Ka hmangngaihna che i hriat theih nan

I hmaiah ruah bingin a rawn theh seng seng a, khawvel pum hi i phurrita a chan changin, ka lo pawm lum chial ang che, ka hmangaihna che i hriat theih nan.

Tlai tla-in zankhua a lo thim a, arsi a lo lan a, i mittui hru hul tur tumah i neih loh chang pawhin, kum maktaduai tam pawh ka lo kuah mai na’ng che, ka hmangaihna che i hriat theihna turin.

I rilru i la siam fel lo tih ka hria; mahse lung-phang suh, i chunga thil ṭha lo a thlen ka phal ngai lo vang. Kan intawn tirh aṭang phat khan, ka ta i ni tih hi ka ringhlel ngai lo asin.

I tan chuan rilṭam, lusun khawhar thleng pawhin ka tuar ang a, kawttlêrah pawh bawkbawvakin ka kal mai ta’ng, a ṭul a nih chuan. Thil engmah i tan tih hreh ka nei lo vang, ka hmangaihna i hriat theih nan.

Tui fâwn so but but chungah chuan thlipui a hrâng vêl a, lungchhirna lamlian thlengin a fan a. Khuahkhirh rual loh danglamna thlî chu zalen takin a lo leu vêl a; kei ang reng hi tumah i la tawng ngai lo.

Hlim takin ka siam thei ang chia, i suangtuahna rama hruai tur che-in theihtâwp ka chhuah ang. Khawvel hmawr ko thleng pawhin ka kal ta’ng e. Ka hmangaihna che i hriat theih nan.

(“Make You Feel My Love” tih hla, ka hla phuah thiam duh ber zinga mi Bob Dylan-a phuah hi, love song satliah a ni hauh lo a ni a, a rau ram pawh a dai phâk hial. He hla-ah hian Biblical imagery pawh hmuh tur a awm nawk: "nothing that I wouldn’t do, go to the ends of the earth for you, to make you feel my love” han tih-ah te hian. Zaithiam hrang hrang - Billy Joel, Garth Brooks, leh mi dangte’n an sa hnem tawh. Ka duh ṭanna chu, Trisha Yearwood-i’n a sak aṭang khan a ni a. Adele-i’n a han vawrh ve leh chiah khan khawvelin a ngaizawng zual niin ka hria. Ka han “paraphrase” fiam ve a nih hi)

KA THLASIK READING LIST

Tun thlasik chu ka nawmsam loh aleiah mal lên emaw, lênkhawm emaw ka peih loh avang leh, cable TV system lam digitalisation ( digitisation) an buaipui vanga ka TV channel duhho a bo tâk duak avangin hun dang, ṭum danga ka chhiar loh tur mang mang Chetan Bhagat-a novel pathum ngawt: 2 States (2009), Revolution 2020 (2011), leh Half Girlfriend (2014) ka fai pak mai (TV nena inkungkaihna thûk leh awmze nei tak neih ka tum vei nen!).

Hmeichhe lehkhathiam, literature lama lût thûk vak si loho hi a tlangpuiin Chetan Bhagat-a zûnah hian an uai nasa a, chhiar ve tura min turtu pawh an tam narawh e. Chhiar enah ka lo en ngai lêm hlei law. “Heti ang hmeichhe lawm, India Mills & Boon mai mai,” ka ti mai mai ṭhin.

A novel “Five Point Someone” (2004) behchhan deuh reuhva an film siam “3 Idiots” kha a entlâk fû-a ka hriat vang te, Indian ṭhalaite’na heti taka an ruih chilh chhan hriat ka duh avang te-in belhchian ve hrim hrim ṭul ka ti a, ka chhiar ta a ni.

A dramedy (drama & comedy kaihkawp) novel-ho, ka tarlan tâk bâkah: One Night @ the Call Center (2005) leh The 3 Mistakes of My Life (2008) tihte zawng zawng hi a hun laia hralh kal ber a ni fai vek a; a maktaduai bi-in a hralh hem hem mai zel. The New York Times chuan Bhagat-a hi India ram history-a Sapṭawnga novel ziak ṭhin zinga hralh tla berah a puang a. TIME magazine pawhin, khawvela mipui hneh leh hruai thei ber ber mi 100 a thlan chhuah zingah a telh ve hial.

