Ni Khat Chhung atana US President

America khua leh tui mi pangngai chin tu pawh mai khu an ram president 12na hming han zawt chawt la, a tam zawk chuan an hriat loh thu an hrilh ang che ’ng a, hria nia inngaite ṭhenkhatin “Zachary Taylor” tiin an chhang ang che. Amaherawhchu, a ni chiah em, David Rice Atchison-a kha a ni lo maw? tiin rei tak chu inhnial phawt a ngai ang.

David Rice tu maw ni a? Ni e, US President 12na ti pawha sawi theih mai tur David Rice Atchison-a hming khan ziah leh zir a hlawh zui lo em bawk a, mite’n an hre zui lo a nih pawhin a mawh lo ve.

David Rice Atchison kha August 11, 1807 khan Frogtown (tuna Kirklevington an tih tak), Kentucky-ah alo piang a. Kum 36 mi awrh a nihin Missouri Senator a thi ta aiawh turin Atchison chu United States Senate-ah ruat a ni a. He office hi kum 12 (1843 aṭanga 1855 thleng) a luah nghe nghe.

March 4, 1849 Sunday chawhnu khan President James Knox Polk chu a president nihna aṭanga chawl tura ruahman a ni a. Amaherawhch,u rokhawlhna lian tak a awm ta tlat mai.

President atana an thlan thar Zachary Taylor kha mi sakhaw mi tak mai a lo ni a, Pathian Ni-a thutiam lak chu duh lovin, a tuk Thawhṭan lam nghah thlen law law a duh ta tlat mai. Chuti a nih chuan tunge darkar 24 chhunga President dinhmun chu lo chelh lailawk ta ang le?

America ang ram riang ruang darkar 24 chhung president nei lova an awm chu thil ni thei a ni si lo.

Kaldan phung pangngaiah chuan Vice-President ni lai George M. Dallas kha President ni zui mai tur chu a ni a, amaherawh chu ani term pawh Polk-a rual khan a tawp ve chiah bawk si.

Ram dan hnuaiah chuan President nihna chu Senate-a President Pro Tem kovah a innghat tur a ni a. Chu vang chuan David Rice Atchison, Congress 13na-ina an thlan tlin leh hlim hlawl a lo ni bawk a, darkar 24 chhung US President nihna chu a kovah a innghat ta a nih chu.

Ni khat chhung atan President chan eng thil ropui nge a tih hman ang aw. Atchinson-a kha khami ni khan engnge a tih an zawh chuan a ni chuan, “Kha Chawlhni kha chuan nileng piapin ka mu,” a ti mauh mai. Ni e, khami ni kha American History-ah chun ni pawimawh lo leh chhinchhiahtlak loh ber zinga mi a ni hial ta ve ang. Eng ro pawimawh mah rel a ni lo va, eng thutlukna mah siam a ni hek lo.

Khami ni khan Atchison kha President a ni chiah em tih hi Atchison ngei ngei pawh khan a inhre lo. A nihnaah tak chuan President Pro Tem kha Senate session khat zel atan ruat an ni ṭhin a. Chuvangin, Atchison-a President Pro Tem nihna pawh kha, Senate session thara a thara lakluh leh ni. Mahse, Senate hmasa tawp rual khan a tawp ve nghal tihna a ni a.

Khami Pathian Ni khan Atchison kha US President a ni lo hrim hrim ti an awm a nih pawhin US President 12na chu, a rei lo a rei lo chung pawhin a ni tho tho a la tih theih tho.

A theihna chhan chu sawrkar thar an lakluh ni khan David Rice Atchison-a kha President Pro Tem atan thutiam an laktir hmasak ber a ni a. Thu a tiam zawh chiah, Vice-President thar ni tura Millard Fillmore-a’n thutiam a lak hma si kha chuan President dinhmun chu a luah tihna a ni a, Minute hnih-khat chu US president a ni reng reng mai.

Thu Lakna Hnar
David Rice Atchison, Border Politician by William E. Parrish (1961, University of Missouri Press, pages 81-85)
The People’s Almanac #2 by David Wallechinsky and Irving Wallace (1978, William Morrow and Company, pages 178-179).
The Straight Dope by Cecil Adams (p. 134-35, Ballantine Books, 1984).