri cher cher karah, khuangpui chang ni awm takin chhimbuk a’n hrâm ri buk a. Zan reha sihal khawhar han û ruah ruah leh ralkhata meialh teng teng inchawihzia te kha a taka hmuh ngawt loh chuan, hrilha fiah zo chi a ni lo.

Kha khua kha

Heti zâwng hian khawvel hi a lo letling ta hê hû ang tih ngaihtuahna châng kan hriat hma khan khawvel hi a nuam a ni, tih ngaihtuahna châng reng reng kha kan han hre chuang hlek lo va, mihring hi a lo nikhua loh theih khawp mai.

Kha hmunah khan nun bul hi ṭan leh dawn ta ila, intihtheihna tham hial a ni ta ve ang. Kha hmunah khan khawvel thil ropui hmuh tum chi a ni lo va, mihring kutchhuak hmuhnawm hmuh tuma mit len hah chi pawh a ni lo. Mahse mihringin a siam theih loh, thli thawt zawnga thing hnah ri seng seng te; phulraw mau innawt ri ṭiah ṭiah te; van dungchhira muvanlai inzui diah diah an han ‘kaw-leeek’ ri chuah chuah mai te kha eng ‘company’ mahin a siam chhuah theih ngai loh tur chu a ni a; mihring leh a chhehvel nun neite inhne rem em em maite kha siam luih leh phuahchawp nun aiin nasa takin a ropui zawk. 

Kha kan khawvel zim takah khan khawvel hi a va zau tak! ‘Pentagon’ ralrelna hmunpuia tawmsen ai chuan Pu Vela kawmchara hmanlai pasalṭha chanchin sawikhawm laih laih kha a thlanawm zawk, tihte kha tunhnu hian ka hre thar leh ṭhin. Hmalam hun hi eng’e a nih hriat tumin kan thlir lo va, hnu lam thil vanga inngaihtuah hahna tur a awm hek lo. Engkim kha tlachawp nun a ni a, neih nei leh neih nei lo a awm theih loh a, la-tu nih ai chuan petu nih kha mi tinin an thlan miau avangin nun kha a rualkhai em em ṭhin. 

Thawhrimna hian eng’e a nghawng chhuah hriat kher tum lo mah ila, thawhrimna hi Pathian hnen aṭanga mihringin a dawn a ni tih inhrilhhriat leh chuan a ngai lo. Darkar tin hi hna-in a khat a, hna hian hlimna a siam a ni, tihte chu a taka chentu kan ni. Pathianin min thlunna hrui chu hna hi a ni a, he hrui lak aṭanga kan talpit rual rual chu, kan nun a hah hun tur a ni tihte kha mimawl thinlunga a thawh dan a ni a, kha ngaih­dan tluang tak lak aṭang khan fin chhuah a, harh chhuah kan duh reng reng lo. 

Sum hian eng’e a tih theih maw? Kan hre lo. Tisa nun tinuam tur hian sum engzah nge kan neih maw? Engmah kan nei lo, mi rethei khua mai kan ni. Mahse engkim ti theia in ngaih, sum leh rangkachak ai chuan inhmangaih tawnna hi ropui kan ti zawk. Sum leh a lei theih thilah chuan chhuan tur kan nei lo; mahse sum tam tak paw’na a lei zawh loh tur nun kan nei a, kan tangka ip chu ruak fai hiau mah se, hmangaihnaah kan hausa asin! Pawn lama hausa, thinlunga rethei hi kan hrethiam ve lo va; pawn lama rethei, thinlunga hausa erawh chu a taka kan chan a ni a, kan hrechiang. 

Ropuina chuai lo

Khaw rethei, nun chhungrila hausa hlir awmkhawm kha kan ni. In leh lo aṭanga in teh dawn chuan, keini chu kan tla sa! Mahse chhuat dungah carpet phah ve lo mah ila, chhuat âwng kara thli rawn thaw lut chho hek hek hian rimtuina te pawh nei tel tlatin ka hria a; bangte chu lo tla bal hiau huau mah se, inlungrual leh inhmangaihna bang chhah takin min hung hnan tlat tho va; khual en tham bungbel hlu tak nei lo mah ila, hlim taka naupang inbuan let tawp tawp hmel hmuhtir tur che kan nei.

