A THLÛKAH KAN BUAI

Beisei kan tihsân hian rilru hnualna a thûk zual duh bik ṭhin. Tun ṭum UEFA European Championship (Euro 2016), Europe? khawmualpuia football tournament lian ber pawh a hmuhnawm chin tura ngaih, quarter finals aṭangin ka en chauh a ni a. Keima lam dik loh nge ni, ka beisei a phâk lo angreng a, ka mit a tlai tehchiam lo tlat.

Germany leh Italy inkhelh phei kha chuan, kei mut theih loh benvawn (chronic insomnia) nei, zing lam dar 2 hma lama muhil ngai mang lo leh muthlu zen zen lo tak hi, vawi thum ngawt ka muthlu hman nia.

Germany inkhelh dawn, an hnam hla an sak apianga ka rilru-a lo awm ṭhin, 2002 FIFA World Cup aṭanga ka vei leh ka sawi fo ṭhin sawi chhuahna remchangah ka’n hmang teh ang.

"Zerman te chu ṭan lo thei kan ni hlei na’ng, keini Mizo Presibitarian te chuan; an hnam hla pawh kan Hrisitian hla bu-a mi, 'Nangma thil ropuite an sawi,' tih ngat kha a ni a," te hi kan han ti leh thâwr thin a. Nu-ho nâk nêm zen zâwngin, a lung tino zâwngin!

Kan Kristian Hla Bu-a “Nangma Thil Ropuite An Sawi” tih hi German hnam hla awzawng a ni lo. An hnam hla chu

“Das Lied der Deutschen” (German Hla/Song of the Germans) tih Hoffmann von Fallersleben phuah daih a ni a. Kan Kristian Hla Bu (No. 363na)-a “Nangma thil ropuite an sawi” tih thlûk khatna nen hian a thlûk a in-ang ve chauh zawk a ni. German hnam hla-ah hi chuan, Mizo Kristian ṭha intite'na huat nachang kan hriat phûl lup "ZÛ" fak mawina te a awm nawk zâwk asin.

A châng hnihna te hi en teh mah u:

"German lânu lêng, German rinawmna,

German ningzû leh biahzai zawngte,

A thang zel dawn khuavelah hian."

(Deutsche Frauen, deutsche Treue,

Deutscher Wein und deutscher Sang

Sollen in der Welt behalten") tih daih asin.

A thlûk hi chu Austrian hnam hla atana Franz Joseph Haydn-a'na kum 1797-a a siam a ni a, kum 1946 thleng khan Austrian hnam hla atan an hmang nghe nghe.

He hla thlûk hi a lar êm êm mai a, a thlûk hmingah pawh "Austria" an vuah a, hla hran hran sak nan an hmang a. Kum 1889 khan “Nangma Thil Ropuite An Sawi” (Glorious things of Thee are spoken) tih hla John Newton-a phuah ("Khawngaihna Mak, Mawi leh Duhawm" phuahtu tho kha. Mizo ṭawnga letlingtu hi Rev. Liangkhaia a ni ve thung) sak nan hian a thlûk an hawh ve mai chauh a ni. Kum 1922, August ni 11 khan he hla thlûk hi German Republic (Weimar Republic) chuan an hnam hla sak nan official takin an hmang ve chauh a ni.

Tu ram pawh, eng vang pawhin kan ṭan a thiang alawm: an hmel a ṭha, an hang tak ṭha, kan kohhran min pui nasa, an zû a thlum tui, an ṭawngṭai taima, an minister-te car a nalh, khawngaih thla an la ... chu lam chu sawi ka tum lo. German Hnam Hla hi “Nangma thil ropuite an sawi” tih hla a ni lo tih ka han sawi ve mai a ni.

Fam Lalzova lêngzêm hla:

“Tawnmang em ni lung lêm ka nei lo?

Ka hawi vêl a, ka tawng si lo;

Zûnlêng erawh a châm ṭânglaiah,

Luah loh lungdi nghilh ni awm lo.”

tih pawh a Sap hla-ah chuan vanram ngaih hla daih asin:

“Waiting for me, they're waiting for me,

Oh, what a glad meeting 'twill be!

Waiting for me, they're waiting for me,

My loved ones are waiting for me.”

