MIN AWI - TAWI SI MAWI SIIN!

A chang chuan kan mi lungduhte kan bula an tâp reng lai pawh hian an hla tlat a. A chang leh, hla taka an awm chung pawh hian min chenchilh lawi si ṭhin a nih hi ti rawh u. Chu chu,

“At times, I feel your absence even in your presence

and other times, I feel your presence even in your absence,”

tiin awlsam leh tluangtlam deuhvin a rawn phawrh mai.

Chutah kan duh zawng, ngainat zawng leh tuina te a in-an loh chuan kan inkarah lei khi-chat awm ṭhin a, chu chu a pawi ṭhin.

“It saddens me,

Knowing that I am fluent only in

a language you do not speak,”

a rawn ti leh mai a. A felfaiin a fiah khawp mai.

Heti anga a suangtuahna lêngvâk, mawi leh tawi fel taka hawrawp hmanga lo khung thlarh thlarh thei, Candle Vanrempuii, tleirawl kum 19 mi lek, English literature-a bachelor degree sual chhuak lek lek tawh hi ka lo la hmelhriat ve ngai hauh lo va, hriat hnu-ah erawh hi chuan theihnghilh a har tawh dawn a nih hi!

Amah Candle-i hi, a la naupang deuh bawk a (han ti ve deuh ngial ila) ka lo hre fuh ve lo mai pawh a, a chhungte chu ka lo bel hlawm khawp mai. A pa kha Mizo guitarist-a ka dah san ber pawl, Tribal Power-a an guitarist ṭhin Maitawka a ni a. A papuia, Nono-a lah hla phuah thiam leh musician tha tak a lo ni a. A pu ni se, thu leh hla lama ka puchuam ngawih ngawih, ka ngaihsan bân theih loh, Pu Dengchhuana (Sangzuala Pa) a lo ni lehzel a. An pathum hian, ka ṭhian, ti a ka chhal ngam vek an ni lehnghal. Vaivut min chansan vek tawh mah se, an hriatrengna erawh chu ka thinlungah rangkachak hawrawpin a inziak kulh a, sahbawna silfai mai chi a ni lo vang.

Chu achhapah, a nu Jenny Sailo, zaithiam, “Her chhuak ve se” tih hla rawn thlawh lartu lah high sikula ka pawlpui a lo ni lehzel a. Art lamah a thlahtute an theuneu lo khawp. Chuti a ni chung chuan, Candle-i hian, keimaha literature ngainatna leh tuina tuhtu chu ka pi Vanrami a ni, a ti mauh mai thung.

Candle leh a ṭhiannu Niji (Lalramhluni) chuan lehkhabu phek 77 leka chhah, “Evermore” tih chu hman ni mai khan an chhuah dun a. He lehkhabu-ah hian Candle-i thu leh hla Sapṭawnga a ziah engemaw zat leh Niji thlalak, mit titlai, ngaihtuahna tithui leh dawn tisei tak tak 30 vel khung khawm a ni. Lehkhabu pan tê ni mah se, hlutna lamah chuan chhah ṭha êl âwl tak a ni.

Candle-i kutchhuak hi a tam zawk chu poem tawi tê tê, a ṭhen phei chu tlar khat lek lek te a ni a. Mahse, ngaihtuahna ril leh thûk tak tak a beng muk tlat a, thumal tluangtlam tê tê zei fahranin a chelekin ‘lyrical quality’ a neihtir a, romanticism chu nêm leh hnip takin a bilh tel a, a thu chuktuah dan (syntax) pawh a fuh. Chu chuan thinhnûn hi a zuk nghawr chê a ni. Tlar khat lek sual chhuak tur paw’n ni tam a duh ṭhin ang tih a rinawm tlat.

