BOMB BAWNRA BER: BÂK BOMB (Japan Ram Chheu phirsi nana U.S. ralthuam vauchher chu!)

Bâk Bomb bul
inṭanna chu Japanese ho­vina December 7, 1941-a Pearl Harbor an bomb ni, ni rapthlak tak, a rapthlak avanga hriat hlawh kumkhua tur an tih a thlen nî chiah kha a ni a.

Khami ni tak khan Pennsylvania ha daktor (dentist) Lytle S. Adams-a chu New Mexico-a Carlsbad Caverns hmuna a âwllên hmang zo, in lam pana a inkhalh haw mêk laiin a radio aṭangin Japanese-hovin bomb hmanga Pearl Harbor an barakhaih thu, thu thinṭhawng tak mai chuan a dêng a. Chu thu a han hriat chuan Adams-a thinur chu a ling ta phat mai a, Japanese-ho chala chil hnawm a, dawl zawra zawrtir dan ngawt mai chu a ngaihtuah ta neuh neuh va.

A ngaihtuahnain kil tin kil tang a fan kual hnu chuan tih dan tur ṭha zet mai a ngaihtuah chhuak ta a.

Bâk rual hi nuai chuang man khawm ila, chu'ng bâkho chu awi mu vek ila an taksaah bomb dah ta vek ila, tichuan Japanese khawpui chung aṭangin a mal malin thlak ta ila . Bâkho chu an tlakna lamah an lo harh ang a, in chhung thim leh puipunna hmuna pakilkar lamah tawm himna zawngin an thlawk darh ngei ang a. Chutah an bomb pai chu a puak ta ang a, kar lovah Japanese khawpui chu mei leh kâta khatin, vutdûrah a chang mai dawn a. Dam khawchhuak an awm tak mial pawhin a dam chhuak chhuna te pawh chu an tlawm lo thei lo vang. tih hi a ni a.

He "theory" pui rep rep tak mai hi tu mi sakechek emaw mai mai ngaihtuah chhuah chu ni se, tu'n barah an khawn lo vang a, chaw tak khûkin an khûkpui hek lo vang. Amaherawhchu a ngaihtuah chhuaktu Adams-a hi pa challang, Tri-State Aviation kut-ke ve ber pakhat ni phak ngat mai, United States President Franklin D. Roosevelt nupui hmingthang Eleanor Roosevelt te nen pawha ṭhian bulṭhu, inngamtlâk tak a lo ni lehzel a.

Adams-a hian a ṭhian nu Eleanor hnenah hian he a ngaihdan hi uluk takin a fah malh malh a, Eleanor-i chuan an Pa US President hnenah chuan thiam takin a'n hrilhchhâwng ve leh sar sar a. A rawtna chu Adams Chuan White House-ah kum 1942, January thla khan a thehlut a, Donald Griffin-a thurawn angin President Roosevelt a pawmpui a ni. Kar lovah U.S. sawrkar chuan tha leh tui, sum leh pai ṭhahnem tak sengsovin Bâk Bomb Beihpui (research) chu an thlak zui ta ngat ngat a ni.

A âtthlak e, in ti thla rawk ang e, a hmantlak tak tak leh tak tak loh pawh finfiah a nih hmain atom chakna ringa bomb siam chuan an lung a lên leh tâk zawk avangin an pamṭul leh ta mai pawh a, a lo chhawrnahawm viau thei tho asin.

Hmana Osama Bin Laden leh a ṭhuihruaite pûka ṭan an khawh avanga beih an hautak em em laite khan he Adams-a bâk bomb hi han ngaihtuah chhuakin han hmang chhin se, bâk chuan pûk lam an pan nghal lo thei si lo va, rei rial lovin helho chu an luhchhuah vek mai lo vang maw?

Kan ṭhian pakhatin hmana changpat bomb siam a tum nen khan a formula hi a inhlat lo ang em aw, ka ti

He Bâk Bomb chanchin hlimawm tak hi chhiar tur ka vai khawm nasa hle nâ a, ka hmu tam lem lo. Bâk bomb siam dan tur duang tur an thlanchhuah zinga tel ve ngei Jack Couffer-ina a ziah "World War II's Other Secret Weapon "(1992, University of Texas Press) tih bu phek 250-a chhah leh Einstein's Refrigerator and Other Stories from the Flip Side of History tih bu Steve Silverman-a ziak hi a râwn tlak ber pawl chu an ni ang. Michael Feista article ziah, "Bats Away! By Joe" tih thupui hmanga American Heritage chanchinbu April/May 1982 (Volume 33, number 3, pages 92- 94) chhuah bakah khawi khawiah emaw chuan hmuh tur a awm leh zauh ṭhin.