“India thar symbol” ti a an sawi mai, chhuan huaisen (unafraid generation) tana meichher chawitu Chetan Bhagat hian blockbuster novel paruk bakah hian non-fiction - a essay, a thusawi, leh a column lâk khawm bu, bu 2 - What Young India Wants (2012) leh Making India Awesome (2015) tih a chhuah tawh bawk a, ka la chhiar lo ve ve thung.

A novel ziah ka chhiarho hi chhiar a nuamin, a ngaihnawm tlang ang reng hle. Amaherawhchu, amah hi “literary novelist” ni lovin “popular novelist” a ni a. A nâwlpuiina an duh tur zawnga bâwl phuan a, tui an tih tur taka chawk kawi thiam “potboiler” an tih ang chi hi a ni a; literature khawthlir aṭanga thlir chuan a sang lua lo. A thuziak chhiar nuam ka tih lehna pakhat chu Indian English writer dangte angin Hinglish (Hindi leh English bilh pawlh) a chelek ve vak lo hi a ni. Vawi khat hawh a, vawi khat chhiar atan chuan a ṭha ve khawp hlawm mai.

He’ng bakah hian min duhsaktute’na a thlâwna lehkhabu min pêk engemaw zat chu tun thlasik hian ka chai nual bawk a. Ka chhiar chhuah pap pap loh, chuk lâka ka lâwr pawh a awm nual. Heti ang thilpêk ka dawng hi nihlawh, vannei leh
chanṭha ka va’n inti tehlul ûm!

A rûk pawha ka beisei ngam loh, Pathian Lehkhabu Thianghlim Mizo-English Parallel [Christian Research Center, Aizawl, Phêk 2008, Rs 1200, 2015] leh Bible Rintlâk Lo a Awm Em? [Christian Research Center, Aizawl, Phêk 338, Rs 200, 2015] chu a buatsaihtu, mi hrât khawkhêng PC Biaksiama chuan min rawn thar tem ve hlauh mai. Ka lawmzia han sep dawn ila, ka khabe hi ka sit khawp ang.

A phêk hmatawngah he thu hi a ziak kalh a:

“Presented to Mafaa,

with highest esteem of your special gift

in literature.

May God bless you!

Love from

Biaksiama

16/11/15” tiin.

Shillong-a sawrkar mi liana a la awm lai khan kan inzui ve fê hman a. Ka awm tawh loh hnu a, ka zin chang pawh khan ka thlennaa chaw ei tura mi rawn lam vang vang ṭhintu kha a ni a; ka tan chuan a hlu khawp mai. Scooty lo chhuah hlim, hmeichhe tlêm tê chauhina an la khalh
ṭhin lai khan, min phur a, kan tlan pelh apiangina min nuih vur vur vek mai te kha ka hre chhuak uar uar. He’ng a lehkhabu min pêk 2 hi ka ching let ve nual a, a bengvarthlakin chhiar a manhla ka ti khawp mai.

Kan ṭhian ṭha, hawihawm leh thilphal tak Vala (Dr Lalchhuanawma Tochhawng) pawhin lehkhabu rotling leh râwntlâk tak tak min pe nual bawk a, ka tan chuan rina lohva ui pachal thithun hi a ni hawt mai.

A lehkhabu min pêk pakhat chu Les Misérables (le-mi-ze-ra-blu ti ang deuhva lam tur; “The Miserable” tihna), French historical novel hmingthang tak Victor Hugo ziah, kum zabi 19naa novel ropui ber pawla an ngaih, ama’n Mizo
ṭawnga a lehlin “Riangvai Chanhai” [Offset Art Printers, Kolkata, phek 432, Rs 250] tih a ni a. He a lehlinah hian engemaw zat chu a kaitawi a ni. Literature mual êng kîl phâk nih ve i duh chuan he lehkhabu hi chhiar makmawh a ni.