He lehkhabu thehlep hian Zofate zingah thu leh hla thlipui zawng a thlehtir hauh lo vang tih chu a chiang reng mai. Sapṭawnga ziah a nih bakah, a tam zawkina a tuina kan la pawh phak loh, ngaihhlut nachang pawh kan la hriat em em loh, poems, prose poems leh photography lam a ni a. Chutah bu tlem tê chauh an chhuah lehnghal a (lei tur a awm tawh paw’n ka hre lo). Chhiartu a nei tlem lutuk tur hi a pamhmai ngawt mai.

An ṭhian dun hian tawnhriat chu la nei tam lua lo mah se (kum lamah 20 hnuai lam ve ve an la ni a), talent erawh an nei ṭha ngang mai, tih hi phat rual a ni lo va. Han ui vawih ngawihpui mai mai atan chuan uiawm ka ti a, ka han phawrh a nih hi.

Sawi tawh ang khan Candle-i kutchhuak hi poem tawi, nawi si lo tlar hnih khat lek lek, ngaihtuahna fan raih si a ni tlangpui. Prose poem an tih ang chi (Stay, Nothing like us, Time and space, I am rooted in you, 26) a dah bawk.

Prose poem chu thu angin a lang a, han chhiarin a hla (poetic) thluam mai a. Thu (prose) leh hla (poem) a kâr tawn a ni. Ke khing khat thu-ah a nghat a, a khing lehlam hla-ah. Chuti chuan nghet takin ṭanhmun a rem a ni. Heti ang prose poem hi ziakmi hmingthang tak tak: Pablo Neruda, Octavio Paz, James Wright, Russell Edson, leh midang dang kutchhuakah kan hmu fur a ni.

Tun hnai kum 10 chhung vel hian, bial zim tê-ah mah ni se, Mizo ṭhalai ṭhenkhat zingah English poetry bengkhawn tharna (new awareness) a thleng a. Chu chuan English poetry ziak turin mi engemaw zat kut a tichê a. Candle-i hi chu’ng mite zinga ka mit la pawl tak chu a ni.

A thu leh hla hi hmangaihna, inṭhenna, lunglenna, khawharna, mihring inlaichinna, hlimna, lungngaihna lam hawi a ni hlawm a. Midang va hneh tumna emaw, a ngaihdan midang va barh tumna lam emaw a ni lo va, “notes to myself” tih ang deuhvin, amah leh amah a inbihchianna leh a inluhchhuahna a ni.

Amah leh amah a inhmuh ngam loh chang pawh a awm ni ngei tur a ni:

‘I have fallen in love with you.’

But it’s a secret

I keep.

Even from myself.

Especially from myself,

a ti miau va.

A chang chuan a nun ruak hi, a nihphung leh nunphung nena inmil lo deuh deuh hmanga hnawh khah te pawh a tum ve ṭhin:

There she goes again-

Trying to fill the void in her heart

With people and things

That just won’t fit.

Chutih mek lai chuan, amah thu leh hla-a châwmtu, “You make me think beautiful thoughts” a tih mai hian a rawn tifamkim leh ṭhin a, a nun ruak pawh chu a rawn chhûng khat ṭhin.

“You redefined me

In the light of who you are

And for that reason and that reason alone-

I am whole.”

Uar tûk si lo va thu a uar dan te hi a tâwk ṭhin teu teu a nia. Hmangaihtu nei loh leh hmangaih ni lova inhriat a hlauhzia heti hian a sawi:

“Sleepless nights and moonless skies

Have made me realise

That feeling unloved is my second deepest fear

And

Being unloved is my first.”

A thinlung luahtu a hmuh nasat theihzia a sawi dan te hi a “ti thei” reuh asin. A maimichhin laiin a hmu a, a men laiin a hmu bawk a, a maimichhin leh a men lai inkar rei lo tê-ah pawh zu han hmu cheu pek a:

“I can see him when

I close my eyes

And when

I open them;

and when they’re somewhere between

the closing and the opening.”

A thu leh hla reng reng hi doctor mi zai thiam tak kuthnu ang thlarhin a felfai a ni.

Art lama thükna leh themthiamna hi inthlahchhawn thil te pawh a ni thei tih ka ring ta khawp mai.

Candle, keep on shining!