Ka thiam, ka theih a tlêm mang e!

“Min ngheng la,

i chauh changin,

Ka pui na’ng che,

Pheilai i sâwn

zel nan.”

(Lean On Me)

Natna khumah daw­râwm leh dawldâng, chau leh chak lo takin i tluzal a. Dinhmun khirhkhan takah i ding mek tih ka hria. Mittui pawhina a phawrh chhuah phak loh lungngaihnain min tuam mek lai hian, Katy Perry hla Roar hian, i zepui chiah chiah mai a puan chhuah avangin min hnem teh tlat asin.

Thi leh dam inkârah thên tawn mêk mah ni la, sakei kawlhsen mit i pu a, tlâwm mai lova bei ngat ngat ṭhintu i ni a, harsatna meipui karah pawh i lâm thei ṭhin. Hnehtu i nih miau avangin i háhûm hi kan la hre leh dawn a ni - sakeibaknei háhûm aia ringa i háhûm ri ngei chu!

Thiltihtheihna chungnung neiin, tinrêng damdawi leh thiamna danglam bik kawl ni ila. Tuna i taksa leh i thinlung tinatu natna zawng zawng kha ka tikiang ang a. Mit khap kar lovah ka dawi bo nghal duak mai tur.

I lo pangngai a, i lo dam ṭhat viah theih nan dîm, duh leh duat deuhva pawm vawng vawngin, ka kuah chial che’ng a, thaw i lâk zawngin nangmah uai rittu hrehawmna leh lungngaihna zawng zawng, ṭhal thing hnah angin a ṭil ar ar mai tur!

Pathian hian ka ṭawngṭaina tlawm tê pakhat chauh min tihlawhtlinsak ngei min tiam se la, chu ṭawngṭaina chu i tana dil nan ihê lovin ka hmang nghal ngei ang.

Mahse, thiltihtheihna chungnung, tinreng damdawi leh thiamna danglam bik ka nei lo va, Pathian lah ka duhzawng tihlawhtling tura keia nawmmâka ka phût leh kar hlawhtlin nghal rual a ni si lo. Ama duh danin, ama thu thuin ro a rel a, chu chu keia lo tihdanglamsak mai theih a ni lo tih ka hai bik lo. Ngenngâwl taka ṭahawh a, thuhnuairawlh taka a hnena ka duhna hriattir mai loh chu.

I natna hi hruatthiampui vek thei lo che mah ila, a ṭhen a zar chu ka hmu thiam ve asin.

Hnara hlît phawi ang huaia i thawven a, i lo engthâwl hawk a, i ipikna a kian duak theih nan thiam leh theih ka va nei lo em!

Thinlung erawh chu ka nei ve a, hmangaihna pawh ka nei ve e. Ka hmangaihna che hian i natna zawng zawng chhêm kiangin, a chhandam thei kher lo vang che tih ka hria; mahse, a chhâwk zangkai deuh che-in, i ko a tizâng deuh mahna le!

Ir chuktuahin pawm che ila, i kutah chelh tlat che ila, i na lai theihnghilh ṭhenin, i awm te pawh a nuam deuh mahna le. Kâwm hlim che-in, tinui che ila, nang leh i chunga thil ṭha lo thleng leh i malsawmna dawn zozaite hi i ngaihtuah chhuah phah ang a. Hun rei lo tê tal chu i tuarah vanpui a chim ni a i hriatna pawh a bo mahna le.

Thil dang pe thei lo che mah ila, ka engkim ka pe che a ni tih hi han hmu thiamtir che ila, i mal lohzia i hre chhuak ang a. I chhungte leh ṭhenrual ṭhate’n i kiangah nangmah beihpuia dingin, ṭan an khawh tlat a, baihvaiin an hnutchhiah dawn lo che, tih i hmuthiam mahna le.

I natna hi ka hmangaih bo mai thei lo va. Van dumpawl thiang kûk mai, chhûm dumina a bawh buai reng reng loh leh ni êng nuam tak ka tiam ngawt ngam lo che a. I nun kawnga zawhna tam tak i neihte chhansak che-in, Pathian rorel dana i hriatthiam loh thilte hi ka hrilhfiah thei ngai dawn lo che.

Hei erawh hi chu ka ti thei ang, theihtawp chhuaha ngaihsak che a, ngaihven che a, ngaihtuah che hi. Ka thahrui zawng zawnga enkawl che a, chhawmdawl che a, duat che hi. Ṭanpuitu kut i mamawh chang apiangin ka kut lo phar chhuah zel ka tum ang a, ka koki-a i lu nghah a, ṭah hawm hawm i duh a nih chuan, ngawi renga i tukkhuma dawma i sama chul heuh heuh turin awm ngei ka duh ang.

A chang chuan mi tupawh mai hian, mi tu emaw kan mamawh riau ṭhin, an ti. Mi besawm tur emaw, a ṭul apiang lo ti tur emaw pawh ni hranpa chuang lova, kan kianga lo awm ve tawp a, min ngaihsak a ni tih lantir tur ringawt mi kan mamawh ṭhin. Chuti ang tur chu i duh chuan, hei i tan 24/7 ka awm e.

Pên khat chauh pen leh tur pawha thahrui nei tawh lova i inngaih a, i beiseina zawng zawng a bo hnu a, ruak ngawih ngawiha i inhriat paw’n, kalpui hram hram tur che-in kaihkuah che ka tum ang.

Tidamtu mak tak ka ni lo va, chhandamtu ka ni lo va, Pathian lah ka ni hek lo. I mamawh apiang phuhruksak tur che-in ka intiam thei lo va. Mahse, lungngaihna leh harsatnate hi mahni chauhvin i hmachhawn lo vang tih erawh chu ka tiam a che. I tan chuan buai luat ka nei ngai lo vang. Buaina buan tak pawh tawk ila, i tan chuan hun neih theih dan, remchanna remchang ka zawng zel ang.

I rilru hniam leh hnual tur chawi kangtu nih ka duh, i hlimna chu ka hlimna aiin a thupui zawk si a. I phurrit kha, ka phurrit a ni ve tho tih hmuhtir che ka tum ang. Nangmah hualtu che hlimna leh lawmna inthup zozai leh nangmaha êng chuai thei lo awm i hmuh fiah theih nan, i mit timengtu nih ka duh ang.

Hringnun mawizia hmuhtir che a, nui hmêl puttir tuk tin che ka tum ang a. Chuti chuan engkim mai hi a ṭha chho vek mai dawn tih i hmu ang a, indelhkilhna awm miah lova hmangaih i nih i inhria ang.

Min hmangaih takzet chuan,

I lungngaihna zawng zawngte kha min hlân la,

I hlauhthawnnate kha ka hnenah rawn thlen la,

I phurritte kha ka kovah rawn nghat la,

I manganna te kha thilpek angin mi pe ang che;

I natna te ka thinlunga

ka lo phûm bo vek hunah,

Chutih hunah chauh chuan

Lungmuangin ka châwl thei ang.