Ngun taka i chhiar chuan, he thawnthu film-a an siam, Hugh Jackman, Russell Crowe leh Anne Hathaway te channa kha i duhlai nen in en zawhah pawh, “Tu ber kha nge Les chu ni ta?” i ti hû hû lo vang.

A dang leh chu ka tuipui tur chi tak niin a hria a ni ang, Sexy Christians: The Purpose, Power, and Passion of Biblical Intimacy by Dr. Ted Roberts & Diane Roberts [Baker Books, phek 266, US $ 16.99, 2010] a ni a. Kristian chhungkua-a sei lian chuan “sex” hi a hmingpum pawhin kan lam ngam lo va, a lamri kan hriat chuan hrâm tlahawlh kan ti a, mahse, mi tlêm tê tih loh chuan kan hmangin, nuam kan ti tlâng vek tho bawk si.

“Sexy Christians” han tih chu thu inkâwlkalh leh inkawkalh tlat pahnih awm dun (oxymoron) emaw i ti a nih chuan inngaihtuah nawn leh rawh. Sex hi Pathian duan chhuah liau liau a ni a. Hlim leh nuam ti taka he hmangaihna par hi inkutsuihte tlan tur a nih dan leh Pathian thu lama thlirna ngaihnawm tak tak chuanna a ni.

Dante-a epic poem “The Divine Comedy” bu-a a thlûr (cantiche) khat “Inferno” (Hremhmun Meidil), Italian literature-a dinhmun pawimawh ber pawl luahtu-a an ngaih, khawvel literature-a kutchhuak ropui ber pawla an hmuh, Hun Laihâwla mite’n hringnun piah lam an ngaihdan pholanna pawimawh tak, amah Vala’na Sapṭawng aṭanga a lehlin, manual printer hmanga a chhut chhuah, copy tlêm tê (limited edition) a siam, mi a râwlrûk pawh ka chhiar a. Thu tluang pangngai anga a lehlin ni mah se, hrawk a fah khawp mai.

Mizo novelist zinga, L. Biakliana aṭanga Zikpuii Pa leh C. Ṭhuamluaia te hmer tel vek chunga thiam ka tih ber C. Lalnunchanga (Taitea) kutchhuak, Mizote’na kan la neih mang loh fantasy novel Kâwlkil Piah Lamtluang [C. Ramengmawii, phek 502, Rs 350, 2015] hi ka khurbînpui ve viau bawk. Fantasy lam (genre) hi ka tuipui lem loh tak, tunlai khawvelina a movie leh a novel zawnga a kûrpui nasat êm êm lawi si a ni a, fantasy novel meuh pawh mi ngainattir thei khawpin Taitea hi a themthiam zu nia. Chhiartute mi chelh beh tlat dan a thiam a; phêk tinin a tibing mup mup ang che.

Sabereka Khuangkaih editor nihna ka hnen
aṭanga chhawmtu, Vanglaini Thu leh Hla Huang columnist nihna a hnen aṭanga ka chhawm, Lalrammawia Ngente essay leh column, thu benglût leh bengvarthlak tak tak lâwrkhawm, Keimah Mizo [Lengchhawn Press, phek 311, Rs 200, 2015] te, The Aizawl Post joint editor PB Lalrammawia thu leh hla, essay leh thawnthu tawi hlimawm leh chhiar nuam tak tak chhûn khâwmna, Thu Tluang, Thu Zângkhai, leh Krismas Lamhawi ti a a ṭhen sawm bu, Khawthlir Tlang Aṭangin [PB Lalrammawia, phek 183, Rs 100, 2015], leh Eddie Zosangliana Colney-ina a putea (a nu nau), zaithiam lar tâwpthang, nun tawi, dam rei Lallianmawia chanchin leh a hla a khawn khawm a dahna bu, Lallianmawia Pachuau (1963 - 1987) [ Eddie Zosangliana Colney, phek 230, Rs 130, 2013] te ka chhiar bawk. Ka tlaiin, ka tleipui hlawm khawp mai. Anniho zarah hian thlasik pawh a vâwt nêp deuhva ka hriat hial chuh!