VAWI KHAT INHMUHNAAH HMANGAIHNA A PIANG THEI EM?

HE THIL “Love at first sight” an tih mai, inhmuh vawi khatnaa inhmangaihna chungchang hi hre lo aram kan awm kher lo vang. Khasi pitar tê tê Kong Kuai-i te hovin, an kuhva hmuam tur sawh dip paha, “Lab at phars side” an ti seu seu pawh ka lo hre ve fo tawh
ṭhin. He thil hi thil naran leh thil thleng reng reng ang ziazangin John Lennon leh Paul McCartney te pawhin,

“Would you believe in a love at first sight?

Yes, I’m certain that happens all the time.” (The Beatles’ With a Little Help from My Friends ) tiin hla hmangin an lo puang tawh a. Kylie Minogue pawhin,

“And everything went from wrong to right,

And the stars came out and filled up the sky,

The music you were playing really blew

my mind,

It was love at first sight,” tiin a lo chiaupui ve vawn vawn tawh bawk a ni. Hei hi nulate’n tlangval pawisa ip an hmuh ruala, anmahnia hmangaihna lo piang ṭhin “Love at purse sight” nen chuan a in-ang chiah awm lo ve.

Nula leh tlangval an vawi khat inhmuhnaa an inkara hmangaihna lo piang ṭhina an sawi hi kei chuan dâwtah rau rau pawh a awihawm loh pawl tak niin ka hria. Ka la tawn ve loh vang pawh ni fahmiang. Vawi khat inhmuhnaa in-îtna, “Lust at first sight” hi chu a awm tih zawng phat rual a ni law, inhmuh phata inngainatna, “Like at first sight” pawh a awm ngei mai; mahse, ““Love at first sight” an tih ve sek hi zawng, kan “love” tih hi a in-ang a nih ngai chuan ka awih loh dan chu chu lei leh van tiat a ni!

Kei ka ngaihdan chuan hmeichhia leh mipa in hranga mi ve ve, inhre ngailote thawk-a-phita an inhmangaih nghal mai theihna dan hi a awm lo va. Hmangaihna chu inhriat chian tawnna lungphum chunga rem a ni si a. Ka hmuh vawi khatna maia mi ka va hmangaih ngawt theih hi ka ring themte liak lo! Engtin nge ka hriatchian hleih loh chu ka hmangaih theih tehlul ang ni.

Thu a chian zawk nan, hmana zirtirtu ropui Nazareth tlangval tihdan angin tehkhin thuin ka kâ ka’n âng ang e.

Puipunna hmun, nula leh tlangval an sûk kawih sawih nuai nuaina karah, êng thim riai ruai hnuaiah, kil khatah nula tlâwntlai ṭha zeih zawih, perhpâwng nû ang zâm mai, thin ti-ur lo fahran, a taksaah vuakna vual phei chu awm sela chu, “Angel vuak thlak a nih hi,” kan tih ngei ngei tur ang chi, mipa tawh phawt chuan mangpui an man chang pawha an hmuh ngei tur ang hmel pû, Upate’n Lalpuithluaii ṭhi an sawi ang maia
hmelṭha paw phât mai hi a lo ding hnâp mai a. A biang no sen hiam mai leh a heh vam ham mai te, hmui hmai cheina bawlhlo fakna atana chanchinbu changkanga an hman hnuhchhuah hlimhlawl emaw tih mai tur a ni a. A hmatheh nau chaw bâwm pawh chu suangtuahna nei chak deuh tlangval tan phei chuan mai ṭawih ham taka han hamsak diai diai chakawm hi a ni a. A kimtlang leh hmelhmai duhawm lutuk chuan kan lungphu leh marphu chu rawn khak buaiin, a mitmeng no nghelh mai chuan ṭeka den ang maiin ka thinlung chu a rawn deng a, ka khawvel vir lai hi a ding dawt mai a.“Chhe Hei!! Saw ngei saw a nih saw hun kha leh chen ka rilruina ar bo a lo zawn ṭhin, ka thinlung chahbi kawltu, ka suangtuahnaa ka duhthusam thiam ang tawka ka lo sam ṭhini chu! Hetiang reng renga min chhun tuiraltu hi ka la tawng ngai lo. Ka thinlunga lo piang pawh hi zep rual lohin hmangaihna a ni ngat mai.” tiin a kiangah chuan va tlan ta nghal ila. Thu hmahruai pawh awm lovin a hnenah chuan, “`Bawihte’ tiin ko che ila na i ti lutuk ang em? Ka hmuh tirh phat aṭang che khan ka hmangaih che a, i tana huam leh zuam loh reng reng ka nei lo va, a
ṭul a nih chuan arsi thlâwk lai pawh ka man sak ang che. Hawh teh, engkhaw sawi set set lovin i innei ringawt phawt mai teh ang,” tiin va luangliam ta bawrh bawrh ila.

Ani chuan ka beisei phâk lohvin, min hmuh phat khan min lo hmangaih ve ngei niin a lo inhria a, ka duhthusam ang ngei chuan, “Ni e maw le, engtikah nge kan inneih ang?” lo ti ta sela. A
ṭawng zawng chuan ha pahnih chauh - chung lam leh hnuai lamah pakhat ve ve, chu pawh a inzâwn lo lehnghal a nei tih lo hmu ta ila. Tin, a thusawi zawnga a thaw pawh chu êk phêka hmai zah ang vela rim tuitang lo ni ta bawk sela. A ṭawng paha a nghawngawrh a bah ṭhat zawng chuan a nghawngah khawihlipui pasarih leh ṭhekin a bawm a ni tih hmu zui leh ta zel ila. A chezia leh titi dan phung aṭang chuan mi thuahkhat, application form vel a “sign here” tih hnuaia fiah kelh kawlha “Gemini” tih ziak kulh tur chi, a mut rei zawng teh tuma ruler nena mu nulh duh tur chi tih hriat hliah hliah mai lo ni bawk si sela, chawp leh chilhin ka lungtenin, ka thinhrik nghal mai lo vang maw? Ani nena kan inkara boruak sosang tak lo awm hman tawhah pawh khan “fullstop” dah nghal hmiahin, “Parte ka ti tawh lo vang che, Biaksailo!!” tiin tukhum chhah kan inchhawn zui mai lo vang maw?

Kar lova chutianga ka rilru puthmang ka thlak danglam theih chuan ka lo la hmangaih lo chhiava tihna a ni ngei ang. Lo hmangaih hman tak tak ngat ila chu, hmangaihna chui a mit a del, an tih angin a mawi lohna te kha ka hmu thei dawn lova. Chu achhapah, Rev. Vanlalnghaka’na a sawi fiamthu ang deuhin, “Love is HNARPING,” kan ti tawh ang a, a thaw rim te pawh , êk in tê i hmuam em ni?” tih hial tura rim nâ pawh ni se kan pawmzam thei zel tho vang. Chu chu a ni hmangaihna chu!

A nihna takah chuan amah ka va hmuh phata ka thinlunga lo piang kha “hmangaihna” ni lovin hmelduhna lekfang, “love at first sight” ni lovin, “infatuation at first sight” a ni zaw ber awm e.