NGHÂKIN KAN DÂK FÂN (To Be With Mr. Vocalist, Eric Martin)

“I'm the one who wants to be with you!

Deep inside I hope you feel it too;

Waited on a line of greens and blues,

Just to be the next to be with you.”

A bâk beisei leh chuan tur hre hek lo vi, bete hmeh a, India leh Bangladesh TV channel pahnih chauh en a, lungawi tâwk ve em em mai ṭhin kha kan ni a. Kan inrin hman hma-in kan ṭhutkhawm pindanah, cable TV-in min han thlun zawm rup mai a. En tur a tam ta lutuk kha en tur ber leh en tur bar hre lovin kan hawihai lek lek zâwk a nih kha.

Khatih laia channel pakhat, TV nena min thlung bet tlattu chu MTV kha a ni. VJ zei tak tak Danny McGill leh Nonie teho zaizahna hnuaiah khan chilthli tla dawnin kan ka ho mai ṭhin. Chu changkânna khawthlang thlipui chuan, kan vânzâwlah, kan lo la hmelhriat ngai mang loh arsi duhawm tak tak a rawn lên chhuak nawk nawk a, mawi takin a pe uarh a.

Chu’ng rockstar zinga huhâng leh huvâng ngah ber pawl chu, “Pu Liana” kan lo tihfiam ve mai, American hard rock group, “Mr Big” kha an ni âwm e. An puipa, an zaipu ber (lead vocals) chu Eric Martin a ni.

An hla rawn vawrh fuh em em mai chu, "To Be with You" tih kha a ni. A hla remna rimawi a fiah fai fel fak mai a, bass drum, acoustic guitar, leh kut ben kha a ni deuh mai. A satu aw lah chuan ngaih a la-in, ngaihno a bei ngang mai, ngirtling leh rêngchal inkawp leltê hmuam ang vang vang mai kha a ni a. Kar lovah rimawi khawvel hi a siruk la-in an rûn zui ta a.

An hla vawrh leh anmahni vawrhtu hla, "To Be with You" chuan kum 1992 khan khawvel ram 15 -ah pakhatna an hauh vek thei asin. Eric Martin phei chuan, “He hla hi kan passport-a stamp chhutu ber, min tihmingthang a ni,” a ti hial.

An hla kha a lâr êm êm mai a, ṭhalai hawiher zau pangngai tan chuan, Krismas dawna a hla tlar dang engmah hre zui lo pawha, “Feliz Navidad” tih tal thiam a ngai ang deuh khan, a thunawn tlar tawpna tal kha zawm theih ngei ngei tur a ni ringawt. “Charso bis the necks TO BE WITH YOU,” ti talin ("To be with you" tih lai erawh hi chu pâwrpui hle tur a ni thung). Lei chhe chawi phahna tur êm erawh chu a ni lo.

A hla perh thiam hmasa nih pawh kha kan inchhuanpui larh a. Nula rîm kan zir ve tirh lam kha a ni a. An sitting room-a guitar a lo awm kha chuan zâwl-ai-dî min chhawpsakah khan kan ngai a ni thawthâng. Kan hêl lai tleitiri te thinlung ram lâk tum khan, Metallica hla “Nothing Else Matters” emaw, Extreme hla “More Than Words” emaw a nih loh chuan, Mr. Big hla "To Be with You" tih hla remin, an ṭingṭang chu kan han sawngkawlawi kual vel ta ṭhin a.

A guitar solo, bulṭhuta “C sharp minor” hmanga a hrui hmeh ṭhian phei rial rial kha kan in-show off ve-na a ni. A hrui tê ber khawih kiu zeuh zawh chiah a, a hruipui pawh rîk pah a, dâr vei lama ṭingṭang bân kan han puak liam zauh ṭhin te kha a va han nuam tak. Suangtuahna ramah chuan Paul Gilbert kan ni. Kan lênnate leh inleng ve dangte khan min ngaihsan hmêl em, tih thlithlai rûk pah khan kan han meng tâl rulh rulh a, kan hawi vêl pawh kha kan lu chu a lei deuh ṭhin alawm. He hla hi bâwngte palai atan pawh kan hmang ṭangkai narawh e.

“Ngawi teh, Chêmtê, engti ang fakauvin nge a nghaisak che a, min han entir teh. Han ding teh le, duhlai, thinlung hliam chu a hil hunah chuan chuti êm chuan a na thei dawn em ni? He’ng i paltlang hnu hi chuan nunkawng dang daih khua-in a rêlsak dawn che alawm. Tho la, bawihte, inthing harh la, law haw teh. Keimah ngeiin ka han hmuhtir ang che. Ka awkâ aṭang ngei hian hei hi lo hre teh khai.

“I bul hnai chhêna awm ka duh a, chu chu nang pawhin thinlung chhungril taka i thlâkhlelh ve ka beisei. I kawplai dawta belbul hnai hmasa leh bertu che nih inbeiseiin ka nghak fan fan che asin.”

“Waited on a line of greens and blues” tih awmzia te kha mahni tâwk tâwkin ka lo chaiin, ka lo chhui ve ṭhin. Sap ṭawngkauchheh (idiomatic expression) lamah “line of greens and blues” tih hi a awm ngai hranpa ka hre si lo va. A phuahtu rilru hmuh tumin, ka phak ve ang tâwk tâwkin ka luhkhung a. Tlang hring dup (greens) leh van dumpawl ruih (blues) intawnna lai, kâwlkil a sawina a ni thei ang em aw? te ka ti a. Chutah, thlawhna ṭumhmun vela intlarnaa va pelh phei theih chin tur an chhinchhiahna “line” ang hi em ni aw, heta hmehbel tehkhin thu a hmanah hian a sawi, tih te ka ngaihtuah leh a.

