TLAI KHAT CHU...

Kum khata hunbi hrang hrang inher chhuak zinga hun nuam leh lunglenthlâk ber pawl, ṭhâl (spring) khaw lum hû chhuah chu keini ang khaw lum ngaithei lo zual chi tan chuan a nuam tâwk chunglam mah a ni tawh a.

Van thiang pâwl kâk thlir pahin, Zoram nipui lo thleng tur urlâwka kawmthlang lama nungcha chiar noh noh leh nunchan zira an han lêng leu vêl chu ngaithla-in ka thlir doh doh a. Vul lai intawng fuh ber mai vaube leh farṭuah te hlei hlei khuan hmun dang melh sawn min harsattir asin.

Khaw lum zualpui tawrh daih nan ka lager beer dah vawh, a vawh luat avanga a thlit chhuahna rial no tung zêt zût pâwn lam pawh thlan hluam mai hi dawmin, bathlâr thlang lamah chuan zothlifim dawn pahin ka ding thlandai mai mai a. Ka lunglêng lutuk chu ka vân ka vân a.

Ka la hre reng khami tlai kha. Lunglênna tlan bosan tuma ka chhuah tâk dâih tlai kha!

Ka inbual fai veng vawng a, Axe Effect (very very sexy!) body spray ka inphuh nam chum chum a, Set Wet hair styling gel-in ka duhthâlin ka chhîpsam chu a van kâwk zâwngin ka han suih zum sung a. Ka kawr Provogue pâwl leh kekawr Denim dum hmanthiam te ka inbel a. Puma pheikhawk pum ka chhuih var vâ vâ a. Ka Samsung smartphone ka taivawn ṭât bawk a. Mahni tâwkah nalh ka intiin, ka lungawi hliah hliah a ni ber.

Duh leh kan kawt kohhran upa fêkfawn chuan a dan pangngaiin, “Aw, châwmhlâwm mai mai si, thah thiang lo ang hrimin a rangkachak khawlaiah a lêng leh ta ziar ziar mai a ni maw!” min lo ti leh mah se eng sarâkah mah ka ngai lo. Ka nun a ni a, ani lo sawi ve tur a awm lo.

Darthlalangah chuan ka han in-en nawn leh thin a, Sapṭawnga “the complete look” an tih ang hi ka ni hawtin ka hria. Tupa fanu duat lai emaw chuan tuarhar min va han ti leh dawn êm, mi û, kan lênna ramah hian!

“Tih tur a awm lo bawk a,” tiin ṭhiante tlawh kual mai mai tumin ka bike, Royal Enfield Bullet 350 chu ka han kapkalak puak thûm ta ṭuk ṭuk a. “Chhei raw kha, nulate u, Romeo Romawia ka lo chhuak e!”

Kan veng ṭhenawma ka vûng vanglai tak chuan cigarrette tlâwn khat chiah ka nei tawh tih ka hre chhuak a. Kawngkam dawr hnai ber kawtah chuan ka ding a, ka chhuk a. Ka inlei fel chuan tlâwn khat chauh zu turin ka’n ding khawmuang a.

Ngaihṭha fahrana meizial ka pak bial talh talh lai chuan, ka dinna epa inchhâwng hnihna veranda-ah chuan nu valai tak, kum 40 bâwr vel tur (nuthlawi ni ngei tur a ni), kawrfual pan angreng tak “cream” rawng, a bân bûl ha hi a lo chhuak hnalh hnalh a.

A lû a su zo hlim ni tur a ni a lû chu “sardarji” lu tuam ang deuh hian towel vârin a tuam a. A âwma a ‘pangkai’ rah te chu a poh lah mai a, a meng vâm hiam mai bawk a. “Sexy” tih thumal ka rilru-a a lo lan changa ka suangtuah ṭhin hi a takah a lo chang a ni ber awm e. Victoria’s Secret Catalogue-a an model hman lo chuangchhuak hlim hlawl emaw tih mai tur a ni a. “Angelte pawh hian thla an lo nei vek kher lo a nih hi,” ka tih phah ta hial a.

Ka beisei phâk loh tawpin chu nu chu ka lamah a lo hawi a, mi a melh vang vang hnu-ah chuan mi a hui ta lauh lauh mai a. Ka mumang a fuh ber ṭum pawha ka man phâk ngai loh a nih avangin ka inringhlel a. “Keimah hi maw?” tih nan keimah leh keimah chu ka han inkâwk a, ani lah chuan nui sâng chungin a lu tuihnai lutuk mai chu a bu nghauh nghauh a.

Chutah zet chuan phûr namen lova phûrin kawng ka kân a, an in lam pan chuan ka tlân phei hlawk hlawk a. Ka va thlen hnaih chuan, “A sir step aṭang khan lo chho rawh,” min lo ti a. Step engzah nge ka rah chhoh pawh ka hre lo, a thlawhin ka thlâwk te pawh a ni mahna.

An kawngkapui ka han thlen chuan a rawn hawng fel ve chiah a. “Min rawn zui rawh,” ti a min hui leh luh phei a rual a. Ka zui lût a, tih chu sawi kher pawh a ngai lo. Ka sosang tawh lutuk kha thâwk pawh ka thaw-in ka hre tawh lo. An mut pindana ka zui luh lai khan ui pa anga ka lei ka chhâk hlui lo kha mak ka inti letling zawk.

An mut pindanah chuan kan han lût ta a. “Lawmna luipui luang lai a chawl e,” tih ang deuh khan ka thisen zâma ka thisen luang lai pawh hi a chawl ṭhupin ka hria.

Pindanah chuan mipa naupang kum 5 mi vel lungawi lo tak mai a, ṭapa lo insût hliam hliam hi ka va hmu a. Chu naupang hnenah chuan, “Bawiha, i ṭah i bân vat loh chuan phûng ka rawn hruai ang ka tih kha i la hria em? Hei phûng chu!” tiin a kutzungchal no sei sâl mai chuan min kawk ta vâ mai a!