ṬAWNGṬAINA HLA ROPUI

Tun ṭum chu khawvela mite thinlung khawihtu ṭawngṭaina thu-chang ropui, ṭha ka tih em em pathum chauh ka han thur chhuak teh ang.

CONFEDERATE SIPAI PAKHAT ṬAWNGṬAINA

America ram tual­chhung indo (American Civil War 1861-1865) indo laia Confederate States of America sipai pakhat indo mual thite ruang an hlawmin, Devil’s Den an tih hmun lar taka an Confederate sipai pakhat ruangah chuan he ṭawngṭaina thu lehkhaa inziak inthlep hi an hmu chhuak a. History-ah chuan he sipai hming hi tarlan a ni lo va, hriat zui a hlawh lem lo. Mahse a ṭawngṭaina hi chuan vawiin thlengin mite thinlungah thu a la sawi a, chakna thahrui a la pe ṭhin a ni. Kan dil leh ngaihtuah aia ṭha zawk min pe ṭhintu Pathian a nihzia a tihchian bakah, Rom 8:26-a: “Chuvângin, Thlarau pawh chuan kan chak lohnaah min pui ṭhîn. Engtia ṭawngṭai tûr nge tih pawh kan hre si lo va. Thlarau chuan rûm sawi hleih theih lohvin min ṭawngṭaisak ṭhîn a ni,” a tih kha a nemnghet viau awm e. Hei le Confederate sipai pakhat ṭawngṭaina chu:

Pathian hnenah chakna ka dil a,
ka lo hlawhtlin theih nan,
Tihbawrhsâwmin ka awm a,
inngaitlawma thu ka awih theih nan.

Hriselna ka dil a,
thil ropui zâwk ka tih theih nan,
Min ti-awngrawp a,
thil ṭha zâwk ka tih theih nan.

Hausakna ka dil a,
ka lo hlim theih nan,
Pachhia-in min siam a,
ka lo fin theih nan.

Thiltihtheihna ka dil a,
mite fak ka hlawh theih nan. Ṭ
Chak lohna min pe a,
Pathian mamawh nachang
ka hriat theih nan.

Thil zawng zawng ka dil a,
hringnun ka hman nawm theih nan.
Nunna min pe a,
thil zawng zawng ka chen theih nan.

Ka dil engmah ka hmu lo va,
Ka beisei engkim ka hmu thung si,
Ka chham chhuah loh ṭawngṭaina
zawng zawng chu,
kei leh kei lovin, chhanin a awm vek a.
Hringfa zawng zingah hian
Malsawmna ropui ber dawng ka va ni êm!
(Lettu Mafaa Hauhnar)

LUNGMUANNA DILA

(Serenity Prayer)

He ṭawngṭaina hla lar tak hi American theologian Reinhold Niebuhr-a phuah a ni a. Niebuhr-a sermon aṭang leh kohhran pawl (church group) hrang hrangte’n an rawn vawrh lar chho va. A hnuah zu ngawlvei, mi pangngai anga lei rem rah leh tuma intelkhawm pawl Alcoholics Anonymous hrang hrangte’n ṭawngṭai hlapui bera an hman zui tâk, khawvel fan chhuaktu a ni:

Pathian, ka thil tihdanglam theih lohte lungdam taka pawm thei turin lungmuanna min pe la;
Ka tihdanglam theih thilte tidanglam ngam turin huaisenna min pe la.
A pahniha danglamna thliar thiam turin finna min pe ang che.
(Lettu Mafaa Hauhnar)

Cherokee Tawngtaina

Cherokee an tih chu Red Indian kan tih mai American Indian-ho an ni a. He an ṭawngṭaina thu inhlanchhawn hian ngaihtuahna a hruaiin, dawn a tisei, thinlung a hnem a ni.

Aw Thlarau Ropui,
engtiklai pawha thuhnuairawlh taka thutak chauh sawi turin min pui la,
mite thusawi laia thinlung inhawng taka beng chhi kar tur te,
thawm reh tlawk tlawk karah hian lungmuanna chhar tur a awm fo tih hre reng tur tein min pui ang che.

(Lettu Mafaa Hauhnar)