Chuta ka thu sirtlûkpui dan ber chu hei hi a ni. Thu leh hla lamah hian rawng chi hrang hrang hian entir a nei thlih thliah a. Rawng sen chu thinrim, rawng eng chu dawihzep, rawng hring chu itsîk/thîk, rawng pâwl chu lungngai/ngui, chuti ang zel chuan. Midang thîk leh îtsîk tak chungin, ngui leh lungngai takin a nghâk, a intlar tihna a ni mahna. Dik maw, dik lo maw, kha kha ka pawm dan chu a ni bur mai. Kan tana par ni lo thliah tuma sakuh ser nghah chu thîkna leh îtsîknaa khah a awl a, lungngaihthlak deuh a ni.

He chhan let loh hmangaihna hla lar tak mai hi Eric Martin hian kum 16 emaw, kum 17 emaw mi vel a nih laia a tleirawl ngaihzâwn em em, Patricia Reynolds a phuahna a ni.

"Ṭhian ṭha tak mai kan ni a. Ka âtchilh ta bur mai a. A hmel a ṭha-in a thluak a ṭha si. A lakah khan dawl zawr takin ka zawr a ni ber mai. Ka duhin ka ngaizawng tak zet a, ani lah chuan ka
ṭhian nih bâk a duh si lo. Mipa a kawp lâwrin, a kuah lâwr phian mai lehnghal. A bialpa nena an inhmuhthiam loh thu leh a rilru nat thute kha min hrilh fo ṭhin. Hmangaihna kha lepchiahna angin a hriat sual pawh a ni mahna. A tan khan pasalṭha huaisen, thuam famkim nena infam at mai nih ka châk a. Ka ṭhian satliah piah lam a nih theih nan chuan eng pawh ka huam a ni, tih lantir tumin he hla hi ka phuah a ni,” a ti. Mahse an tan chu ni ṭha chu a her chhuak ta lo a nih hmel.

He American rock singer Eric Martin hi kan tlangval chhuahpui ve a ni a (kan tlangval chhuah tirha lar chhuak ka tihna, ani chu October 10, 1960-ah vang vang khan a piang), keiniho chhuan tan kha chuan “icon” a tling a ni.

Mr. Big kha chhuantharte dawhkana tuihnai tak maia rock 'n' roll rawn chhawp chhuaktu langsar tak chu an ni ngei chhap mai. "To Be with You" an rawn vawrh hnu rei lo tê-ah "Just Take My Heart" an rawn vawrh chhuak leh ta. A rimawi tumte: Paul Gilbert (guitar), Billy Sheehan (bass guitar), leh Pat Torpey (drums) lah khan mahni chan ṭheuh kha “ka vaibel” tih tlukin an bel vek a, Sawiselbovate an ni ringawt.

MTV-a an zai lo chân ngawt ngawt ringawt zawng a ni ngang lo ve, tiin Cheng 45-in Musicatto dawrah an album “Lean into It” tih chu ka lei ta thlâwt a. Ngaihthlak zawh pawha ngaihthlak leh a ṭul ṭhin miau avang khan ka va han hlûmlêt zing tak em! Chutah hla hlui, Cat Steven-a hla "Wild World" an han sa leh phei kha chu, ka va han sakpui nasa tlauh tlauh tak, a aw a chak tawk lo va, puih a ngaih vang ni hlek lo khan, a aw chak ṭha lutuk khan lo tel ve lo thei lovin min siam zawk a ni.

Chuta ṭang chuan literature lamin min hui nasat tâk em avangin, thu leh hla lamah ka khurbîng zui ta a. Eric Martin leh Mr. Big te nen chuan kawng hran zawhin kan inṭhen ta phawk a. An chanchin hriat mumal ka nei zui ta lo va. Eric Martin-a solo albumho, Mr. Vocalist leh a dangte chu hriat pawh ka hre zui ta lo. Ka thinlungah erawh chuan an thi tak tak thei chuang lo.

Hei eng nge ni ta, kum 20 chuang zet a vei hnuah, Mr. Big-a an khaipa ber Eric Martin chu kan Zoram leilung ngei rapin, kan chhuahtlangah a tualchai dawn an tih thâwm ka hriat tâk ni? Ka mitvai leh ka bengchhe ri chu a ni em lo maw? Ngaihzawng hmasa hun rei tak hnu-a hmu leh tur angah te ka inchan a, ka helhhawlhin ka lai titih mai dawn ka ti.

Tribal Art Center, Tanhril-ah November ni 15 zanah a che dawn a, a hla lar ṭhinho pawh a rawn thlawh thar nual dawn e, an tih chu! Amah ngei hmuh hlân nghâkhlelin ka dâk fân ang a, tlar hring leh dumpawlah chuan ka intlar mai ta lawng! Hmuh awla a awm lai hian a hmuh chi khawp ang le, hei bâk hi chu hmuh leh tur a vang tawh dawn êm mai si a, kan ramah hian.

“So come on, baby, come on over!”