Kawng dungah ‘motor’ tlan thawm hriat tur awm lo mah se, zâwi dap maia se-pachal han tei ngauh ngauh hmel hian min tithlamuang tlat a, thawmhnaw man to leh nalh, mit la em em mai ai chuan tlai ni tla tur chhum inkâp êng sur mai hian kan lung a len zawk. 

Thawk lo va hahdam tumna rilru hi kan hriatthiam phak bak thil a ni. Rim taka thawh hnu a, Zopa thlama chawlh der der hlutna hi tehchhuah theih a ni lo. Keini ngaihah chuan leilung hi min thlahtute taksa a ni a, kan zah a ni. Thawkrimte tan Pathianin boruak ṭha hip tur min pe-ah kan ngai a, thlifim a thawt rual hian Pathian thaw kan hip lutah kan inngai ṭhin. Mihring hi vaivut ve mai kan ni a, thing leh mau, nungchate nen hian vaivutah kan kirho leh dawn tih kan chian em avangin leilung aṭanga chawr chhuak leh, he leilung min luahpuitute hi keimahni tluka hlu an ni tih kan inhrilh fo a; keini aia dam rei tur zawk, thing leh tlangte hi kan thih hnu a, kan tuchhuan lo kal zel turte’n min rawn hriat chhuah phahna hmun turah kan ngai a, he leilung mil hian kan ke kan chhep ve chauh zawk ṭhin. 

Nun mawl hausa

Kha khaw nun mawl leh ho-ah khan nun tak chhar tur a awm a, engkim a inkhairualna hmunah khan ropuina leh chawimawina hi chang tura beih fo a ṭul lo va, kan neih sa thil a ni. Pa hnathawk haw malchunga naupangho hlim taka an inchhaih nui iar iar hmel hi lemziak ringawt aṭang chuan a fiah lo ang. Mipa naupang rual, indo lem chang tlan ziai ziai lai te; tuikhur pana hmeichhe naupangin an ṭin an khai ri rawk rawk te; zan thla êng hnuaia tlangval lungleng zual, tute tukverh biang emaw-a ṭhu a, aw nalh lo taka zai tleng tleng ri mawizia te hi a taka chan ngawt loh chuan suangtuah thiam chi a ni lo. Ni sa vawl vawl leh reh tlawk tlawk kara ui bauh leh ar dawkdawlâk ri te hi mihring thianghlimte bengah chuan rimawi a tling asin. 

Thing bul leh lung bul be-tu ni mai awm khawpa nun mawl hmangtute ni mah ila, in biak ṭhin Pathian ringtute kan ni. Pathian hian kan neih phak bak nei turin min siam lo vang tih kan ring a. Kan neih tur thil chu hunin a her chhuahpui turah kan dah a, ban vak leh zuan vaka neih belh kher kan tum lo. Pathian biakna hmunhma leh biakbuk thilah chuan khawvel ropuina thil dang hi han bel mawi leh tur chuang kan nei lo. Biak In dar rik tleng tlengna hi han pan ila, tlang chhipa In pakhat ve mai a ni. Mahse kan Biak In chu a vankâwk zawngin kan sa ve tho a, thawhlawm thlak bawmah chuan, thlak bawm leng lo khawp sum thawh khawm tur nei lo mah ila, kan thinlungin hla kan sa ve tho a; Van khian kan thawm hi an hriat phak ve tho kan ring ṭhin. 

Leilung hi kan chhuahsan leh tur hmun a nih avangin, a siamtu’n a duan ang hi kan ti danglam phal lo va; thinlung hi mi dang hnenah pe chhawng thei lo mah ila, a ngaihtuahna erawh chu mi dang tan kan hnutchhiah thei tih kan hria. Sum tam tak inrochun tur ngaihtuah ai chuan, a rochuntu tur chu pawimawh kan ti zawk a, kan thinlungah hian sum aiin hlimna kan dah hmasa ṭhin.