EIH-CHI HI!

Hawrawp chuktuah khâwm hi Kalashnikov AK-47 Assault Rifle aiin a “bon” zawk, tiin chil per chuaih chuaihin ka va au ve a nih kha. Mizo Students’ Union huaihawt, Zo Literature Meet-a, “Literature-in Hnam Inpumkhatna a Thlen Theih Dan” tih paper ka buatsaih, ka va chhawp-chhuah a, ka va ṭheh hawn ve khan.

Chutah chuan, ka lehkha buatsaiha “Paite” ti a ziak chung si a, engvanga “Paihte” ti a lam ri nge ka nih min zâwt a. Lusei/ Duhlian ṭawng, Mizo ṭawng kan tih tâk hmang ka nih avanga, “Paihte” ti a ziak leh sawi ṭhin ka nih thu-in ka chhang a, “h” ka lo chhut hmaih palh thu nen. Zau zawkin ka sawi ve ta chiam a, fiah zo tak maw! “Paihte” tih hi intham lohna, inhmuhhniamna, inhnuaichhiahna ṭawngkam (derogatory term) a ni lo.

“The Paite, a Transborder Tribe of India and Burma” tih ziaktu H. Kamkhenthang sawi hmang chuan, ka ziah dan leh ka lam dan chu a lo dik thlap zâwk a nih hmêl, “Paite (pronounced as Paihte)” tiin a ziak tlat a.

Hemi ṭum hian kan historian chhuanvâwr, chawhma lama resource person-a an hman, B. Lalthangliana chuan, hming reng reng chu a putute invuah dana dah hi a ṭha ngai e, tih ang zawnga an zirtirtu (professor) pakhatina a hrilh thu a sawi a. Ka pawmpui thawkhat viau mai. Ani hian a paper-ah “Paite” tiin a ziak bawk.

Mahse, Paihte/Paite chungchangah chuan a putute pawhin an invuah duh dan a in-ang lo zung tlat mai. Lusei ṭawng hlang hmangte bêl hnai leh, an zinga inbengbelte chuan dan naranin, “Paihte” an inti a; Zo hnahthlak ṭawng dang leh awze hmangho hian “Paite” an ti tlângpui niin a lang.

Sap lehkhabu ziaktu TH Lewin (Thangliana) leh John Shakespear (Tarmita) te chuan, “Paite” tiin an ziak a. Kan Mizo chanchin ziaktu hmasa Hrangṭhiauva, K. Zawla leh midangte chuan “Paihte” tiin an dah thung. Mak tak maiin Sap pachal, dictionary ropui tak min siamsaktu, JH Lorrain (Pu Buanga) paw’n, a dictionary-ah “Paihte” tiin a dah ve khiah. Tun thlenga Zofate zinga Mizo ṭawng bungraw lama hausa ka tih ber ber, JF Laldailova, James Dokhuma, leh A Thanglura pawhin, “Paihte” tiin an ziak a ni.

Kan veng thlanmuala kum 1940 bawr vela lungphunah, anmahni ngei pawhin heti hian an ziak tlat:

“HRIATRENGNA

DUHTAK

PI DEMI PAIHTE

ṬHURO NUN-IN

K. 80 A DAM

11.12.37 AH LAL

PA AH A CHAWL TA.” tiin.

Paihte chungchangah chang lo pawh, Mizo ṭawng (Lusei/ Duhlian ṭawng) hmang lo tam tak hian kan
ṭawnga “h” kan telh (tel, ni lovin) tam tak hi an lam ri phâk ve lo fo va, chuvang chuan ziah tel lohvah an tlâk ṭhin. Kan Zosap Missionary-te’na kan ṭawnga Pathian hla min siamsak hmasak ber zinga mi, “Tunah ka awih, ka awih ang e,” tih tur ni âwm tak pawh, “Tuna ka oi ka oi ang e,” an ti a. “Theihnghilh” tih tura “theihnghil”; “talhtum” tih tura “taltum”; a tam mai, zawn peih chuan.

Kan Zosapte khan, “amah, keimah, tunah,” tih angho pawh hi “ama, keima, tuna,” tiin an dah fai deuh vek (Mizo ṭawngkauchheha “manilomaha” ti a “h” paih te leh “maimichhing” tiha “t” paih te hi chu Mizo ṭawng dik a ni thung). An hla lehlin kan en pawhin, kan “h” hi an rilruin an hmaih fo tih a hriat, “leh” leh “che” tih te, “tu” leh “duh” tih te hi ri inzul leh inrem ni a ngaiin, rhyme angin an dah.

He’ng hian vawiin thlengin kan Mizo Bible-ah ngei hian hnuhma lian pui pui a la nei a.

“Hauh” tih turah pawh, “hau” an la hman cheu hi: “Miin keimah avanga an hau che u a,” (Mat 5:11). “Hmuhsit/hmuhsitna/ hmuhsitawm” ti a ziah tur, kan Bible-a “hmusit” ti a “h” telh loh hi a awm nual. “Mite hmusit ka ni” (Sam 22:6). He’ng pawh hi lo en teh un: Sam 44:13, Sam 79:4, Isaia 28:14, Isaia 53:3, Tah Hla 1:11, Ezekiela 36: 15.