Hman deuhva Rebecca Saimawii hla sak lâr tak, “Nang ang” tih pawh kha Sap Pathian hla "He came in love" nen a thlûk a in-an vangin Pathian hla a ni ve ngawt lo ang deuh hi a ni:

"Mahse nunhlui dawn changin thinlai rûk a na ngei,

Ngaihlai aw, ka thinlai hnêmtu lairilah i châm si ṭhin,

Enga’n kher nge nang ang an lo pian ve le,

Sakhmel chauh ṭha si a, mahse nunrâwng si,"

tih leh,

"But we took Him and we nailed Him to a cross made of wood,

And we raised it high and dropped it in the ground where it stood,

And the blood that flowed to the earth below

Brought forgiveness for the world that had treated him so.” tih chu a thu ken inpersan leh inralkah tak a ni.

"Londonderry Air" an tih hla thlûk ringawt pawh hi an inṭawm nasa asin: “Danny Boy” tih te, “Zâwlkhawhermawii” tih te, “Vantirhkohho fak leh biak ropui hmang khian” (I cannot tell why He Whom angels worship) tih te, "Irish Love Song" te, leh hla dang 15 chuangin an hmang a ni.

ZO TAKIN AW!

A Mizovate ber hian keimahni hnam hi kan hmusit ru tlatin ka hre ṭhin a, heti ang te chuan engtin nge ram dang, hnam dangin min ngaihsan theih tehlul ang ni. “A Zo ṭiah ṭiah,” tih chu thil ṭhing leh changkang lo sawi nan kan hmang a. Tlawmngai pawl leh kohhran ṭhalaiin “Zo Zân” kan hman paw’n ṭhing leh nuihzatthlak taka inthuam kan rilru-ah a lo lang nghal a.

Mizorama pianga seilian, kan Mizo nulate ngei pawhin, social media lamah, “Kei chu Mizo mipa chu sawi loh, Asian hmel pu hrim hrim ka duh lo bur tawp, I’m 100% not interested at all in Asian guys,” an ti zârh zârh ngam tawh a. Heti taka mahni chhuahna leh mahni ṭobul kan hmuhsit chuan kan thang kâng ngai lo vang. Mizo zingah hian “hnam bo” kan tam ngawt tawhin ka ring a ni.

Ram dang khual kan neih te hlei hlei hian kan Mizo hla ngei mai lo hlui thei ila a ṭhat dawn nen tih nâk alaia, Mizo leh Mizo rual pungkhawm - biak in chena - Sap hla kan in sak khum leh ngheng mai thin te hi chu a zia lo lam deuh chu a ni lo maw?

Guinness World Record siam thlâkhlelh vangin kan “Cheraw” pawh “Bamboo Dance” tiin kan han thlâk kawisawi vel a. Kha world record kan siam vang khan kan hnam leh kan hnam lâm chu khawvela a lâr phah sawt pawh ka hre lêm hlei law.

South Korean musician Psy (Park Jae-sang)-a te’n an "Gangnam Style" hmangin khawvel an hnehlâk a. Bob Marley te’n an Jamaican Creole-in khawvel hi ke-artui an lek khum tawh a; Brazilian-in an Samba-reggae leh Punjabi-in an Bhangra music-in khawvel an al mek a; Shakira te, Jennifer Lopez te leh mi dang dangin rem leh rem lovin an "Latino” ṭobul an pho lang hram hram zel a ni a.

Keini a lova intih changkanna ang hrim a Sap hla kan uar duar mai hi chu mi tih thîk avanga ar-êk liak te kan ang dawn dawn lo maw? Mizo zaithiamte hian Vaiva ṭawng thiam taka kan lo vawn bel ve Sap hla hi sa ve tawh lo se, ka ti a ni reng reng lo; sak ve zauh chang chu kan nei ang, “Kan uar lu deuh lo maw,” ka ti chauh zawk a ni.

Enga khaw lawi lova mahni tapchakzawla dangmâwn phe hlerh hlerh a, Sap hla lo sa-râkpui vak vak hi eng nge maw a ropui viauna le, tih chang chu ka nei ve deuh.

Elvis-a zai dan anga zai a, a hla sa thiam tak pakhat kan nei, ani pawhin Elvis-a hla a sakna album te a siam nual tawh niin ka hria. Mahse, engtik khawtikah mah a thleng sang thei tak tak ngai lo vang. A thlen san bera a hlawh tur awm chhun chu, “Elvis a ang ve fû mai,” tih zawng hi a ni mai. Khawvel mihring tluklehdingawn 7 velah hian keini aia Sap hla sa thiam hi an ṭhahnem em mai si a.

He thu hi kei, Mizo hla aia Sap hla ngaina leh ngaithla hnem zawk hian inthlahrun avanga hmai khâp chungin ka han sawi ve dêk dêk a ni.