“Beirual” an tih ṭhin chu “beihrual” tiin kan thlak tawh a, ṭawngkam dang pawh ṭhahnem tak siam dik a ni tawh.

Pu Buanga’na a dictionary-a, “bawi, n. a slave, a bondman, a vassal, a serf,” a ti pawh hian entawntu a ngah ngang mai a. Zoṭawng lama ka mi rin ber pawl James Dokhuma meuh pawh khan “bâwih” ti a a ziah chang awm bawk mah se, “bawi” tiin a hmang chamchi a (He’ng thilah leh, “ziak” her danglam, modified form-a “ziah” hmang lo va, “ziak” a ti iak iak mai
ṭhin kha, mak ka ti viau va, tunah chuan mak ka ti ta lo ve. Zosâp ke bula chher len, Ch. Pasena pûm chhuak kha a ni miau va). Tunah phei chuan Boichhingpuii te, Boitlung hnam te kan kan awm tâk nawk hi. Kan Mizo Bible hman laiah ve leh thung hi chuan, “Bawi” ti lovin, “Bawih” an ti ṭhap leh lawi a, a lawmawm tak zet a ni (Cf. Gen 12:10, Exod 21:26, Lev 19:20, etc.).

“H” paih hrilêng hian kan thumala “h” a suat nasa hle.“Chawhchawrawih” pawh “chawchawrawi” kan ti zo ta.

Ṭawng lama mi fîr leh fet peih, Dr R. Zokhuma hian, a hunah leh hun lovah pawh, “h” dahna tur ni a a hriat loh, keiin dah ngei tur ni a ka hriat si chungchangah hian mi a khak fo ṭhin. "Lêrh" tiha "h" dah te hi a ngaithiam lo va, “lêr” tih hi a duh dan a ni a; kei chuan chu chu ler leh lêrh tak niin ka hre thung, lênglêrh! Kan inhnial ziah a, tai pâwng pâwngin, a tua mah mah chu kan inhmin lêm hlei law (amah hre reng chungin a ni a, khita “chil per chuaih chuaih” tih pawh khi ka hman ngat ni. “Chuai chuai, tih tur,” a ti ri pawh ka bengah hian a châm thei nia!).

Lei ang deuh, zawh lova lâwn nana an siam hi a
ṭobulah chuan “leilâwn” a ni ang, mahse,"leihlâwn" ti a "h" telh (tel ni lovin) hi ka pawm thlap a; “leihkapui” tih thlengin (hei hi rualhlui ka hriat mualliam tawhte hman dan pawh a ni). Heta hawrawp belh hi Mizo
ṭawng kalhmang a ni a, awmze hranpa a neih ṭul ka ti lo. Hnu kan chhiah (thil kan kalsan, sulhnu kan dah) hi "hnuchhiah" ni âwm tak a ni a, "hnutchhiah" tiin “t” kan belh tlat si hi. “Ni teh se!” tih uar tâka sawi nana “Ni teh sen!” kan tih ang te, khita “teh u” tih tur ni mai âwm taka, “teh un!” ka tih te, tunlaia kan uar thar êm êm mai, “a’n ti a” tih aia, “a’n ti ah!” kan ti
ṭhin te nen lam hian.

MAK KA TI THLÛ A NI ANG E

Bawihte, engtik lai pawha min hmangaih reng dan hi mak ka ti a; keiina ka hmangaih dan êm êm che pawh hian min tihlauthâwng a ni mahna.

Min mal thur nalh a, a ngaihna hre lo va, a letlinga min khai kân dan te hi ka hrethiam lo a ni ang; ka mamawh dan êm êm che pawh hi mak ka ti ni fahmiang!

Bawihte, kei hi engin nge a kârcheh hre lo va hawihai, pa khawhar leh mal tak ka ni. Nang hi min pui thei awm chhun pawh i ni mahna. Bawihte, ka dinhmun dik tak hi min hriat chiantir dawn lo’m ni, min hriatthiamtir dawn na nge?

Ka kianga i tâp reng mai dan te, kalsan che ka hlauh dan te, thu leh hla-a min châwm dan te, ka dai pelh dâwn a min kalh a, min khalh ngîl dan te hi mak ka ti thlu a ni ang e.

(Dave Grohl (Foo Fighters) leh Norah Jones-i’n Sir Paul McCartney chawimawina Kennedy Center Honors-a McCartney-a ballad ropui tâwp thei lo, ‘Maybe I’m Amazed’ an sak ka han ngaithla leh a. Ka hrawk a inhnawh, ka thâwk lâk a buai, ka lungphu inkhak dan zawng zawng nen! Norah zaithiamzia chu ka hre tawh alawm, Dave-a heti tak hi a lo ni ang tih erawh chu rin ngaihna ka hre lo!)